Go Latela Mehlaleng ya Batswadi Ba-ka

KA GE GO ANEGA HILDA PADGETT

Pego ya ditaba e balega ka gore, “Bophelo bja-ka bo neetšwe tirelong ya Yo Godimo-dimo, gomme nka se kgone go hlankela marena a mabedi.” Mantšu ao a ke ilego ka a botša balaodi ba British Ministry of Labour and National Service ka 1941 e ile ya ba lebaka la-ka la go gana taelo ya bona ya go dira mošomo wa sepetlele nakong ya Ntwa ya II ya Lefase. Kapejana ka morago ga moo ke ile ka golegwa gomme ka ahlolelwa dikgwedi tše tharo kgolegong ka baka la go gana ga-ka.

KE’NG seo se bego se ntsentše ka gare ga bothata bjo? Aowa, e be e se ka baka la kgopolo ya bofsa goba mokgwa wa borabele. Go e na le moo, mabaka a thomegile morago kua ge ke be ke sa le ngwana.

Phišego ya Tate Bakeng sa Mmušo

Ke belegwe ka June 5, 1914, kua Horsforth kgaufsi le Leeds ka leboa la Engelane. Batswadi ba-ka e lego Atkinson le Pattie Padgett, e be e le barutiši ba sekolo sa Sontaga gape e bile e le ditho tša khwaere Kerekeng ya Primitive Methodist moo tate a bego a bapala okane. Ge ke be ke sa le ngwana, legae lešo e be e le le thabilego ka ntle le selo se tee. Maemo a lefase a be a tshwenya tate. O be a hloile ntwa le bošoro gomme a dumela taelo ya Beibele e rego: “O se kê wa bolaya.”—Ekisodo 20:13.

Ka 1915 mmušo o ile wa kgothaletša masogana ka moka go tsenela bohlabani ka go ithatela, gomme ka tsela yeo e le go phema go ingwadišetša tirelo ya kgapeletšo ya tša bohlabani. Tate o ile a ema letšatši ka moka puleng a letile ka go tshwenyega lebaka la gagwe la go ingwadiša bjalo ka mohlabani. Letšatšing le latelago bophelo bja gagwe ka moka bo ile bja fetoga!

Ge a be a šoma bjalo ka radipompi ntlong e kgolo, o ile a bolela le bašomi ba bangwe mabapi le ditiragalo tša lefase. Radirapana o ile a mo nea pampišana e nyenyane ya Gathering the Lord’s Jewels. Tate o ile a ya le yona gae, a e bala a ba a e badišiša. O ile a re: “Ge e ba seo e le therešo, gona selo le ge e le sefe se sengwe se fošagetše.” Letšatšing le latelago o ile a kgopela tsebišo e oketšegilego, gomme o ile a ithuta Beibele bošego ka moka go fihla dinakong tša mesong ka dibeke tše tharo. O be a tseba gore o be a hweditše therešo! Ka Sontaga sa January 2, 1916, pukutšatši ya gagwe e re: “Ke ile Kerekeng mesong, ka ya go I.B.S.A. [International Bible Students Association (Mokgatlo wa Barutwana ba Beibele ba Ditšhaba-tšhaba), bjalo ka ge Dihlatse tša Jehofa di be di bitšwa bjalo ka nako yeo kua Engelane] bošego—ka ithuta Ba-Hebere 6:9-20—ketelo ya-ka ya pele go banabešo.”

Kapejana kganetšo e ile ya tsoga. Metswalo ya rena le bagwera ba rena ba kerekeng ba ile ba nagana gore tate o be a gafa. Eupša o be a itiretše phetho. O be a phelela diboka le thuto, gomme ka March o ile a bontšha boineelo bja gagwe go Jehofa ka kolobetšo ya meetseng. Ka morago ga dibeke tše sego kae tate a e-ya a nnoši dibokeng, mma o be a kwele go lekane. O ile a mpea ka gare ga phorema ya-ka gomme a sepela dikhilomithara tše seswai go ya Leeds, a fihla feela ge diboka di fela. O ka akanya kamoo tate a ilego a thaba ka gona. Go tloga ka nako yeo go ya pele, lapa lešo le be le kopane tirelong ya Jehofa.

Boemo bja tate bo be bo le thata kudu—e bile moithapi madireng gomme mo e ka bago dibeke tše sego kae feela, ya ba yo a ganago ka baka la letswalo. Ge a bitšwa o ile a gana go swara sethunya, gomme ka July 1916 o ile a lebana le kahlolo ya pele ya tše hlano kgorong ya tša bohlabani, a ahlolelwa matšatši a 90 kgolegong. Ka morago ga ge a feditše kahlolelo ya gagwe ya pele, tate o ile a khutša dibeke tše pedi tšeo di ilego tša latelwa ke kahlolo e nngwe gape ya kgoro ya tša bohlabani, gomme a ahlolelwa matšatši a mangwe gape a 90 ka kgolegong. Ge go golegwa ga gagwe gape ga dikgwedi tše tharo go latela, o ile a išwa Royal Army Medical Corps, gomme ka February 12, 1917, o ile a sesišwa ka sekepe sa madira go ya Rouen, Fora. Pukutšatši ya gagwe e bega gore moo o ile a tenwa kudu ke boemo bja gagwe letšatši le lengwe le le lengwe. O ile a lemoga gore o be a fo hlokomela madira a gobetšego gore a bušetšwe morago ntweng.

Le mo o ile a gana go tšea karolo. Mo nakong ye kgoro ya tša bohlabani e ile ya mo ahlolela nywaga e mehlano kgolegong ya madira a Brithania kua Rouen. Ge tate a be a dutše a kgopela go išwa kgolegong ya setšhaba bjalo ka yo a ganago ka baka la letswalo, o ile a otlwa ka dikgwedi tše tharo, a phela ka senkgwa le meetse tšeo di ilego tša latelwa ke dijo tše di tlwaelegilego tša kgolegong go fihlela a nona; ke moka mokgwa wo ka moka o ile wa bušeletšwa gape. Mosegare diatla tša gagwe di be di bofelelwa ka mokokotlong ka dihaka tša matsogo gomme nakong ya bošego le dinakong tša dijo diatla tša gagwe di be di bofelelwa ka pele. Bophelong bja gagwe ka moka, o ile a ba le mabadi mo matsogong moo dihaka tšeo e bego e le tše dinyenyane kudu di bego di patišitšwe mo nameng ya gagwe, tša feleletša ka dintho tše bohloko. Gape o be a e-na le diketwane tša maoto tšeo di tlemeletšwego lethekeng la gagwe.

Balaodi ba madira ba ile ba dira selo le ge e le sefe seo se lego matleng a bona go senya boikemišetšo bja gagwe bjo tiilego, eupša ba ile ba palelwa. O ile a amogwa Beibele le dipuku tša gagwe. O be a se na mangwalo a tšwago gae, le gona o be sa kgone go a romela. Ka morago ga nywaga e mebedi o ile a dira phetho ya go bontšha potego ya gagwe ka go gana dijo. O ile a tšwela pele ka maikemišetšo a gagwe ka matšatši a šupago, a sa je goba gona go nwa, moo go ilego gwa feleletša ka gore a fetišetšwe sepetleleng sa kgolego, a babja o šoro. O ile a bontšha boikemišetšo bja gagwe gaešita le ge a ile a nyaka go loba bophelo bja gagwe ka baka la se. Nywageng ya ka morago o ile a dumela gore o be a fošitše ka go bea bophelo bja gagwe kotsing ka tsela ye, gomme le ka mohla a ka se ke a dira tiro e bjalo gape.

Ntwa e ile ya fela ka November 1918 tate a sa dutše a le kgolegong kua Rouen, eupša mathomong a ngwaga o latelago o ile a išwa kgolegong ya setšhaba kua Engelane. Nagana kamoo a ilego a thaba ka gona ge a amogela mangwalo le diphuthelwana ka moka tše di tšwago go mma tšeo di bego di kgobokeditšwe, gotee le Beibele ya gagwe e bohlokwa le dipuku! O ile a išwa Kgolegong ya Winchester moo a ilego a kopana le ngwanabo rena yo e sa lego mofsa yoo diphihlelo tša gagwe tša nakong ya ntwa di bego di swana le tša gagwe. Leina la gagwe e be e le Frank Platt, yoo ka morago a ilego a hlankela Bethele ya London ka nywaga e mentši. Ba ile ba dira dithulaganyo tša go kopana letšatšing le le latelago, eupša ka nako yeo Frank o be a išitšwe go gongwe.

Ka April 12, 1919, mma o ile a amogela thelekramo e rego: “Haleluya! Ke tla gae—ke leletša London.” E bile nako e thabišago gakaakang ka morago ga nywaga e meraro ya moleko, teko le karogano! Sa pele seo tate a ilego a se nagana e bile go letša mogala le go kopana le banababo rena ba Bethele ya London. O ile a hwetša kamogelo e lerato kua 34 Craven Terrace. Ka morago ga go hlapa mmele le go beola le go apara sutu le kefa tše adimilwego, tate o ile a boela gae. Na o ka akanya ka lethabo leo le bilego gona ge re boela re kopana? Ka nako yeo ke be ke e-na le nywaga e nyakilego go ba e mehlano, gomme ke be ke se sa mo gopola.

Seboka sa pele seo tate a bilego go sona ka morago ga go lokollwa ga gagwe e bile Segopotšo. Ge a namelela manamelelong a go ya ka holong, motho wa pele yo a ilego a kopana le yena e bile Frank Platt yoo a bego a fetišeditšwe sepetleleng sa madira kua Leeds. A lethabo le lekaakang le ba ilego ba ba le lona ge ba abelana diphihlelo tša bona! Go tloga nakong yeo go ba go fihla go lokollweng ga gagwe, Frank o ile a dira lapa lešo legae la gagwe la bobedi.

Tirelo ya Mma ya Potego

Lebakeng ka moka la ge tate a be a se gona, mma o be a dira modiro wa go hlatswa diaparo go oketša ditseno tša gagwe tše di fokolago go tšwa mmušong. Banababo rena ba be ba le botho kudu go rena. Dibeke tše dingwe le tše dingwe tše sego kae yo mongwe wa bagolo ba phuthego o be a mo amogetša omfolopo e nyenyane yeo e nago le mpho e sa ngwalwago leina la yo e tšwago go yena. Ka mehla mma o ile a bolela gore e bile lerato la banababo rena leo le bego le mmatametša kgaufsi le Jehofa le go mo thuša go kgotlelela dinakong tšeo tše thata ka moka. O be a e-ba gona ka mehla dibokeng tša phuthego nakong ka moka ya ge tate a be a se gona. Teko e šoro kudu go yena e bile ge ka lebaka la go feta ngwaga a be a sa tsebe ge e ba tate a be a sa phela goba a hwile. Go oketša bothateng bjoo, ka 1918 nna gotee le mma re ile ra swarwa ke Kwatama. Batho ba be ba e-hwa ka gohle go re dikologa. Baagišani bao ba ilego ba ya go thuša baagišani ba bona ba ile ba swarwa ke bolwetši gomme ba hwa. Ga go na pelaelo gore tlhaelelo ya dijo nakong yeo e ile ya thuša go fokotša matla a mebele ya batho go itweleng go fetelweng ke malwetši.

Mantšu a moapostola Petro a itlhatsetše e le a therešo gakaakang go lapa lešo: “Lena ba xo tlaišêxa ka lebakanyana, . . . [Modimo] ó tlo Le thêkxa; ó tlo Le tiiša”! (1 Petro 5:10) Go tlaišega ga batswadi ba-ka go ba thušitše go hlagolela tumelo e sa šišinyegego go Jehofa, kholofelo e feletšego ya gore o a re hlokomela le gore ga go seo se ka re aroganyago le lerato la Modimo. E bile tšhegofatšo e kgethegilego go nna go hwetša kgodišo e bjalo ya go godišetšwa tumelong.—Ba-Roma 8:38, 39; 1 Petro 5:7.

Tirelo ya Bofseng

Ka morago ga go lokollwa ga tate, tirelo ya Mmušo e ile ya fetoga selo se bohlokwa maphelong a rena. Le ka mohla ga ke gopole re sa be gona sebokeng ka ntle le ge re be re babja. Kapejana ka morago ga ge a boile gae, tate o ile a rekiša khamera ya gagwe ya go ntšhetša diswantšho godimo ga poleiti le leseka la mma la gauta gore re hwetše tšhelete ya go ya kopanong. Le ge re be re sa kgone go ba le dinako tša maikhutšo, le ka mohla ga se ra ka ra lahlegelwa ke dikopano tše, go akaretša le tša kua London.

Nywaga e mebedi goba e meraro ka morago ga ntwa, go bile le dinako tše lapološago. Tate le mma ba ile ba ikhola ka botlalo ka dibaka ka moka tša go thabela bogwera le go ba gotee. Ke sa gopola kamoo re bego re etela banababo rena ba bangwe le dikgaetšedi, gomme nna bjalo ka ngwanenyana yo monyenyane, ke be ke dula gomme ke penta le go thala diswantšho mola batho ba bagolo ba boledišana ka ga kwešišo e mpsha ya therešo. Go boledišana, go opela gotee ba dikaneditše okane le go thabela bogwera bjo bobotse, go be go ba thabiša kudu le go ba lapološa.

Batswadi ba-ka ba be ba tiile kudu tlwaetšong ya-ka. Kua sekolong ke be ke le yo a fapanego, gaešita le ge ke be ke e-na le nywaga e mehlano ke be tšea “Testamente e Mpsha” bakeng sa go e bala ge klase e ithuta katikasema. Ka morago ke ile ka bontšhwa pele ga sekolo ka moka bjalo ka “yo a ganago ka baka la letswalo” ka ge ke be ke sa tšee karolo meletlong ya Letšatši la Bagale.a Ga ke itshole ka baka la tsela ye ke godišitšwego ka yona. Ge e le gabotse, e bile tšhireletšo gomme e dirile gore go be bonolo go tšwela pele ‘tseleng e tshesane.’ Kae le kae moo batswadi ba-ka ba bego be e-ya gona, dibokeng goba tirelong, ke be ke e-ba gona.—Mateo 7:13, 14.

Ke sa gopola kudu-kudu mesong ya Sontaga seo ge ke thoma go dira boboledi ke nnoši ka lekga la pele. Ke be ke e-na le nywaga e 12 feela. Ge ke sa le mahlalagading, ke gopola ke tsebiša mesong e mengwe ya Sontaga gore ke be ke e-ya go dula ka gae. Ga go le yo a ilego a ntshola goba a nkgapeletša go tšwa, ka gona ke ile ka dula ka serapaneng ka ithuta Beibele ya-ka gomme ke ikwa ke sa thaba le gatee. Ka morago ga beke goba tše pedi ke dira se, ke ile ka re go tate: “Ke nagana gore ke tla sepela le wena mesong ye!” Go tloga nakong yeo go ya pele ga se ka ka ka gadima morago.

Ngwaga wa 1931 e bile o thabišago gakaakang! Ga se feela gore re ile ra amogela leina la rena le lefsa la Dihlatse tša Jehofa, eupša ke ile ka kolobetšwa ge re le kopanong ya setšhaba kua Alexandra Palace, London. Nka se lebale letšatši leo. Re be re apere dikobo tše ditelele tše diso, gomme yeo ke ilego ka e apara go ile gwa direga gore e be e kolobilego yeo e bego e šetše e dirišitšwe ke yo mongwe yo a bego a kolobetšwa!

Maikemišetšo a-ka ka mehla bjalo ka ngwana e be e le go ba mmapatši wa dipuku tša bodumedi, bjalo ka ge baboledi ba nako e tletšego ba be ba tsebja bjalo nakong yeo. Ge ke dutše ke gola, ke ile ka ikwa gore ke swanetše go dira mo go oketšegilego tirelong ya Jehofa. Ka gona ka March 1933, ge ke e-na le nywaga e 18, ke ile ka tlatša sehlopha sa bahlanka ba nako e tletšego.

Selo seo se ilego sa re thabiša ka mo go kgethegilego e bile “Dibeke tša Babulamadibogo” metseng e itšego e megolo, ge bahlanka ba nako e tletšego ba ba fihlago go lesome-pedi ba be ba kopana gotee gomme ba dula le banababo rena ba lefelong leo, gomme ba šoma bjalo ka sehlopha. Re ile ra iša dipukwana go baetapele ba bodumedi le go banna ba bangwe ba tumilego. Go ba batamela go be go nyaka sebete. Gantši re be re amogelwa ka lenyatšo, gomme bontši bja rena re be re bethantšhetšwa mabati mahlong. Ga se gore se se be se re tshwenya, ka gobane phišego ya rena e be e le e kgolo moo re bego re thabišwa ke go gobošwa bakeng sa leina la Kriste.—Mateo 5:11, 12.

Kua Leeds re ile ra fetola phorema, paesekele ya maotwana a mararo le sethuthuthu sa tate le koloyana e kgomagantšwego le sethuthutu, gomme ka morago ya ba koloi ya gagwe bakeng sa go rwala metšhene ya dikeramafomo. Banababo rena ba babedi ba be ba e-ya setarateng le metšhene, ba bapala direkoto tša mmino bakeng sa go lemoša batho le go ba hlohleletša gore ba tle mejakong ya bona, ke moka se se latelwe ke polelo ya metsotso e mehlano e gatišitšwego ke Ngwanabo rena Rutherford. Ka morago ga moo ba be ba fetela setarateng se sengwe mola rena bagoeledi re latela gomme ra aba dipuku tša Beibele.

Ka nywaga e mentši, mantšiboa a mangwe le a mangwe a Sontaga ka morago ga seboka, re be re e-ya Town Hall Square moo go bego go e-na e Sekhutlo sa Seboledi gomme re thekga ka go theetša e nngwe ya dipolelo tša botelele bja iri tša Ngwanabo rena Rutherford, re aba dipampišana le go ikopanya le motho le ge e le ofe yo a bontšhitšego kgahlego. Re ile ra thoma go tsebja kudu moo. Gaešita le maphodisa a be a re hlompha. Mantšiboeng a mangwe re be re kopane bjalo ka tlwaelo ge kua kgojana, re e-kwa modumo wa meropa le sehlopha sa mmino. Kapejana molokeloke wa ma-Fasi a ka bago a lekgolo o ile wa tla o theoša le tsela. Ba ile ba gwanta ba dikologa ka morago ga rena gomme ba ema ba phagamišetša difolaga tša bona godimo. Sehlopha sa mmino se ile sa emiša gomme gwa re tuu gabotsana ka nako yeo lentšu la Ngwanabo rena Rutherford le bego le duma: “Ba leseng ba dumediše difolaga tša bona le go bolela gore phološo ya bona e tšwa go batho ge e ba ba rata. Re tla rapela le go bolela gore phološo e tšwa feela go Jehofa Modimo wa rena!” Re ile ra fo ipotšiša gore ke’ng seo se bego se tla direga ka mo go latelago! Ga go se se ilego sa direga, ka ntle le gore ba ile ba hwetša bohlatse bjo bobotse, gomme maphodisa a ile a ba dira gore ba homole e le gore re ka kgona go kwa polelo ka moka ya phatlalatša.

Mo nakong ye keramafomo e be e thomile go dirišwa go re thuša go nea bohlatse bjo bogolo. Mo mejakong, re ile ra dula re tsepeletše ka kelohloko rekotong bakeng sa go kgothaletša batho go theetša ka metsotso e mehlano e tletšego therong e gatišitšwego ya Beibele. Gantši beng ba dintlo ba be ba re amogela, gomme ba thabela gore re boe gape gomme re bapale direkoto tše oketšegilego.

Ngwaga wa 1939 e bile wa go swarega kudu le o thata, ka go phulega ga kganetšo le bošoro. Pele ga e nngwe ya dikopano tša rena, banababo rena ba ile ba lebana le dihlopha tša bahlola-mpherefere le megoo ya setarateng e sego kae kudu. Ka gona nakong ya kopano, ba ile ba dira dithulaganyo tša gore sehlopha se kgethegilego sa banababo rena sa dikoloi se yo dira boboledi mafelong a dikhuduego mola dikgaetšedi le banababo rena ba bangwe ba ile ba ya moo go bego go šireletšegile. Ge ke be ke šoma le sehlopha setarateng se sengwe, ke ile ka theoga le mokgoba bakeng sa go etela dintlo tše di lego ka morago. Ge ke sa le ka ntlong, ke ile ka kwa go thoma mpherefere—go be go goeletšwa e bile go hlabja mekgoši setarateng. Ke ile ka fo tšwela pele ke boledišana le motho ka ntlong, ka lelefatša poledišano go fihlela ke e-kwa gore dilo di boetše sekeng. Ke moka ke ile ka rotoga le mokgoba le go tšwela ka ntle ga mokgoba setarateng gomme ka hwetša gore banabešo ba bangwe le dikgaetšedi ba be ba tšhogile ge ba be ba sa kgone go nkhwetša! Lega go le bjalo, ka morago mosegare bahlola-mpherefere ba ile ba leka go šitiša seboka sa rena, eupša ba ile ba ntšhetšwa ka ntle ke banababo rena.

Ntwa ya II ya Lefase e a Hlasela

Mo nakong ye go ngwadišwa ka kgapeletšo go be go tšwela pele, gomme bontši bja banababo rena ba bafsa bo ile bja golegwa go tloga go dikgwedi tše 3 go ya go tše 12. Tate ka nako yeo o ile a hwetša tokelo e oketšegilego ya go etela banababo rena ka kgolegong. Sontaga se sengwe le se sengwe o be a swara Thuto ya Morokami ka kgolegong ya lefelong leo. Mantšiboa a Laboraro o be a etela banababo rena ka diseleng tša bona. Ka ge a bile le phihlelo e bjalo e telele le e thata ya go ba kgolegong yena ka noši nakong ya ntwa ya pele ya lefase, o ile a thabela kudu go hlankela bao ba fetago ditekong tše swanago. O ile a dira se ka nywaga e 20, go fihla lehung la gagwe ka 1959.

Ka 1941 re be re thoma go tlwaela bošoro le bonaba bjoo batho ba bantši ba ilego ba bo bontšha mabapi le boemo bja rena bja go se tšee lehlakore. Go be go se bonolo go ema ditarateng ka dimakasine gomme wa lebana le se. Ka nako e swanago, re ile ra thabela go thuša bafaladi bao ba bego ba amogetšwe tikologong ya rena. Ma-Latvia, Mapoliši, ma-Estonia le Majeremane—e bile lethabo le lekaakang go bona difahlego tša bona di ela ka lethabo ge ba bona Morokami goba Consolation (yeo ga bjale e lego Phafoga!) ka leleme la gabo bona!

Ka morago ke ile ka tlelwa ke teko ka baka la boema-gare bjoo ke ilego ka bo tšea nakong ya Ntwa ya II ya Lefase. Ka ge ke be ke tswalelelwa ka seleng ya-ka ka diiri tše 19 go tše dingwe le tše dingwe tše 24, ke ile ka hwetša bophelo bja kgolegong bo le thata. Matšatši a pele a mararo a ile a ba thata kudu ka ge ke be ke nnoši. Letšatšing la bone, ke ile ka biletšwa ofising ya mmušiši moo ke ilego ka hwetša banenyana ba bangwe ba babedi ba eme. Yo mongwe wa banenyana o ile a ntshebela a re: “Ke ka baka la’ng o le mo?” Ke ile ka re: “O tla makala ge o ka tseba.” O ile a botšiša ka go seba ka go tšhoga: “Ke wena le-JW?” Ngwanenyana yo mongwe o ile a mo kwa gomme a re botšiša ka bobedi a re: “Na le ma-JW?” gomme ka boraro bja rena re ile ra gokarelana ka matsogo. Re be re se sa hlwa re le tee!

Tirelo e Thabišago ya Nako e Tletšego

Ge ke lokolotšwe kgolegong, ke ile ka tšwetša pele tirelo ya-ka ya nako e tletšego, gomme ngwanenyana wa nywaga e 16 yoo a bego a sa tšwa go tlogela sekolo o ile a ntlatša. Re ile ra khudugela Ilkley, toropo e botse mollwaneng wa Yorkshire Dales. Re ile ra leka ka thata go hwetša lefelo le loketšego bakeng sa diboka tša rena ka dikgwedi tše tletšego tše tshelelago. Mafelelong re ile ra hira karatšhe yeo re ilego ra e fetola gore e be Holo ya Mmušo. Tate o ile a re thuša, a re thuša ka mabone le seruthetši. Gape o ile a re kgabišetša moago. Diphuthego tša kgaufsi di ile tša re thekga ka nywaga e mentši, di abela banababo rena beke e nngwe le e nngwe go re nea dipolelo tša phatlalatša. Ka tšhegofatšo ya Jehofa re ile ra atlega le go oketšega, gomme mafelelong phuthego e ile ya hlongwa.

Ka January ya 1959, tate o ile a babja ka tšhoganetšo. Ke ile ka bitšwa gae, gomme o ile a hwa ka April. Nywaga yeo e ilego ya latela e bile e thata. Mma le yena o ile a thoma go se ipshine mmeleng gotee le go lahlegelwa ke kgopolo, e lego seo se ilego sa dira gore ke be bothateng. Eupša moya wa Jehofa o ile wa nthekga, gomme ke ile ka kgona go mo hlokomela go ba go fihla lehung la gagwe ka 1963.

Ke bile le ditšhegofatšo tše dintši go tšwa go Jehofa go theoša le nywaga. Ke tše dintši kudu go ka di bala. Ke bone phuthego ya gešo e gola gomme e arolwa gane, e romela bagoeledi le babulamadibogo ntle, ba bangwe bjalo ka baromiwa dinageng tša kgole tše bjalo ka Bolivia, Laos le Uganda. Tebelelo ya lenyalo le go ba le lapa le ka mohla ga se ya ka ya kgonega. Se ga se sa ka sa ntira gore ke nyame; ke be ke dula ke swaregile kudu. Gaešita le ge ke se na metswalo ya nama, ke na le bana ba bantši le ditlogolo Moreneng gaešita le ba balwago ga lekgolo.—Mareka 10:29, 30.

Ke fela ke laletša babulamadibogo ba bafsa gotee le bafsa ba bangwe legaeng la-ka bakeng sa go thabela bogwera bja Bokriste. Re lokišeletša Thuto ya Morokami gotee. Re bile re laodiša diphihlelo le go opela dikopelo tša Mmušo go etša ge batswadi ba-ka ba be ba tlwaetše go dira. Ge ke dikologilwe ke sehlopha se se thabilego sa bafsa, ke dula ke e-na le ponagalo ya bofsa le ya lethabo. Ga go na bophelo bjo bokaone go nna go feta tirelo ya bobulamadibogo. Ke leboga Jehofa ge ke bile le tokelo ya go latela mehlaleng ya batswadi ba-ka. Thapelo ya-ka ke gore eka nka tšwela pele ke hlankela Jehofa go ya go ile.

[Mongwalo wa tlase]

[Seswantšho go letlakala 23]

Hilda Padgett le batswadi ba gagwe, Atkinson le Pattie

[Seswantšho go letlakala 23]

Pampišana yeo e ilego ya tutuetša kgahlego ya tate therešong