“Ngwako wa Thapelo wa Ditšhaba ka Moka”
“A ga go a ngwalwa gore: Ngwako wa-ka o tlo bitšwa ngwako wa thapelo wa ditšhaba ka moka?”—MAREKA 11:17, PK.
1. Adama le Efa ba ile ba thabela tswalano ya mohuta mang le Modimo mathomong?
GE Adama le Efa ba be ba bopša, ba ile ba thabela tswalano ya kgaufsi le Tatago bona wa legodimong. Jehofa Modimo o ile a boledišana le bona gomme a hlalosa morero wa gagwe o kgahlišago ka moloko wa batho. Ruri, ba be ba tutueletšega gantši go tšhollela Jehofa theto ka baka la mediro ya gagwe e tlabago ya tlholo. Ge Adama le Efa ba be ba nyaka tlhahlo ge ba be ba dutše ba naganišiša ka karolo ya bona e le tate le mma ba nakong e tlago ba lapa la motho, ba be ba ka ya go Modimo ba le lefelong le ge e le lefe legaeng la bona la Paradeise. Ba be ba sa nyake ditirelo tša moperisita tempeleng.—Genesi 1:28.
2. Go bile le phetogo efe ge Adama le Efa ba be ba dirile sebe?
2 Boemo bo ile bja fetoga ge morongwa wa lerabele a be a fekeeletša Efa go nagana gore boemo bja gagwe bophelong bo be bo tla kaonefala ge a be a ka gana bogoši bja Jehofa, a bolela gore o be a tla “ba byalo ka Modimo.” Ka go rialo, Efa o ile a ja seenywa sa sehlare seo Modimo a bego a se ileditše. Ka gona, Sathane o ile a diriša Efa go leka monna wa gagwe. Ka manyami, Adama o ile a theetša mosadi wa gagwe yo a nago le sebe, a bontšha gore o be a lebelela tswalano ya gagwe le yena e le ya bohlokwa kudu go feta tswalano ya gagwe le Modimo. (Genesi 3:4-7) Ge e le gabotse, Adama le Efa ba ile ba kgetha Sathane e le modimo wa bona.—Bapiša le 2 Ba-Korinthe 4:4.
3. Mafelelo a mabe a borabele bja Adama le Efa e bile afe?
3 Ka go dira bjalo, batho ba babedi ba pele ga se ba lahlegelwa feela ke tswalano ya bona e bohlokwa-hlokwa le Modimo, eupša ba ile ba lahlegelwa le ke tebelelo ya go phela ka mo go sa felego paradeiseng ya lefaseng. (Genesi 2:16, 17) Mebele ya bona ya sebe mafelelong e ile ya fokola go fihlela ba e-hwa. Bana ba bona ba ile ba abela boemo bjo bja sebe. Beibele e hlalosa gore: “Ké xôna, . . . lehu le aparetše batho bohle.”—Ba-Roma 5:12.
4. Modimo o ile a nea batho ba sebe kholofelo efe?
4 Go be go nyakega selo se sengwe bakeng sa go boelanya batho ba sebe le Mmopi wa bona yo mokgethwa. Ge a be a ahlolela Adama le Efa, Modimo o ile a nea bana ba bona ba nakong e tlago kholofelo ka go holofetša “peu” e bego e tla phološa batho mafelelong a borabele bja Sathane. (Genesi 3:15) Ka morago, Modimo o ile a utolla gore Peu ya tšhegofatšo e be e tla tla ka Aborahama. (Genesi 22:18) A naganne ka morero wo o lerato, Modimo o ile a kgetha ditlogolo tša Aborahama e lego ba-Isiraele gore e be setšhaba sa gagwe se se kgethilwego.
5. Ke ka baka la’ng re swanetše go kgahlegela ditaba ka botlalo tša kgwerano ya Molao ya Modimo le Isiraele?
5 Ka 1513 B.C.E., ba-Isiraele ba ile ba tsena tswalanong ya kgwerano le Modimo gomme ba dumela gore ba tla kwa melao ya gagwe. Kgwerano yeo ya Molao e swanetše go ba e kgahlišago bohle ba ba nyakago go rapela Modimo lehono ka gobane e be e šupa go Peu e holofeditšwego. Paulo o boletše gore e be e le “moriti fêla wa tše di tl’o xo tla.” (Ba-Hebere 10:1) Ge Paulo a be a bolela taba ye o be a ahla-ahla tirelo ya baperisita ba Isiraele tabarenakeleng e šuthišwago, goba tenteng ya borapedi. E be e bitšwa “tempele ya Jehofa” goba ‘ngwako wa Jehofa.’ (1 Samuele 1:9, 24, PK) Ka go hlahloba tirelo e kgethwa e bego e dirwa ngwakong wa Jehofa wa lefaseng, re ka lemoga ka mo go tletšego kudu thulaganyo ya kgaugelo yeo go yona batho ba sebe ba ka boelanywago le Modimo lehono.
Sekgethwa-kgethwa
6. Ke’ng seo se bego se beilwe ka Sekgethwa-kgethweng, gona go ba gona ga Modimo go be go emetšwe bjang moo?
6 Beibele e re: “Yo-xodimo-dimo xa a dule mo xo tše di dirilwexo ka diatla.” (Ditiro 7:48) Lega go le bjalo, go ba gona ga Modimo ka ngwakong wa gagwe wa lefaseng go be go emelwa ke leru le le bego le le ka phapošing ya ka gare-gare e bitšwago Sekgethwa-kgethwa. (Lefitiko 16:2, NW) Go molaleng gore leru le le be le phadima kudu, le nea Sekgethwa-kgethwa seetša. Le be le le ka godimo ga polokelo e kgethwa e bitšwago “areka ya bohlatse,” yeo e bego e e-na le diphaphathi tša mafsika tšeo go tšona go ngwadilwego e mengwe ya melao yeo Modimo a e neilego Isiraele. Godimo ga sekhurumelo sa Areka go be go e-na le bakerubi ba babedi ba gauta ba nago le diphego tše di phurolotšwego, bao ba bego ba emela dibopiwa tša moya tše di lego boemong bjo bo phagamego mokgatlong wa Modimo wa legodimong. Leru la mohlolo la seetša le be le le ka godimo ga sekhurumelo gare ga bakerubi. (Ekisodo 25:22, PK) Se se be se swantšhetša Modimo Ra-matla-ohle a dutše sedulong sa bogoši godimo ga koloi ya legodimong e thekgilwego ke bakerubi ba phelago. (1 Koronika 28:18) E hlalosa lebaka leo ka lona Kgoši Hiskia a ilego a rapela ka gore: “Morêna Modimo wa Isiraele, Kokama-Bakerube.”—Jesaya 37:16.
Sekgethwa
7. Go be go e-na le dithoto dife ka Sekgethweng?
7 Phapoši ya bobedi ya tabarenakele e be e bitšwa Sekgethwa. Ka gare ga karolo ye go ya ka go le letshadi la mojako go be go eme sehloma-pone se sebotse sa dikala tše šupago gomme ka go le letona e le tafola ya senkgwa-ponwa. Kua pele go be go eme aletare yeo go yona monkgo o bose wa diorelo tše di fišwago o bego o rotogela godimo. E be e le pele ga seširo seo se bego se arola Sekgethwa go Sekgethwa-kgethwa.
8. Baperisita ba be ba phetha mediro efe ka mehla ka Sekgethweng?
8 Mesong e mengwe le e mengwe le mantšiboeng a mangwe le a mangwe, moperisita o be a swanelwa ke go tsena tabarenakeleng gomme a fiše diorelo aletareng ya diorelo. (Ekisodo 30:7, 8) Mesong ge diorelo di be di e-fsa, mabone a šupago a bego a le godimo ga sehloma-pone sa gauta a be a swanetše go tlatšwa ka oli. Mantšiboa mabone a be a thumašwa gore a hlabiše seetša ka Sekgethweng. Ka Sabatha e nngwe le e nngwe moperisita o be a swanelwa ke go bea dinkgwa tše 12 tše difsa tafoleng ya senkgwa-ponwa.—Lefitiko 24:4-8.
Lapa
9. Morero wa sebjana sa meetse e be e le ofe, gona re ka ithuta thuto efe go se?
9 Tabarenakele e be e bile e e-na le lapa le le ageleditšwego ke legora la mašela a tente. Ka lapeng le go be go e-na le sebjana se segolo seo baperisita ba bego ba hlapela diatla tša bona le maoto ka go sona pele ba tsena ka Sekgethweng. Ba be ba bile ba swanelwa ke go hlapa pele ba dira dihlabelo aletareng e bego e le ka lapeng. (Ekisodo 30:18-21) Molao wo wa bohlweki ke kgopotšo e matla go bahlanka ba Modimo lehono ya gore ba swanetše go kgomarela go seka mmeleng, boitshwarong, monaganong le moyeng ge e ba ba nyaka gore borapedi bja bona bo amogelwe ke Modimo. (2 Ba-Korinthe 7:1) Mafelelong dikgong tša mollo wa aletareng gotee le meetse a sebjana di be di tlišwa ke makgoba a tempeleng ao e sego ba-Isiraele.—Jošua 9:27.
10. Tše dingwe tša dibego tše di bego di neelwa aletareng ya dihlabelo ke dife?
10 Mesong e mengwe le e mengwe le mantšiboeng a mangwe le a mangwe, kgapa e nyenyane ya sehlabelo e be e fišwa aletareng gotee le sebego sa dijo le dino. (Ekisodo 29:38-41) Dihlabelo tše dingwe di be di dirwa ka matšatši a kgethegilego. Ka dinako tše dingwe sehlabelo se be se swanelwa ke go dirwa ka baka la sebe se itšego sa motho. (Lefitiko 5:5, 6) Ka dinako tše dingwe mo-Isiraele o be a ka neela sehlabelo sa go ithapa sa seleboga seo dikarolo tša sona di jewago ke baperisita le ke motho yo a dirago sebego. Se se be se bontšha gore badira-dibe bao e lego batho ba be ba ka ba le khutšo le Modimo, ba thabela dijo le yena ka tsela ya seswantšhetšo. Gaešita le modiiledi e be e ka ba morapedi wa Jehofa gomme a ba le tokelo ya go neela dibego tša go ithapa ngwakong wa Gagwe. Eupša e le gore Jehofa a bontšhwe tlhompho e swanetšego, baperisita ba be ba ka amogela feela dibego tše e lego tše kaone-kaone. Bupi bja dibego tša dijo e be e swanetše go ba bjo bo šitšwego gabotse kudu gomme diphoofolo tša dihlabelo e be e swanetše go ba tše di se nago bosodi le ge e le bofe.—Lefitiko 2:1; 22:18-20; Maleaki 1:6-8.
11. (a) Go be go dirwa’ng ka madi a dihlabelo tša diphoofolo, gona se se be se šupa go eng? (b) Pono ya Modimo ka madi a batho le a diphoofolo ke efe?
11 Madi a dihlabelo tše a ile a tlišwa aletareng. Se se be se dira e le kgopotšo ya letšatši le letšatši go setšhaba ya gore e be e le badira-dibe ba nyakago molopolodi yoo madi a gagwe a tšholotšwego a bego a tla fedišetša dibe tša bona sa ruri gomme a ba phološa lehung. (Ba-Roma 7:24, 25; Ba-Galatia 3:24; bapiša le Ba-Hebere 10:3.) Gape, go dirišwa mo go go kgethwa ga madi go be go gopotša ba-Isiraele gore madi a emela bophelo le gore bophelo ke bja Modimo. Go dirišwa le ge e le gofe mo gongwe ga madi ke batho go be go ileditšwe ka mehla ke Modimo.—Genesi 9:4; Lefitiko 17:10-12; Ditiro 15:28, 29.
Letšatši la Poelano
12, 13. (a) Letšatši la Poelano e be e le eng? (b) Moperisita yo mogolo o be a swanelwa ke go dira’ng pele a tliša madi ka Sekgethwa-kgethweng?
12 Gatee ka ngwaga ka seo se bego se bitšwa Letšatši la Poelano, setšhaba sa Isiraele ka moka go akaretša le badiiledi ba ba bego ba rapela Jehofa se be se swanetše go tlogela modiro ka moka gomme se ikone dijo. (Lefitiko 16:29, 30) Ka letšatši le le bohlokwa, setšhaba se be se hlwekišwa sebe ka tsela ya seswantšhetšo e le gore se thabele ditswalano tša khutšo le Modimo ka ngwaga o mongwe. Anke re akanyeng ka boemo gomme re nagane ka ditiragalo tše dingwe tša bohlokwa.
13 Moperisita yo mogolo o ka lapeng la tabarenakele. Ge a hlapile ka sebjaneng sa meetse, o bolaya poo ya sehlabelo. Madi a poo a tšhollelwa ka sebjaneng; a tla dirišwa ka tsela e kgethegilego bakeng sa go fediša dibe tša moloko wa boperisita wa Lefi. (Lefitiko 16:4, 6, 11) Eupša go na le selo se sengwe seo moperisita yo mogolo a swanetšego go se dira pele a e-ya bokgoleng le ge e le bofe ka sehlabelo. O tšea seorelo se se nkgago bose (mohlomongwe a se tšhela ka gare ga morufsi) gomme a gokola magala a hwibitšego aletareng a a tšhela ka gare ga sebjana sa gauta sa mollo. Bjale o tsena ka Sekgethweng gomme o sepela a lebile seširong sa Sekgethwa-kgethwa. O dikologa le seširo ka go nanya gomme o ema pele ga areka ya kgwerano. Se se latelago, o tšhela diorelo godimo ga magala a tukago a sa bonwe ke motho le ge e le ofe yo mongwe gomme Sekgethwa-kgethwa se tlala leru le nkgago bose.—Lefitiko 16:12, 13.
14. Ke ka baka la’ng moperisita yo mogolo a be a swanelwa ke go tsena ka Sekgethwa-kgethweng ka madi a diphoofolo tše pedi tše di sa swanego?
14 Bjale Modimo o ikemišeditše go bontšha kgaugelo le go boelanywa ka tsela ya seswantšhetšo. Ka baka le sekhurumelo sa Areka se be se bitšwa “sedulo sa kgaugelo” goba “sekhurumêlô sa poêlanô.” (Ba-Hebere 9:5, bapiša le mongwalo wa ka tlase wa NW.) Moperisita yo mogolo o tšwa ka Sekgethwa-kgethweng, o tšea madi a poo gomme o tsena ka Sekgethwa-kgethweng gape. Bjalo ka ge go be go laetšwe Molaong, o ena monwana wa gagwe ka gare ga madi gomme a a fokela ga šupa pele ga sekhurumelo sa Areka. (Lefitiko 16:14) Se se latelago o boela ka lapeng gomme o bolaya pudi yeo e lego sebego sa dibe ‘sa setšhaba.’ O tliša a mangwe a madi a pudi ka Sekgethwa-kgethweng gomme a dira ka ona kamoo a dirilego ka gona ka madi a poo. (Lefitiko 16:15) Ditirelo tše dingwe tša bohlokwa le tšona di be di direga ka Letšatši la Poelano. Ka mohlala, moperisita yo mogolo o be a swanelwa ke go bea diatla tša gagwe godimo ga hlogo ya pudi ya bobedi gomme a bolele go yona “melato . . . ya Ba-Isiraele.” Ka gona pudi ye e phelago e be e tla gapelwa lešokeng gore e tloše dibe tša setšhaba ka kgopolo ya seswantšhetšo. Poelano e be e dirwa ka mokgwa wo ngwageng o mongwe le o mongwe e direlwa “baperisita ka moka, le sethšaba ka moka sa phuthêxô.”—Lefitiko 16:16, 21, 22, 33.
15. (a) Tempele ya Salomo e be e swana bjang le tabarenakele? (b) Puku ya Ba-Hebere e re’ng ka tirelo e kgethwa e bego e dirwa ka tabarenakeleng le ka tempeleng?
15 Nywageng e 486 ya mathomo ya histori ya Isiraele e le batho ba kgwerano ya Modimo, tabarenakele e šuthišwago e be e dira e le lefelo la bona la borapedi bja Modimo wa bona Jehofa. Ka morago Salomo wa Isiraele o ile a newa tokelo ya go aga moago wa sa ruri. Gaešita le ge tempele ye e be e swanetše go ba e kgolo le e botse kudu, polane e neilwego ke Modimo e be e le ya sebopego se swanago le sa tabarenakele. Go swana le tabarenakele, e be e swantšhetša thulaganyo e kgolwanyane le e atlegago kudu ya borapedi yeo Jehofa a bego a tla e ‘hloma, e sego motho.’—Ba-Hebere 8:2, 5; 9:9, 11.
Tempele ya Pele le ya Bobedi
16. (a) Ke kgopelo efe e lerato yeo Salomo a ilego a e dira ge a be a neela tempele? (b) Jehofa o ile a bontšha bjang go amogela ga gagwe thapelo ya Salomo?
16 Ge a be a neela tempele yeo ya letago, Salomo o ile a akaretša kgopelo ye e buduletšwego: “Le moeng e sexo wa sethšaba sé sa xaxo sa Isiraele, mo-tšwa-kxolê a tlaxo ka ’baka la ’ina la xaxo . . . xe a ka tla a rapêla à le Ngwakong wó, O kwê Ò le xodimong, Ò le bodulong bya xaxo byo bo tiilexo, O dirê se se kxopêlwaxo ke moeng, xore ’thšaba tšohle tša lefase di tsebê Leina la xaxo, di Xo boifê byalo ka sethšaba sé sa xaxo sa Isiraele, ba tsebê xore mo Ngwakong wo ke o axilexo, xo bolwa Leina la xaxo.” (2 Koronika 6:32, 33) Ka tsela e lego molaleng, Modimo o ile a bontšha go amogela ga gagwe thapelo ya Salomo ya go neela. Mollo o ile wa wa o e-tšwa legodimong, wa latswa dihlabelo tša diphoofolo tše di bego di le godimo ga aletare gomme letago la Jehofa la tlala ka tempeleng.—2 Koronika 7:1-3.
17. Ke’ng seo se ilego sa direga mafelelong ka tempele e agilwego ke Salomo, gona ka baka la’ng?
17 Ka manyami, ba-Isiraele ba ile ba lahlegelwa ke poifo ya bona e botse ya go boifa Jehofa. Ge nako e dutše e e-ya, ba ile ba goboša leina la gagwe le legolo ka ditiro tša bona tša go tšholla madi, borapedi bja medimo ya diswantšho, bohlotlolo, go ba le dikopano tša botona le botshadi le wa leloko gotee le ka go swara ditšhiwana, bahlologadi le batšwa-ntle gampe. (Hesekiele 22:2, 3, 7, 11, 12, 26, 29) Ka go rialo, ka ngwaga wa 607 B.C.E. Modimo o ile a phetha kahlolo ka go tliša madira a Babele gore a fediše tempele. Ba-Isiraele ba ba phologilego ba ile ba išwa bothopša Babele.
18. Tempeleng ya bobedi, ke ditokelo dife tšeo di ilego tša bulegela banna ba bangwe bao e bego e se ba-Isiraele, bao ba bego ba thekga borapedi bja Jehofa ka pelo ka moka?
18 Ka morago ga nywaga e 70 mašaledi a sokologilego a ba-Juda a ile a boela Jerusalema gomme a newa tokelo ya go aga tempele ya Jehofa lefsa. Ka mo go kgahlišago, go be go hlaela baperisita le ba-Lefi gore ba hlankele ka tempeleng ye ya bobedi. Ka baka leo, ba-Nethinimi bao e bego e le ditlogolo tša bahlanka ba tempeleng bao e bego e se ba-Isiraele ba ile ba newa ditokelo tše kgolwanyane e le bahlankedi ba ngwako wa Modimo. Lega go le bjalo, le ka mohla ga se ba ka ba lekana le baperisita le ba-Lefi.—Esera 7:24; 8:17, 20.
19. Modimo o ile a holofetša’ng mabapi le tempele ya bobedi, gona mantšu a a ile a phethega bjang?
19 Mathomong go ile gwa bonala eka tempele ya bobedi e be e tla phalwa ke ya pele. (Hagai 2:3) Eupša Jehofa o ile a holofetša gore: “Le dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô. . . . Letaxô la Ntlo yé e tlo ba le lexolo, le le fetišaxo lela la ya kxalê.” (Hagai 2:7, 9) Ka go phethagatša mantšu a, tempele ya bobedi e ile ya ba le letago le legolwanyane. E ile ya swarelela nywaga e 164 go feta ya pele gomme barapedi ba bangwe ba bantši ba tšwago dinageng tše dintši kudu ba ile ba kgeregela malapeng a yona. (Bapiša le Ditiro 2:5-11.) Go mpshafatšwa ga tempele ya bobedi go ile gwa thoma mehleng ya Kgoši Herode gomme malapa a yona a katološwa. E phagame lefsikeng le legolo le ikadilego e bile e dikologilwe ke mathudi a mabotse, e be e feta tempele ya mathomo e agilwego ke Salomo ka botse. E be e e-na le lapa le legolo la ka ntle bakeng sa batho ba ditšhaba bao ba bego ba nyaka go rapela Jehofa. Lepheko la lefsika le be le arola Lapa le la Ba-ntle go malapa a ka gare a bego a boloketšwe ba-Isiraele feela.
20. (a) Ke phapano efe e kgahlišago e ilego ya swaya tempele e agilwego lefsa? (b) Ke’ng seo se ilego sa bontšha gore ba-Juda ba be ba lebelela tempele ka tsela e fošagetšego, gona Jesu o ile a dira’ng ge a be a arabela go se?
20 Tempele ye ya bobedi e bile e fapanego kudu ka ge Morwa wa Modimo Jesu Kriste a ile a ruta ka malapeng a yona. Eupša go swana le tempele ya pele, ba-Juda ka kakaretšo ba be ba se na pono e swanetšego ya tokelo ya bona ya go ba bahlokomedi ba ngwako wa Modimo. Ee, ba ile ba ba ba dumelela bagwebi gore ba gwebe ka lapeng la Ba-ntle. Godimo ga moo, batho ba be ba dumelelwa go diriša tempele e le lefelo la go kgabola ge ba be ba iša dilo Jerusalema ka moka. Matšatši a mane pele ga lehu la gagwe, Jesu o ile a hlwekiša mekgwa e bjalo ya boiphedišo tempeleng ge a be a dutše a bolela gore: “A ga go a ngwalwa gore: Ngwako wa-ka o tla bitšwa ngwako wa thapelo wa ditšhaba ka moka? eupša lena le o dirile legolo la bahlakodi.”—Mareka 11:15-17, PK.
Modimo o Lahlela Ngwako wa Gagwe wa Lefaseng sa Ruri
21. Jesu o ile a bontšha’ng mabapi le tempele ya Jerusalema?
21 Ka baka la mogato wa Jesu wa sebete wa go phagamiša borapedi bjo bo sekilego bja Modimo, baetapele ba bodumedi ba ba-Juda ba be ba ikemišeditše go mmolaya. (Mareka 11:18) A tseba gore o be a tla tloga a bolawa, Jesu o ile a botša baetapele ba bodumedi ba ba-Juda gore: “Ngwakô wa lena o tlo Le tloxêlêlwa è le lešope.” (Mateo 23:37, 38) O bontšhitše moo gore Modimo o be a tla tloga a se sa amogela sebopego sa borapedi se se bego se dirišwa ka tempeleng ya seswantšhetšo ya Jerusalema. E be e ka se sa hlwa e e-ba “ngwako wa thapelo wa ditšhaba ka moka.” Ge barutiwa ba gagwe ba be ba bontšha Jesu meago e megolo ya tempele o itše: “A xa Le di bône dilô tšé ka moka? Rrui, . . . felô fá xa xo lefsika le le tl’o xo leswa lè le xodimo xa le lengwê le s’a šuthišwa.”—Mateo 24:1, 2.
22. (a) Mantšu a Jesu mabapi le tempele a ile a phethagatšwa bjang? (b) Go e na le go thea dikholofelo tša bona motseng wa lefaseng, Bakriste ba pele ba ile ba tsoma’ng?
22 Boporofeta bja Jesu bo ile bja phethagala nywageng e 37 ka morago ka ngwaga wa 70 C.E. ge madira a Roma a be a fediša Jerusalema le tempele ya yona. Seo se ile sa nea bohlatse bjo bo tlabago kudu bja gore ka kgonthe Modimo o be a tlogetše ngwako wa gagwe wa seswantšhetšo. Le ka mohla Jesu ga se a ka a bolela e sa le pele ka go agwa lefsa ga tempele e nngwe Jerusalema. Moapostola Paulo o ngwaletše Bakriste ba ba-Hebere mabapi le motse woo wa lefaseng gore: “Xobane mono xa re na motse wo o tiilexo; re nyaka wo o tl’o xo tla.” (Ba-Hebere 13:14) Bakriste ba pele ba be ba fagahletše go ba karolo ya “Jerusalêma wa lexodimong”—Mmušo o swanago le motse wa Modimo. (Ba-Hebere 12:22) Ka gona, borapedi bja therešo bja Jehofa ga bo sa theilwe tempeleng ya kgonthe ya lefaseng. Sehlogong sa rena se se latelago re tla ahla-ahla thulaganyo e phagamego yeo Modimo a e hlometšego bohle ba ba kganyogago go mo rapela “ka môya le ka xo rereša.”—Johane 4:21, 24.
Dipotšišo tša Tlhahlobo
◻ Adama le Efa ba ile ba lahlegelwa ke tswalano efe le Modimo?
◻ Ke ka baka la’ng dikarolo tša tabarenakele di swanetše go re kgahliša?
◻ Re ithuta’ng ka mediro ya ka lapeng la tabarenakele?
◻ Ke ka baka la’ng Modimo a ile a dumelela tempele ya gagwe gore e fedišwe?
[Seswantšho go letlakala 10, 11]
TEMPELE E AGILWEGO LEFSA KE HERODE
1. Sekgethwa-kgethwa
2. Sekgethwa
3. Aletare ya Sebego se se Fišwago
4. Mogopo wa Lewatle le le Tološitšwego
5. Lapa la Baperisita
6. Lapa la Isiraele
7. Lapa la Basadi