Phuthego Ya Bokriste Mothopo wa Thušo e Matlafatšago

POPI, mosadi yo a lego nywageng ya gagwe ya bo-20, o be a tshwenyegile ka lebaka la boemo bja lapa bjo bo kwešago bohloko bjo bo akaretšago go hloka poledišano ya bolokologi le batswadi ba gagwe.a Ka morago ga go tšhollela seo se lego pelong ya gagwe go mogolo wa Mokriste le mosadi wa gagwe, o ile a ba ngwalela gore: “Ke le leboga kudu bakeng sa go tšea nako le boledišana le nna. Ga le tsebe gore go hlokomela ga lena go bolela mo gogolo gakaakang go nna. Ke leboga Jehofa ka go mpha batho bao nka ba botago le bao nka boledišanago le bona.”

Toula, mosadi yo a sa tšwago go ba mohlologadi yo a nago le bana ba babedi bao ba lego mahlalagading, o ile a ikhwetša a le kgakanegong ya go ba le mathata maikwelong gotee le mathata a tša ditšhelete. Yena gotee le bana ba gagwe ka mehla ba be ba amogela diketelo tše di matlafatšago tša banyalani ba Bakriste ba phuthegong ya gabo bona. Ka morago ga ge a ile a lebeletšana le boemo bja gagwe ka katlego, o ile a ba romela karata ye e rego: “Ka mehla ke a le gopola dithapelong tša-ka. Ke gopola makga a mantši ao le ilego la nthuša le go nthekga.”

Na ka dinako tše dingwe o ikwa o le yo a “imêlwaxo” ke dikgateletšo tše di oketšegago tša lefase le? (Mateo 11:​28) Na “nako le ditiragalo tše di sa letelwago” di sentše bophelo bja gago ka diphihlelo tše bohloko? (Mmoledi 9:​11, NW) Gona ga o noši. Eupša bjalo ka ge dikete tša bao ba gateletšegilego di hweditše, le wena ka mo go swanago o ka hwetša thušo ya kgonthe ka phuthegong ya Bokriste ya Dihlatse tša Jehofa. Lekgolong la pele la nywaga C.E., moapostola Paulo o hweditše gore badumedi-gotee le yena ba itšego e be e tloga e le “thušo e matlafatšago” go yena. (Ba-Kolose 4:​10, 11, NW) O ka ba le phihlelo e swanago.

Thekgo le Thušo

Mangwalong a Bakriste a Segerika, lentšu “phuthego” le fetoletšwe go tšwa polelwaneng ya Segerika ek·kle·siʹa, yeo e bolelago sehlopha sa batho bao ba bokanego gotee. Lentšung leo go na le dikgopolo tša go ba batee le go thekgana.

Phuthego ya Bokriste e thekga therešo ya Lentšu la Modimo le go bolela ditaba tše di lokilego tša Mmušo. (1 Timotheo 3:​15; 1 Petro 2:9) Lega go le bjalo, phuthego e bile e nea thekgo ya moya le thušo go bao ba kopanelago le yona. Moo motho a ka hwetša sehlopha sa bagwera ba lerato, bao ba kgomegago le bao ba hlokomelago bao ba itokišeditšego le bao ba ratago go thuša le go homotša ba bangwe dinakong tša kgateletšego.​—2 Ba-Korinthe 7:​5-7.

Barapedi ba Jehofa ka mehla ba hwetša polokego le tšhireletšego phuthegong ya gagwe. Mopsalme o bontšhitše gore o ile a thaba le go ikwa a šireletšegile ge a le gare ga batho ba Modimo bao ba bokanego. (Psalme 27:​4, 5; 55:​14; 122:1) Ka mo go swanago lehono, phuthego ya Bokriste ke mokgatlo wa badumedi-gotee bao ba aganago le go kgothatšana.​—Diema 13:​20; Ba-Roma 1:​11, 12.

Ditho tša phuthego di rutwa gore ‘di dire botse; di bo direle batho bohle, gagolo di bo direle batho babo tšona ba tumelo.’ (Ba-Galatia 6:​10) Thuto yeo e theilwego Beibeleng yeo di e amogelago e di šušumetša gore di bontšhane lerato la borwarre le maikwelo a borutho. (Ba-Roma 12:​10; 1 Petro 3:8) Banababo rena ba moya le dikgaetšedi ka phuthegong ba šušumeletšwa go ba ba botho, go ba khutšong le ba kwelanago bohloko ka lerato. (Ba-Efeso 4:3) Go e na le go fo ba barapedi ba ba rulagantšwego, ba bontšha go kgomega ga lerato ka ba bangwe.​—Jakobo 1:​27.

Ka gona, ka phuthegong bao ba gateletšwego ba hwetša boemo bjo borutho bja tikologo e swanago le ya lapa. (Mareka 10:​29, 30) Maikwelo a go ba le tswalano le sehlopha seo se tlemaganego le se lerato a ba matlafatša. (Psalme 133:​1-3) Ka go šomiša phuthego, “molaki e a bôtêxaxo yo bohlale” o nea dijo tša moya tšeo di nago le phepo “ka lebaka la xôna.”​—Mateo 24:​45.

Thušo e Tšwago go Balebeledi ba Lerato

Ditho tša phuthego ya Bokriste di ka letela gore ka go yona di hwetše badiši bao ba swanelegago bao ba nago le lerato, kwešišo le bao ba neago thekgo ya moya le kgothatšo. Badiši bao ba nago le dika tše bjalo ba swana le “tšhireletšo ge phefo e foka, le setšhabelo sa go tšhabela pula.” (Jesaya 32:​1, 2, PK) Bagolo ba kgethilwego ka moya o mokgethwa goba balebeledi ba hlokomela batho ba Modimo bao ba swanago le dinku, ba kgothatša bao ba babjago le bao ba gateletšegilego le go leka go tsošološa bao ba sentšego.​—Psalme 100:3; 1 Petro 5:​2, 3. 

Ee, sehlopha sa bagolo sa phuthego ga se sehlopha sa ditsebi tša tša kalafo goba dingaka tšeo di kgonago go alafa mathata a tša maphelo a mmele goba a monagano ao badumedi-gotee le bona ba lebeletšanego le ona. Tshepedišong ye ya gona bjale ya dilo, bao ba babjago ba sa ‘nyaka ngaka.’ (Luka 5:​31, bapiša le NW.) Lega go le bjalo, badiši ba bjalo ba ka thuša bao ba nyakago thušo moyeng. (Jakobo 5:​14, 15) Ge e ba go kgonega, bagolo ka mo go swanago ba rulaganya bakeng sa go nea thušo e nngwe.​—Jakobo 2:​15, 16.

Ke mang yo a hlohleletšago tokišetšo ye e lerato? Jehofa Modimo ka noši! Moporofeta Hesekiele o hlalosa Jehofa e le yo a tsebatšago gore: “Ke tlo nyaka dinku tša-ka ka di hlôkômêla. . . . Ke tlo lôtôla dinku tša-ka ka di hlakodiša xohle mo di xašanyeditšwexo xôna . . . Dinku tša-ka ke tlo di diša Nna ka nnoši, ka di hutamiša.” Modimo gape o tshwenyegile ka dinku tšeo di teka-tekago le tšeo di fokolago.​—Hesekiele 34:​11, 12, 15, 16.

Thušo ya Kgonthe ka Nako e Swanetšego

Na thušo ya kgonthe e a hwetšagala ka phuthegong ya Bokriste e le ka kgonthe? Ee, le gona mehlala ye e latelago e bontšha maemo a fapa-fapanego ao go ona phuthego e ipontšhago go ba e nago le thušo.

◆ Go lahlegelwa ke yo o mo ratago. Monna wa Anna o ile a hlokofala ka morago ga bolwetši bjo bo sa folego. Anna o re: “Go tloga ka nako yeo ke ile ka amogela lerato le borutho go tšwa go borwarre bja Bokriste. Mantšu a tšwelago pele a botho a thekgo le kgothatšo go tšwa go badumedi-gotee le nna, go akaretša dikgokarelo tša bona tšeo di tšwago pelong, a ile a dira gore pelo ya-ka e tšwele pele e betha go e na le gore e robegele sa ruri, gomme ke leboga Jehofa. Lerato la bona le ntirile gore ke ikwe ke thekgwa kudu, ka feleletša ka go phagamišetšwa godimo le go hlokomelwa ka lerato.” Le wena ka mo go swanago o ka ba o ile wa ba le phihlelo e bohloko ya go lahlegelwa ke yo o mo ratago ka lehu. Dinakong tše bjalo, ditho tša phuthego di ka nea khomotšo yeo e nyakegago kudu ka mo go kgonegago gotee le thekgo ya maikwelo.

◆ Bolwetši. Arthur, e lego molebeledi wa mosepedi yo a tšwago Poland, o be a etela diphuthego tša Bogareng bja Asia bakeng sa go di matlafatša moyeng. Ketelong e nngwe ya gagwe o ile a babja o šoro gomme ge a e-ba kaone o ile a ba le mathata a magolo. Arthur o gopola ka tebogo e tseneletšego gore: “Ke nyaka go le botša kamoo banabešo le dikgaetšedi [motseng wa Kazakhstan] ba ilego ba ntlhokomela ka gona. Banabešo le dikgaetšedi bao bontši bja bona ke sa ba tsebego​—gaešita le bao ba thabelago​—ba ile ba ntlišetša tšhelete, dijo le dihlare. . . . Gomme ba dirile se ka lethabo le legolo.

“Nagana ka maikwelo a-ka ge ke be ke amogela enfelopo yeo e nago le tšhelete le lengwalo le le rego: ‘Ngwanešo yo a rategago, ke go romela ditumedišo tše borutho. Mma o mphile tšhelete ya ice cream, eupša ke ile ka dira phetho ya gore ke go fe yona bakeng sa go lefelela dihlare. Hle e-ba kaone kapejana. Jehofa o re nyaka ka nako e telele. Ditakaletšo tše dibotse. Le gona o re botše dikanegelo tše dingwe gape tše dibotse tšeo di agago. Vova.’” Ee, bjalo ka ge go bontšhitšwe mo tabeng ye, ba bagolo le ba banyenyane ka phuthegong ba ka nea thušo e matlafatšago dinakong tša bolwetši.​—Ba-Filipi 2:​25-29.

◆ Kgateletšego. Teri o be a e-na le kganyogo e tšwago pelong ya go hlankela bjalo ka mmulamadibogo goba mogoeledi wa nako e tletšego wa Mmušo. Lega go le bjalo, ka lebaka la mathata, o ile a swanelwa ke gore a kgaotše go bula madibogo. O re: “Ke ile ka ikwa ke na le molato o mogolo ka ge ke lekile go hlankela boemong bjo gomme ka se fetše le ge e le ngwaga.” Teri o ile a dumela ka phošo gore go amogelwa ke Jehofa go be go ithekgile ka botelele bja nako yeo a bilego tirelong ya gagwe ka yona. (Bapiša le Mareka 12:​41-44.) A gateletšegile kudu, o ile a ikarola. Lega go le bjalo, thušo e lapološago e ile ya tšwelela ka phuthegong.

Teri o gopola gore: “Kgaetšedi yo a godilego wa mmulamadibogo o ile a nthuša gomme a ntheetša ge ke mo tšhollela maikwelo a-ka. Ge ke tloga legaeng la gagwe, ke ile ka ikwa eka ke be ke rotšwe morwalo. Go tloga moo go ya pele, kgaetšedi yo wa mmulamadibogo le monna wa gagwe yo e lego mogolo ka phuthegong ba ile ba nnea thušo e bohlokwa. Ke be ke amogela mogala ka mehla go tšwa go bona ba nyaka go kwa gore ke tšwela pele bjang. . . . Ba ile ba ntumelela go ba gona thutong ya bona ya lapa ka dinako tše dingwe, e lego seo se ilego sa gatelela ka go nna bohlokwa bja malapa ao a dulago a le boteeng.”

Ga se mo go sa tlwaelegago go ba bantši​—gaešita le go Bakriste ba ineetšego​—gore ba gateletšege, ba nyeme moko le go lewa ke bodutu. Re ka leboga gakaakang thušo e lerato le e se nago boithati e hwetšagalago ka phuthegong ya Modimo!​—1 Ba-Thesalonika 5:​14.

◆ Ditshenyo le dikotsi. Ipee boemong bja lapa la batho ba bane bao ba ilego ba loba thoto ya bona ka moka ge ngwako wa bona o be o e-swa lore-lore. Kapejana ba ile ba hwetša se se bitšwago “phihlelo e kgothatšago yeo ka mehla e tla re kgomago yeo e ilego ya re tiišetša lerato la kgonthe gare ga batho ba Jehofa.” Ba hlalosa ka gore: “Mo e ka bago kapejana ka morago ga tiragalo ke ge megala ya kgonthe ya thekgo le khomotšo e tšwago go banababo rena ba moya le dikgaetšedi e tsena e sa kgaotše. Mogala o be o lla o sa kgaotše. Go kgomega ga kgonthe ga yo mongwe le yo mongwe le go bontšha ga gagwe lerato e be e le mo go kgomago kudu moo e lego gore re ile ra ba ra rothiša megokgo ya tebogo.”

Go se go ye kae ke ge bagolo ba phuthego ba rulagantše sehlopha se segolo sa banabešo, gomme ka matšatši a mmalwa, ba ile ba agela lapa le ngwako o mofsa. Moagišani o ile a goeletša ka gore: “O tla bona! Go na le mehuta ka moka ya batho ye e šomago moo​—banna, basadi, ba baso le ma-Sepania!” Bjo e be e le bohlatse bjo bo lego molaleng bja lerato la borwarre.​—Johane 13:​35.

Bakriste-gotee ba ile ba ba ba fa lapa leo diaparo, dijo le tšhelete. Tate o hlalosa ka gore: “E be e le nakong ya sehla sa Keresemose ge yo mongwe le yo mongwe a nea dimpho, eupša re ka bolela ka go kgodišega gore ga go le o tee yo a thabetšego mohuta wa kgonthe wa go nea kudu mo gogolo moo re go dirilego.” Le gona ba tlaleletša ka gore: “Dikgopolo tša mollo di nyamelela ganyenyane-ganyenyane gomme legatong la tšona go šala dikgopolo tše di rategago tša ditiro tša botho le bagwera ba babotse. Ditebogo tša rena di ya go Tatago rena yo lerato wa legodimong Jehofa, ka gore re na le lapa le bjalo le kopanego le le kgahlišago la barwarre lefaseng, gape re leboga go ba karolo ya lona!”

Ee, go tsenwa gare ga ditaba mo go bjalo ga go kgonege, gaešita le go letelwa masetla-pelong a mangwe le a mangwe a mohuta woo. Eupša mohlala o swanago le wo o bontšha gabotse thekgo yeo phuthego e ka e neago.

Bohlale bjo bo Tšwago Godimo

Ba bantši ba hweditše mothopo o mongwe wa thušo le matla ka phuthegong ya Bokriste. Ke eng seo? Dipuku tšeo di lokišeditšwego ke “molaki e a bôtêxaxo yo bohlale.” Tše di tumilego kudu gare ga tše ke dimakasine tša Morokami le Phafoga! E le gore di nee keletšo e nago le temogo le thuto e šomago, dipuku tše di ithekgile kudu bohlaleng bjo bo tšwago godimo bjo bo hwetšwago ka Beibeleng. (Psalme 119:​105) Tsebišo ya mangwalo e tlatšwa ke nyakišišo yeo e ka botwago le e kwalago mabapi le dihlogo tše swanago le kgateletšego ya monagano, go boela sekeng ka morago ga go swarwa gampe, mathata a sa fapa-fapanego a tša leago le a tša boiphedišo, ditlhohlo tšeo bafsa ba lebeletšanego le tšona le mathata a kgethegilego a dinageng tše di hlabologago. Go feta tšohle, dipuku tše di thekga tsela ya Modimo e le tsela e phalago tšohle ya bophelo.​—Jesaya 30:​20, 21.

Ngwaga o mongwe le o mongwe Mokgatlo wa Watch Tower o amogela mangwalo a dikete a tebogo. Ka mohlala, mabapi le Phafoga! lesogana la Russia le ngwadile se mabapi le sehlogo se se bolelago ka ga go ipolaya: “Ka baka la tshekamelo ya-ka ya kgateletšego, . . . ke ile ka nagana gantši ka go ipolaya. Sehlogo se se nthušitše go matlafatša tumelo ya-ka ya gore Modimo o tla nthuša go swaragana le mathata a-ka. O nyaka gore ke phele. Ke a mo leboga ka thekgo ya gagwe ye a mphilego yona ka sehlogo se.”

Ge e ba maphoto ao a sa kokobelego a mathata a lefase le a bonala a le šoro kudu go ka lebeletšanwa le ona, o ka kgonthišega gore go na le lefelo leo le šireletšegilego ka phuthegong ya Bokriste. Ka kgonthe, ge e ba leganata le le omilego la tshepedišo ya gona bjale ya dilo e se nago lerato le go nwa matla, o ka hwetša lefelo le nonnego le le neago matla mokgatlong wa Jehofa. Ka morago ga go hwetša thušo e bjalo le wena ka mo go swanago o ka boeletša maikwelo a mosadi wa Mokriste yoo a ilego a lebeletšana ka katlego le bolwetši bja monna wa gagwe bjo bo išago lehung gomme a ngwala gore: “Ka baka la lerato le tlhokomelo tšeo re di bontšhitšwego, ke ikwa eka Jehofa o re rwele bothateng bjo ka seatla sa gagwe. Ke leboga gakaakang go ba karolo ya mokgatlo o mobotse wa Jehofa!”

[Mengwalo ya tlase]

[Seswantšho go letlakala 26]

Re ka nea thušo e matlafatšago go bao ba babjago, bao ba hwetšwego gotee le ba bangwe