“Modiro ke o Mogolo”

E BE e le nako ya seboka se bohlokwa kudu kua Jerusalema. Sebokeng seo, Kgoši Dafida o be a kgobokeditše dikgošana ka moka tša Jerusalema, balaodi ba dihlopha tšeo di hlankelago kgoši le banna ba matla ka moka. Banna ba ba ile ba thaba kudu ge ba be ba ekwa tsebišo e kgethegilego ya Kgoši Dafida. Jehofa o be a laetše morwa wa Dafida e lego Solomone gore a age tempele e kgolokgolo moo setšhaba se bego se tla rapela Modimo wa therešo gona. Modimo o be a neile Kgoši Dafida yo a bego a tšofetše polane ya tempele yeo gomme yena a e nea Solomone. Dafida o ile a re: “Modiro ke o mogolo; gobane ntlo ye e kgolo ga se ya motho, eupša ke ya Jehofa Modimo.”—1 Dikor. 28:1, 2, 6, 11, 12; 29:1.

Ke moka Dafida o ile a botšiša setšhaba gore: “Ke mang yo a ithaopago go nea Jehofa mpho lehono?” (1 Dikor. 29:5) Ge e ba o be o le moo, nkabe o ile wa arabela bjang? Na nkabe o ile wa thabela go thekga modiro woo o mogolo? Setšhaba sa Isiraele se ile sa thekga modiro woo ka mafolofolo. Ee, setšhaba se ile “sa thabela go ntšha dibego tša sona tša boithaopo, ka gobane se be se neela Jehofa dibego tša boithaopo ka pelo e feletšego; kgoši Dafida le yena a thaba kudu.”—1 Dikor. 29:9.

Mengwaga e makgolo ka morago, Jehofa o ile a re lokišeletša selo seo se fetago tempele ya Solomone ka bogolo. O agile tempele e kgolo ya moya, e lego tokišetšo ya gore batho ba kgone go mo hlankela motheong wa sehlabelo sa Jesu. (Baheb. 9:11, 12) Jehofa o thuša batho bjang gore ba boelane le yena? O ba thuša ka mošomo wa rena wa go dira batho barutiwa. (Mat. 28:19, 20) Ka baka la mošomo wo, ngwaga le ngwaga go swarwa dithuto tša Beibele tše dimilione, barutwana ba Beibele ba dikete ba a kolobetšwa, gomme go hlongwa diphuthego tše makgolo.

Ka go re’alo, kgolo yeo e dira gore go gatišwe Dibeibele tše dintši, go agwe Diholo tša Mmušo le go di hlokomela e bile go nyakwe mafelo a go swarela dikopano tše dinyenyane le tše dikgolo. Ruri modiro wa rena wa go bolela ditaba tše dibotse ke o mogolo le wo o kgotsofatšago!—Mat. 24:14.

Go rata Modimo le moagišani le go akgofa ga modiro wa go bolela ditaba tše dibotse go tutuetša batho ba Modimo go ‘ithaopela go nea Jehofa mpho’ ka go ntšha meneelo ka go rata. Ruri go a thabiša go “godiša Jehofa ka dilo tša [rena] tše bohlokwa” le go bona kamoo dilo tšeo di dirišwago gabotse go phetha modiro o bohlokwa historing!—Die. 3:9.

Mekgwa Yeo ba Bangwe ba Kgethago go Neela ka Yona go Thekga Modiro wa Lefase ka Bophara

Ba bantši lehono ba ‘boloka se sengwe ka thoko,’ goba ba beela tšhelete ka thoko gomme ba e tsenya ka lepokising la phuthegong ya gabo bona la moneelo wa go thekga “Modiro wa Lefase ka Bophara.” (1 Bakor. 16:2) Kgwedi le kgwedi, diphuthego di romela meneelo ye ofising ya Dihlatse tša Jehofa yeo e hlankelago naga ya gabo tšona. E bile go a kgonega gore le wena o romele moneelo ka go lebanya mokgatlong wa molao woo o dirišwago ke Dihlatse tša Jehofa nageng ya geno. E le gore o tsebe leina la mokgatlo woo wa molao wo o dirišwago ke Dihlatse tša Jehofa nageng ya geno, hle eya go www.pr2711.com/nso gomme o ikgokaganye le ofisi ya lekala ya Dihlatse tša Jehofa yeo e hlankelago naga ya geno. Mekgwa yeo o ka neelago ka yona še:

MENEELO

O ka ntšha moneelo ka go o romela ka akhaonto ya panka, ka karata ya panka, ka karata ya mokitlana goba ka founo. Dinageng tše dingwe o ka ntšha moneelo o diriša wepesaete ya jw.org goba wepesaete e nngwe ya mokgatlo.
O ka neela ka tšhelete, mabenyabje goba dilo tše dingwe tša bohlokwa. Akaretša le lengwalo leo le bontšhago gore tšhelete yeo goba dilo tšeo ke moneelo wa go lebanya.

MENEELO YEO E ITHEKGILEGO KA MAEMO

Ye ke tšhelete yeo o neelago ka yona eupša e le yeo o ka e bušetšwago ge e ba o e nyaka.
Akaretša le lengwalo leo le hlalosago gore go ka direga gore tšhelete yeo o tle o e nyake.

MEKGWA E MENGWE YEO O KA NEELAGO KA YONA

Ka mo tlase go lokeleditšwe mekgwa e mengwe ya go ntšha meneelo ya go thekga modiro wa Mmušo lefaseng ka bophara. Pele o ntšha moneelo, thoma ka go ikgokaganya le ofisi ya lekala yeo e hlankelago naga ya geno gomme o botšiše gore ke mekgwa efe yeo e dirišwago nageng ya geno. Dinyakwa tša molao le melao ya lekgetho e a fapana, ka gona boledišana le motho yo a tsebago melao yeo gabotse pele o neela.

Inšorense: O ka ntšha moneelo wo ka go kgetha mokgatlo wa molao wo o dirišwago ke Dihlatse tša Jehofa gomme wa o ngwadiša gore o tšee inšorense ya gago ya bophelo goba thulaganyo ya go rola modiro/phenšene.

Diakhaonto tša Panka: Go ithekgile ka dinyakwa tša panka yeo o e dirišago, o ka dira gore mokgatlo e be mojabohwa wa tšhelete ya gago, wa ngwala lengwalo la panka leo le bontšhago gore o nea mokgatlo bokae goba wa dira gore mokgatlo e be mojabohwa wa tšhelete ya gago ge o rola modiro. Le gona o ka ngwala gore o mongwe wa mekgatlo yeo e dirišwago ke Dihlatse tša Jehofa o šale o tšea tšhelete yeo ge o hlokofetše.

Di-stock le Di-bond: O ka neela ka di-stock le di-bond go mokgatlo wa molao wo o dirišwago ke Dihlatse tša Jehofa. Le gona o ka ngwala tumelelano yeo go yona o laelago gore dilo tše di fetišetšwe go mokgatlo ka morago ga lehu la gago.

Mafelo: Ge e ba o na le lefelo goba moago wo o ka rekišwago, o ka neela ka wona go mokgatlo wa molao wo o dirišwago ke Dihlatse tša Jehofa. Ge e ba wena goba batho ba bangwe ba dula moagong woo, o ka rulaganya gore o tšwele pele o dula moo goba batho bao ba tšwele pele ba dula go wona go fihlela o hlokofetše.

Moneelo wa Ngwaga le Ngwaga: O ka neela ka tšhelete go mokgatlo wa molao wo o dirišwago ke Dihlatse tša Jehofa gomme wa dira tumelelano ya gore o tla diriša e nngwe ya tšhelete yeo ngwaga le ngwaga ge o sa phela. O ka fokoletšwa tšhelete ya lekgetho ngwageng woo o ntšhago moneelo woo ka wona.

Dikeno le Mekgatlo ya Semolao: O ka rulaganya gore dithoto tša gago goba tšhelete di newe mokgatlo wo o dirišwago ke Dihlatse tša Jehofa ka morago ga ge o hlokofetše. O ka dira seo ka go ngwala keno ya semolao goba tumelelano yeo go yona o bolelago gore mokgatlo wa Dihlatse tša Jehofa ke mojabohwa wa dilo tša gago. Se se ka dira gore o fokoletšwe tšhelete ya lekgetho.

Bao ba dirišago mokgwa wo o bitšwago “charitable planning” go neela, ba swanetše go rulaganye dilo tša bona gabotse pele ba ka neela. O ka hwetša tsebišo e oketšegilego ya mabapi le go ntšha moneelo wa go thekga modiro wa lefase ka bophara wa Dihlatse tša Jehofa ka poroutšheng ya Charitable Planning to Benefit Kingdom Service Worldwide, yeo e hwetšagalago ka Seisemane le Sepanishi. Poroutšha ye e bolela ka mekgwa e fapafapanego yeo motho a ka neelago ka yona, ya go swana le ge motho a tlogelela motho yo mongwe bohwa ge a hlokofetše. Tsebišo yeo e lego ka poroutšheng ye e ka no se šome maemong a gago ka baka la melao ya lekgetho le melao e mengwe ya nageng ya geno. Ba bantši ba kgonne go thekga modiro wa rena wa lefase ka bophara le wa go thuša bana babo rena e bile ba hweditše meputso ya lekgetho ka go neela ka e nngwe ya ditsela tše. Ge e ba poroutšha ye e le gona nageng ya geno, o ka kgopela kopi ya yona go mongwaledi wa phuthego ya geno.

Ge o nyaka tsebišo e oketšegilego, kgotla linki yeo e rego, “Ntšha Moneelo wa go Thekga Modiro wa Rena wa Lefase ka Bophara” botlaseng bja letlakala la wepesaete ya jw.org/nso, goba o ikgokaganye le ofisi ya lekala leo le hlankelago naga ya geno.