Jehofa o Šegofatša Kudu Bao ba Ikgafago ka go Rata

MMOPI wa rena o file batho seriti ka go ba nea mpho e sa bapišwego le selo ya tokologo ya boikgethelo. Go oketša moo, o šegofatša kudu bao ka go hloka boithati ba dirišago tokologo ya bona ya boikgethelo go tšwetša pele borapedi bja therešo le bao ba tagafatšago leina la gagwe le lekgethwa le go thekga morero wa gagwe o mogolo. Jehofa ga a nyake gore re ikokobeletše yena ka go ikwa re gapeletšega goba ka go ithola kgwara. Go e na le moo, o tšeela godimo kudu boineelo bja go tšwa pelong bjo bo tutuetšwago ke lerato la kgonthe le tebogo e tseneletšego.

Ka mohlala, ge Baisiraele ba be ba le lešokeng la Sinai, Jehofa o ile a ba laela gore ba age lefelo la borapedi. O itše: “Ntšhetšang Jehofa moneelo. Anke yo mongwe le yo mongwe wa pelo e ratago a o tliše gore e be moneelo o yago go Jehofa.” (Ek. 35:5) Moisiraele yo mongwe le yo mongwe o be a ka neela ka seo a ka se kgonago, le gona moneelo o mongwe le o mongwe wa boithatelo—go sa šetšwe gore e be e le eng goba o mokaakang—o be o ka dirišwa ka tsela ya maleba go tšwetša pele morero wa Modimo. Ba ile ba arabela bjang?

“Yo mongwe le yo mongwe yoo pelo ya gagwe e bego e mo šušumetša” le “yo mongwe le yo mongwe yoo moya wa gagwe o bego o mo hlohleletša” a tliša moneelo wa boithatelo, ‘yo mongwe le yo mongwe a dira seo ka pelo yeo e ratago.’ Banna le basadi ba ile ba tliša ka go rata dilo tše di latelago bakeng sa modiro wa Jehofa: dipelete, mangina, dipalamonwana, gauta, silifera, koporo, tlhale e talalerata, boya bjo bo tailwego ka mmala wa bophepolo bjo bohwibidu, lešela la mmala o mohwibiduhwibidu, lešela le boletiana la linene, boya bja pudi, matlalo a dikgapa ao a tailwego ka mmala o mohwibidu, matlalo a boleta, kota ya moduhlare, maswikana a bohlokwa, balesamo le makhura. Mafelelong, “ditlabakelo tšeo e be e le tše di lekanego modiro ka moka wo o bego o tla dirwa, e bile di feta tekanyo.”—Ek. 35:21-24, 27-29; 36:7.

Selo seo se ilego sa thabiša Jehofa kudu ke moya wa go nea ka go rata wa bao ba ilego ba thekga borapedi bja therešo, e sego dilo tšeo di bego di neetšwe. Le gona ba ile ba ithaopela go neela ka nako ya bona le matla a bona. Beibele e re “basadi ka moka bao ba bego ba na le dipelo tše bohlale ba ile ba ohla ka diatla tša bona.” Ee, “basadi ka moka ba dipelo tše bohlale ba šušumeletšega go ohla boya bja pudi.” Go feta moo, Jehofa o ile a nea Betsalele “bohlale, kwešišo, tsebo le bokgoni bja mošomo o mongwe le o mongwe wa diatla.” Ge e le gabotse, Modimo o ile a nea Betsalele le Oholiaba bokgoni bjo bo nyakegago bja go dira mešomo ka moka yeo ba bego ba laetšwe go e dira.—Ek. 35:25, 26, 30-35.

Ge Jehofa a be a botša Baisiraele gore ba ntšhe moneelo, o be a kgodišegile ka botlalo gore “yo mongwe le yo mongwe wa pelo e ratago” o be a tla thekga borapedi bja therešo. Ke moka o ile a šegofatša kudu bao ba ilego ba ikgafa ka go rata ka go ba nea tlhahlo le lethabo le legolo. Ka go re’alo, Jehofa o ile a bontšha gore ge a šegofatša moya wa boikgafo wa bahlanka ba gagwe, o kgonthišetša gore o ba nea bokgoni le didirišwa tše di nyakegago go phethagatša thato ya gagwe. (Ps. 34:9) Ge o dutše o hlankela Jehofa ka go hloka boithati, ruri o tla šegofatša moya wa gago wa boikgafo.

MEKGWA YEO BA BANGWE BA KGETHAGO GO NEELA KA YONA GO THEKGA MODIRO WA LEFASE KA BOPHARA

Go swana le mehleng ya moapostola Paulo, ba bantši lehono ba ‘boloka se sengwe ka thoko’ goba ba beela tšhelete ka thoko gomme ba e tsenya lepokising la phuthego la moneelo leo le ngwadilwego gore “Modiro wa Lefase ka Bophara.” (1 Bakor. 16:2) Kgwedi le kgwedi, diphuthego di romela meneelo ye ofising ya Dihlatse tša Jehofa yeo e hlankelago naga ya gabo tšona. E bile go a kgonega gore le wena o romele meneelo ka go lebanya mokgatlong wa molao woo o dirišwago ke Dihlatse tša Jehofa nageng ya geno. E le gore o tsebe leina la mokgatlo woo wa molao wo o dirišwago ke Dihlatse tša Jehofa nageng ya geno, hle ikgokaganye le ofisi ya lekala yeo e hlankelago naga ya geno. Aterese ya ofisi yeo ya lekala e ka hwetšwa go www.pr2711.com/nso. Mekgwa yeo o ka neelago ka yona ka go lebanya še:

MENEELO E LEBANYAGO

O ka ntšha meneelo ka go e romela ka akhaonto ya panka, ka karata ya panka goba ka karata ya mokitlana. Makaleng a mangwe se se ka dirwa le Wepesaeteng ya jw.org goba Wepesaeteng e nngwe yeo e dirišwago ke mokgatlo.
Meneelo ya tšhelete, mabenyabje goba dilo tše dingwe tša bohlokwa tša motho ka noši. Akaretša le lengwalo leo le bontšhago gore tšhelete yeo goba dilo tšeo ke moneelo wa go lebanya.

MENEELO YEO E RULAGANTŠWEGO

Go tlaleletša go dimpho tša tšhelete le dilo tša bohlokwa tša motho ka noši, go na le mekgwa e mengwe ya go ntšha meneelo ya go thekga modiro wa Mmušo lefaseng ka bophara. Mekgwa ye e bontšhitšwe ka mo tlase. Go sa šetšwe mokgwa goba mekgwa yeo o ratago go e diriša, hle thoma ka go ikgokaganya le ofisi ya lekala yeo e hlankelago naga ya geno go bona ge e ba mekgwa ye e dirišwa nageng ya geno. Ka ge dinyakwa tša molao le melao ya lekgetho e fapana, ke gabohlokwa gore o ikgokaganye le baeletši bao ba swanelegago ba lekgetho le ba molao pele o kgetha tsela e kaone ya go neela.

Inšuranse: O ka dira moneelo wo ka go kgetha mokgatlo wo o dirišwago ke Dihlatse tša Jehofa gomme wa o ngwadiša gore o tšee inšuranse ya gago ya bophelo goba thulaganyo ya go rola modiro/phenšene.

Diakhaonto tša Panka: Diakhaonto tša panka, mangwalo a panka ao a bontšhago gore o nea mokgatlo bokae goba diakhaonto tša ge motho a rola modiro di ka neelwa mokgatlo woo o dirišwago ke Dihlatse tša Jehofa ge motho a ehwa goba tša lefša mokgatlo woo ka go dumelelana le dinyakwa tša panka yeo.

Di-stock le Di-bond: Di-stock le di-bond di newa mokgatlo woo o dirišwago ke Dihlatse tša Jehofa e le mpho e lebanyago, goba di neelwa ka go ngwala tumelelano ya gore di fetišetšwe go mokgatlo ka morago ga lehu la mong wa tšona.

Mafelo: Ge e ba o nyaka go neela ka lefelo, hle ikgokaganye le ofisi ya lekala pele. Lekala le tla dira phetho ya ge e ba lefelo leo le tla dirišwa goba go rekišwa gomme tšhelete yeo ya tsenywa moneelong wa modiro wa lefase ka bophara.

Dikeno le Mekgatlo ya Semolao: Dithoto goba tšhelete di ka tlogelelwa mokgatlo woo o dirišwago ke Dihlatse tša Jehofa ka go dira keno ya semolao goba ka go bolela gore mokgatlo woo ke mojabohwa wa tumelelano yeo ya go aba bohwa. Tumelelano e bjalo e ka ba le mehola e itšego tabeng ya lekgetho.

Go ka kgethwa mokgatlo wa semolao wo o dirišwago ke Dihlatse tša Jehofa nageng ya geno gore o tla tšea bohwa bja gago. O se ke wa kgetha mokgatlo woo gore e be wona o abago bohwa bja gago, o bo laolago goba o go bolokelago bjona.

Ge o nyaka go tseba mo go oketšegilego, o ka ikgokaganya le Accounting Office ka lengwalo goba ka mogala atereseng yeo e lego ka mo tlase, goba o ka ikgokaganya le lekala leo le hlankelago naga ya geno.