Go Lebiša Barutwana Ba Beibele Phuthegong Ya Jehofa
1 Barutwana ba Beibele ba swanetše go tlwaelana le phuthego ya “mohlape o tee” woo Jesu a boletšego ka wona go Johane 10:16. Ba swanetše go lemoga gore go ikopanya ga bona le phuthego ya Jehofa ke ga bohlokwa bakeng sa go phološwa ga bona. (Kut. 7:9, 10, 15) Ka gona, re swanetše go thoma go lebiša barutwana ba Beibele phuthegong kapejana ka morago ga ge thuto ya Beibele e hlomilwe.
2 Thuša barutwana ba gago ba Beibele go itlwaelanya le dikarolo tše dintši tša phuthego ya Jehofa ya lefaseng. Ka go latela mohlala wa lekgolong la pele la nywaga, batho ka moka ba Jehofa ba ka diphuthegong tšeo di bopjago ke bagolo, bahlanka ba bodiredi le bagoeledi. Lehono, ditho tša phuthego di thabela go ba gona dibokeng tše hlano ka beke. Go fela go e ba le dikopano tše dikgolo le tše nyenyane tšeo di rulagantšwego mo ngwageng, gomme dikopano tše di nea thuto e kgethegilego gotee le dibaka tša go kopana le Dihlatse-gotee tša mafelong a fapa-fapanego. Se sengwe gape, go na le babulamadibogo, baromiwa le balebeledi ba basepedi gotee le Sehlopha se Bušago seo se hlahlago modiro wa lefase ka bophara. O ka tlwaelanya bjang barutwana ba gago ba Beibele le dikarolo tše fapa-fapanego tša phuthego ya Jehofa? O ka ba thuša bjang gore ba bone gore thulaganyo ya phuthego ke yeo e theilwego Beibeleng?
DIRIŠA PUKWANA YA BA DIRA THATO YA MODIMO
3 Pukwana ya Ba Dira Thato ya Modimo e na le tsebišo e ntši kudu mabapi le phuthego ya Jehofa. Ka yona o ka tlwaelanya ka mo go tšwelago pele barutwana ba Beibele le phuthego gomme wa ba thuša go lemoga kamoo e šomago ka gona. Tsela e botse ya go thoma ke ka go bolela seo se diregago Holong ya Mmušo. Se se tla kgothaletša morutwana go ba gona dibokeng tša phuthego. Pele o mo laleletša polelong ya phatlalatša ka lekga la mathomo, boeletša tsebišo e lego go matlakala 14 le 15. Mmontšhe diswantšho. Hlalosa lefelo leo Holo ya Mmušo e lego go lona le kamoo e bogegago ka gona. Mo gongwe o ka ba wa mmontšha seswantšho sa Holo ya Mmušo yeo o kopanelago go yona.
4 Ge go tsebišwa ka ketelo ya molebeledi wa tikologo phuthegong, hlahloba le morutwana wa gago wa Beibele matlakala 20 le 21. Diriša dipotšišo tšeo di lego bofelong bja letlakala 21 go dira gore dintlha tše kgolo di bonale. Hlahloba le yena thekgo ya Mangwalo ya thulaganyo ya rena ya gona bjale ka go diriša serapa sa pele go letlakala 20. Tsebišo ye e tla dira gore ketelo ya morutwana wa gago Holong ya Mmušo e be e nago le morero kudu.
5 Ka mo go swanago, pele ga kopano ya lena ya selete, kopano ya tikologo goba letšatši le kgethegilego la kopano, akaretša seo se gatišitšwego go letlakala 19. Lebiša tlhokomelo go seo se dirwago dikopanong tše dikgolo, gomme o bontšhe tekanyo ya ditšhaba-tšhaba yeo e bontšhitšwego go letlakala 18. Ge o bolela ka seswantšho seo se bontšhago go lokollwa ga puku e mpsha, mo gongwe o ka mo lokišeletša poledišano e tšwelago pele ya matlakala 24 le 25. Go hlalosa bobulamadibogo, akaretša dintlha tše di lego go matlakala 22 le 23.
FETOGELA GO SEO SE NYAKEGAGO
6 Bjale ka ge o ka bona, ga se tlemo go thoma pukwana ya Ba Dira Thato ya Modimo mathomong. Go e na le moo, ge sebaka se tšwelela gomme go nyakega, hlahloba dintlha tše itšego go tšwa pukwaneng tšeo di tlago go thuša morutwana gore a thabele phuthego ya Jehofa le go mo kgothaletša go kopanela le phuthego ya lefelong leo.
7 Go ba le kgodišego ge o bolela ditaba tše go tla dira gore morutwana wa gago a se tsoge a di lebetše le ka mohla. Fišega moyeng. (Dit. 18:25) Le gona, kgonthišega gore wena “o rutaxo ba bangwê,” o bea mohlala o mobotse ka go bontšha tebogo bakeng sa phuthego ya Jehofa. (Ba-Roma 2:21) Ka go dira bjalo, mo gongwe o ka thuša ba bangwe go tsena mohlapeng o tee woo Jesu a o išago bophelong bjo bo sa felego.