Letlolo La Dipotšišo
● Na go a dumelelega go dula tšhemong ya phuthego e nngwe eupja wa ya dibokeng felo go gongwe?
Mokgatlo o amogetše mangwalo a mantši mabapi le potšišo ye e lego ka mo godimo. Ka baka leo re dirile phetho ya gore re boeletše e nngwe ya tsebišo yeo e ilego ya gatišwa ka go Tšebeletso ea Rona ea ’Muso ya April 1976.
Ka boripana, re kgothaletša bagoeledi gore ba ye dibokeng tša phuthego yeo ba dulago tšhemong ya yona. Mabakeng a mantši se se itlhatsela e le seo se holago lapa kudu, ka ge gantši se dira gore go be bonolo go ya dibokeng, go kopanela tirelong ya tšhemo ka bokgaufsi le go holwa ke thušo yeo e newago ke bagolo.
Go ka ba go e-na le mabaka ao ka ona mogoeledi goba lapa le ka bago le sa kgone go dira ka go dumelelana le tlhahlo e lego ka mo godimo. Hlogo e nngwe le e nngwe ya lapa e ikarabelela ka lapa la yona. E tla ba mo gobotse go yena gore a boledišane ka taba pele le bagolo gore a holwe ke keletšo ya bona pele a dira phetho. Ka morago ga go hlahlobišiša mabaka ka moka ao a akaretšwago, o tla swanelwa ke go dira phetho mabapi le seo e lego se se kaone. Ga go na lebaka la go nyatša phetho ya gagwe ge e dirilwe.
Mafelong a metse e megolo, gantši go ka ba go e-na le diphuthego tše dintši tšeo di lego lefelong le tee. Go ka ba le mabaka a mantši ao ka wona bagolo ba ka dirago phetho ya gore dikgahlego tša modiro di tla tšwetšwa pele ka go fetišetšwa ga bagoeledi phuthegong e nngwe. Ka mohlala, e ka ba mo go nyakegago go matlafatša phuthego yeo e nago le bagoeledi ba sego kae. Bagolo ka phuthegong e nngwe le e nngwe ba ka tšweletša seo ba bonago e le se se ka dirwago gomme ba kgopele gore lapa le lengwe le le lengwe leo le kgongwago le ele hloko seo. Go tla ba bjalo le ka bagolo, bahlanka ba bodiredi goba babulamadibogo bao ba kgopelwago gore ba fetišetšwe felo go gongwe go yo thuša phuthego yeo e nyakago thušo. Ka dinako tše dingwe molebeledi wa tikologo a ka lemoga gore phuthego e nngwe e na le bagolo ba bantši mola phuthego e nngwe e lego kgaufsi e e-na le bagolo ba sego kae feela gomme ka baka leo e nyaka thušo. Molebeledi wa tikologo a ka dira gore go nyakega ga thušo mo go bjalo go tsebje ke phuthego yeo e nago le bagolo ba bantši. Ka morago ga ge ba etše hloko dinyakwa tša bona ka noši, ba ka dira phetho ya gore mogolo o tee goba ba babedi, gotee le malapa a bona, ba ka ya moo go yo thuša phuthego e bjalo. (Bona Tšebeletso ea ’Muso ya April 1973.) Ka go latela tlhahlo e lego ka mo godimo kgaufsi kudu ka mo go ka kgonegago, re tla dira gore “tšohle di yê ka bothakxa le ka molaô.”—1 Ba-Kor. 14:40.