Tempele ya Jehofa e Kgolo ya Moya

“Rè na le Moperisita e moxolo e mokaakaa, . . . Yêna Molaki wa yôna Ntlo-kxêthwa ya makxonthe ye e hlomilwexo ke Modimo, e sa kaxo ya hlôngwa ke motho.”—BA-HEBERE 8:1, 2.

1. Ke tokišetšo efe e lerato yeo Modimo a e diretšego batho ba sebe?

KA BAKA la lerato la gagwe le legolo la go rata batho, Jehofa Modimo o lokišeditše sehlabelo sa go tloša dibe tša lefase. (Johane 1:29; 3:16) Se ile sa nyaka gore a fetišetše bophelo bja Morwa wa gagwe wa leitšibulo go tloga legodimong go ya popelong ya kgarebe ya mo-Juda e bitšwago Maria. Morongwa wa Jehofa o ile a hlalosetša Maria ka mo go kwalago gore ngwana yo a bego a tla mo ima o be a tla bitšwa ‘yo mokgethwa, Morwa wa Modimo.’ (Luka 1:34, 35, PK) Josefa yo a bego a beeleditše Maria o ile a botšwa ka mokgwa wa mohlolo wa go ingwa ga Jesu gomme a lemoga gore yo o be a tla “phološa sethšaba sa xaxwe dibeng tša sôna.”—Mateo 1:20, 21.

2. Jesu o ile a dira’ng ge a be a e-na le nywaga e ka bago 30, gona ka baka la’ng?

² Ge Jesu a be a dutše a gola, o swanetše go ba a ile a kwešiša tše dingwe tša ditherešo tše mabapi le matswalo a gagwe a mohlolo. O be a tseba gore Tatagwe wa legodimong o be a e-na le modiro wa go phološa bophelo wo a bego a nyaka gore a o dire lefaseng. Ka gona, ge e be e le monna yo a ipheditšego wa nywaga e ka bago 30, Jesu o ile a tla go moporofeta wa Modimo Johane gore a kolobetšwe Nokeng ya Jorodane.—Mareka 1:9; Luka 3:23.

3. (a) Jesu o be a bolela’ng ka mantšu a rego, “Xa O kxahlwe ke [dihlabelo] le dibexô”? (b) Ke mohlala ofe o mobotse kudu woo Jesu a o beetšego bohle ba nyakago go ba barutiwa ba gagwe?

³ Jesu o be a rapela nakong ya ge a kolobetšwa. (Luka 3:21) Go molaleng gore go tloga mo nakong ye go ya pele, o ile a phethagatša mantšu a Psalme 40:6-8 go etša ge moapostola Paulo a ile a bontšha ka morago gore: “Xa O kxahlwe ke [dihlabelo, NW] le dibexô; se o nthakxetšexo sôna ké mmele.” (Ba-Hebere 10:5) Ka gona Jesu o bontšhitše go lemoga ga gagwe gore Modimo “xa [a] kxahlwe” ke gore dihlabelo tša diphoofolo di tšwele pele di dirwa tempeleng ya Jerusalema. Go e na le moo, o ile a lemoga gore Modimo o be a mo lokišeditše mmele o phethagetšego wa motho, e lego Jesu gore a o neele e le sehlabelo. Se se be se tla tloša go nyakega le ge e le gofe mo gongwe ga dihlabelo tša diphoofolo. A bontšha kganyogo ya gagwe e tšwago pelong ya go ikokobeletša thato ya Modimo, Jesu o ile a tšwela pele go rapela ka gore: “Ké Nna é, ke a tla, Modimo; ke dira tše di Xo kxahlaxo; matlakaleng a puku xo ngwadilwe tše di ntebanexo.” (Ba-Hebere 10:7) Ke mohlala o mobotse gakaakang wa sebete le boineelo bjo bo se nago boithati wo Jesu a o beilego letšatšing leo bakeng sa bohle bao ka morago e bego e tla ba barutiwa ba gagwe!—Mareka 8:34.

4. Modimo o bontšhitše bjang go amogela ga gagwe go ikgafa ga Jesu?

⁴ Na Modimo o ile a bontšha go amogela thapelo ya Jesu ya kolobetšo? Anke yo mongwe wa baapostola ba kgethilwego ba Jesu a re nee karabo: “Ya re xe Jesu a kolobeditšwe, à e-tšwa meetseng, xwa napa xwa bulêxa lexodimo, ’me a bôna Môya wa Modimo ò theoxa byalo ka leeba, ò e-tla xodimo xa xaxwe. Xwa tloxa xò kwala lentšu le le tšwaxo lexodimong lè re: Yêna-yó ké Yêna Morwa-moratwa wa-ka, yo ke kxahlwaxo ke Yêna.”—Mateo 3:16, 17; Luka 3:21, 22.

5. Ke’ng se se bego se swantšhetšwa ke aletare ya kgonthe ya tempele?

⁵ Go amogela ga Modimo go tlišwa ga mmele wa Jesu e le sehlabelo go be go bolela gore ka kgopolo ya moya, aletare e fetago yeo e bego e le ka tempeleng ya Jerusalema ka bogolo e be e tšweletše. Aletare ya kgonthe yeo diphoofolo di bego di dirwa dihlabelo go yona e be e swantšhetša aletare yeo ya moya, yeo ge e le gabotse e bego e le e “kxahlaxo” Modimo goba thulaganyo ya go amogela bophelo bja Jesu bja motho e le sehlabelo. (Ba-Hebere 10:10) Ke ka baka leo moapostola Paulo a bego a ka ngwalela Bakriste-gotee le yena gore: “Re na le aletare ya rena, ye ba ba hlankêlaxo Ntlo-kxêthwa [goba tempeleng] yela ba se naxo tokêlô ya xo ja tše di tšwaxo mo xo yôna.” (Ba-Hebere 13:10) Ka mantšu a mangwe, Bakriste ba therešo ba holwa ke sehlabelo se phagamego sa go tloša dibe seo bontši bja baperisita ba ba-Juda ba se gannego.

6. (a) Ke’ng seo se tšweletšego nakong ya ge Jesu a kolobetšwa? (b) Sereto se se rego Mesia goba Kriste se bolela’ng?

⁶ Go tlotšwa ga Jesu ka moya o mokgethwa go be go bolela gore bjale Modimo o be a tšweleditše thulaganyo ya gagwe ka moka ya tempele ya moya, Jesu a hlankela e le Moperisita yo Mogolo. (Ditiro 10:38; Ba-Hebere 5:5) Morutiwa Luka o ile a budulelwa gore a šupe ngwaga wa tiragalo ye e bohlokwa e le “ngwaxa wa lesome la metšô e fetšaxo seatla wa boxoši bya Kesara Tiberio.” (Luka 3:1-3) Seo se dumelelana le ngwaga wa 29 C.E.—e lego dibeke tše 69 tlwaa tša ngwaga goba nywaga e 483 go tloga nakong yeo Kgoši Arithasasitha a ntšhitšego taelo ya gore maboto a Jerusalema a agwe lefsa. (Nehemia 2:1, 5-8) Go ya ka boporofeta, “Motlotšwa Mo-êta-pele” o be a tla tšwelela ka ngwaga woo o swailwego. (Daniele 9:25) Go molaleng gore ba-Juda ba bantši ba be ba lemoga se. Luka o bega gore “sethšaba se be se dutše sè holofetše” go tšwelela ga Mesia goba Kriste, e lego direto tšeo di tšwago mantšung a Sehebere le Segerika a nago le tlhaloso e swanago ya “yo a tloditšwego.”—Luka 3:15.

7. (a) Modimo o tloditše neng “Sekxêthwa-kxêthwa,” gona se se ile sa bolela’ng? (b) Ke’ng se sengwe seo se ilego sa diragalela Jesu nakong ya ge a kolobetšwa?

⁷ Nakong ya ge Jesu a kolobetšwa, bodulo bja Modimo bja legodimong bo ile bja tlotšwa goba bja beelwa ka thoko e le “Sekxêthwa-kxêthwa” thulaganyong e kgolo ya tempele ya moya. (Daniele 9:24) “Ntlo-kxêthwa [goba tempele] ya makxonthe ye e hlomilwexo ke Modimo, e sa kaxo ya hlôngwa ke motho” e be e thomile go šoma. (Ba-Hebere 8:2) Gape, ka go kolobetšwa ga gagwe ka meetse le moya o mokgethwa, motho Jesu Kriste o ile a tswalwa lefsa e le Morwa wa moya wa Modimo. (Bapiša le Johane 3:3.) Se se be se bolela gore Modimo ka nako e swanetšego o be a tla biletša Morwa wa gagwe gape bophelong bja legodimong moo a bego a tla hlankela ka letsogong le letona la Tatagwe e le Kgoši le Moperisita yo Mogolo “wa neng le neng ka mokxwa wa Melekitsedeke.”—Ba-Hebere 6:20; Psalme 110:1, 4.

Sekgethwa-kgethwa sa Legodimong

8. Ke dibopego dife tše difsa tšeo sedulo sa Modimo sa bogoši bjale se ilego sa ba le tšona legodimong?

⁸ Letšatšing leo Jesu a kolobeditšwego ka lona, sedulo sa Modimo sa bogoši sa legodimong se ile sa ba le dibopego tše difsa. Go hlaolwa ga sehlabelo se se phethagetšego sa motho bakeng sa go tloša dibe tša lefase go ile gwa gatelela bokgethwa bja Modimo ge bo bapišwa le go ba ga motho le sebe. Kgaugelo ya Modimo le yona e ile ya gatelelwa ka kgopolo ya gore bjale o be a bontšhitše go ikemišetša ga gagwe go phophothelwa goba go boelanywa. Ka go rialo, sedulo sa Modimo sa bogoši legodimong se be se le bjalo ka karolo ya ka gare-gare ya tempele moo moperisita yo mogolo a bego a tsena gatee ka ngwaga ka madi a phoofolo bakeng sa go tloša sebe ka tsela ya seswantšhetšo.

9. (a) Seširo sa magareng ga Sekgethwa le Sekgethwa-kgethwa se be se swantšhetša’ng? (b) Jesu o phuleleditše bjang seširo sa tempele ya Modimo ya moya?

⁹ Seširo seo se bego se arola Sekgethwa go Sekgethwa-kgethwa se be se swantšhetša mmele wa Jesu wa nama. (Ba-Hebere 10:19, 20) E be e le lepheko leo le bego le thibela Jesu go tsena moo Tatagwe a lego gona ge e be e sa le motho lefaseng. (1 Ba-Korinthe 15:50) Nakong ya lehu la Jesu, “sešireletšô sa Ngwakong wa Modimo sè [ile sa] xaxoxa xo tloxa xodimo xo iša fase sa tšwa diripa tše pedi.” (Mateo 27:51) Se se ile sa bontšha ka mo go tlabago gore lepheko le le bego le thibela Jesu go tsena legodimong bjale le be le tlošitšwe. Matšatši a mararo ka morago Jehofa Modimo o ile a dira mohlolo o tlabago kudu. O ile a tsoša Jesu bahung, e sego e le motho yo a hwago wa nama le madi eupša e le sebopiwa sa letago sa moya ‘se se dulago se le gona neng le neng.’ (Ba-Hebere 7:24) Matšatšing a 40 ka morago Jesu o ile a rotogela legodimong gomme a tsena ‘Sekgethwa-kgethweng’ sa kgonthe, a “bônala pele xa sefahloxô sa Modimo ka ’baka la rena.”—Ba-Hebere 9:24.

10. (a) Go ile gwa direga’ng ka morago ga ge Jesu a tlišitše mohola wa sehlabelo sa gagwe go Tatagwe wa legodimong? (b) Go tlotšwa ka moya o mokgethwa go ile gwa bolela’ng bakeng sa barutiwa ba Kriste?

¹⁰ Na Modimo o ile a amogela mohola wa madi a Jesu a tšholotšwego e le a tlošago dibe tša lefase? Ka kgonthe o ile a o amogela. Bohlatse bja se bo ile bja tla matšatšing a 50 tlwaa ka morago ga tsogo ya Jesu letšatšing la monyanya wa Pentekoste. Moya o mokgethwa wa Modimo o ile wa tšhollelwa go barutiwa ba 120 ba Jesu bao ba bego ba bokane Jerusalema. (Ditiro 2:1, 4, 33) Go swana le Moperisita wa bona yo Mogolo Jesu Kriste, bjale ba ile ba tlotšwa gore ba hlankele e le “boperisita byo bokxêthwa, . . . xo tliša [dihlabelo] tša môya” ka tlase ga thulaganyo e kgolo ya Modimo ya tempele ya moya. (1 Petro 2:5) Go feta moo, batlotšwa ba ba ile ba bopa setšhaba se sefsa, e lego “sethšaba se sekxêthwa” sa Modimo sa Isiraele ya moya. Go tloga bjale go ya pele diporofeto ka moka tša dilo tše botse mabapi le Isiraele, tše bjalo ka kholofetšo ya “kxwêranô e mphsa” e begilwego go Jeremia 31:31 di be di tla šoma go phuthego e tloditšwego ya Bokriste, e lego “Ba-Isiraele ba Modimo” ba kgonthe.—1 Petro 2:9; Ba-Galatia 6:16.

Dibopego tše Dingwe tša Tempele ya Modimo ya Moya

11, 12. (a) Ke’ng se se bego se swantšhetšwa ke lapa la baperisita tabeng ya Jesu, gona le swantšhetša’ng tabeng ya balatedi ba gagwe ba tloditšwego? (b) Sebjana sa meetse se swantšhetša’ng, gona se dirišwa bjang?

¹¹ Gaešita le ge Sekgethwa-kgethwa se be se swantšhetša ‘legodimo ka bolona’ moo Modimo a dutšego sedulong sa bogoši, dibopego tše dingwe ka moka tša tempele ya Modimo ya moya di tswalana le dilo tše di lego lefaseng. (Ba-Hebere 9:24, NW) Tempeleng ya Jerusalema go be go e-na le lapa la ka gare-gare la baperisita, le le bego le e-na le aletare ya dihlabelo le sebjana se segolo sa meetse ao baperisita ba bego ba a dirišetša go itlhwekiša pele ba phetha tirelo e kgethwa. Dilo tše di swantšhetša’ng thulaganyong ya Modimo ya tempele ya moya?

¹² Tabeng ya Jesu Kriste, lapa la ka gare-gare la baperisita le be le swantšhetša boemo bja gagwe bja go hloka sebe e le Morwa wa Modimo yo a phethagetšego yo e lego motho. Ka go dumela sehlabelong sa Jesu, balatedi ba tloditšwego ba Kriste ba balelwa go loka. Ka go rialo, Modimo a ka dirišana le bona ka mo go swanetšego bjalo ka ge eka ga ba na sebe. (Ba-Roma 5:1; 8:1, 33) Ka gona, lapa le le bile le swantšhetša boemo bjo batho ba bo baletšwego bja go loka bjoo ditho ka se tee ka se tee tša boperisita bjo bokgethwa di nago le bjona pele ga Modimo. Ka nako e swanago, Bakriste ba tloditšwego e sa dutše e le ba sa phethagalago e bile ba ka dira sebe. Sebjana sa meetse se se lego ka lapeng se swantšhetša Lentšu la Modimo leo Moperisita yo Mogolo a le dirišetšago go hlwekiša boperisita bjo bokgethwa ka go se kgaotše. Ka go ikokobeletša mogato wo wa go hlwekiša, ba hweditše ponagalo ya seriti e godišago Modimo le go gogela ba lego ka ntle borapeding bja gagwe bjo bo sekilego.—Ba-Efeso 5:25, 26; bapiša le Maleaki 3:1-3.

Sekgethwa

13, 14. (a) Sekgethwa sa tempele se swantšhetša’ng tabeng ya Jesu le balatedi ba gagwe ba tloditšwego? (b) Sehloma-pone sa gauta se swantšhetša’ng?

¹³ Karolo ya mathomo ya tempele e swantšhetša boemo bjo bo phagametšego bja lapa. Tabeng ya motho yo a phethagetšego Jesu Kriste, e swantšhetša go tswalwa ga gagwe lefsa e le Morwa wa moya wa Modimo yo a reretšwego go boela bophelong bja legodimong. Ka morago ga ge ba boletšwe e le ba lokilego motheong wa tumelo ya bona mading a Kriste a tšholotšwego, balatedi ba ba tloditšwego le bona moya wo wa Modimo o šoma go bona ka mo go kgethegilego. (Ba-Roma 8:14-17) Ka “meetse [ke gore, kolobetšo ya bona] le ka Môya,” ba “tswalwa lefsa” e le barwa ba moya ba Modimo. Ka ge ba le bjalo, ba na le kholofelo ya go tsošetšwa bophelong bja legodimong e le barwa ba moya ba Modimo ge feela ba ka dula ba botega go fihla lehung.—Johane 3:5, 7; Kutollo 2:10.

¹⁴ Baperisita ba bego ba hlankela ka gare ga Sekgethwa sa tempele ya lefaseng ba be ba sa bonwe ke barapedi ba lego ka ntle. Ka mo go swanago, Bakriste ba tloditšwego ba boemong bja moya bjoo bontši bja barapedi ba Modimo bao kholofelo ya bona e lego ya go phela ka mo go sa felego lefaseng la paradeise ba se nago bjona e bile ba sa bo kwešišego. Sehloma-pone sa gauta sa tabarenakele se swantšhetša boemo bjo bo sedimošeditšwego bja Bakriste ba tloditšwego. Go šoma ga moya o mokgethwa wa Modimo bjalo ka oli e lego ka gare ga mabone go hlabiša seetša Beibeleng. Kwešišo yeo Bakriste ba e hwetšago ka baka la se ga ba timane ka yona. Go e na le moo, ba kwa Jesu yo a itšego: “Lena Le seetša sa lefase. . . . Le sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.”—Mateo 5:14, 16.

15. Ke’ng se se swantšhetšwago ke senkgwa se se lego tafoleng ya senkgwa-ponwa?

¹⁵ Gore ba dule ba le boemong bjo bjo bo sedimošeditšwego, Bakriste ba tloditšwego ba swanetše go iphepa ka mehla ka se se swantšheditšwego ke senkgwa se se lego tafoleng ya senkgwa-ponwa. Mothopo wa bona o mogolo wa dijo tša moya ke Lentšu la Modimo leo ba katanelago go le bala le go naganišiša ka lona letšatši le letšatši. Jesu o ile a holofetša le go ba lokišetša “dijô ka lebaka la xôna” ka “molaki [wa gagwe] e a bôtêxaxo yo bohlale.” (Mateo 24:45) “Molaki” yo ke sehlopha ka moka sa Bakriste ba tloditšwego ba lego lefaseng ka nako le ge e le efe e kgethilwego. Kriste o dirišitše sehlopha se se tloditšwego bakeng sa go phatlalatša tsebišo mabapi le go phethagala ga diporofeto tša Beibele le go nea tlhahlo e lego nakong ka go dirišwa ga melao ya motheo ya Beibele bophelong bja letšatši le letšatši bja mehleng yeno. Ka gona, Bakriste ba tloditšwego ba iphepa ka tebogo ka ditokišetšo tše bjalo ka moka tša moya. Eupša go thekgwa ga maphelo a bona a moya go ithekgile ka se se fetago go tsenya tsebo ya go tseba Modimo menaganong le dipelong tša bona. Jesu o itše: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” (Johane 4:34) Ka mo go swanago, Bakriste ba tloditšwego ba kgotsofatšwa ke go katanela go dira thato e utolotšwego ya Modimo letšatši le letšatši.

16. Ke’ng se se swantšhetšwago ke tirelo ya aletareng ya diorelo?

¹⁶ Mesong le mantšiboa, moperisita o be a neela Modimo diorelo aletareng ya diorelo ka Sekgethweng. Ka nako e swanago, barapedi bao e sego baperisita ba be ba rapela Modimo ge ba dutše ba eme ka malapeng a ka ntle a tempele ya gagwe. (Luka 1:8-10) Beibele e hlalosa gore: “Diôrêlô; ké dithapêlô tša bakxêthwa.” (Kutollo 5:8) Mopsalme Dafida o ngwadile gore: “Thapêlô ya-ka O e semê seôrêlô.” (Psalme 141:2) Bakriste ba tloditšwego le bona ba lebelela tokelo ya bona ya go ya go Jehofa ka thapelo ka Jesu Kriste e le ya bohlokwa. Dithapelo tša potego tše di tšwago pelong di bjalo ka seorelo se se nkgago bose. Bakriste ba tloditšwego ba reta Modimo le ka ditsela tše dingwe, ba diriša melomo ya bona go ruta ba bangwe. Go kgotlelela ga bona ba lebeletšane le mathata gotee le potego ya bona ka tlase ga teko ke tše di kgahlišago Modimo ka mo go kgethegilego.—1 Petro 2:20, 21.

17. Go be go akaretšwa’ng phethagalong ya tshwantšhetšo ya boporofeta yeo e neilwego ke go tsena la mathomo ga moperisita yo mogolo ka Sekgethwa-kgethweng ka Letšatši la Poelano?

¹⁷ Ka Letšatši la Poelano, moperisita yo mogolo wa Isiraele o be a swanelwa ke go tsena ka Sekgethwa-kgethweng gomme a fišetše diorelo ka gare ga morufsi o nago le magala a tukago. Se se be se swanetše go dirwa pele ga ge a tliša madi a dibego tša sebe. Go phethagatša tshwantšhetšo ye ya boporofeta, motho Jesu o ile a kgomarela potego e feletšego go Jehofa Modimo pele a neela bophelo bja gagwe e le sehlabelo se tee sa ka mo go sa felego bakeng sa dibe tša rena. Ka gona, o bontšhitše gore motho yo a phethagetšego o be a ka kgomarela potego ya gagwe go Modimo go sa šetšwe kgateletšo le ge e le efe yeo Sathane a e tlišago godimo ga gagwe. (Diema 27:11) Ge a be a lekwa, Jesu o ile a rapela “ka dillo tše thata le ka megokgo, gomme a kwewa ka kamogelo ka baka la go boifa ga gagwe Modimo.” (Ba-Hebere 5:7, NW) Ka tsela ye o ile a godiša Jehofa e le Mmuši yo a lokilego le yo a swanetšego wa legohle. Modimo o ile a putsa Jesu ka go mo tsoša bahung a mo iša bophelong bja go se hwe bja legodimong. A le boemong bjo bjo bo phagamego, Jesu o lebiša tlhokomelo lebakeng la bobedi la go tla ga gagwe lefaseng, e lego go boelanya badira-dibe ba sokologago ba batho le Modimo.—Ba-Hebere 4:14-16.

Letago le Legolwanyane la Tempele ya Modimo ya Moya

18. Jehofa o tlišitše bjang letago le fetišago tempeleng ya gagwe ya moya?

¹⁸ Jehofa o boletše e sa le pele gore: “Letaxô la Ntlo yé e tlo ba le lexolo, le le fetišaxo lela la ya kxalê.” (Hagai 2:9) Ka go tsoša Jesu e le Kgoši e sa hwego le Moperisita yo Mogolo, Jehofa o ile a tliša letago le fetišago ka tempeleng ya gagwe ya moya. Bjale Jesu o boemong bja go tlišetša “bohle ba ba mo kwaxo [phološo] ye e sa felexo.” (Ba-Hebere 5:9) Ba pele ba go bontšha go kwa mo go bjalo e bile barutiwa ba 120 ba ilego ba amogela moya o mokgethwa ka Pentekoste ya 33 C.E. Puku ya Kutollo e boletše e sa le pele gore barwa ba ba moya ba Isiraele e be e tla ba ba 144 000 ka palo mafelelong. (Kutollo 7:4) Ge ba e-hwa, ba bantši ba bona ba ile ba swanelwa ke go robala ba sa kwe selo lebitleng le le tlwaelegilego la batho ba letetše nako ya go ba gona ga Jesu a le matleng a bogoši. Tatelano ya dinako ya boporofeta e lego go Daniele 4:10-17, 20-27 e šupa go 1914 e le nako ya gore Jesu a thome go buša gare ga manaba a gagwe. (Psalme 110:2) Ka nywaga-some e mentši e sa le pele Bakriste ba tloditšwego ba ile ba letela ngwaga woo ka go fagahla. Ntwa ya pele ya lefase gotee le madi-mabe a sepedišanago le yona bathong di ile tša nea bohlatse bja gore Jesu ka kgonthe o be a beilwe sedulong sa bogoši e le Kgoši ka 1914. (Mateo 24:3, 7, 8) Nakwana ka morago ga moo ka ge go be go fihlile nako ya gore “kahlolô e thômê ka Ngwakô wa Modimo,” Jesu o be a tla phethagatša kholofetšo yeo a e dirilego go barutiwa ba gagwe ba tloditšwego bao ba bego ba robetše lehung e rego: “Ke tlo boa ka Le tšea, xore mo Nna ke lexo xôna le lena Le bê xôna.”—1 Petro 4:17; Johane 14:3.

19. Mašaledi a ba 144 000 a tsena bjang Sekgethwa-kgethweng sa legodimong?

¹⁹ Ditho tše 144 000 tša boperisita bjo bokgethwa ga se tša swaiwa le go kgoboketšwa ka moka legaeng la tšona la legodimong mafelelong. Mašaledi a tšona a sa dutše a phela lefaseng boemong bja moya bjo bo swantšheditšwego ke Sekgethwa, ba arogantšwe le lefelo le lekgethwa pele ga Modimo ke “sešireletšo” goba lepheko la mebele ya bona ya nama. Ge ba ba e-hwa ba botega, ba tsošwa le semeetseng e le dibopiwa tše sa hwego tša moya go ya go tlatša ba ba 144 000 bao ba šetšego ba le legodimong.—1 Ba-Korinthe 15:51-53.

20. Ke modiro ofe o bohlokwa wo mašaledi a boperisita bjo bokgethwa a o phethago mo nakong ye, gona o na le mafelelo afe?

²⁰ Ka ge go e-na le baperisita ba bantši gakaakaa ba hlankelago gotee le Moperisita yo Mogolo legodimong, tempele ya Modimo ya moya e amogetše letago le oketšegilego. Ka nako e swanago, mašaledi a boperisita bjo bokgethwa a phetha modiro o bohlokwa kudu lefaseng. Ka boboledi bja ona, Modimo o ‘šišinya ditšhaba ka moka’ ka dipolelo tša kahlolo ya gagwe go etša ge go boletšwe e sa le pele go Hagai 2:7. Ka nako e swanago, barapedi ba dimilione ba hlaloswago e le “matsaka a dithšaba ka moka” ba kgeregela ka malapeng a lefaseng a tempele ya Jehofa. Ba ba tsena bjang thulaganyong ya Modimo ya borapedi, gona ke letago lefe la nakong e tlago leo re ka le letelago bakeng sa tempele ya gagwe e kgolo ya moya? Dipotšišo tše di tla seka-sekwa sehlogong se se latelago.

Dipotšišo tša Tlhahlobo

◻ Jesu o beile mohlala ofe o mobotse kudu ka 29 C.E.?

◻ Ke thulaganyo efe e ilego ya thoma go šoma ka 29 C.E.?

◻ Ke’ng se se swantšhetšwago ke Sekgethwa le Sekgethwa-kgethwa?

◻ Tempele e kgolo ya moya e tagafaditšwe bjang?

[Seswantšho go letlakala 17]

Ge Jesu a be a tlotšwa ka moya o mokgethwa ka 29 C.E., tempele ya Modimo e kgolo ya moya e ile ya thoma go šoma