Go Thekga Babulamadibogo
1 Batho ba Modimo ba tsebja ka go ba ga bona le karolo ka mafolofolo bodireding. Gaešita lege e se bohle bao maemo a bona a ba dumelelago go bula madibogo, fela re swanetše go katanela go hlagolela moya wa bobulamadibogo, go ba ka moya ka moka go seo re se dirago. Re thaba gotee le ba bantši bao ba kgonago go tsenela tirelo ya bobulamadibogo gaešita le go ba kgothatša.
2 Go ba mmulamadibogo le go tšwela pele o le yena ke modiro o mogolo. Babulamadibogo ba rwala karolo e kgolo ya modiro wa boboledi le wa go ruta. Se ga se fihlelelwe ka ntle le boiteko bjo bogolo le boikgafo. Ba bangwe ba ka thekga bjang le go kgothatša bahlanka ba ba nako e tletšego ba mafolofolo?
3 Seo se ka Dirwago: Babulamadibogo ba nyaka thekgo ya bagolo. Babulamadibogo ba a kgothatšega ge bagolo ba šoma le bona. Bagolo ba bantši ba leka go šoma gotee le mmulamadibogo wa ka phuthegong bonyenyane gatee ka ngwaga. Ka tsela ye bagolo ba kgona go nea theto bakeng sa seo babulamadibogo ba se dirago le go ba thuša go dira tšwelopele e oketšegilego. Babulamadibogo mo gongwe ba ka swanelwa ke go beakanya thulaganyo ya bona e le gore ba be tšhemong nakong ya ge bagolo ba hwetšagala. Le gona, bagolo ba tla rata go kgonthiša gore go na le tšhemo e lekanego bakeng sa dihlopha. Go ka rulaganywa gore go swarwe diboka tše oketšegilego tša tirelo ya tšhemo mathapama goba mantšiboa ka baka la dithulaganyo tša babulamadibogo. Se se tla ba bjalo kudu-kudu dikgweding tšeo ka tšona go nago le babulamadibogo ba go thuša ba bantšinyana.—Jes. 40:11.
4 Bahlanka ba bodiredi ba boemong bjo bobotse bja go thuša babulamadibogo ka go ba thekga bodireding le ka go hlokomela ka mafolofolo dithulaganyo tša phuthego. Dikgaetšedi tšeo e lego babulamadibogo di a leboga ge banababo rena e le bona ba etelelago pele go rulaganyeng dihlopha tša tirelo ya tšhemo. Bao ba swarago dipuku le dimakasine ba ka kgonthiša gore go na le disola tše lekanego. Go hlokomela ditaba tše bjalo go dira gore babulamadibogo ba kgone go lebiša tlhokomelo bodireding bja bona.
5 O Mongwe le o Mongwe a ka Thuša: Bagoeledi ba ka thuša ka go itira gore ba hwetšagale gantši gore ba šome le babulamadibogo. Babulamadibogo ba thabela go sepela le bagoeledi ba bangwe gotee le thekgo ya bona. Mohlomongwe o ka rulaganya go šoma le babulamadibogo gatee ka beke goba gabedi ka kgwedi. Dilo tše di bonagalago di ka abelanwa le babulamadibogo, gomme go fa mo go lebogwa kudu ke babulamadibogo.—Ba-Fil. 4:14-19.
6 Malapa a ka thuša ditho tša ona tšeo di bulago madibogo ka mekgwa e mentši. Gantši mešomo ya ka gae e ka rulaganywa lefsa bakeng sa go dira gore setho se tee goba tše fetago moo tša lapa di kgone go bula madibogo. Kgaetšedi o mongwe yo a nago le bana ba bararo o šoma matšatši a mabedi ka beke. Barwa ba gagwe ba thuša ka go ya mabenkeleng le ka mešomo e mengwe ka gae. Morwedi o thuša ka go hlwekiša le go apea. Go tloga mola a fetšago dithuto tša gagwe, le yena o thomile go bula madibogo, gomme o šiedišana matšatši a go šoma le mmagwe. Tirišano e bjalo ka lapeng e dira gore ba bantši ba kgone go bula madibogo gomme e tliša tšhegofatšo ka lapeng.
7 Babulamadibogo ba mafolofolo ba itlhatsela e le tšhegofatšo phuthegong ka ditsela tše dintši. Phišego ya bona le mohlala di kgothatša ba bantši gore ba dire mo go oketšegilego tirelong. Ruri re swanetše go nyaka go dira sohle se re ka se kgonago gore re ba thekge. Maiteko a bjalo a kopanego a tliša lethabo go bohle gomme a feleletša ka tumišo go Jehofa.