“Se Se Bolela Bophelo Bjo Bo Sa Felego”

¹ Mantšu a Jesu ao a ngwadilwego go Johane 17:3 (NW) a swanetše go tšeelwa godimo. O be a bolela a tiišitše—ge a re go monya tsebo ka Modimo le ka Kriste go bolela bophelo bjo bo sa felego! Eupša na ke feela ka go ba ga rena le tsebo ya go tseba Jehofa le Jesu moo re tlago go putswa ka bophelo bjo bo sa felego? Aowa. Ba-Isiraele ba be ba tseba gore Jehofa e be e le Modimo wa bona, eupša tsela ya bona ya bophelo e be e sa bonagatše tumelo yeo. Ka baka leo, ba ile ba lahlegelwa ke kamogelo ya gagwe. (Hos. 4:1, 2, 6) Lehono dimilione tša batho mo gongwe di ka ba di “na le phišego go Modimo, eupša e sego ka tlhaologanyo [“go ya ka tsebo e nepagetšego,” NW].” (Ba-Roma 10:2, PK) Ba swanetše go thoma go tseba Jehofa, yo e lego “Modimo a nnoši wa therešo,” gomme ba ithute kamoo ba ka mo hlankelago ka gona ka mo go swanetšego. Gore re fihlelele seo, ka November re tla be re sepediša puku ya Tsebo e Išago Bophelong bjo bo sa Felego. Ke matseno afe ao o tlago go a diriša ge o sepediša puku ya Tsebo? Tše dingwe tša ditšhišinyo tšeo di ka thušago šidi.

² Ka ge kgopolo ya go phela ka mo go sa felego mo lefaseng e le e mpsha go batho ba bantši, matseno a a ka tanya kgahlego ya bona: ◼“Re botšiša baagišani ba rena potšišo. Ge e ba o be o ka laletšwa gore o phele ka mo go sa felego lefaseng la go swana le le, na o be o tla amogela taletšo yeo? [Bontšha seswantšho seo se lego go matlakala 4-5 ka pukung ya Tsebo. Dumelela karabo.] Ye ruri e ka ba phihlelo ya gago e thabišago bophelong. Eupša na o nagana gore ke’ng seo o tla swanelwago ke go se dira gore se e be sa kgonthe ka wena? [Dumelela karabo.] Ela hloko mogato woo o nyakegago go ya ka Johane 17:3. [Bala.] Puku ye e thuša ba bantši gore ba hwetše mohuta wo o kgethegilego wa tsebo. Na o ka rata go ba le kopi ya gago ka noši bakeng sa go e bala? [Dumelela karabo.] O ka hwetša ye ka moneelo o monyenyane wa R4,00. Ketelong ya-ka e latelago, re ka ahla-ahla lebaka leo ka lona e lego ga tlhaologanyo go dumela gore re ka hwetša bophelo bjo bo sa felego gona mo lefaseng.”

³ Ge o boela bakeng sa go etela bao o ahla-ahlilego le bona Johane 17:3, mo gongwe o ka tšwela pele ka tsela ye: ◼“Ketelong ya-ka ya nakong e fetilego, ke go baletše mantšu a kgahlišago a Jesu go Johane 17:3, moo a re kgonthišeditšego gore go monya tsebo ka Modimo le ka yena go bolela bophelo bjo bo sa felego. Eupša batho ba bantši ba dumela gore bophelo bjo bokaone bo ka hwetšwa feela legodimong. O ikwa bjang ka seo? [Dumelela karabo.] Ge e ba puku yeo ke go tlogeletšego yona e le kgaufsi, ke tla rata go go bontšha ditemana tša Beibele tšeo di hlatselago gore Paradeise e tla tsošološwa mo lefaseng. [Ahla-ahla dirapa 11-16 go matlakala 9-10 ka pukung ya Tsebo.] Ketelong ya-ka e latelago, ke tla rata go go bontšha lebaka leo ka lona o ka botago dikholofetšo tše tšeo di hwetšwago ka Beibeleng. Ge go sa le bjalo, mohlomongwe o ka bala kgaolo 2 ka koping ya gago ya puku.”

⁴ Ye ke thero yeo mo gongwe o ka ratago go e diriša go batho bao ba sekametšego bodumeding: ◼“Re be re dutše re boledišana le baagišani ba rena mabapi le lebaka leo ka lona go nago le madumedi a mantši gakaakaa a fapanego lefaseng. Go na le dikereke tše ikemetšego tše fetago tše 4000 Afrika Borwa e nnoši, gomme go na le dihlopha tša madumedi tše fetago 10 000 lefaseng ka moka. Lega go le bjalo, go na le Beibele e tee feela. Go ya ka pono ya gago ke ka baka la’ng go e-na le tlhaka-tlhakano ye ya madumedi? [Dumelela karabo. Phetla puku ya Tsebo go kgaolo 5, gomme o bale serapa 1.] O tla hwetša dikarabo tše di kgotsofatšago tša dipotšišo tšeo ka go bala kgaolo ye. Ke tla thabela go go tlogelela puku ye ka moneelo wa R4,00.” Ge e ba e amogelwa, dira dithulaganyo tše tsepamego tša go boela, gomme o re: “Ge ke boa, mohlomongwe re ka ahla-ahla ge e ba madumedi ka moka e fo ba ditsela tše fapanego tšeo di išago felo-gotee.”

⁵ Ge o boela bakeng sa go tšwetša pele poledišano mabapi le lebaka leo ka lona go nago le madumedi a mantši gakaakaa, o ka bolela se: ◼“Ge ke be ke bolela le wena nakong e fetilego, ke ile ka rotoša potšišo ya mabapi le ge e ba madumedi ka moka e fo ba ditsela tše fapanego tše di išago felo-gotee. O nagana’ng ka seo? [Dumelela karabo.] Ke rata go go bontšha ka pukung yeo ke go tlogeletšego yona seo Jesu a se boletšego ka taba ye. [Phetla go kgaolo 5 ka pukung ya Tsebo, gomme o bale dirapa 6-7, go akaretša le Mateo 7:21-23.] Mo gongwe o ka ba o ipotšiša lebaka leo ka lona go lego bohlokwa go tseba gabotse-botse seo thato ya Modimo e lego sona. O tla hwetša gore dirapa tše di latelago ke tšeo di rutago kudu. Hle bala karolo e šetšego ya kgaolo ye. Nakong e tlago ge ke e-tla, ke tla thabela go go bontšha mohola wa go ba le tsebo e nepagetšego ya Beibele.”

⁶ Matseno a lebanyago gantši ke a atlegago go thomeng dithuto tša Beibele. Matseno a šišintšwego ao a tšwelelago go letlakala 14 ka go puku ya “Go Boledišana” šea: ◼“Ke etetše go tla go go nea thuto ya legae ya Beibele yeo e sa lefelelwego. Ge e ba go kgonega, ruri ke tla rata go diriša metsotso e se mekae go bontšha kamoo batho mafaseng a 200 ba boledišanago ka Beibele magaeng e le dihlopha tša malapa. Re ka diriša sehlogo le ge e le sefe sa dihlogo tše e le motheo wa poledišano. [Bontšha go latelana ga ditaba tša ka gare ka pukung ya Tsebo.] Ke efe yeo e go kgahlišago kudu?” Emela motho gore a kgethe. Phetla kgaolong yeo e kgethilwego, gomme o thome thuto serapeng sa pele.

⁷ Matseno a mangwe a lebanyago a atlegago ao o ka a lekago bakeng sa go thoma dithuto šea: ◼“Ke nea dithuto tša Beibele ka ntle le tefo gomme ke na le nako thulaganyong ya-ka bakeng sa barutwana ba oketšegilego. Thušo ye ya go ithuta Beibele ke yona yeo re e dirišago. [Bontšha puku ya Tsebo.] Thuto e swarelela dikgwedi tše sego kae feela gomme e nea dikarabo dipotšišong tša go etša tše rego: Ke ka baka la’ng Modimo a dumelela tlaišego? Ke ka baka la’ng re tšofala le go hwa? Go direga’ng ka baratiwa ba rena ba ba hwilego? Le gona re ka batamela bjang kgaufsi le Modimo?” Ke moka botšiša gore, “Na nka go bontšha kamoo thuto e swarwago ka gona?” Ge e ba thuto e ganwa, botšiša motho ge e ba a ka rata go ba le puku ya Tsebo bakeng sa go ipalela ka noši.

⁸ A lehumo le lekaakang leo tsebo e nepagetšego ya go tseba Modimo le Kriste e lego lona go motho yo mongwe le yo mongwe yo a nago le yona! Go e monya ruri go bolela bophelo bjo bo sa felego maemong a phethagetšego. Anke re dirišeng sebaka se sengwe le se sengwe ka November go abelana le ba bangwe tsebo e išago bophelong bjo bo sa felego.