Go Thoma Dithuto Tša Magae Tša Beibele

1 E nngwe ya diphihlelo tše di putsago kudu le tše di kgotsofatšago go Bakriste ba therešo ke go ruta motho o mongwe therešo ka thuto ya legae ya Beibele. Lega go le bjalo, ba bangwe ba ka ba ba sa tšee karolo sebopegong se se se humišago sa bodiredi bja rena ka gobane ba nagana gore ga ba kgone go thoma le go swara thuto ya Beibele. Bagoeledi ba bantši le babulamadigo bao ba nago le bokgoni ba kile ba ikwa ka tsela yeo. Lega go le bjalo, ka go bota Jehofa le go diriša ditšhišinyo tše di lego ka go Tirelo ya Rena ya Mmušo, ba ithutile kamoo ba ka thomago le go swara dithuto tša Beibele ka gona gomme ba okeditše lethabo la bona bodireding. O ka ipeela pakane e swanago.

2 Go Diriša Mokgwa o Lebanyago le Dipampišana: E nngwe ya ditsela tše bonolo kudu tša go thoma thuto ke ka go diriša mokgwa o lebanyago. Selo feela seo batho ba bangwe ba se nyakago ke taletšo e borutho ya go ithuta Beibele. Se se ka dirwa ka go fo botšiša mong wa ntlo gore: “Na o be o tla rata go ba le thuto ya legae ya Beibele ya motho ka noši gomme o oketše tsebo ya gago ya Beibele le morero wa Modimo ka lefase?” Goba mo gongwe o ka botša mong wa ntlo gore o tla thabela go mmontšha tsela yeo thuto ya legae ya Beibele e swarwago ka yona. Gaešita lege ba bantši ba ka gana boithapo bjo, nagana ka lethabo le o bago le lona ge o hwetša motho yo a bo amogelago!

3 Tsela e nngwe ya go thoma thuto ya Beibele ke ka go diriša e nngwe ya dipampišana tša rena. Gaešita lege e le tše dinyenyane, di nea molaetša o matla le o kgodišago. Thuto e ka thongwa bjang ka pampišana? Ka go fo nea mong wa ntlo pampišana yeo o dumelago gore e tla mo kgahla. Ka gona, gata mogato wa pele gomme o laletše mong wa ntlo gore a bale serapa sa pele le wena. Bala mangwalo ao a bontšhitšwego gomme o hlalose kamoo a tsenago ka gona tabeng. Ketelong ya mathomo, mo gongwe le ka ahla-ahla serapa se tee goba tše pedi feela. Ge mong wa ntlo a thoma go lemoga gore o ithuta dilo tše di kgahlišago tše di tšwago Beibeleng, mo gongwe o ka kgona go oketša nako yeo o e dirišago dipoledišanong tša lena.

4 Go Diriša Beibele Feela: Ka dinako tše dingwe motho o dumela go bolela ka Beibele eupja a bonala a sa rate go amogela thuto e rulagantšwego goba go diriša e nngwe ya dipuku tša rena. O sa dutše o ka thoma le go swara thuto ya Beibele ka go lokišetša dipoledišano tše di kgahlišago tša Mangwalo tšeo di theilwego dikarolong tša puku ya Phela ka mo go sa Felego goba pukung ya Go Boledišana, eupja o diriša Beibele feela ge o etela motho yo a thabelago. Dipoledišano tše bjalo di ka tšea metsotso e 15 goba e 20 goba go feta moo, go ithekgile ka maemo. Ge e ba go dirwa ka mehla le ka mokgwa o tšwelago pele wa go ruta ditherešo tša Beibele, gona o thomile thuto ya Beibele gomme e ka begwa e le thuto. Ge nako e le e swanetšego, rola puku ya Phela ka mo go sa Felego gomme o sware thuto e rulagantšwego ka yona.

5 Go okeletša go hwetšeng dibaka bodireding bja tšhemo, na o kile wa leka go thoma dithuto tša Beibele le baagišani, bao o ba tlwaetšego goba ditho tša lapa? Na ke kgale? Na o kile wa leka gape morago bjale? Ge e ba mokgwa o mongwe o se wa ka wa šoma, na o kile wa nagana ka go leka o mongwe?

6 O ka atlega go thoma dithuto ge e ba o diriša ditšhišinyo tšeo di newago, o phegelela tirelong ya tšhemo gomme o bota Jehofa gore o tla go šegofatša. Le ka mohla le se ke la nyatša matla a therešo le thušo yeo Jehofa a e neago. Eka le ka oketša lethabo la lena bodireding ka go thoma le go swara dithuto tša magae tša Beibele.