Itlhatsele o Itokišitše!

“Le itlhatsele le le ba itokišitšego, gobane Morwa wa motho o tla ka nako yeo le sa e naganego.”—MAT. 24:44.

1, 2. (a) Ke ditiragalo dife tšeo go boletšwego ka tšona e sa le pele boporofeteng bja Beibele tšeo di ka swantšhwago le go hlaselwa ke lepogo? (b) Tlhaselo e tlago e go kgoma bjang?

KA NYWAGA e mentši, sebapadi se se tumilego sa sethaleng se be se kgahliša babogedi ka go bapala ka khutšo le mapogo ao se a tlwaeditšego. Se itše: “Ge phoofolo e go bota, o kwa eka o filwe mpho e botse kudu lefaseng.” Eupša ka October 3, 2003, seo se ile sa fetoga. Ka lebaka leo le sa tsebjego, e nngwe ya diphoofolo tša sebapadi seo, lepogo la sona le lešweu la boima bja dikhilograma tše 172, le ile la se hlasela. Tlhaselo yeo e be e se ya letelwa e bile sebapadi se se be se sa itlhama.

² Ke mo go kgahlišago gore Beibele e bolela e sa le pele ka tlhaselo ya “sebata” gomme re swanetše go dula re itokišitše. (Bala Kutollo 17:15-18.) Sebata se se hlasela mang? Se se makatšago ke gore lefase la Diabolo le tšwa diripa tše pedi. Sebata sa mmala o mohwibiduhwibidu se emela Ditšhaba tše Kopanego gomme “dinaka tše lesome” di emela mebušo ka moka ya dipolitiki. Di tla hlanogela Babilona o Mogolo wo o swanago le mogweba-ka-mmele, mmušo wa lefase wa bodumedi bja maaka, gomme tša o fediša o šoro. Se se tla direga neng? Ga re tsebe letšatši le ge e le iri. (Mat. 24:36) Seo re se tsebago ke gore se tla direga ka iri yeo re sa e naganego le gore nako e šetšego pele ga tlhaselo ye e fokoditšwe. (Mat. 24:44; 1 Bakor. 7:29) Ka gona, ke gabohlokwa gore re dule re itokišitše moyeng gore ge tlhaselo yeo e fihla gomme Kriste a etla bjalo ka Mophethi wa dikahlolo, a tle a itlhatsele e le Mophološi wa rena! (Luka 21:28) Gore re kgone go dula re itokišitše, re ka ithuta mohlaleng wa bahlanka ba Modimo bao ba botegago bao ba ilego ba itlhatsela ba itokišitše gomme ba bile dihlatse tše di bonego ka mahlo tša go phethagatšwa ga dikholofetšo tša Modimo. Na re tla naganišiša ka diphihlelo tše tša kgonthe?

Itlhatsele o Itokišitše—Bjalo ka Noa

3. Ke maemo afe ao a ilego a dira gore Noa a lebeletšane le tlhohlo ya go hlankela Modimo ka potego?

³ Noa o ile a itlhatsela a itokišitše gore a bone go phethagatšwa ga dikholofetšo tša Modimo, go sa šetšwe maemo a mabe ao a bego a aparetše lefase mehleng ya gagwe. Akanya ka ditlhohlo tšeo Noa a ilego a lebeletšana le tšona ge barongwa ba marabele ba be ba le ka sebopego sa batho gomme ba robala le basadi ba babotse! Ditswalano tše tšeo e sego tša tlhago di ile tša dira gore go belegwe ditšitširipa, “bagale” bao ba ilego ba diriša matla a bona a magolo go kweša ba bangwe bohloko. (Gen. 6:4) Akanya ka bošoro bjo bo ilego bja ba gona ge dinatla tše di be di tsoša moferefere kae le kae mo di yago gona. Mafelelong, bokgopo bo ile bja ata gomme tsela ya motho ya go nagana le yeo a itshwarago ka yona e ile ya ba e mpe kudu. Ke moka, Mmuši Morena Jehofa o ile a ntšha taelo yeo e ilego ya swaya mathomo a phedišo ya lefase leo la batho bao ba sa mmoifego.—Bala Genesi 6:3, 5, 11, 12.a

4, 5. Maemo a mehleng yeno a swana bjang le a mehleng ya Noa?

⁴ Jesu o porofetile gore maemo a mehleng yeno a tla swana le a mehleng ya Noa. (Mat. 24:37) Ka mohlala, le rena re thulana le meoya e kgopo. (Kut. 12:7-9, 12) Barongwa ba ba batemona ba ile ba ikapeša mebele ya nama mehleng ya Noa. Gaešita le ge ga bjale ba thibetšwe go apara mebele ya nama, ba katanela go laola batho ba banyenyane le ba bagolo. Batemona ba bao ba ratago dikopano tša botona le botshadi tšeo di gobogilego ba thabišwa ke go bona bobe le ditiro tše di lešago dihlong tša bao ba ka ba senyago megopolo mo lefaseng.—Baef. 6:11, 12.

⁵ Lentšu la Modimo le hlalosa Diabolo e le “mmolai” e bile a na le “mokgwa wa go baka lehu.” (Joh. 8:44; Baheb. 2:14) Modimo ga a mo dumelele go bolaya yo mongwe le yo mongwe yoo a nyakago go mmolaya. Lega go le bjalo, sebopiwa se se matla sa moya se tutuetša bomenetša le bofora. Se tutuetša batho gore ba ikemišetše go bolaya ba bangwe. Ka mohlala, ngwana o tee go ba 142 bao ba belegwago kua United States o tlo bolawa. Ka baka la bošoro bjo sehlogo bjo bo atilego lehono, na o nagana gore Jehofa a ka bo hlokomologa go fapana le ge a dirile mehleng ya Noa? Na a ka se tšee kgato?

6, 7. Noa le lapa la gagwe ba ile ba bontšha bjang gore ba na le tumelo le gore ba boifa Modimo?

⁶ Go se go ye kae, Noa o ile a tsebišwa ka phetho ya Modimo ya go fediša lefase ka meetsefula le go fediša diphedi ka moka. (Gen. 6:13, 17) Jehofa o ile a laela Noa gore a age areka yeo e bopegilego bjalo ka lepokisi le legolo. Noa le lapa la gagwe ba ile ba dira modiro woo. Ba thušitšwe ke’ng go kwa le go itlhatsela ba itokišitše ge kahlolo ya Modimo e fihla?

⁷ Tumelo e tiilego le go boifa Modimo di ile tša tutuetša Noa le lapa la gagwe go dira dilo tšeo Modimo a di laetšego. (Gen. 6:22; Baheb. 11:7) Ka ge e be e le hlogo ya lapa, Noa o ile a dula a phafogile moyeng gomme a phema go kgongwa ke kgobogo ya lefase leo la bogologolo. (Gen. 6:9) O be a tseba gore lapa la gagwe le swanetše go itiša malebana le go akaretšwa ditseleng tše šoro le moyeng wa go ipuša wa batho bao ba ba dikologilego. Go be go le bohlokwa gore ba se ke ba nwelela kudu ditiragalong tša letšatši le letšatši tša bophelo. Modimo o be a ba neile modiro woo ba bego ba swanetše go o dira e bile go be go le bohlokwa gore lapa ka moka le dule le naganne ka modiro woo.—Bala Genesi 6:14, 18.

Noa le Lapa la Gagwe ba Ile ba Itlhatsela ba Itokišitše

8. Ke’ng seo se bontšhago gore ditho tša lapa la Noa di be di ineetše go Modimo?

⁸ Pego ya Beibele e bolela kudu ka hlogo ya lapa e lego Noa, le ge mosadi wa Noa le barwa ba gagwe le basadi ba bona e be e le barapedi ba Jehofa. Moporofeta Hesekiele o hlatsela se e le therešo. O itše bana ba Noa ba be ba ka se phološwe ka baka la go loka ga tatago bona ge nkabe ba phetše mehleng ya Hesekiele. Ba be ba godile ka mo go lekanego gore ba ka ikgethela go kwa goba go se kwe. Ka gona, yo mongwe le yo mongwe wa bona o ile a bontšha gore o rata Modimo le ditsela tša gagwe. (Hesek. 14:19, 20) Lapa la Noa le ile la amogela tlhahlo ya gagwe, la ba le tumelo e swanago le ya gagwe gomme la se dumelele gore tutuetšo ya ba bangwe e le šitiše go dira modiro woo le o neilwego ke Modimo.

9. Ke mehlala efe ya mehleng yeno yeo re ka e swantšhago le tumelo ya Noa?

⁹ Ke mo go thabišago kudu lehono go bona dihlogo tša malapa borwarreng bja rena bja lefase ka bophara di dira sohle seo di ka se kgonago go ekiša mohlala wa Noa! Di a lemoga gore ga se gwa lekana go nea malapa a tšona dijo, diaparo, madulo le thuto. Di swanetše go hlokomela malapa le ka dilo tša moya. Ka go re’alo, di itlhatsela di itokišeditše seo Jehofa a lego kgauswi le go se dira.

10, 11. (a) Noa le lapa la gagwe ba swanetše go ba ba ile ba ikwa bjang ge ba be ba le ka arekeng? (b) Re swanetše go ipotšiša potšišo efe?

¹⁰ Noa, mosadi wa gagwe, barwa ba gagwe le basadi ba bona ba swanetše go ba ba šomile ka thata go ageng areka ka nywaga e ka bago e 50. Ge ba dutše ba aga areka, ba swanetše go ba ba ile ba tsena le go tšwa ka gare ga yona ka makga a makgolo. Ba ile ba dira gore meetse a se tsene ka gare ga yona, ba e tlatša ka dijo le diphoofolo. Akanya ka tiragalo yeo. Mafelelong letšatši le legolo le a fihla. Ke letšatši la bo-17 la kgwedi ya bobedi ngwageng wa 2370 B.C.E., ba tsena ka arekeng. Jehofa o tswalela mojako, ke moka pula e thoma go na. Ye e be e se feela pula ya matlakadibe. Methopo ka moka ya madiba e a thibologa gomme pula ya matlorotloro e tšhologela arekeng. (Gen. 7:11, 16) Batho bao ba lego ka ntle ga areka ba a hwa mola bao ba lego ka gare ba phologa. Lapa la Noa le swanetše go ba le ile la ikwa bjang? Ruri le swanetše go ba le ile la leboga Modimo. Ga go pelaelo gore le ile la re: ‘Ruri re thabišwa ke gore re ile ra sepela le Modimo wa therešo gomme ra itlhatsela re itokišitše!’ (Gen. 6:9) Na o ipona o le ka kua ga Haramagedone, o thabile ka tsela e swanago le ye?

¹¹ Ga go seo se ka thibelago Ramatlaohle gore a phethagatše kholofetšo ya gagwe ya go fediša tshepedišo ye ya dilo ya Sathane. Ipotšiše gore: ‘Na ke tloga ke kgodišegile gore ga go na le e tee ya dikholofetšo tša Modimo yeo e tlago go folotša le ganyenyane le gore ka moka ga tšona di tla phethagala ka nako ya gagwe e beilwego?’ Ge e ba go le bjalo, itlhatsele o itokišitše ka go dula o naganne ka “letšatši la Jehofa” leo le batamelago ka lebelo.—2 Pet. 3:12.

Moshe o Ile a Dula a Phafogile

12. Ke’ng seo se bego se ka foufatša pono ya moya ya Moshe?

¹² Anke re eleng hloko mohlala o mongwe. Go ya ka pono ya batho, Moshe o be a bonagala a le boemong bjo bokaone kudu ge a le Egipita. Ka ge a be a godišitšwe ke morwedi wa Farao, go bonagala a be a tšeelwa godimo gomme a eja dijo tša maemo, a apara diaparo tše dibotse e bile a phela lefelong la manobonobo. O ile a hwetša thuto e phagamego kudu. (Bala Ditiro 7:20-22.) O be a ka tla a hwetša bohwa bja maemo a godimo.

13. Go tlile bjang gore Moshe a dule a naganne ka dikholofetšo tša Modimo?

¹³ Go bonagala tlwaetšo yeo Moshe a e hweditšego go batswadi ba gagwe ge e be e sa le yo monyenyane e dirile gore a bone gore Baegipita ba be ba dira tša bošilo ka go rapela medimo ya diswantšho. (Ek. 32:8) Thulaganyo ya tša thuto ya Egipita le go ata ga dilo tše di bonagalago ka lapeng la bogoši ga se gwa dira gore Moshe a lahle borapedi bja therešo. O swanetše go ba a ile a naganišiša kudu ka dikholofetšo tšeo Modimo a ilego a di holofetša borakgolokhukhu ba gagwe gomme a tloga a kganyoga go itlhatsela a itokišeleditše go dira thato ya Modimo. Le gona, Moshe o boditše Baisiraele gore: “Jehofa . . . Modimo wa Aborahama, Modimo wa Isaka le Modimo wa Jakobo o nthomile go lena.”—Bala Ekisodo 3:15-17.

14. Tumelo ya Moshe le sebete sa gagwe di ile tša lekwa bjang?

¹⁴ Ka go se swane le medimo ya diswantšho yeo e bego e emela medimo ya go se phele ya Egipita, Jehofa, Modimo wa therešo, e be e le wa kgonthe go Moshe. O be a phela eka o bona “Yo a sa bonagalego.” Moshe o be a na le tumelo ya gore batho ba Modimo ba tla lokollwa, eupša o be a sa tsebe gore seo se tla direga neng. (Baheb. 11:24, 25, 27) Go fagahlela go bona Baheberu ba lokollwa go ile gwa bonagala ge a be a lwela lekgoba la Moisiraele leo le bego le tlaišwa. (Ek. 2:11, 12) Lega go le bjalo, nako ya Jehofa e be e se ya hlwa e fihla, ka gona Moshe o ile a swanelwa ke go tšhabela nageng ya kgole. Ga go pelaelo gore o ile a thatafalelwa ke go tloga bophelong bja manobonobo kgorong ya Egipita gomme a yo phela lešokeng. Lega go le bjalo, Moshe o ile a itlhatsela a itokišitše ka gore a dule a phafogetše tlhahlo e nngwe le e nngwe yeo Jehofa a mo neilego yona. Ka gona, Modimo o be a ka mo diriša gore a imolle bana babo ka morago ga gore a fetše nywaga e 40 a le Midiane. A hlahlwa ke Modimo, Moshe o ile a kwa gomme a boela Egipita. Nako e be e fihlile ya gore Moshe a phethe taelo e tšwago go Modimo le gore a dire modiro wa Modimo ka tsela ya Modimo. (Ek. 3:2, 7, 8, 10) Ge a boetše Egipita, Moshe, “motho yo boletaleta go feta batho bohle,” o be a swanetše go ba le tumelo le sebete gore a ye go Farao. (Num. 12:3) Ga se a ya gatee feela, eupša o ile ka makga a mantši, a sa tsebe gore o tlo ya go Farao go fihla neng ge dikotlo di dutše di latelana.

15. Ke’ng seo se ilego sa tutuetša Moshe gore a dule a phakgametše dibaka tša go tumiša Tatagwe wa legodimong go sa šetšwe ditšhitišo?

¹⁵ Ka morago ga nywaga e 40, go tloga ka 1513 B.C.E. go fihla ka 1473 B.C.E., Moshe o ile a kwešwa bohloko. Lega go le bjalo, o ile a tsoma dibaka tša go tumiša Jehofa gomme ka pelo ka moka a kgothatša Baisiraelegotee le yena gore ba dire bjalo. (Doit. 31:1-8) Ke ka baka la’ng a ile a dira se? Ka gobane o be a rata leina la Jehofa le bogoši bja gagwe go feta kamoo a ithatago ka gona. (Ek 32:10-13; Num. 14:11-16) Go sa šetšwe go nyamišwa goba ditšhitišo, le rena re swanetše go tšwela pele re thekga pušo ya Modimo, re kgodišegile gore tsela ya gagwe ya go dira dilo ke e bohlale, ya go loka kudu e bile e phala tše dingwe ka moka. (Jes. 55:8-11; Jer. 10:23) Na o ikwa ka tsela yeo?

Dula o Phakgame!

16, 17. Ke ka baka la’ng Mareka 13:35-37 e le bohlokwa kudu go wena?

¹⁶ “Dulang le lebeletše, dulang le phakgame, gobane ga le tsebe gore nako e beilwego e neng.” (Mar. 13:33) Jesu o ile a nea temošo yeo ge a be a bolela ka pontšho yeo e tlago go swaya bofelo bja tshepedišo ye e kgopo ya dilo. Ela hloko mantšu a go phetha a boporofeta bjo bogolo bja Jesu bjalo ka ge bo begwa ke Mareka, a rego: “Dulang le phakgame gobane ga le tsebe nako yeo Mong wa ntlo a tlago ka yona, e ka ba mantšiboa goba bošegogare goba ge dikgogo di lla goba e sa le bosasa, e le gore ge a fihla ka tšhoganetšo, a se ke a hwetša le robetše. Eupša seo ke le botšago sona ke se botša bohle ke re: Dulang le phakgame.”—Mar. 13:35-37.

¹⁷ Keletšo ya Jesu e šišinya kgopolo. O ile a bolela ka go dula re phakgame dikarolong tše nne tša bošego. Go be go tla ba thata go dula re phakgame karolong ya mafelelo ka gobane nako ye e be e tla ba go tloga mo e ka bago ka iri ya boraro mesong go fihla ge letšatši le hlaba. Batho bao ba rulaganyago ntwa ba bona ye e le nako e botse ya go hlasela manaba a bona ka gobane e ba nea sebaka se sebotse sa gore ba a hwetše a sa “robetše.” Ka tsela e swanago lehono, ge lefase le ile ka boroko bja moya, re ka hwetša go le thata kudu go dula re phakgame. Na re a belaela gore re swanetše go ‘dula re phakgame’ le go ‘dula re lebeletše’ bofelo bjo go boletšwego ka bjona e sa le pele le phološo ya rena?

18. Bjalo ka Dihlatse tša Jehofa, re na le tokelo efe e kgolo kudu?

¹⁸ Motho yo a tlwaetšago diphoofolo yo go boletšwego ka yena mathomong o ile a phologa tlhaselo ya lepogo. Eupša boporofeta bja Beibele bo bontšha gabotse gore bodumedi bja maaka le tshepedišo ye ka moka e kgopo di ka se phologe bofelo bjo bo tlago. (Kut. 18:4-8) Eka bahlanka ba Modimo ka moka, ba banyenyane le ba bagolo, ba ka bona bohlokwa bja go dira sohle seo ba ka se kgonago go itlhatsela ba itokišeleditše letšatši la Jehofa go etša ge Noa le lapa la gagwe ba ile ba bona bohlokwa bja go dira seo. Re phela lefaseng la batho bao ba sa hlomphego Modimo moo barutiši ba bodumedi bja maaka, go akaretša le bailaModimo, ba kwerago Mmopi. Eupša re ka se ipee kotsing ya gore ba re kgome. Anke re tšeeleng godimo mehlala yeo re e ahlaahlilego gomme re dule re phakgametše dibaka tša go lwela le go godiša Jehofa bjalo ka “Modimo gare ga medimo,” yena “Modimo yo mogolo, yo matla le yo a boifišago.”—Doit. 10:17.

[Mongwalo wa tlase]

Na o a Gopola?

• Ke ka baka la’ng Noa a ile a swanelwa ke go etiša pele dinyakwa tša moya tša lapa la gagwe?

• Mehla ya rena e swana kudu bjang le ya Noa?

• Go sa šetšwe go nyamišwa, ke ka baka la’ng Moshe a ile a dula a naganne ka dikholofetšo tša Jehofa?

• Ke boporofeta bofe bja Beibele bjo bo go tutueletšago go dula o phakgame moyeng?

[Seswantšho go letlakala 25]

Noa le lapa la gagwe ba ile ba dula ba swaregile ka modiro wa Jehofa

[Seswantšho go letlakala 26]

Dikholofetšo tša Modimo tše di kgonthišeditšwego di ile tša thuša Moshe gore a dule a phakgame