“Dimpho Tšeo E Lego Banna” Bakeng Sa Go Hlokomela Dinku Tša Jehofa

“Ó rotoxetše kwa xodimo, a thopolla mathopya, a nea batho dineô [“dimpho tšeo e lego banna,” NW ].”​—BA-EFESO 4:8.

1. Ke mantšu afe ao a ilego a bolelwa ke kgaetšedi wa Mokriste ka bagolo phuthegong ya gabo?

“KE LEBOGA kudu bakeng sa go re šetša ga lena. Go myemyela ga lena, botho bja lena, le go kgomega ga lena ke tša kgonthe. Ka mehla le dula le ikemišeditše go theetša le go abelana le rena mantšu a tšwago Beibeleng ao a re kgothatšago moyeng. Ke rapelela gore ke se ke ka le tšea gabohwefo.” A ke mantšu ao a ngwadilwego ke kgaetšedi wa Mokriste a a ngwalela bagolo phuthegong ya gabo. Go molaleng gore lerato leo le bontšhwago ke badiši ba šetšago ba Bakriste le be le mo kgomile pelo.​—1 Petro 5:​2, 3.

2, 3. (a) Go ya ka Jesaya 32:​1, 2, bagolo ba nago le kwelobohloko ba hlokomela bjang dinku tša Jehofa? (b) Ke neng moo mogolo a ka lebelelwago e le mpho?

² Bagolo ke tokišetšo e tšwago go Jehofa bakeng sa go hlokomela dinku tša gagwe. (Luka 12:​32; Johane 10:​16) Jehofa o rata dinku tša gagwe​—ge e le gabotse, o di rata kudu mo a di rekilego ka madi a bohlokwa a Jesu. Ka gona, ga go makatše ge Jehofa a kgahlišwa ke ge bagolo ba swara dinku tša gagwe ka lerato. (Ditiro 20:​28, 29) Hlokomela tlhaloso ya boporofeta ya go hlalosa bagolo ba goba “bakxôma”: “E tlo ba monna mo-ka-seêmaphefong, maôbô-puleng, nokana-lesehleng, moriti wa lentswê-lexolo naxeng ya lenyôra.” (Jesaya 32:​1, 2) Ee, ba swanetše go šireletša, ba lapološe le go homotša dinku tša gagwe. Ka gona, bagolo bao ba dišago mohlape ka kwelobohloko ba leka go phela go ya ka seo Modimo a se letetšego go bona.

³ Bagolo ba bjalo ka Beibeleng ba bolelwa e le “dimpho tšeo e lego banna.” (Ba-Efeso 4:8, NW) Ge o nagana ka mpho, o nagana ka selo seo se newago bakeng sa go thuša mo go nyakegago goba bakeng sa go thabiša motho yo a se amogelago. Mogolo a ka lebelelwa e le mpho ge a diriša bokgoni bja gagwe bakeng sa go nea thušo e nyakegago le go tsenya letsogo bakeng sa gore mohlape o thabe. A ka dira se bjang? Karabo e hwetšago mantšung a Paulo go Ba-Efeso 4:​7-16, e godiša tlhokomelo e lerato ya Jehofa bakeng sa dinku tša gagwe.

“Dimpho Tšeo e Lego Banna” ​—Go tšwa Kae?

4. Jehofa o “rotoxetše kwa xodimo” bjang e le go phethagatša Psalme 68:​18, gomme ke bomang bao e bego e le “dimpho ka sebopego sa banna”?

⁴ Paulo ge a be a diriša mantšu “dimpho tšeo e lego banna,” o be a tsopola Kgoši Dafida yo a bego a boletše ka Jehofa gore: “O rotoxetše kwa xodimo, O thopolla mathopya, O tšea dibexô tša batho (“dimpho ka sebopego sa banna,” NW).” (Psalme 68:​18) Ka morago ga ge ba-Isiraele ba bile Nageng ya Kholofetšo ka nywaga e itšego, Jehofa o ile a ‘rotogela’ ka tsela ya seswantšhetšo Thabeng ya Tsione gomme a dira Jerusalema mošate wa mmušo wa Isiraele gomme Dafida ya ba kgoši ya wona. Eupša ke bomang bao e bego e le “dimpho ka sebopego sa banna”? E be e le banna bao ba bego ba thopilwe nakong ya go fenywa ga naga. Ka morago go ile gwa dirwa gore a mangwe a mathopša a a hwetšagale go ba-Lefi bakeng sa go thuša ka modiro wa tabarenakeleng.​—Esera 8:20.

5. (a) Paulo o bontšha bjang gore Psalme 68:​18 e phethagala phuthegong ya Bokriste? (b) Jesu o ‘rotogetše godimo’ ka tsela efe?

⁵ Paulo lengwalong la gagwe leo a le ngwaletšego ba-Efeso o bontšha gore mantšu a mopsalme a phethagala ka tekanyo e kgolo phuthegong ya Bokriste. Paulo ge a bolela Psalme 68:​18 ka mantšu a gagwe o ngwadile gore: “E mongwê le e mongwê wa rena ó séditšwe ka kxauxêlô, ka tekanyô ya ba moo Kriste a re neilexo ka xôna. Xobane xo itšwe: Ò rotoxetše kwa xodimo, a thopolla mathopya, a nea batho dineô [“dimpho tšeo e lego banna,” NW].” (Ba-Efeso 4:​7, 8) Paulo mo o diriša psalme ye go Jesu e le moemedi wa Modimo. Jesu ‘o fentše lefase’ ka tsela ya gagwe ya tumelo. (Johane 16:​33) O ile a ba a fenya lehu le Sathane ka ge Modimo a mo tsošitše bahung. (Ditiro 2:​24; Ba-Hebere 2:​14) Ka 33 C.E., Jesu yo a tsošitšwego o ile a rotogela “xodimo xa maxodimo ohle”​—ka godimo-dimo ga dibopiwa tše dingwe ka moka tša legodimong. (Ba-Efeso 4:​9, 10; Ba-Filipi 2:​9-11) Jesu ka ge e le mofenyi o ile a tšea “mathopya” lenabeng. O dirile seo bjang?

6. Jesu yo a rotogetšego legodimong o ile a thoma bjang go senya ntlo ya Sathane go thoma ka Pentekoste ya 33 C.E., gomme o ile a dira’ng ka “mathopya”?

⁶ Jesu ge a be a le lefaseng o ile a bontšha matla a gagwe godimo ga Sathane ka go phološa bao ba dirilwego bahlanka ke batemona. Go be go le bjalo ka ge eka Jesu o hlasetše ntlo ya Sathane, a mo tlema gomme a thopa dithoto tša gagwe. (Mateo 12:​22-29) Anke o nagane feela, a tshenyo e kaakang yeo Jesu a bego a ka e dira gatee-tee ge a tsošitšwe gomme a gafetšwe “matla ka moka lexodimong le lefaseng”! (Mateo 28:​18) Go thoma ka Pentekoste 33 C.E., Jesu yo a rotogetšego legodimong e le moemedi wa Modimo o ile a thoma go senya ntlo ya Sathane ka go “thopolla mathopya”​—e lego banna bao e bego e le kgale ba le bohlankeng bja sebe le lehu e bile ba le ka tlase ga taolo ya Sathane. Ka go ithatela, “mathopya” a a ile a ba “bahlanka ba Kriste ba ba diraxo thatô ya Modimo ka pelo e rataxo.” (Ba-Efeso 6:6) Ge e le gabotse, Jesu o ile a ba lokolla taolong ya Sathane, gomme a ba nea phuthego e le “dimpho tšeo e lego banna” legatong la Jehofa. Nagana ka kgalefo ya Sathane e sa thušego selo ge ba be ba ubulwa pele ga gagwe!

7. (a) “Dimpho tšeo e lego banna” di hlankela maemong afe ka diphuthegong? (b) Ke sebaka sefe seo Jehofa a se neilego monna yo mongwe le yo mongwe yo a hlankelago e le mogolo?

⁷ Na re hwetša ‘dimpho tše bjalo tšeo e lego banna’ ka phuthegong lehono? Ee, re a di hwetša! Re di hwetša di hlankela e le bagolo, ba šoma ka thata e le ‘baebangedi, badiši le barutiši’ diphuthegong tše di fetago 87 000 tša batho ba Modimo lefaseng ka moka. (Ba-Efeso 4:​11) Sathane o tla thaba kudu ge ba swara mohlape gampe. Eupša leo ga se lebaka leo ka lona Modimo a ba gafetšego phuthego ka Kriste. Go e na le moo, Jehofa o neile banna ba bakeng sa gore phuthego e phele gabotse, gomme ba ikarabela go yena bakeng sa dinku tšeo ba di gafetšwego. (Ba-Hebere 13:​17) Ge e ba o hlankela o le mogolo, Jehofa o go neile sebaka se sebotse sa go ipontšha o le mpho goba tšhegofatšo go banabeno. O ka dira se ka go phetha mehuta e mene e bohlokwa ya boikarabelo.

Ge go Nyakega ‘go Lokišwa’

8. Ka moka ga rena re swanelwa ke go lokišwa ka ditsela dife ka dinako tše dingwe?

⁸ Sa pele, Paulo o re “dimpho tšeo e lego banna” di neilwe ‘gore bakgethwa ba lokišwe.’ (Ba-Efeso 4:​12, bapiša le PK.) Leina la Segerika leo le fetoletšwego e le ‘go lokišwa’ le šupa go “go lebantšha ka tshwanelo.” Ka ge re le batho ba sa phethagalago, ka moka ga rena re swanelwa ke go lokišwa nako le nako​—e le gore kgopolo ya rena, boemo bja rena bja kgopolo goba boitshwaro ‘di lebantšhwe ka tshwanelo’ gore di dumelelane le kgopolo le thato ya Modimo. Jehofa ka lerato o neile “dimpho tšeo e lego banna” bakeng sa go re thuša go dira ditokišo tše di nyakegago. Ba dira se bjang?

9. Mogolo a ka thuša bjang go lokiša nku yeo e fošitšego?

⁹ Ka dinako tše dingwe mogolo a ka kgopelwa gore a thuše nku yeo e fošitšego, e lego yoo mohlomongwe ‘a tšhogilego a wetše molatong.’ Mogolo a ka thuša bjang? Ba-Galatia 6:1 e re: “Le mo tsošê [‘le mo lokiše,’ NW] ka môya o bonôlô.” Ka gona ge mogolo a nea keletšo a ka se ke a omanya motho yo a dirilego phošo, gomme a diriša mantšu a bogale. Keletšo e swanetše go ba e kgothatšago, e sego gore e ‘tšhošetše’ yo a e newago. (2 Ba-Korinthe 10:9; bapiša le Jobo 33:7.) Motho a ka ba a šetše a ikwa a hlabja ke dihlong, ka gona modiši yo lerato o phema go nola motho yoo moko. Ge go le molaleng gore keletšo gaešita le kgalemelo e matla e tutuetšwa ke lerato e bile e newa ka lerato, go na le kgonagalo ya gore e lokiše kgopolo goba boitshwaro tša motho yo a fošitšego, ka go rialo ya mmušetša sekeng.​—2 Timotheo 4:2.

10. Go lokiša ba bangwe go akaretša eng?

¹⁰ Jehofa ka go nea “dimpho tšeo e lego banna” bakeng sa go re lokiša, o be a gopotše gore bagolo e be ba lapološago moyeng le bao ba swanelwago ke gore ba ekišwe ke batho ba gagwe. (1 Ba-Korinthe 16:​17, 18; Ba-Filipi 3:​17) Go lokiša ba bangwe ga go akaretše feela go phošolla bao ba gatago mogato o fošagetšego, eupša go bile go akaretša le go thuša batho ba botegago go kgomarela tseleng e nepagetšego.a Lehono ka ge go e-na le mathata a mantši gakaakaa ao a ka nyamišago, ba bantši ba nyaka kgothatšo gore ba swarelele. Ba bangwe mo gongwe ba ka nyaka thušo e lerato gore ba lokiše kgopolo ya bona gore e dumelelane le ya Modimo. Ka mohlala, Bakriste ba bangwe ba botegago ba katana le maikwelo a tseneletšego a go ikwa ba hlaelelwa goba go ikwa ba se na mohola. Batho ba bjalo “ba dipelo tše di tapilexo” mo gongwe ba ka nagana gore Jehofa le ka mohla a ka se ke a ba rata le gore gaešita le go iteka ga bona ka matla go hlankela Modimo le ka mohla go ka se amogelege go yena. (1 Ba-Thesalonika 5:​14) Eupša tsela ye ya go nagana ga e dumelelane le kamoo Modimo a ikwago ka gona e le ka kgonthe ka barapedi ba gagwe.

11. Bagolo ba ka dira’ng go thuša bao ba katanago le maikwelo a go ikwa ba se na mohola?

¹¹ Bagolo le ka dira’ng go thuša ba bjalo? Abelanang le bona ka botho bohlatse bja Mangwalo bja gore Jehofa o šetša yo mongwe le yo mongwe wa bahlanka ba gagwe, gomme le ba kgonthišetše gore ditemana tše tša Beibele di šoma go bona ka noši. (Luka 12:​6, 7, 24) Ba thušeng go bona gore Jehofa o ba ‘gogetše’ gore ba mo hlankele, ka gona o swanetše go ba a ba rata e le ka kgonthe. (Johane 6:​44) Ba kgonthišetšeng gore ga se bona ba nnoši​—bahlanka ba bantši ba botegago ba Jehofa ba ile ba ba le maikwelo a swanago. Moporofeta Eliya o kile a gateletšega kudu maikwelong mo a ilego a nyaka go hwa. (1 Dikxoši 19:​1-4) Bakriste ba bangwe ba tloditšwego lekgolong la pele la nywaga ba be ba ikwa ba ‘solwa’ ke dipelo tša bona ka noši. (1 Johane 3:​20, PK) Ke mo go homotšago go tseba gore batho ba botegago mehleng ya Beibele e be e le ba “fôkôlaxo bo-ka rena.” (Jakobo 5:​17) Gape le ka boeletša dihlogo tše di kgothatšago ka go Morokami le Phafoga! le batho ba nyamilego. Maiteko a lena a lerato a go tsošološa kholofelo ya batho ba bjalo a ka se ke a hlokomologwa ke Modimo yo a le neilego gore le be “dimpho tšeo e lego banna.”​—Ba-Hebere 6:10.

‘Go Aga’ Mohlape

12. Ke’ng seo se bontšhwago ke polelwana “xore mmele wa Kriste o axišwê,” gomme senotlelo se se bulago tsela ya go aga mohlape ke sefe?

¹² Sa bobedi, “dimpho tšeo e lego banna” di neilwe ka kgopolo ya gore “mmele wa Kriste o axišwê.” (Ba-Efeso 4:​12) Paulo mo o diriša seka-polelo. ‘Go agiša’ go re gopotša moago, gomme “mmele wa Kriste” o šupa go batho​—e lego ditho tša phuthego ya Bakriste ba tloditšwego. (1 Ba-Korinthe 12:​27; Ba-Efeso 5:​23, 29, 30) Bagolo ba swanetše go thuša banababo bona gore ba tie moyeng. Boikemišetšo bja bona ke ‘go agiša, e sego go šwalalanya’ mohlape. (2 Ba-Korinthe 10:8) Senotlelo se bulago tsela ya go aga mohlape ke lerato, ka gobane “se se axišaxo ké leratô.”​—1 Ba-Korinthe 8:1.

13. Go ba le kwelobohloko go bolela’ng, gomme ke ka baka la’ng go le bohlokwa gore bagolo ba bontšhe kwelobohloko?

¹³ Sebopego se sengwe sa lerato seo se thušago bagolo go aga mohlape ke kwelobohloko. Go ba le kwelobohloko go bolela go ipea maemong a ba bangwe​—go itswalanya le dikgopolo tša bona le maikwelo a bona le go naganela mafokodi a bona. (1 Petro 3:8) Ke ka baka la’ng go le bohlokwa gore bagolo ba be le kwelobohloko? Lebaka le legolo-golo ke gore Jehofa​—yo e lego yena a neago “dimpho tšeo e lego banna”—​ke Modimo wa kwelobohloko. Ge bahlanka ba gagwe ba tlaišega goba ba le bohlokong, o ba kwela bohloko. (Ekisodo 3:7; Jesaya 63:9) O naganela mafokodi a bona. (Psalme 103:​14) Ka gona, bagolo ba ka bontšha bjang kwelobohloko?

14. Bagolo ba ka bontšha kwelobohloko go ba bangwe ka ditsela dife?

¹⁴ Ge motho yo mongwe a e-tla go bona a nyamile, ba a theetša, ba amogela maikwelo a motho yoo. Ba leka go kwešiša tsela yeo banababo bona ba godilego ka yona, semelo sa bona le maemo a bona. Ke moka ge bagolo ba nea thušo e agago ya Mangwalo, dinku di tla hwetša go le bonolo go e amogela ka gobane e e-tšwa go badiši bao ba tlogago ba ba kwešiša e bile e le ba šetšago. (Diema 16:​23) Kwelobohloko gape e tutueletša bagolo gore ba naganele mafokodi a ba bangwe le maikwelo ao mo gongwe a ka bakwago ke seo. Ka mohlala, Bakriste ba bangwe ba botegago ba ka ikwa ba le molato ka gobane ba sa kgone go dira go gontši go hlankeleng Modimo, mohlomongwe ka baka la botšofadi goba go se ipshine mmeleng. Ka lehlakoreng le lengwe, ba bangwe mo gongwe ba ka nyaka kgothatšo gore ba kaonefatše bodiredi bja bona. (Ba-Hebere 5:​12; 6:1) Kwelobohloko e tla thuša bagolo go hwetša “mantšu a ratêxaxo” ao a agago ba bangwe. (Mmoledi 12:​10) Ge dinku tša Jehofa di agwa e bile di tutuetšwa, lerato la tšona la go rata Modimo le tla di tutueletša go dira sohle seo di ka se kgonago tabeng ya go mo hlankela!

Banna Bao ba Godišago Botee

15. Polelwana e rego “botee bya tumêlô” e bolela’ng?

¹⁵ Sa boraro, “dimpho tšeo e lego banna” di neilwe e le gore “ka moka re bê re fihlêlê botee bya tumêlô le bya tsebô ya xo tseba Morwa wa Modimo.” (Ba-Efeso 4:​13) Polelwana “botee bya tumêlô” e šupa botee, e sego feela bja ditumelo, eupša le bja badumedi. Ka gona, le ke lebaka le lengwe leo ka lona Modimo a re neilego “dimpho tšeo e lego banna”​—bakeng sa go godiša botee gare ga batho ba gagwe. Ba dira se bjang?

16. Ke ka baka la’ng go le bohlokwa gore bagolo ba boloke botee gare ga bona?

¹⁶ Sa pele, ba swanetše go kgomarela botee gare ga bona. Ge e ba badiši ba arogane, dinku di ka hlokomologwa. Nako e bohlokwa yeo e ka bego e dirišetšwa go diša mohlape e ka tšewa ka mo go sa swanelago ke diboka tše telele le dingangišano mabapi le ditaba tše nyenyane. (1 Timotheo 2:8) Bagolo ba ka no se dumelelane ka taba e nngwe le e nngwe yeo ba ka bago ba e ahla-ahla, ka gobane ke banna bao ba nago le dimelo tšeo di ka bago di fapane kudu. Go ba le botee ga go iletše go ba ga bona le dipono tše di fapanego goba gore ba di bolele ka tsela e leka-lekanego poledišanong ya go se bebe sefahlego. Bagolo ba boloka botee bja bona ka go theetšana ka tlhompho ka ntle le go ahlola e sa le pele. Le gona ge feela go se na molao wa motheo wa Beibele woo o robjago, yo mongwe le yo mongwe o swanetše go ikemišetša go ikokobeletša le go thekga phetho ya makgaola-kgang ya sehlopha sa bagolo. Moya wa go ineela o bontšha gore ba hlahlwa ke “bohlale byo bo tšwaxo xodimo,” bjoo bo nago le ‘kagišo le bonolo.’​—Jakobo 3:​17, 18.

17. Bagolo ba ka thuša bjang go boloka botee ka phuthegong?

¹⁷ Bagolo gape ba phafogela go godiša botee ka phuthegong. Ge ditutuetšo tše di bakago karogano​—tše bjalo ka lesebo le le gobatšago, tshekamelo ya go naganelana maikemišetšo a fošagetšego goba moya wa diphapano​—di bea khutšo kotsing, ba ikemišetša go nea keletšo e agago. (Ba-Filipi 2:​2, 3) Ka mohlala, bagolo ba ka ba ba lemoga batho bao ba ntšhago diphošo kudu goba bao ba nago le tshekamelo ya go tsentšha nko ditabeng tša ba bangwe, ka go rialo ya ba bafeane. (1 Timotheo 5:​13; 1 Petro 4:​15) Bagolo ba tla leka go thuša batho ba bjalo gore ba lemoge gore tsela ye e fapane le seo re se rutilwego ke Modimo le gore yo mongwe le yo mongwe o swanetše go “rwešwa morwalo e lexo wa xaxwe.” (Ba-Galatia 6:​5, 7; 1 Ba-Thesalonika 4:​9-12) Ba tla hlalosa gore Jehofa o tlogelela dilo tše dintši matswalong a yo mongwe le yo mongwe wa rena ba diriša Mangwalo, le gore ga go na motho yo a swanetšego go ahlola ba bangwe ka dilo tše bjalo. (Mateo 7:​1, 2; Jakobo 4:​10-12) Go swanetše go ba le moya wa go botana le go hlomphana ka phuthegong gore re hlankele ka botee. “Dimpho tšeo e lego banna” di re thuša go boloka khutšo ya rena le botee ka go nea keletšo ya Mangwalo ge e nyakega.​—Ba-Roma 14:19.

Go Šireletša Mohlape

18, 19. (a) “Dimpho tšeo e lego banna” di re šireletša go bomang? (b) Ke kotsi efe e nngwe yeo dinku di swanelwago ke go šireletšwa go yona, gomme bagolo ba gata mogato ofe bakeng sa go šireletša dinku?

¹⁸ Sa bone, Jehofa o nea “dimpho tšeo e lego banna” bakeng sa go re šireletša gore re se ke ra tšewa-tšewa “ke phefô e nngwê le e nngwê ya thutô ka xo fora-foretšwa ke batho, re xokwa ke maanô a xo re aroša.” (Ba-Efeso 4:​14) Lentšu la mathomo bakeng sa “xo fora-foretšwa” go thwe le bolela “go radia ditaeseng” goba “go kgona go bapadiša ditaese.” Na seo ga se re gopotše kamoo bahlanogi ba dirišago mahlale ka gona? Ba fetoša Mangwalo ka boradia e le go leka go goketša Bakriste ba therešo gore ba tlogele tumelo ya bona, ba diriša dipolelo tše boreledi. Bagolo ba swanetše go phafogela “diphiri [tše bjalo] tše di jaxo batho.”​—Ditiro 20:​29, 30.

¹⁹ Dinku tša Jehofa di swanetše go šireletšwa le dikotsing tše dingwe. Dafida modiši wa bogologolo o ile a šireletša mohlape wa tatagwe ka sebete go dibata. (1 Samuele 17:​34-36) Le lehono go ka tšwelela maemo ao go ona badiši ba tshwenyegago ba Bakriste ba swanelwago ke go bontšha sebete e le gore ba šireletše mohlape go batho le ge e le bafe bao ba ka swarago dinku tša Jehofa gampe goba ba di gatelela, kudu-kudu bao ba hlaselegago gabonolo. Bagolo ba tla akgofela go kgaola bao ba dirago dibe ka boomo ka phuthegong le bao ba dirišago boradia, bofora le maano-mabe ka boomo e le gore ba phegelele bokgopo.b​—1 Ba-Korinthe 5:​9-13; bapiša le Psalme 101:7.

20. Ke ka baka la’ng re ka ikwa re šireletšegile tlhokomelong ya “dimpho tšeo e lego banna”?

²⁰ Re leboga gakaakang bakeng sa “dimpho tšeo e lego banna”! Re ka ikwa re šireletšegile tlhokomelong ya bona e lerato, ka gobane ba re lokiša ka lerato, ba re aga ka lerato, ba boloka botee bja rena ka ntle le tika-tiko gomme ba re šireletša ka sebete. Eupša “dimpho tšeo e lego banna” di swanetše go lebelela bjang tema yeo di e kgathago ka phuthegong? Le gona re ka bontšha bjang gore re a di leboga? Dipotšišo tše di tla ahla-ahlwa sehlogong se se latelago?

[Mengwalo ya tlase]

Na o a Gopola?

◻ “Dimpho tšeo e lego banna” ke bomang, gomme ke ka baka la’ng Modimo ka Kriste a di neile phuthego?

◻ Bagolo ba phethagatša bjang boikarabelo bja bona bja go lokiša mohlape?

◻ Bagolo ba ka dira’ng gore ba age badumedi-gotee le bona?

◻ Bagolo ba ka boloka bjang botee bja phuthego?

[Seswantšho go letlakala 10]

Kwelobohloko e thuša bagolo go kgothatša bao ba nyamilego

[Seswantšho go letlakala 10]

Botee gare ga bagolo bo godiša botee ka phuthegong