“Se se Bolela Bophelo bjo bo sa Felego”

“Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”—JOHANE 17:3.

TSEBO e ka phološa bophelo. Ge Nouhou wa dikgwedi tše lesome a be a thoma go babja, mmagwe—mošomi wa tša maphelo wa kua Niger—o be a tseba seo a swanetšego go se dira. O ile a lokišeletša motswako wa go dira gore mmele o boele o be le meetse ka go hlakanya meetse a hlwekilego le letswai le swikiri. Go ya ka UNICEF, ka ge a ile “a gata mogato kapejana gaešita le go mo iša lefelong la tša kalafo la setšhaba, ngwana wa gagwe o ile a kgona go fola ka bjako.”

Tsebo e tšwago Beibeleng le yona e ka phološa bophelo. Mongwadi wa pele wa Beibele, Moshe, o boletše gore: “Ga se mantšu a go hloka mohola go lena, eupša ona a bolela bophelo go lena; e bile ka mantšu a le ka atiša matšatši a lena.” (Doiteronomio 32:47) Na ruri Beibele e ka kgona go atiša matšatši a rena? E bolela bophelo go rena bjang?

Dihlogo tše hlano tše di fetilego tša lelokelelo le la dihlogo di bontšhitše gore Beibele ke puku yeo e ka se bapišwego ge go bolelwa ka boporofeta bja yona bjo bo ka botwago, go nepagala ga yona ka tša histori le thutamahlale, go dumelelana ga dipuku tša yona le keletšo ya yona e šomago. Se se gatelela taba ya gore Beibele ke ya moswananoši. Ka gona, ge e bolela gore e lebiša bophelong bjo botelele—bophelo bjo bo sa felego—na ga e swanelwe ke gore o e hlahlobe ka kelohloko?

Re go kgothaletša gore o ithute kamoo tsebo e nepagetšego ya Beibele e ka go neago khutšo ya monagano ka gona gona bjale le lethabo nakong e tlago. Dihlatse tša Jehofa di tla thabela go go bontšha kamoo o ka hwetšago tsebo e bjalo ka gona.

[Lepokisi/Seswantšho go letlakala 9]

Beibele ke ya moswananoši moo e lego gore e nea dikarabo tše di kgotsofatšago tša dipotšišo tše bohlokwa tšeo re ipotšišago tšona tše bjalo ka tše:

• Ke ka baka la’ng re le mo?

• Ke ka baka la’ng go ena le tlaišego e ntši gakaaka?

• Na go na le kholofelo le ge e le efe ka baratiwa ba ka ba ba hwilego?

O ka hwetša dikarabo tša Beibele tša dipotšišo tše ka pukung ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.