Go Leboga “Dimpho Tšeo E Lego Banna”
“Tsebang bao ba ba Le swaretšexo modirô [“ba šomago ka thata gare ga lena,” NW ]; . . . Le ba xodišê sa ruri ka leratô, ka baka la modirô woo wa bôná.”—1 BA-THESALONIKA 5:12, 13.
1. Go ya ka Ditiro 20:35, go nea go na le matla afe? Bontšha.
“LEŠEXO la monei le phala la monewa.” (Ditiro 20:35) Na o ka gopola lekga la mafelelo ge o be o bona therešo ya mantšu ao a Jesu? Mohlomongwe e bile nakong ya ge o be o nea motho yo o mo ratago e le ka kgonthe mpho. O be o e kgethile ka kelohloko, ka gobane o be o nyaka gore e be selo seo moratiwa wa gago a bego a tla se rata. Sefahlego se se edilego sa motho yo o mo ratago—se ile sa ruthetša pelo ya gago gakaakang! Go nea ke pontšho ya lerato ge go dirwa ka maikemišetšo a mabotse, gomme go bontšha lerato go na le matla a go re dira gore re thabe.
2, 3. (a) Ke ka baka la’ng go ka thwe ga go na motho yo a thabilego go feta Jehofa, gomme tokišetšo ya “dimpho tšeo e lego banna” e ka mo thabiša bjang pelo? (b) Ke’ng seo re ka se ratego go se dira ka mpho e tšwago go Modimo?
2 Ka gona, ke mang yo e ka bago yo a thabilego go feta Jehofa, Monei wa “’neô tšohle tše botse, le ’mphô tšôhle di tletšexo”? (Jakobo 1:17; 1 Timotheo 1:11) Mpho e nngwe le e nngwe yeo a e neago e tutuetšwa ke lerato. (1 Johane 4:8) Go tloga go le bjalo le ka mpho yeo Modimo a e neilego phuthego ka Kriste—e lego “dimpho tšeo e lego banna.” (Ba-Efeso 4:8, NW) Tokišetšo ya go nea bagolo gore ba hlokomele mohlape ke pontšho ya lerato le le tseneletšego la Modimo la go rata batho ba gagwe. Banna ba ba kgethwa ka kelohloko—ba swanelwa ke go fihlelela ditshwanelego tša Mangwalo. (1 Timotheo 3:1-7; Tito 1:5-9) Ba a tseba gore ba swanetše go ‘šetša mohlape,’ ka gobane ke ka go dira bjalo mo dinku di tla bago le lebaka la go ikwa di leboga badiši ba bjalo ba lerato. (Ditiro 20:29; Psalme 100:3) Ge Jehofa a bona gore dinku tša gagwe di na le dipelo tšeo di tletšego tebogo e bjalo, ruri pelo ya gagwe e swanetše go ba e thaba!—Diema 27:11.
3 Ruri re ka se rate go hwefola mohola wa mpho e tšwago go Modimo; le gona re ka se ke ra nyaka go ba ba sa lebogego dimpho tša gagwe. Ka gona go rotoga dipotšišo tše pedi: Bagolo ba swanetše go lebelela bjang kabelo ya bona ka phuthegong? Le gona mohlape ka moka o ka bontšha bjang gore o leboga “dimpho tšeo e lego banna”?
‘Re Badirišani ba Lena’
4, 5. (a) Paulo o swantšha phuthego le eng, gomme ke ka baka la’ng se e le seswantšho se se swanetšego? (b) Seswantšho sa Paulo se bontšha’ng ge e le ka tsela yeo re swanetšego go lebelelana le go swarana ka yona?
4 Jehofa o gafetše “dimpho tšeo e lego banna” tekanyo e itšego ya matla a taolo ka phuthegong. Go ba gona, bagolo ga ba nyake go diriša matla a bona a taolo gampe, eupša ba bile ba tseba gore go bonolo kudu gore ba dire bjalo ka ge e le batho ba sa phethagalago. Ka gona ba swanetše go itebelela bjang ge ba bapišwa le mohlape ka moka? Nagana ka seswantšho seo moapostola Paulo a se dirišitšego. Paulo ka morago ga go ahla-ahla lebaka leo ka lona “dimpho tšeo e lego banna” di neilwego o ngwadile gore: “Re bê ba therešô leratong, ’me re fêlê re tiêlêla dilong tšohle, rè le dithô tša Kriste, e lexo Yêna hlôxô, hlôxô e bušaxo mmele wohle, e kôpanyaxo dithô tšohle tša holana, sethô sa dira modirô wa sôna wo o se lebanexo, sa phediša mmele sa o bopa, sa o axiša ka leratô.” (Ba-Efeso 4:15, 16) Ka gona, Paulo o swantšha phuthego, go akaretša bagolo le ditho tše dingwe le mmele wa motho. Ke ka baka la’ng se e le seswantšho se se swanetšego?
5 Mmele wa motho o dirilwe ka ditho tše dintši tše di sa swanego eupša o na le hlogo e tee feela. Lega go le bjalo, ga go na setho seo se sego bohlokwa mmeleng—e ka ba mošifa, mogala-tšhika goba mothapo. Setho se sengwe le se sengwe se bohlokwa, gomme se tlaleletša ka se sengwe gore mmele ka moka e be o phetšego gabotse le o mobotse. Ka mo go swanago, phuthego e bopilwe ka ditho tše dintši tše di sa swanego, eupša setho se sengwe le se sengwe—go sa šetšwe gore ke mofsa goba ke motho yo mogolo, se tiile goba se a fokola—se ka tlaleletša ka se sengwe bophelong bjo bobotse bja moya le botseng bja phuthego. (1 Ba-Korinthe 12:14-26) Ga go le o tee yo a swanetšego go ikwa e le lefeela la go lahlwa. Ka lehlakoreng le lengwe, ga go le o tee yo a swanetšego go ikwa a phagametše ba bangwe, ka gobane ka moka ga rena—badiši le dinku ka mo go swanago—re karolo ya mmele, gomme go na le hlogo e tee feela, e lego Kriste. Ka go rialo, Paulo o thala seswantšho se sebotse sa lerato, tlhokomelo le tlhompho tšeo re swanetšego go di bontšhana. Go lemoga se go thuša bagolo gore ba lebelele ka boikokobetšo le teka-tekano kabelo ya bona ka phuthegong.
6. Paulo o ile a bontšha bjang moya wa boikokobetšo gaešita le ge a be a e-na le matla a taolo a boapostola?
6 ‘Dimpho tše tšeo e lego banna’ ga di nyake go laola maphelo goba tumelo tša barapedi-gotee le bona. Paulo gaešita le ge a be a e-na le matla a taolo a boapostola o ile a botša phuthego ya Korinthe ka boikokobetšo gore: “Xa se xo re re babuši ba tumêlô; ké xo re re badiriši ba lethabô la lena; xobane Le eme tumelong.” (2 Ba-Korinthe 1:24) Paulo o be a sa kganyoge go laola tumelo le tsela ya bophelo ya banababo. Ruri o be a sa bone go nyakega gore a dire bjalo, ka gobane o ile a bontšha kgodišego ya gore e be e šetše e le banna le basadi ba botegago bao ba bego ba le ka mokgatlong wa Jehofa ka gobane ba be ba rata go dira seo se lokilego. Ka gona, Paulo ge a be a bolela ka yena le mosepedišani wa gagwe, e lego Timotheo, ge e le gabotse o be a re: ‘Go šoma le lena bakeng sa go hlankela Modimo ka lethabo ke modiro wa rena.’ (2 Ba-Korinthe 1:1) A moya wa boikokobetšo!
7. Bagolo bao ba ikokobeditšego ba lemoga eng ka kabelo ya bona ka phuthegong, gomme ba na le kgodišego efe ka badiri-gotee le bona?
7 “Dimpho tšeo e lego banna” di na le modiro o swanago lehono. Ke ‘badirišani ba lethabo la rena.’ Bagolo ba ikokobeditšego ba lemoga gore ga se bona bao ba swanetšego go dira phetho ka tekanyo ya bogolo bja modiro woo ba bangwe ba ka kgonago go o dira tirelong ya Modimo. Ba a tseba gore gaešita le ge ba ka kgothaletša ba bangwe go katološa goba go kaonefatša bodiredi bja bona, fela tirelo ya go direla Modimo e swanetše go tšwa pelong e ratago. (Bapiša le 2 Ba-Korinthe 9:7.) Ba kgodišegile gore ge e ba badiri-gotee le bona ba thabile ba tla dira sohle seo ba ka se kgonago. Ka go rialo kganyogo ya bona e tšwago pelong ke gore ba thuše banababo bona go ‘hlankela Morena ba thabile.’—Psalme 100:2.
Go Thuša Bohle Gore ba Hlankele ka Lethabo
8. Ditsela tše dingwe tšeo ka tšona bagolo ba ka thušago banababo bona gore ba hlankele Jehofa ka lethabo ke dife?
8 Bagolo, le ka thuša bjang banababo lena gore ba hlankele ka lethabo? Le ka kgothatša ka mohlala. (1 Petro 5:3) Dirang gore phišego ya lena le lethabo la lena bodireding di bonale, gomme ba bangwe ba ka kgothatšega gore ba ekiše mohlala wa lena. Retang ba bangwe bakeng sa maiteko a bona a dirwago ka pelo ka moka. (Ba-Efeso 4:29) Theto e borutho le e tšwago pelong e thuša ba bangwe gore ba ikwe ba e-na le mohola e bile ba nyakega. E kgothaletša dinku gore di nyake go dira sohle seo di ka se kgonago gore di hlankele Modimo. Phemang go bapiša ka mo go sa swanelago. (Ba-Galatia 6:4) Go bapiša mo go bjalo go ka nyamiša ba bangwe go e na le go ba tutueletša go kaonefatša. Ka ntle le moo, dinku tša Jehofa ke batho ka o tee ka o tee—bao ba nago le maemo a sa swanego le bokgoni bjo bo sa swanego. Ka go swana le Paulo, bontšhang go holofela banababo lena. Lerato “le dumêla tšohle,” ka gona re dira gabotse ge re dumela gore banababo rena ba rata Modimo gomme ba nyaka go mo kgahliša. (1 Ba-Korinthe 13:7) Ge le ‘godiša ba bangwe,’ le ba dira gore ba ntšhe ka ga tšhwene. (Ba-Roma 12:10) Kgodišegang gore ge dinku di kgothatšwa e bile di lapološwa, bontši bo tla dira sohle seo bo ka se kgonago go hlankeleng Modimo, gomme bo tla thabišwa ke tirelo yeo.—Mateo 11:28-30.
9. Ke go lebelela bagolo-gotee le yena bjang mo go tla thušago mogolo yo mongwe le yo mongwe go hlankela ka lethabo?
9 Go itebelela ka boikokobetšo o le ‘modirišani’ go tla go thuša go hlankela ka lethabo le go leboga dimpho tša moswana-noši tša bagolo-gotee le wena. Mogolo yo mongwe le yo mongwe o na le ditalente tša gagwe le bokgoni bja gagwe tšeo a ka di dirišetšago go hola phuthego. (1 Petro 4:10) Yo mongwe a ka ba a e-na le mpho ya go ruta. Yo mongwe e ka ba e le morulaganyi yo a nago le bokgoni. Yo mongwe gape e ka ba e le yo a batamelegago ka mo go kgethegilego ka baka la go ba ga gagwe yo botho le go ba le kwelobohloko. Therešo ke gore ga go na mogolo yo a nago le mpho e nngwe le e nngwe ka tekanyo e swanago. Na go ba le mpho e itšego—a re re, mpho ya go ruta—go dira gore mogolo yo mongwe a phagamele yo mongwe? Le gatee! (1 Ba-Korinthe 4:7) Ka lehlakoreng le lengwe, ga go nyakege gore re hufegele mpho yeo yo mongwe a nago le yona goba gore re ikwe re nyatšega ge bokgoni bja mogolo yo mongwe bo mo tlišetša theto go tšwa go ba bangwe. Gopola gore le wena o na le dimpho tšeo Jehofa a di bonago go wena. Le gona a ka go thuša go hlagolela dimpho tšeo gomme wa di dirišetša go hola banabeno.—Ba-Filipi 4:13.
‘E-Bang ba Kwago le ba Ikokobeditšego’
10. Ke ka baka la’ng e le mo go swanetšego gore re bontšhe tebogo bakeng sa “dimpho tšeo e lego banna”?
10 Ge re amogela mpho, go bontšha tebogo ge e se mokgwa ke molao. Ba-Kolose 3:15 e re: “Le bê baleboxi.” Ka gona, go thwe’ng ka “dimpho tšeo e lego banna,” e lego mpho e bohlokwa yeo Jehofa a re neilego yona? Ke therešo gore kudu-kudu re leboga Jehofa, Monei wa Dimpho yo a fago kudu. Eupša go thwe’ng ka “dimpho tšeo e lego banna” ka botšona? Re ka bontšha bjang gore re a di leboga?
11. (a) Re ka bontšha bjang tebogo ya rena bakeng sa “dimpho tšeo e lego banna”? (b) Polelwana e rego ‘e-bang ba kwago’ le e rego ‘e-bang ba ikokobetšago’ di bolela’ng?
11 Re ka bontšha tebogo ya rena ya go leboga “dimpho tšeo e lego banna” ka go akgofela go kwa keletšo ya bona le diphetho tša bona tše di theilwego Beibeleng. Beibele e re eletša ka gore: “Kwang baruti ba lena, Le laiwê ke bôná [“le ikokobeletše bona,” NW], xobane ba diša meôya ya lena; xobane ba tlo sekišwa se ba Le dirilexo sôna. Ba kweng, xore ba dirê bà thabile, e sexo ka diphêxêlô; xobane xo ba diriša ka mokxwa woo xo ka se Le hole selô.” (Ba-Hebere 13:17) Hlokomela gore ga se ra swanela go ba feela ‘ba kwago,’ eupša gape re swanetše go ‘ikokobeletša’ bao ba etelelago pele. Lentšu la Segerika bakeng sa ‘e-ba yo a ikokobetšago’ ka go lebanya le bolela gore ‘ineeleng ka tlase ga.’ Seithuti sa Beibele R. C. H. Lenski ge a bolela ka dipolelwana ‘go kwa’ le ‘go ikokobetša,’ o re: “Motho o kwa ge a dumelelana le seo a botšwago gore a se dire, a kgodišegile ka go nepagala ga sona le go ba ga sona le mohola; motho o ineela . . . ge a e-na le kgopolo e fapanego.” Ge re kwešiša e bile re dumelelana le tlhahlo ya bao ba etelelago pele, go kwa go ka itlela feela. Eupša go thwe’ng ge e ba re sa kwešiše lebaka la phetho e itšego?
12. Ke ka baka la’ng re swanetše go ba ba ikokobeditšego goba ba ineelago gaešita le ge re sa kwešiše ka mo go tletšego lebaka leo ka lona go tšerwego phetho e itšego?
12 Mo ke mo go ka nyakegago gore re ikokobetše goba gore re ineele. Ka baka la’ng? Lebaka ke gore re swanetše go holofela gore banna ba bao ba swanelegago moyeng ba re kganyogela tšeo di re holago kudu. Ka ntle le moo, ba tseba gabotse gore ba swanetše go ikarabela go Jehofa bakeng sa dinku tšeo ba gafetšwego gore ba di hlokomele. (Jakobo 3:1) Go okeletša moo, re dira gabotse ge re gopola gore mo gongwe re ka ba re sa tsebe dintlha ka moka tša khupamarama tšeo di ba lebišitšego phethong yeo e theilwego go seo se tsebjago.—Diema 18:13.
13. Ke’ng seo se ka re thušago gore re be ba ikokobeditšego ge go tliwa diphethong tša boahlodi tša bagolo?
13 Go thwe’ng ka go ikokobetša ge go tliwa diphethong tša boahlodi? Ke therešo gore se se ka no se be bonolo, kudu-kudu ge e ba go dirilwe phetho ya go kgaola motho yo re mo ratago—motswalo goba mogwera wa pelo-bohloko. Mo le gona go kaone kudu go ikokobeletša kahlolo ya “dimpho tšeo e lego banna.” Ba boemong bja go se bebe sefahlego go feta kamoo rena re ka bago ka gona, gomme ba ka ba ba tseba ditherešo tše oketšegilego go feta rena. Banababo rena ba gantši ba kwešwa bohloko ke diphetho tše bjalo; go ‘ahlola ka go direla Jehofa’ ke boikarabelo bjo bo dirago motho gore a naganišiše. (2 Koronika 19:6) Ba dira boiteko bjohle gore ba bontšhe kgaugelo, ka gobane ka mehla ba gopola gore Modimo ke “molebaledi.” (Psalme 86:5) Eupša gape ba swanetše go boloka phuthego e hlwekile, gomme Beibele e laela gore ba kgaole modiri wa bobe yo a sa itsholego. (1 Ba-Korinthe 5:11-13) Mabakeng a mantši modiri wa bobe ka boyena o amogela phetho. Kgalemelo e ka ba e le sona selo seo a se nyakago gore a hlaphogelwe kgopolong. Ge e ba rena bao re mo ratago re ikokobetša ge go tliwa phethong, ka go rialo re ka ba re mo thuša gore a holwe ke tayo.—Ba-Hebere 12:11.
“Le ba Xodišê sa Ruri”
14, 15. (a) Go ya ka 1 Ba-Thesalonika 5:12, 13, ke ka baka la’ng bagolo ba swanelwa ke kgodišo ya rena? (b) Ke ka baka la’ng go ka thwe bagolo ‘ba šoma ka thata gare ga rena’?
14 Gape re ka bontšha go leboga ga rena “dimpho tšeo e lego banna” ka go ba bontšha tlhompho. Paulo ge a ngwalela phuthego ya Thesalonika, o eleditše ditho tša yona ka gore: “Tsebang bao ba ba Le swaretšexo modirô [“bao ba šomago ka thata gare ga lena,” NW]; ba e lexo baxolo ba lena Moreneng ba xo Le eletša. Le ba xodišê sa ruri ka leratô, ka ’baka la modirô woo wa bôná.” (1 Ba-Thesalonika 5:12, 13) “Bao ba šomago ka thata”—na seo ga se hlalose bagolo ba ineetšego bao ba ikgafelago rena ka go hloka boithati? Ka nakwana, nagana ka boikarabelo bjo boima bjoo banababo rena ba ba ba rategago ba bo rwalago.
15 Mabakeng a mantši ke banna ba malapa bao ba swanelwago ke go šoma mošomo wa boiphedišo e le gore ba fepe malapa a bona. (1 Timotheo 5:8) Ge e ba mogolo a e-na le bana, bana ba ba nyaka nako le tlhokomelo tša tatago bona. Mo gongwe go ka nyakega gore a ba thuše ka mošomo wa bona wa sekolo, gotee le go ba rulaganyetša nako e itšego gore ba diriše matla a bona a bofsa boitapološong bjo bo agago. (Mmoledi 3:1, 4) Sa bohlokwa kudu, o hlokomela dinyakwa tša moya tša lapa la gagwe, o swara thuto ya lapa ya Beibele ka mehla, o šoma le bona bodireding bja tšhemo le go ya le bona dibokeng tša Bokriste. (Doiteronomio 6:4-7; Ba-Efeso 6:4) Anke re se lebale gore go okeletša boikarabelong bjo bjoo ba bantši ba rena re nago le bjona, bagolo ba na le mediro e oketšegilego: go lokišeletša dikarolo tša diboka, go dira maeto a bodiši, go hlokomela katlego ya moya ya phuthego, gomme ge go nyakega go swaragana le ditaba tša boahlodi. Ba bangwe ba swara boikarabelo bjo bo oketšegilego mabapi le dikopano tša tikologo, dikopano tša selete, go agwa ga Diholo tša Mmušo le Dikomiti tša go Hloma Kwano le Dipetlele. Ruri bana ba babo rena “ba šoma ka thata”!
16. Hlalosa ditsela tšeo ka tšona re ka bontšhago go naganela bagolo.
16 Re ka bontšha bjang gore re a ba naganela? Seema sa Beibele se re: “Lentšu la xo tla lebakeng la xôna, ké lôna le le botse.” (Diema 15:23; 25:11) Ka gona, mantšu a tebogo e tšwago pelong le kgothatšo a ka ba bontšha gore ga re tšee modiro wa bona o thata gabohwefo. Le gona, re swanetše go ba bao ba bontšhago teka-tekano ka seo re se letelago go bona. Ka lehlakoreng le lengwe, re swanetše go ikwa re lokologile go ka ya go bona bakeng sa thušo. Go ka ba le dinako tšeo ka tšona ‘pelo ya rena e tlaletšwego’ gomme re nyaka kgothatšo, tlhahlo goba keletšo ya Mangwalo, go tšwa go bao ba ‘tsebago go ruta’ Lentšu la Modimo. (Psalme 55:4; 1 Timotheo 3:2) Ka nako e swanago, re swanetše go lemoga gore ke tekanyo e itšego feela ya nako yeo mogolo a ka kgonago go re nea yona, ka gobane a ka se hlokomologe dinyakwa tša lapa la gagwe goba tša ba bangwe ka phuthegong. Ka ge re ‘kwela bana ba babo rena bao ba šomago ka thata bohloko,’ re ka se ba nyake dilo tše di fetago tšeo ba ka di kgonago. (1 Petro 3:8) Go e na le moo, anke re bontšheng tebogo bakeng sa nako le ge e le efe le tlhokomelo tšeo ba ka kgonago go re nea tšona.—Ba-Filipi 4:5.
17, 18. Ke boikgafo bofe bjo bo dirwago ke basadi ba bantši bao banna ba bona e lego bagolo, gomme re ka bontšha bjang gore ga re tšee dikgaetšedi tše tše di botegago gabohwefo?
17 Go thwe’ng ka basadi ba bagolo? Na le bona ga ba swanelwe ke gore re ba naganele? Go feta moo, ba abelana banna ba bona le phuthego. Se gantši se nyaka gore ba ikgafe. Ka dinako tše dingwe, bagolo ba swanelwa ke gore ba fetše diiri tša mantšiboa ba hlokomela ditaba tša phuthego mola go sego bjalo ba be ba ka ba ba fetša nako le malapa a bona. Diphuthegong tše dintši basadi ba botegago ba Bakriste ba dira boikgafo bjo bo bjalo ka go rata e le gore banna ba bona ba ka hlokomela dinku tša Jehofa.—Bapiša le 2 Ba-Korinthe 12:15.
18 Re ka bontšha bjang gore ga re tšee dikgaetšedi tše tše di botegago tša Bakriste gabohwefo? Ruri re ka dira se ka go se nyake mo gontši kudu go banna ba bona. Eupša le gona anke re se ke ra lebala matla a mantšu a bonolo a tebogo. Diema 16:24 e re: “Polêlô tše di ratêxaxo ké todi ya dinose; di natefêla pelo, le mmele di a tsoša.” Ela hloko phihlelo ye. Ka morago ga seboka sa Bokriste, banyalani ba ile ba ya go mogolo gomme ba kgopela go bolela le yena ka morwa wa bona yo a lego mahlalagading. Ge mogolo a be a bolela le banyalani ba, mosadi wa gagwe o be a letile ka go se fele pelo. Ka morago ga moo, mma yoo o ile a ya go mosadi wa mogolo gomme a re: “Ke rata go go leboga bakeng sa nako yeo monna wa gago a iphilego yona bakeng sa go thuša lapa la-ka.” Mantšu ao a bonolo a mabose a tebogo ruri a ile a kgoma mosadi yoo wa mogolo pelo.
19. (a) Bagolo ba phetha maikemišetšo afe ka potego e le sehlopha? (b) Ke’ng seo ka moka ga rena re swanetšego go ikemišetša go se dira?
19 Tokišetšo ya gore bagolo ba hlokomele dinku ke e nngwe ya ‘dineo tše botse’ tša Jehofa. (Jakobo 1:17) Aowa, banna ba ga se ba phethagala; ba dira diphošo go swana le rena ka moka. (1 Dikxoši 8:46) Lega go le bjalo, bagolo e le sehlopha ka diphuthegong lefaseng ka bophara, ka potego ba phetha boikarabelo bjo Jehofa a bego a ba gopoletše bjona—e lego, go lokiša mohlape, go o aga, go o dira gore o dule o e-na le botee le go o šireletša. Eka mogolo yo mongwe le yo mongwe a ka ikemišetša go tšwela pele a hlokomela dinku tša Jehofa ka lerato, ka go rialo a ipontšha e le mpho goba tšhegofatšo go banababo. Le gona, anke ka moka ga rena re ikemišetše go bontšha tebogo bakeng sa “dimpho tšeo e lego banna” ka go ba bao ba kwago le bao ba ikokobeletšago bona le ka go bontšha tlhompho bakeng sa mošomo wa bona o thata. Re ka leboga gakaakang gore Jehofa ka lerato o neile banna bao ge e le gabotse ba rego go dinku tša gagwe: ‘Go le thuša go hlankela Modimo ka lethabo ke modiro wa rena’!
O be o tla Araba Bjang?
◻ Ke ka baka la’ng phuthego e ka swantšhwa ka mo go swanetšego le mmele?
◻ Bagolo ba ka thuša bjang banababo bona go hlankela Jehofa ka lethabo?
◻ Ke ka baka la’ng re se ra swanela go ba ba kwago feela, eupša gape re swanetše go ba ba ikokobeletšago bao ba re etelelago pele?
◻ Re ka bontšha go naganela bagolo ka ditsela dife?
[Seswantšho go letlakala 16]
Bagolo, retang ba bangwe bakeng sa maiteko a bona a moya ka moka
[Seswantšho go letlakala 17]
Bagolo ba ka thuša ditho tša lapa le ba bangwe go hlankela ka lethabo ka mohlala wa bona wa phišego bodireding
[Seswantšho go letlakala 18]
Re leboga bagolo ba rena bao ba šomago ka thata!