Karolo 8: Go Lebiša Barutwana Mokgatlong
Go Swara Dithuto tša Beibele tše di Tšwelago Pele
1. Ke ka baka la’ng go e-na le mohola go ruta morutwana ntlha e itšego mabapi le mokgatlo wa Jehofa bekeng e nngwe le e nngwe thutong ya Beibele?
1 Morero wa rena tabeng ya go swara dithuto tša Beibele ga se feela go ruta batho thuto ya bodumedi eupša gape ke go thuša barutwana gore e be karolo ya phuthego ya Bokriste. (Sak. 8:23) Poroutšha ya Dihlatse tša Jehofa—Ke Bomang? Di Dumela Eng? e ka re thuša go dira se. Nea barutwana ba Beibele ba bafsa kopi ya yona, gomme o ba kgothaletše go e bala. Go oketša moo, tšea metsotso e sego kae bekeng e nngwe le e nngwe o ruta morutwana ntlha e itšego mabapi le mokgatlo wa Jehofa.
2. Ke bjang o ka kgothaletšago barutwana ba Beibele gore ba be gona dibokeng tša phuthego?
2 Diboka tša Phuthego: Tsela e kgolo yeo ka yona barutwana ba Beibele ba thomago go thabela mokgatlo wa Jehofa ke ka go kopanela le rena dibokeng tša phuthego. (1 Ba-Kor. 14:24, 25) Ka baka leo, o ka thoma go ba tlwaelanya le tšona ka go hlalosa diboka tše hlano tša beke le beke, o hlalosa seboka ka setee ka setee. Bolela sehlogo sa polelo ya phatlalatša e latelago. Ba bontšhe sehlogo seo se tlago go ahla-ahlwa Thutong ya Morokami le Thutong ya Puku ya Phuthego. Hlalosa Sekolo sa Bodiredi sa Pušo ya Modimo le Seboka sa Tirelo. Ge e ba o e-na le kabelo sekolong, mohlomongwe o ka e lokišeletša le bona. Boledišana le bona ka dintlha tše di kgahlišago tšeo di ilego tša tšweletšwa sebokeng. Diriša diswantšho tše di lego dikgatišong tša rena go ba thuša gore ba bope seswantšho-kgopolo sa seo se diregago. Ba laletše gore ba be gona go tloga thutong ya mathomo-thomo.
3. Ke dibopego dife tša mokgatlo tše re ka di ahla-ahlago?
3 Ge Segopotšo, dikopano le ketelo ya molebeledi wa tikologo di batamela, tšea metsotso e sego kae go hlalosa le go aga phišego ya go fišegela ditokišetšo tše. Tšwela pele o araba dipotšišo tše bjalo ka tše: Ke ka baka la’ng re bitšwa Dihlatse tša Jehofa? Ke ka baka la’ng re bolela ka mafelo a rena a diboka e le Diholo tša Mmušo? Mediro ya bagolo le bahlanka ba bodiredi ke efe? Modiro wa boboledi le wa tšhemo o rulaganywa bjang? Dipuku tša rena di tšweletšwa bjang? Mokgatlo o hlokomelwa bjang ka tša ditšhelete? Ke tema efe e kgathwago ke ofisi ya lekala le Sehlopha se Bušago tabeng ya go okamela modiro?
4, 5. Dibidio tša rena di ka oketša bjang kwešišo le tebogo bakeng sa mokgatlo?
4 Dibidio tše di Rutago: Tsela e nngwe yeo ka yona barutwana ba Beibele ba ka bonago mokgatlo wa Jehofa o makatšago ke ka dibidio tša rena. Bidio ya To the Ends of the Earth e bontšha ka modiro wa rena wa lefase ka bophara wa boboledi; Our Whole Association of Brothers e bontšha ka borwarre bja rena bja lefase ka bophara; gomme United by Divine Teaching e bontšha botee bjo Dihlatse tša Jehofa di nago le bjona. Mosadi yo a ilego a amogela dimakasine tša rena le dipuku tše dingwe ka nywaga e ka bago e mehlano o ile a kgongwa ke bidio ya Jehovah’s Witnesses—The Organization Behind the Name, mo a ilego a ba a sekiša megokgo. O be a šetše a thomile go bota Dihlatse tše di bego di mo etela, eupša ka morago ga go bogela bidio, o ile a nagana gore a ka bota le mokgatlo wo. Go ile gwa thongwa thuto e rulagantšwego le yena, gomme bekeng e latetšego, o ile a ba gona dibokeng Holong ya Mmušo.
5 Ka go fetša metsotso e sego kae le barutwana ba rena beke le beke gomme re diriša ditlabakelo tše di neilwego, re ka tšwela pele re lebiša barutwana mokgatlong o tee wo Jehofa a o dirišago lehono.