“Dirang Byalo Xore E Bê Xo Nkxopola”

1 Jesu o laetše balatedi ba gagwe gore ba bine segopotšo sa lehu la gagwe. (Luka 22:19) Monyanya wo e be e tla ba segopotšo sa sehlabelo se segolo seo Jesu a se neilego bakeng sa batho. Lenyaga Dihlatse tša Jehofa lefaseng ka bophara di tla bina Segopotšo sa lehu la Kriste ka Labohlano, April 17, ka morago ga ge letšatši le sobetše.

2 Tokišetšo ya Motho ka Noši: Re ka lokišetša bjang monyanya o swanetšego wa tiragalo ye ya bohlokwa? Tsela e nngwe ke ka go naganišiša ka thapelo ka bophelo bja lefaseng le bodiredi bja Jesu. O bile Molopolodi wa batho ka go gafa bophelo bja gagwe bjo bo phethagetšego ka sehlabelo. (Mat. 20:28) Bakeng sa go thuša o mongwe le o mongwe gore a leboge tokišetšo ye, re kgothaletša gore le hlahlobe dikgaolo 112 go ya go 116 tša Motho yo a Phagamego Kudu yo a Kilego a Phela.

3 Mmalo wa rena wa Beibele pele ga Segopotšo lenyaga, bjalo ka ge o ngwadilwe ka go 1992 Calendar of Jehovah’s Witnesses, ke ditemana tše di kgethilwego go tšwa pukung ya Beibele ya Mareka. Mmalo wo wa Beibele o kgethegilego o rulaganyeditšwe lebakeng la matšatši a tshelelago go tloga ka Sontaga go fihla ka Labohlano, April 12-17. Ka moka ga rena re nyaka go diriša nako e lekanego re naganišiša ka ditiragalo tše tša bohlokwa.

4 Tokišetšo e Feletšego ka Bagolo: Kgonthišegang gore ditaletšo tša Segopotšo di gona. Na go na le madulo a lekanego bakeng sa bohle bao go letetšwego gore ba be gona? Moo diphuthego tše fetago e tee di tlago go diriša holo, go swanetše go dirwa dithulaganyo tše botse e le gore phuthego e nngwe le e nngwe e tle e be le nako e lekanego ya go bina Segopotšo. Bao e lego bahlokomedi ba swanetše go tsebišwa dikabelo tša bona. Ba tla rata go gata mogato wa pele tabeng ya go amogela batho ba bafsa bao ba tlago. Go swanetše go kgethwa seboledi seo se swanelegago gabotse seo se tlago go neela taba ka mo go kwagalago le ka tsela ya Mangwalo. Abelang bagolo ba ikarabelago goba bahlanka ba bodiredi gore ba fetiše diswantšhetšo. Go swanetše go neelwa senkgwa se se sa omelwago le beine e khubedu yeo e sa tswakwago. Bakeng sa dikgopotšo tše oketšegilego, bonang tokollo ya Morokami wa February 15, 1985, letlakala 19.

5 Ka go dira ditokišetšo tše feletšego e sa le pele, re tla bontšha gore re tloga re leboga ka botlalo seo se bolelwago ke tiragalo ye e kgethegilego le gore re kganyoga go bina Segopotšo sa lehu la Kriste ka go dumelelana le taelo ya Jesu.—1 Ba-Kor. 11:23-26.

[Lepokisi go letlakala ]

1. Na o mongwe le o mongwe, go akaretša le seboledi, o tsebišitšwe ka nako e nepagetšego le lefelo la monyanya? Na seboledi se na le senamelwa?

2. Na go dirilwe dithulaganyo tše swanetšego bakeng sa go lokišetša diswantšhetšo?

3. Na go dirilwe dithulaganyo tša gore go be le yo a tlago le lešela la tafola le le hlwekilego le palo e nyakegago ya digalase le dipoleite?

4. Ke dithulaganyo dife tšeo di dirilwego bakeng sa go hlwekiša holo pele ga Segopotšo le go e hlwekiša go se nene ka morago ge e ba phuthego e nngwe e tla ba e diriša holo mantšiboeng ao? Na go rulagantšwe ditlabelo tše di swanetšego tša modumo ge e ba go hirilwe holo?

5. Na bahlokomedi le bafetiši ba diswantšhetšo ba abetšwe? Na go rulagantšwe seboka le bona pele ga Segopotšo bakeng sa go ahla-ahla dikabelo tša bona? Neng? Ke megato efe yeo e tlago go latelwa bakeng sa go kgonthiša gore bohle ba fetišetšwa di diswantšhetšo ka mo go swanetšego?

6. Na dithulaganyo di feletše bakeng go thuša banababo rena le dikgaetšedi ba tšofetšego le ba digole? Na go dirilwe dithulaganyo bakeng sa go nea batlotšwa lege e le bafe bao ba ka bago ba le malaong gomme ba sa kgone go tla Holong ya Mmušo?