“Tiišang Dipelo Tša Lena”

“Xo rata xore Le se fêlê pelo [“le be le kgotlelelo,” NW], xore ka xo dira thatô ya Modimo Le tšeê se Le se holofedišitšwexo.”​—BA-HEBERE 10:36.

1, 2. (a) Ke’ng seo se ilego sa diragalela bontši bja Bakriste lekgolong la pele la nywaga? (b) Ke ka baka la’ng go le bonolo gore tumelo e fokole?

GO BANGWADI ka moka ba Beibele, ga go le o tee yo a boletšego ka tumelo gantši go feta moapostola Paulo. Le gona, gantši o boletše ka bao tumelo ya bona e ilego ya fokola goba ya hwa. Ka mohlala, Himeneo le Alesandere “ba robegetšwe ke sekepe sa bona mo tumelong.” (1 Timotheo 1:​19, 20, PK) Dema o ile a tlogela Paulo ka baka la “xo rata lefase lé la byale.” (2 Timotheo 4:​10) Ba bangwe ka ditiro tša bona tšeo e sego tša Bokriste le tša go hloka boikarabelo ‘ba ile ba latola tumelo.’ Ba bangwe ba ile ba forwa ke bohlale bja maaka gomme ‘ba aroga tumelong.’​—1 Timotheo 5:8; 6:​20, 21.

² Ke ka baka la’ng Bakriste bao ba tloditšwego ba ile ba palelwa ditseleng tše? Ee, “xe e le tumêlô ké kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” (Ba-Hebere 11:1) Re bontšha tumelo go seo re sa se bonego. Ga re e nyake bakeng sa dilo tšeo di bonwago. Go bonolo go šomela lehumo leo le bonagalago go feta mahumo a sa bonwego a moya. (Mateo 19:​21, 22) Dilo tše dintši tšeo di bonagalago​—tše bjalo ka “kxanyoxô ya nama, le kxanyoxô ya mahlô”​—di kgahliša e le ka kgonthe nama ya rena e sa phethagalago gomme di ka fokodiša tumelo ya rena.​—1 Johane 2:​16.

3. Mokriste o swanetše go hlagolela tumelo ya mohuta ofe?

³ Lega go le bjalo, Paulo o re, “e a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.” Moše o be a e-na le tumelo e bjalo. O “[be] à lebeletše moputsô wo a tl’o xo o bôna” gomme “a xomarêla Eo a sa bonwexo byalo ka e ke ó a mmôna.” (Ba-Hebere 11:​6, 24, 26, 27) Mokriste o nyaka tumelo ya mohuta wo. Bjalo ka ge go boletšwe sehlogong sa pele ga se, Aborahama e be e le mohlala o mobotse tabeng ye.

Mohlala wa Aborahama wa Tumelo

4. Tsela ya Aborahama ya bophelo e ile ya kgongwa bjang ke tumelo ya gagwe?

⁴ Aborahama o be a le Uri ge a amogela kholofetšo ya Modimo ya gore o be a tla tšweletša peu yeo e bego e tla ba tšhegofatšo go batho ba ditšhaba tšohle. (Genesi 12:​1-3; Ditiro 7:​2, 3) Motheong wa kholofetšo yeo, Aborahama o ile a kwa Jehofa, a thoma ka go hudugela Harane ke moka a tla a ya Kanana. Ge a le moo Jehofa o ile a holofetša go nea peu ya Aborahama naga yeo. (Genesi 12:7; Nehemia 9:​7, 8) Lega go le bjalo, bogolo bja seo Jehofa a se holofeditšego bo be bo tla phethagala ka morago ga lehu la Aborahama. Ka mohlala, Aborahama ka noši le ka mohla ga se a ka a ba mong wa karolo le ge e le efe ya naga ya Kanana​—ka ntle le mphoma wa Makapela, woo a ilego a o reka e le lefelo la lebitla. (Genesi 23:​1-20) Lega go le bjalo, o be a e-na le tumelo lentšung la Jehofa. Godimo ga tšohle, o be a e-na le tumelo ka “motse [wa nakong e tlago] wo o tl’o xo thêwa wa tia, woo mothei le moaxi wa wôna e lexo Modimo.” (Ba-Hebere 11:​10) Tumelo e bjalo e ile ya mo thekga bophelong bja gagwe ka moka.

5, 6. Tumelo ya Aborahama e ile ya lekwa ka tsela efe ge e le ka kholofetšo ya Jehofa?

⁵ Se se bonwa ka mo go kgethegilego mabapi le kholofetšo ya gore peu ya Aborahama e be e tla ba setšhaba se segolo. E le gore se se direge, Aborahama o be a nyaka morwa, gomme o ile a leta nako e telele gore a šegofatšwe ka yena. Ga re tsebe gore o be a e-na le nywaga e mekae ge a be a thoma go kwa ka kholofetšo ya Modimo, eupša ge a be a tšea leeto le letelele la go ya Harane, Jehofa o be a se a hlwa a mo nea ngwana. (Genesi 11:​30) O bile Harane ka nako e telele ka mo go lekanego go ka ‘ba le maruo le batho,’ gomme ge a hudugela Kanana o be a e-na le nywaga e 75 gomme Sara a e-na le e 65. Lega go le bjalo, go be go se na morwa. (Genesi 12:​4, 5) Ge Sara a be a fihla nywageng ya gagwe ya bogareng bja bo-70, o ile a phetha ka gore bjale o be a tšofetše kudu go ka nea Aborahama ngwana. Ka baka leo, ka go latela tlwaelo ya mehleng yeo, o ile a nea Aborahama lekgoba la gagwe la ngwanenyana e lego Hagara gomme a ba le morwa ka yena. Eupša yo e be e se ngwana yo a holofeditšwego. Mafelelong Hagara le ngwana wa gagwe Išimaele ba ile ba rakwa. Lega go le bjalo, ge Aborahama a be a ba humelela, Jehofa o ile a holofetša go šegofatša Išimaele.​—Genesi 16:​1-4, 10; 17:​15, 16, 18-20; 21:​8-21.

⁶ Ka nako e swanetšego ya Modimo ka noši​—e lego nako e telele-telele ka morago ga ge ba kwele kholofetšo ka lekga la pele​—Aborahama wa nywaga e 100 le Sara wa nywaga e 90 ba ile ba ba le ngwana wa mošemane, e lego Isaka. E swanetše go ba e bile mo go kgahlišago gakaakang! Go banyalani ba ba ba tšofetšego, go be go nyaka go le bjalo ka ge eka ke tsogo ge mebele ya bona e “hwilego” e be e tliša bophelo bjo bofsa. (Ba-Roma 4:​19-21, bapiša le PK.) Go leta go tšere nako e telele, eupša ge kholofetšo e phethegile mafelelong, go leta go be go e swanetše.

7. Tumelo e tswalana bjang le kgotlelelo?

⁷ Mohlala wa Aborahama o re gopotša gore tumelo ga se ya swanela go ba ya nako e kopana feela. Paulo o ile a tswalanya tumelo le kgotlelelo ge a be a ngwala gore: “Xo rata xore Le se fêlê pelo [“le be le kgotlelelo,” NW], xore ka xo dira thatô ya Modimo Le tšeê se Le se holofedišitšwexo. . . . Xomme rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.” (Ba-Hebere 10:​36-39) Ba bantši ba letile nako e telele bakeng sa go phethagala ga kholofetšo. Ba bangwe ba ile ba leta lebaka la nako ya bophelo bja bona ka moka. Tumelo ya bona e tiilego e ile ya ba thekga. Le gona, ka go swana le Aborahama ba tla amogela moputso ka nako e swanetšego ya Jehofa.​—Habakuku 2:3.

Go Theetša Modimo

8. Re theetša Modimo bjang lehono, gomme ke ka baka la’ng seo se tla tiiša tumelo ya rena?

⁸ Bonyenyane ke dilo tše nne tšeo di ilego tša tiiša tumelo ya Aborahama, gomme tšona dilo tšeo di ka re thuša. Sa pele o ile a bontšha ‘go dumela ga gagwe gore Modimo o gona’ ka go theetša ge Jehofa a be a bolela. Ka go rialo, e be e le yo a fapanego le ba-Juda ba mehleng ya Jeremia bao ba bego ba dumela go Jehofa eupša ba se na tumelo mantšung a gagwe. (Jeremia 44:​15-19) Lehono Jehofa o bolela le rena ka matlakala a Beibele, e lego Lentšu la gagwe le le buduletšwego leo Petro a itšego le bjalo ka “lebônê le le etšaxo mo xo lexo lefsifsi . . . dipelong tša lena.” (2 Petro 1:​19) Ge re bala Beibele ka kelohloko, re gare ‘re otlwa ka mantšu a tumelo.’ (1 Timotheo 4:​6, PK; Ba-Roma 10:​17) Go feta moo, mehleng ye ya bofelo “molaki e a bôtêxaxo yo bohlale” o nea ‘dijo tša moya ka lebaka la gona,’ e lego tlhahlo ya go diriša melao ya motheo ya Beibele le go kwešiša boporofeta bja Beibele. (Mateo 24:​45-47) Go theetša Jehofa ka ditsela tše go bohlokwa kudu tabeng ya go ba le tumelo e tiilego.

9. Go tla direga’ng ge e ba ruri re dumela kholofelo ya Bokriste?

⁹ Tumelo ya Aborahama e be e tswalana kgaufsi le kholofelo ya gagwe. “Aborahama ó dumetše à holofetše . . . xe xo thwe ó tlo ba tata’xo dithšaba tše ntši.” (Ba-Roma 4:​18) Se ke selo sa bobedi seo se ka re thušago. Le ka mohla ga se ra swanela go lebala gore Jehofa “ba ba Mo nyakaxo ó a ba putsa.” Moapostola Paulo o itše: “Ké sôna se re itapišetšaxo sôna rè roxwa; ka xobane re holofetše Modimo e a phelaxo.” (1 Timotheo 4:​10) Ge e ba ruri re dumela kholofelo ya Bokriste, tsela ya rena ka moka ya bophelo e tla ba pontšho ya tumelo ya rena, go etša ge go be go le bjalo ka Aborahama.

Go Bolela le Modimo

10. Ke thapelo ya mohuta ofe yeo e tlago go tiiša tumelo ya rena?

¹⁰ Aborahama o ile a bolela le Modimo, gomme se e bile selo sa boraro seo se ilego sa tiiša tumelo ya gagwe. Lehono le rena re ka bolela le Jehofa re diriša mpho ya thapelo ka Jesu Kriste. (Johane 14:6; Ba-Efeso 6:​18) E bile ka morago ga ge a boletše seswantšho seo se gatelelago go nyakega ga go rapela ka mehla moo Jesu a ilego a botšiša potšišo e rego: “Morwa-motho mohla a tlaxo a Le re ó tlo hwetša lefaseng xò sa na le tumêlô?” (Luka 18:8) Thapelo yeo e agago tumelo ga se yeo e se nago mogopolo goba ya go itlela feela. Ke yeo e nago le morero ka mo go tseneletšego. Ka mohlala, thapelo e tšwago pelong e bohlokwa ge e ba re e-na le diphetho tše bohlokwa tšeo re swanetšego go di dira goba ge re le ka tlase ga kgateletšego e kgolo.​—Luka 6:​12, 13; 22:​41-44.

11. (a) Aborahama o ile a tiišwa bjang ge a be a bulela Modimo pelo ya gagwe? (b) Re ka ithuta eng phihlelong ya Aborahama?

¹¹ Ge Aborahama a be a tšofala gomme Jehofa a be a se a hlwa a mo nea peu e holofeditšwego, o ile a bolela le Modimo ka seo se mo tshwenyago. Jehofa o ile a mo kgonthišetša. Mafelelo e bile afe? Aborahama “[o ile] a dumêla Morêna; ’me Morêna a mmalêla tumêlô yeo a re ké xôna xo loka.” Ke moka Jehofa o ile a nea seka bakeng sa go kgonthišetša mantšu a gagwe a kgonthišetšo. (Genesi 15:​1-18) Ge e ba re bulela Jehofa dipelo tša rena ka thapelo, re amogela kgonthišetšo ya Jehofa Lentšung la gagwe Beibele gomme re mo kwa ka tumelo e feletšego, gona Jehofa le yena o tla tiiša tumelo ya rena.​—Mateo 21:​22; Juda 20, 21.

12, 13. (a) Aborahama o ile a šegofatšwa bjang ge a be a latela tlhahlo ya Jehofa? (b) Ke diphihlelo tša mohuta ofe tšeo di tlago go tiiša tumelo ya rena?

¹² Selo sa bone seo se ilego sa tiiša tumelo ya Aborahama e bile thekgo yeo Jehofa a mo neilego yona ge a be a latela tlhahlo ya Modimo. Ge Aborahama a be a e-ya go hlakodiša Lota go dikgoši tšeo di hlaselago, Jehofa o ile a mo nea phenyo. (Genesi 14:​16, 20) Le ge Aborahama a be a phela bjalo ka modiiledi nageng yeo peu ya gagwe e bego e tla e rua e le bohwa, Jehofa o ile a mo šegofatša ka dilo tše di bonagalago. (Bapiša le Genesi 14:​21-23.) Jehofa o ile a hlahla maiteko a molaki wa gagwe a go hweletša Isaka mosadi yo a swanetšego. (Genesi 24:​10-27) Ee, Jehofa ‘o šegofaditše Aborahama dilong ka moka.’ (Genesi 24:1) Ka baka la seo, tumelo ya gagwe e ile ya ba e tiilego kudu gomme a ba le tswalano ya kgaufsi kudu le Jehofa Modimo mo Jehofa a ilego a mmitša “mogwera wa-ka.”​—Jesaya 41:​8, PK; Jakobo 2:​23.

¹³ Na rena lehono re ka ba le tumelo e bjalo e tiilego? Ee. Ge e ba ka go swana le Aborahama re leka Jehofa ka go kwa ditaelo tša gagwe, le rena o tla re šegofatša gomme seo se tla tiiša tumelo ya rena. Ka mohlala, go gaša mahlo Pegong ya Ngwaga wa Tirelo wa 1998 go bontšha gore ba bantši ba ile ba šegofatšwa ka tsela e kgahlišago ge ba be ba e-kwa taelo ya gagwe ya go bolela ditaba tše di lokilego.​—Mareka 13:10.

Pego ya Tumelo Lehono

14. Jehofa o šegofaditše bjang lesolo la Kingdom News No. 35?

¹⁴ Morago ka October 1997, lesolo la lefase ka bophara ka Kingdom News No. 35 e bile le le atlegilego kudu gomme se ka moka e bile ka baka la phišego le mafolofolo a Dihlatse tše dimilione e le batho ka o tee ka o tee. Mohlala wa se ke seo se diregilego Ghana. Go ile gwa abja mo e nyakilego go ba dikopi tše dimilione tše 2,5 ka maleme a mane, gomme gwa kgopelwa dithuto tša Beibele tše e nyakilego go ba tše 2 000 ka baka la se. Cyprus, Dihlatse tše pedi tšeo di bego di aba Kingdom News di ile tša lemoga gore moperisita o di šetše morago. Ka morago ga nakwana di ile tša leka go mo nea kopi ya Kingdom News. O be a šetše a hweditše kopi gomme a re: “Ke kgahlilwe kudu ke molaetša wa yona mo e lego gore ke ile ka nyaka go lebogiša batho bao ba e lokišeditšego.” Denmark go ile gwa abja dikopi tše dimilione tše 1,5 tša Kingdom News gomme se sa ba le mafelelo a mabotse. Mosadi yo a šomago go tša dikgokagano le batho moo o itše: “Pampišana ye e na le molaetša bakeng sa motho yo mongwe le yo mongwe. Go bonolo go e kwešiša, gomme e a go tutuetša, ya go nea kganyogo ya go nyaka go tseba mo go oketšegilego. Ruri e opa kgomo lenaka!”

15. Ke diphihlelo dife tšeo di bontšhago gore Jehofa o šegofaditše boiteko bja go fihlelela batho kae le kae?

¹⁵ Ka 1998 go dirilwe boiteko bja go dira boboledi go batho, e sego feela magaeng a bona eupša kae le kae. Nageng ya Côte d’Ivoire banyalani ba baromiwa ba ile ba etela dikepe tše 322 maema-kepeng. Ba ile ba sepediša dipuku tše 247, dimakasine tše 2 284, diporoutšha tše 500 le dipampišana tše makgolo-kgolo, gaešita le dibidio e le gore basesiši ba dikepe ba di bogele ge ba le ka lewatleng. Canada, Hlatse e ile ya ya bodirelong bja mebele ya dikoloi. Mong wa bodirelo bjoo o be a thabela, gomme ngwanabo rena o ile a dula diiri tše nne le seripa, gaešita le ge nako yeo a ilego a e fetša a dira boboledi e bile feela iri e tee goba go feta moo go se nene magareng ga bareki. Mafelelong go ile gwa rulaganyetšwa thuto ka 10:00 p.m. Lega go le bjalo, ka dinako tše dingwe e be e sa thome go ba go fihla bošego-gare gomme e swarelela go fihla ka iri ya bobedi mesong. Go bonala thulaganyo ye e be e le tlhohlo, eupša go ile gwa hwetšwa mafelelo a mabotse. Monna yo o ile a dira phetho ya gore a tswalele bodirelo bja gagwe ka Disontaga e le gore a be gona dibokeng. Go se go ye kae yena le lapa la gagwe ba be ba dira tšwelopele e botse.

16. Ke diphihlelo dife tšeo di bontšhago gore poroutšha ya Seo Modimo a se Nyakago le puku ya Tsebo ke didirišwa tše matla modirong wa boboledi le wa go ruta?

¹⁶ Poroutšha ya Ke Eng Seo Modimo a se Nyakago go Rena? le puku ya Tsebo e Išago Bophelong bjo bo sa Felego di tšwela pele e le didirišwa tše matla modirong wa boboledi le wa go ruta. Nageng ya Italy moitlami wa mosadi yo a bego a letetše pese o ile a amogela kopi ya Kingdom News. Letšatšing le le latelago, o ile a batamelwa gape gomme a amogela poroutšha ya Seo Modimo a se Nyakago. Letšatši le lengwe le le lengwe ka morago ga moo, o ile a swarelwa thuto ya Beibele ya metsotso e 10 go ya go e 15 boema-peseng. Ka morago ga kgwedi le seripa, o ile a dira phetho ya gore a tloge lefelong la bodulo la baitlami gomme a ye gae Guatemala bakeng sa go yo tšwetša thuto ya gagwe pele. Nageng ya Malawi motho yo a tsenago kereke yo a fišegago yo leina la gagwe e lego Lobina o ile a tenega ge barwedi ba gagwe ba be ba thoma go ithuta Beibele le Dihlatse tša Jehofa. Lega go le bjalo, banenyana ba ile ba abelana therešo ya Beibele le mmago bona ge ba be ba ka kgona. Ka June 1997 Lobina o ile a bona puku ya Tsebo gomme a kgahlišwa ke polelwana e rego “Tsebo e Išago.” Ka July o ile a dumela thuto ya Beibele. Ka August o ile a ba gona kopanong ya selete gomme a theetša lenaneo ka moka ka kelohloko. Mafelelong a kgwedi yeo o be a tlogetše kereke ya gagwe gomme a swanelegetše go ba mogoeledi yo a sa kolobetšwago. O ile a kolobetšwa ka November 1997.

17, 18. Dibidio tša Mokgatlo di ipontšhitše bjang e le tše di holago go thušeng batho ka o tee ka o tee gore ba “bone” dilo tša moya?

¹⁷ Dibidio tša Mokgatlo di thušitše ba bantši gore ba “bone” dilo tša moya. Nageng ya Mauritius monna o ile a tlogela kereke ka baka la go hloka botee mo go lego moo. Moromiwa o ile a mmontšha botee bja Dihlatse tša Jehofa a diriša bidio ya United by Divine Teaching. A kgahlegile, monna yoo o itše: “Lena Dihlatse tša Jehofa le šetše le le Paradeiseng!” O ile a dumela go swarelwa thuto ya Beibele. Kgaetšedi yo mongwe nageng ya Japane o ile a bontšha monna wa gagwe yo a sa dumelego bidio ya Jehovah’s Witnesses​—The Organization Behind the Name, gomme o ile a tutueletšega gore a swarelwe thuto ya Beibele ya ka mehla. Ka morago ga go bogela bidio ya United by Divine Teaching, o ile a nyaka go ba yo mongwe wa Dihlatse tša Jehofa. Lelokelelo la dikarolo tše tharo la dibidio tšeo di nago le sehlogo se se rego The Bible​—A Book of Fact and Prophecy le mo thušitše go diriša melao ya motheo ya Beibele bophelong bja gagwe. Mafelelong bidio ya Jehovah’s Witnesses Stand Firm Against Nazi Assault e ile ya mmontšha gore Jehofa o tiiša batho ba Gagwe malebana le ditlhaselo tša Sathane. Monna yo o ile a kolobetšwa ka October 1997.

¹⁸ Tše e fo ba tše sego kae tša diphihlelo tše dintši tšeo ba bantši ba bilego le tšona ngwageng o fetilego wa tirelo. Di bontšha gore Dihlatse tša Jehofa di na le tumelo e šomago le gore Jehofa o tiiša tumelo yeo ka go šegofatša modiro wa tšona.​—Jakobo 2:17.

Hlagolela Tumelo Lehono

19. (a) Re boemong bjo bokaone go feta Aborahama bjang? (b) Ke ba bakae bao ba ilego ba bokana ngwagola bakeng sa go gopola lehu la Jesu la sehlabelo? (c) Ke dinaga dife tšeo di bilego le palo e kgolo ka mo go kgethegilego ya bao ba bilego gona Segopotšong ngwagola? (Bona tšhate go matlakala 12 go ya go 15.)

¹⁹ Rena lehono re boemong bjo bokaone ka ditsela tše dintši go feta kamoo Aborahama a bego a le ka gona. Re a tseba gore Jehofa o phethagaditše ditšhegofatšo tša gagwe ka moka go Aborahama. Bana ba Aborahama ba ile ba tšea naga ya Kanana e le bohwa gomme ba fetoga setšhaba se segolo e le ka kgonthe. (1 Dikxoši 4:​20; Ba-Hebere 11:​12) Go feta moo, mo e ka bago nywaga e 1 971 ka morago ga ge Aborahama a tlogile Harane, setlogolo sa gagwe, e lego Jesu, o ile a kolobetšwa meetseng ke Johane Mokolobetši gomme ka morago a kolobetšwa ka moya o mokgethwa ke Jehofa ka boyena gore e be Mesia, Peu ya Aborahama ka kgopolo e feletšego ya moya. (Mateo 3:​16, 17; Ba-Galatia 3:​16) Ka Nisani 14, 33 C.E., Jesu o ile a gafa bophelo bja gagwe e le topollo bakeng sa bao ba bego ba tla bontšha tumelo go yena. (Mateo 20:​28; Johane 3:​16) Bjale ba dimilione ba be ba ka itšhegofatša ka yena. Ngwagola ba 13 896 312 ba ile ba bokana ka Nisani 14 bakeng sa go gopola tiro ye e kgahlišago ya lerato. A go phagamišwa mo gogolo gakaakang ga Jehofa Mmoloki yo Mogolo wa dikholofetšo!

20, 21. Ba ba tšwago ditšhabeng ka moka ba itšhegofaditše bjang ka Peu ya Aborahama lekgolong la pele la nywaga, gomme ba itšhegofatša bjang lehono?

²⁰ Lekgolong la pele la nywaga, ba bantši ba tšwago ditšhabeng ka moka​—go thoma ka Isiraele ya nama​—ba ile ba bontšha tumelo go Peu ye ya Aborahama gomme ba fetoga barwa ba ba tloditšwego ba Modimo, e lego ditho tša “Ba-Isiraele ba Modimo” ba bafsa ba moya. (Ba-Galatia 3:​26-29; 6:​16; Ditiro 3:​25, 26) Ba na le tebelelo e kgonthišeditšwego ya bophelo bja moya bja go se hwe magodimong e le babuši-gotee Mmušong wa Modimo. Ke feela ba 144 000 bao ba tlago go šegofatšwa ka tsela ye, gomme go šetše ba sego kae ba bona. (Kutollo 5:​9, 10; 7:4) Ngwagola ba 8 756 ba ile ba hlatsela go dumela ga bona gore ke karolo ya palo ye ka go ja diswantšhetšo nakong ya monyanya wa Segopotšo.

²¹ Mo e nyakilego go ba Dihlatse tša Jehofa ka moka lehono ke ba “lešaba le lexolo” leo le porofetilwego go Kutollo 7:​9-17. Ka ge ba itšhegofatša ka Jesu, ba na le kholofelo ya bophelo bjo bo sa felego lefaseng la paradeise. (Kutollo 21:​3-5) Ba 5 888 650 bao ba bilego le karolo modirong wa boboledi ka 1998 ke bohlatse bja gore lešaba le ke le “lexolo” e le ka kgonthe. E bile mo go kgahlišago ka mo go kgethegilego go bona Russia gotee le Ukraine di bega bagoeledi ba ka godimo ga ba 100 000 ka lekga la mathomo. Pego e tšwago United States le yona e bile e kgethegilego​—e lego bagoeledi ba 1 040 283 ka August! Tše e bile tše tharo feela tša dinaga tše 19 tšeo di begilego bagoeledi ba ka godimo ga ba 100 000 ngwagola.

Kholofetšo Yeo e Tlago go Phethagala Kgaufsinyane

22, 23. (a) Ke ka baka la’ng re swanetše go tiiša dipelo tša rena lehono? (b) Re ka itlhatsela bjang re swana le Aborahama gomme re sa swane le batho bao ba se nago tumelo bao ba boletšwego ke Paulo?

²² Bao ba bilego gona Segopotšong ba ile ba gopotšwa gore re šetše re fihlile bokgole bjo bokaakang phethagatšong ya dikholofetšo tša Jehofa. Ka 1914 Jesu o ile a bewa sedulong sa bogoši e le Kgoši ya Mmušo wa Modimo wa legodimong, a thoma go ba gona ga gagwe a le matleng a Mmušo. (Mateo 24:3; Kutollo 11:​15) Ee, Peu ya Aborahama bjale e buša e le legodimong! Jakobo o itše go Bakriste ba mehleng ya gagwe: “Se feleng pelo. Tiišang dipelo tša lena, xobane xo tla xa Morêna xo kxaufsi.” (Jakobo 5:8) Ee, go ba gona moo gona bjale ke selo sa kgonthe! Re na le mabaka a mantši gakaakang a go tiiša dipelo tša rena!

²³ Eka kholofelo ya rena ya go holofela dikholofetšo tša Modimo e ka tšwela pele e mpshafatšwa ke thuto ya ka mehla ya Beibele le thapelo yeo e nago le morero. Anke le ka mohla re se kgaotše go hwetša tšhegofatšo ya Jehofa ge re dutše re e-kwa Lentšu la gagwe. Ke moka re tla ba bjalo ka Aborahama, e sego bjalo ka bao tumelo ya bona e ilego ya fokola gomme ya hwa go etša ge Paulo a boletše. Ga go na selo seo se tlago go re aroganya le tumelo ya rena e kgethwa-kgethwa. (Juda 20) Re rapelela gore eka se e ka ba sa therešo ka bahlanka ka moka ba Jehofa ngwageng wa tirelo wa 1999 le go tšwela pele go iša bokamosong bja ka mo go sa felego.

Na o a Tseba?

◻ Re ka theetša Modimo bjang lehono?

◻ Ke mehola efe yeo e tlišwago ke thapelo yeo e nago le morero ya go rapela Modimo?

◻ Ge e ba re latela tlhahlo ya Jehofa ka boikokobetšo, tumelo ya rena e tla tiišwa bjang?

◻ Ke dibopego dife tša pego ya ngwaga le ngwaga (matlakala 12 go ya go 15) tšeo o hweditšego e le tše di kgahlišago ka mo go

[Seswantšho go letlakala]

Ge e ba re theetša Lentšu la Jehofa, kholofelo ya rena dikholofetšong tša gagwe e tla mpshafala

[Seswantšho go letlakala 18]

Tumelo ya rena e a tia ge re tšea karolo bodireding

kgethegilego?