Thuša ba Bangwe Gore ba be Gona Dibokeng
1 “Bagwera ba bangwe le ba bangwe tikologong . . . bao ba ratago go ba gona dibokeng ba laletšwa ka borutho go dira bjalo.” Ga e sa le go tloga ge tsebišo ye e tšwelela ka tokollong ya Zion’s Watch Tower ya November 1880, Dihlatse tša Jehofa di ile tša laletša batho ka mafolofolo go bokana gotee bakeng sa thuto ya Beibele. (Kut. 22:17) Ye ke karolo e bohlokwa ya borapedi bja therešo.
2 Go Bohlokwa go ba Gona: Re hwetša ditšhegofatšo ge re kopanela le phuthego. Re tlwaelana gakaone le Modimo wa rena yo a kgahlišago, Jehofa. Phuthegong, re bokana gotee bakeng sa go ‘rutwa ke Jehofa.’ (Jes. 54:13) Mokgatlo wa gagwe o rulaganya lenaneo leo le tšwelago pele la thuto ya Beibele leo le re batametšago kgaufsi le yena le go nea thušo e šomago tabeng ya go dira “tšohle tše Modimo a di rataxo.” (Dit. 20:27; Luka 12:42) Diboka di nea tlwaetšo ya motho ka noši ya bokgoni bja go ruta Lentšu la Modimo. Dikgopotšo tše di tšwago Mangwalong di re thuša go thabela tswalano e atlegilego le ba bangwe gotee le Jehofa ka boyena. Go gwerana le bao ba ratago Modimo go matlafatša tumelo ya rena.—Ba-Roma 1:11, 12.
3 Nea Taletšo e Lebanyago: Laleletša morutwana yo mongwe le yo mongwe wa Beibele dibokeng di sa tloga fase thutong ya mathomo. Mo nee pampišana ya taletšo. Tsoša kgahlego ya gagwe ka go abelana le yena ntlha yeo e go kgothaditšego go tšwa sebokeng se se fetilego le go bolela ka se sengwe seo se tlago go ahla-ahlwa sebokeng se se latelago. Hlalosa kamoo Holo ya Mmušo e lego ka gona, gomme o kgonthišetše gore o tseba kamoo a ka fihlago ka gona go yona.
4 Ge e ba morutwana a sa be gona di sa tloga fase, tšwela pele o mo laletša. Diriša metsotso e sego kae beke e nngwe le nngwe go mmontšha kamoo mokgatlo wa rena o šomago ka gona. Diriša poroutšha ya Ba Dira Thato ya Modimo le bidio ya Jehovah’s Witnesses—The Organization Behind the Name bakeng sa go mo tlwaelanya le rena le diboka tša rena. E-tla le bagoeledi ba bangwe bakeng sa go tlwaelanya morutwana le bona. Leboga Jehofa thapelong bakeng sa mokgatlo gomme o bolele go nyakega ga gore morutwana a kopanele le wona.
5 O se ke wa dika-dika go thuša bao ba sa tšwago go thabela go kopanela le rena. Ge tebogo ya bona ya go leboga Jehofa e dutše e gola, ba tla tutueletšega go diriša seo ba ithutago sona le go ba karolo ya mokgatlo o nago le botee wa Modimo.—1 Ba-Kor. 14:25.