Motho yo a Neago—Jehofa o tla mo Šegofatša

GA E sa le go tloga kgale go dira dihlabelo go le bohlokwa borapeding bja therešo. Baisiraele ba be ba nea Modimo dihlabelo tša diphoofolo, gomme Bakriste ba be ba dutše ba tsebja ka go nea Modimo “sehlabelo sa tumišo.” Lega go le bjalo, go sa na le dihlabelo tše dingwe tšeo di kgahlago Modimo. (Baheb. 13:15, 16) Mehlala e latelago, e bontšha gore dihlabelo tšeo di dira gore batho ba thabe le go šegofatšwa ke Jehofa.

Hanna yo e bego e le mohlanka yo a botegago wa Modimo, o be a tloga a nyaka morwa, eupša o be a sa kgone go ba le bana. O ile a rapela Jehofa gomme a mo tshepiša gore ge e ba a ka mo nea ngwana wa mošemane, o be a tla “mo nea [Yena] bophelong bja gagwe ka moka.” (1 Sam. 1:10, 11) Ge nako e dutše e eya, Hanna o ile a ima gomme a belega morwa a mo reela leina la Samuele. Ka morago ga gore Hanna a tshweše Samuele letswele, o ile a mo iša taberenakeleng, bjalo ka ge a ile a tshepiša Jehofa. Jehofa o ile a šegofatša Hanna ka ge a ile a mo nea selo se bohlokwahlokwa. Hanna o ile a šegofatšwa ka go ba le bana ba bangwe ba bahlano, gomme Samuele a ba moporofeta e bile Modimo a mo diriša go ngwala Beibele.—1 Sam. 2:21.

Go swana le Hanna le Samuele, Bakriste lehono ba na le tokelo ya go hlankela Mmopi wa bona ka dipelo tša bona ka moka. Jesu o re tshepišitše gore Jehofa o tla re šegofatša kudu ge e ba re mo neela sehlabelo le ge e sefe tirelong ya gagwe.—Mar. 10:28-30.

Lekgolong la pele la mengwaga, mosadi wa Mokriste yo a bego a bitšwa Dorokase, o be a tumile ka “ditiro tše dibotse le dimpho tša kgaugelo,” e lego dihlabelo tšeo a bego a di dira go thuša ba bangwe. Ka manyami, o ile “a babja gomme a hwa,” gomme seo sa dira gore phuthego e nyame kudu. Ge barutiwa ba be ba ekwa gore Petro o be a le gona lefelong leo, ba ile ba mo kgopela gore a tle kapejana. Nagana kamoo ba ilego ba thaba ka gona ge Petro a etla gomme a tsoša Dorokase bahung! Ye e be e le pego ya mathomo ya ka Beibeleng ya motho yo a ilego a tsošwa bahung ke moapostola. (Dit. 9:36-41) Modimo o be a sa lebala dihlabelo tša Dorokase. (Baheb. 6:10) Mohlala wa gagwe o mobotse wa go nea ka pelo ka moka, o ngwadilwe ka Lentšung la Modimo gore re o ekiše.

Moapostola Paulo le yena o beile mohlala o mobotse kudu tabeng ya go nea ka pelo ka moka ka go diriša nako ya gagwe le go thuša ba bangwe. Ge Paulo a be a ngwalela bana babo ba Bakriste ba kua Korinthe, o itše: “Ge e le nna ke tla ikgafa ka lethabo kudu gomme ka gafiwa ka mo go feletšego bakeng sa meoya ya lena.” (2 Bakor. 12:15) Paulo o iponetše ka boyena gore go thuša ba bangwe ga go thabiše wena feela, eupša sa bohlokwa kudu ke gore go thabiša le Jehofa.—Dit. 20:24, 35.

Go molaleng gore Jehofa o thabišwa ke ge re diriša nako ya rena le matla a rena go thekga Mmušo wa gagwe le go thuša badumedigotee le rena. Eupša na go na le ditsela tše dingwe tšeo re ka thekgago modiro wa go bolela ditaba tše dibotse tša Mmušo wa Modimo? Ee, di gona! Go tlaleletša tabeng ya go diriša nako ya rena le matla a rena, re ka tumiša Modimo ka go ntšha meneelo. Meneelo yeo e dirišetšwa go thekga modiro wa go ruta ka Beibele wo o dirwago lefaseng ka moka. Le gona meneelo ye e thekga baromiwa le bahlanka bao ba lego tirelong e kgethegilego ya nako e tletšego. Go oketša moo, meneelo ye e thuša gore go tšweletšwe dikgatišo le dibidio le gore di fetolelwe. E thuša le batho bao ba wetšwego ke dikotsi e bile e thuša le go aga Diholo tša Mmušo. Re ka kgodišega gore ge re nea, Jehofa Modimo o tla re šegofatša. Go feta moo, ge re nea Jehofa dilo tša rena tše bohlokwa re a mo godiša goba go mo tumiša.—Die. 3:9; Doit. 15:10.

Mekgwa Yeo Ba Bangwe Ba Neelago Ka Yona Go Thekga Modiro Wa Lefase Ka Bophara

Go swana le mehleng ya Moapostola Paulo, Bakriste ba bantši lehono ba ‘boloka se sengwe ka thoko,’ goba ba beela tšhelete ka thoko gomme ba e tsenya ka lepokising la phuthegong ya gabo bona la moneelo wa go thekga “Modiro wa Lefase ka Bophara.” (1 Bakor. 16:2) Kgwedi e nngwe le e nngwe diphuthego tša Dihlatse tša Jehofa di romela tšhelete ye ofising ya tšona ya lekala. E bile go a kgonega gore le wena o romele moneelo ka go lebanya mokgatlong wo o lego molaong wa Dihlatse tša Jehofa nageng ya geno. E le gore o tsebe leina la mokgatlo woo, hle, ikgokaganye le ofisi ya lekala ya Dihlatse tša Jehofa ya nageng ya geno. Eya go www.pr2711.com/nso gore o hwetše aterese. Go ithekgile ka maemo a mo o dulago gona, o ka diriša mekgwa ye e latelago go neela:

MENEELO

O ka ntšha moneelo o diriša akhaonto ya panka, ka karata ya panka, goba ka karata ya mokitlana. Dinageng tše dingwe o ka ntšha moneelo o diriša wepesaete ya jw.org goba wepesaete e nngwe ya mokgatlo.
O ka neela ka tšhelete, mabenyabje goba dilo tše dingwe tša bohlokwa. Ngwala le lengwalo leo le bontšhago gore tšhelete yeo goba dilo tšeo ke moneelo wa go lebanya.

MENEELO YEO E ITHEKGILEGO KA MAEMO

Ke tšhelete yeo o ka neelago ka yona eupša wa e bušetšwa ge e ba o e nyaka.
Ngwala le lengwalo leo le hlalosago gore go ka direga gore tšhelete yeo o tle o e nyake.

MEKGWA E MENGWE YEO O KA NEELAGO KA YONA

Ka mo tlase go bontšhwa mekgwa e mengwe ya go ntšha meneelo ya go thekga modiro wa Mmušo lefaseng ka bophara. Pele o ntšha moneelo, thoma ka go ikgokaganya le ofisi ya lekala yeo e hlankelago naga ya geno gomme o botšiše gore ke mekgwa efe yeo e dirišwago nageng ya geno. Dinyakwa tša molao le melao ya lekgetho e a fapana, ka gona boledišana le motho yo a tsebago melao yeo gabotse pele o neela.

Inšorense le Ditšhelete tša Phenšene: O ka ntšha moneelo wo ka go kgetha mokgatlo wa molao wo o dirišwago ke Dihlatse tša Jehofa gomme wa o ngwadiša gore o tšee inšorense ya gago ya bophelo goba ditšhelete tša gago tša ge o rotše modiro goba tša phenšene.

Diakhaonto tša Panka: Le gona o ka ngwala gore o mongwe wa mekgatlo yeo e dirišwago ke Dihlatse tša Jehofa o šale o tšea tšhelete yeo ge o hlokofetše.

Di-stock le Di-bond: O ka neela ka di-stock le di-bond go mokgatlo wa molao wo o dirišwago ke Dihlatse tša Jehofa. Le gona o ka ngwala tumelelano yeo go yona o laelago gore dilo tše di fetišetšwe go mokgatlo ka morago ga lehu la gago.

Mafelo: Ge e ba o na le lefelo goba moago wo o ka rekišwago, o ka neela ka wona go mokgatlo wa molao wo o dirišwago ke Dihlatse tša Jehofa. Ge e ba wena goba batho ba bangwe ba dula moagong woo, o ka rulaganya gore o tšwele pele o dula moo goba batho bao ba tšwele pele ba dula go wona go fihlela o hlokofetše.

Dikeno le Mekgatlo ya Semolao: O ka rulaganya gore dithoto tša gago goba tšhelete di newe mokgatlo wo o dirišwago ke Dihlatse tša Jehofa ka morago ga ge o hlokofetše. O ka dira seo ka go ngwala keno ya semolao goba tumelelano yeo go yona o bolelago gore mokgatlo wa Dihlatse tša Jehofa ke mojabohwa wa dilo tša gago. Se se ka dira gore o fokoletšwe tšhelete ya lekgetho.

Bao ba dirišago mokgwa wo o bitšwago “charitable planning” go neela, ba swanetše go rulaganya dilo tša bona gabotse pele ba ka neela. O ka hwetša tsebišo e oketšegilego ya mabapi le go ntšha moneelo wa go thekga modiro wa lefase ka bophara wa Dihlatse tša Jehofa ka poroutšheng ya Charitable Planning to Benefit Kingdom Service Worldwide, yeo e hwetšagalago ka Seisemane le Sepanishi. Poroutšha ye e bolela ka mekgwa e fapafapanego yeo motho a ka neelago ka yona, ya go swana le ge motho a tlogelela motho yo mongwe bohwa ge a hlokofetše. Tsebišo yeo e lego ka poroutšheng ye e ka no se šome maemong a gago ka baka la melao ya lekgetho le melao e mengwe ya nageng ya geno. Ba bantši ba kgonne go thekga modiro wa rena wa lefase ka bophara le wa go thuša bana babo rena, e bile ba hweditše meputso ya lekgetho ka go neela ka e nngwe ya ditsela tše. Ge e ba poroutšha ye e le gona nageng ya geno, o ka kgopela kopi ya yona go mongwaledi wa phuthego ya geno.

Ge o nyaka tsebišo e oketšegilego, kgotla linki yeo e rego, “Ntšha Moneelo wa go Thekga Modiro wa Rena wa Lefase ka Bophara” botlaseng bja letlakala la wepesaete ya jw.org/nso, goba o ikgokaganye le ofisi ya lekala leo le hlankelago naga ya geno.