Go Nyakega Dithuto Tša Beibele Tše Oketšegilego
1 Jehofa Modimo o šegofatša mokgatlo wa gagwe wa lefaseng ka kgolo e tšwelago pele. Ngwageng o fetilego wa tirelo lefaseng ka bophara ba 375 923 ba ile ba kolobetšwa—e lego palogare ya barutiwa ba bafsa ba fetago 1000 letšatši le lengwe le le lengwe goba mo e ka bago ba 43 iri e nngwe le e nngwe! Go sa šetšwe nywaga-some ya mathata yeo banababo rena ba ka bago ba ile ba lebeletšana le yona dikarolong tše fapa-fapanego tša lefase, modiro wa Mmušo o a atlega gomme go ba le dikoketšego tše kgolo. Ke mo go kgahlišago gakaakang go bala ka tšwelopele e dirwago go phatlalatšeng ditaba tše di lokilego!
2 Le rena mo Afrika Borwa ngwageng o fetilego wa tirelo, re bone dikoketšego palogareng ya bagoeledi le babulamadibogo ba go thuša, diiring tšeo di dirišitšwego ge go dirwa boboledi, le dipalong tša dipukwana, diporoutšha le dimakasine tšeo di sepedišitšwego. Go bile le koketšego palong ya bao ba kolobeditšwego le tlhoreng yeo e di fetago ya bao ba bilego gona Segopotšong. Go thwe’ng ka modiro wa maeto a go boela le dithuto tša Beibele? Re ile ra ba le dikoketšego tše dinyenyane. Lega go le bjalo, dibopego tše tša bodiredi ke seo modiro wa go dira barutiwa o se akaretšago. Ke eng seo yo mongwe le yo mongwe wa rena a ka se dirago go oketša go ba le karolo ga rena maetong a go boela le dithutong tša Beibele?
3 Matlafatša Kganyogo ya go Swara Thuto: Rena ka noši re swanetše go lebiša tlhokomelo ya rena tabeng ya go ba ba tiilego le ba mafolofolo moyeng. Balatedi ba Kriste ba therešo ke ba “fišegelago mediro e mebotse.” (Tito 2:14, PK) Ge re hlahloba bodiredi bja rena, na re ka bolela gore re fagahla ka mo go tseneletšego go lateleleng dipuku ka moka tšeo di sepedišitšwego tšhemong? Na re bao ba fišegago ka go ithapela go swara dithuto tša legae tša Beibele go bohle bao ba bontšhago kgahlego? (Ba-Roma 12:11) Goba na go nyakega gore re hlagolele kganyogo e kgolwanyane ya go dira maeto a go boela le go thoma dithuto tša legae tša Beibele?
4 Go bala Beibele ga motho ka noši, go ba gona ka mehla dibokeng, le go ithuta dikgatišo go tla re thuša gore re dule re phetše moyeng le go ba ba matlafaditšwego ke moya wa Modimo. (Ba-Ef. 3:16-19) Se se tla matlafatša tumelo ya rena le kgodišego go Jehofa le lerato la rena la go rata magagabo rena. Re tla tutueletšega go ruta motho yo mongwe therešo, ka go rialo ra dira bodiredi bja rena gore e be bjo bo kgahlišago, bjo bo atlegilego le bjo bo tutuetšago. Ee, re swanetše go nyaka dithuto tša Beibele tše oketšegilego!
5 Ithute le Lapa Pele: Batswadi ba Bakriste bao ba nago le bana bao ba dulago ka gae ba swanetše go tshwenyega ka lenaneo la bona la thuto ya ka mehla ya lapa ya Beibele. (Doit. 31:12; Ps. 148:12, 13; Die. 22:6) E tla ba mo go holago kudu go batswadi gore ba ithute poroutšha ya Seo Modimo a se Nyakago gomme ka morago ba ithute puku ya Tsebo le bana ba bona go ba lokišeletša gore ba swanelegele bjalo ka bagoeledi bao ba sa kolobetšwago le bakeng sa boineelo le kolobetšo. Go ba gona, taba e oketšegilego e ka hlahlobja, go ithekgilwe ka senyakwa sa ngwana le nywaga ya gagwe. Motswadi yo a ithutago le ngwana yo a sego a kolobetšwa a ka bega thuto, nako le maeto a go boela, go etša ge go boletšwe go Letlolo la Dipotšišo ka go Tirelo ya Rena ya Mmušo ya June 1987.
6 Kaonefatša Thulaganyo ya Motho ka Noši: Ge go elwa hloko palo ya dimakasine, diporoutšha le dipuku tšeo di sepedišitšwego, ga go pelaelo gore tekanyo e kgolo ya peu e phatlaladitšwe. Dienywa tše tša therešo tšeo di bjetšwego di na le kgonagalo e kgolo ya go tšweletša barutiwa ba bafsa. Eupša na molemi goba raserapana a ka kgotsofala e le ka kgonthe ge e ba a bjala ka go se kgaotše gomme ka morago ga maiteko a gagwe ka moka le ka mohla a se be le nako ya go buna? Le gatee. Ka mo go swanago, bodiredi bja go latelela bo a nyakega.
7 Na ka mehla o rulaganya nako ya go dira maeto a go boela? Boela e sa le ka pela gohle mo kgahlego e bontšhitšwego gona. Dira maeto a go boela ka boikemišetšo bja go thoma thuto ya Beibele. Na o boloka pego ya bothakga, e lego nakong le e rulagantšwego gabotse ya maeto a go boela? Gotee le leina le aterese ya mong wa ntlo, kgonthišetša gore o bega letšatši la ketelo ya mathomo, selo le ge e le sefe seo o se sepedišitšego, tlhaloso e kopana ya seo se ilego sa ahla-ahlwa le taba yeo go ka boledišanwago ka yona ketelong e latelago. Tlogela sekgoba pegong ya gago gore go tle go okeletšwe tsebišo e oketšegilego ka morago ga leeto le lengwe le le lengwe la go boela.
8 Seka-seka Kamoo o ka Dirago Leeto la go Boela ka Gona: Ke dintlha dife tše dingwe tšeo o swanetšego go di gopola ge o dira leeto la go boela go motho yo a thabelago? (1) E-ba yo borutho, yo a nago le bogwera, yo a fišegago le yo a tlwaelegilego. (2) Ahla-ahla dihlogo goba dipotšišo tše di mo kgahlago. (3) Boloka poledišano e le e bonolo le ya Mangwalo. (4) Ketelong e nngwe le e nngwe, katanela go ruta mong wa ntlo selo seo a tlago go se lemoga e le sa bohlokwa go yena ka noši. (5) Godiša go fagahlela taba yeo go tlago go bolelwa ka yona ketelong e latelago. (6) O se ke wa dula nako e telele. (7) O se ke wa botšiša dipotšišo tšeo di swarišang mong wa ntlo dihlong goba wa mo tsenya letšatši. (8) Diriša temogo e le gore o se ke wa sola dipono tše fošagetšego goba mekgwa e mebe ya mong wa ntlo pele ga ge tebogo ya moya e hlagoletšwe.—Bona pampiri ya ka gare ya Tirelo ya Rena ya Mmušo ya March 1997 bakeng sa thušo e oketšegilego ya kamoo o ka bago yo a atlegago go direng maeto a go boela le go thomeng dithuto tša Beibele.
9 Hlohlomiša Kgonagalo e Nngwe le e Nngwe: Phuthegong e nngwe, go be go kgonega go hwetša maina le dinomoro tša difolete tša badudi ka moka lefelong la dintlo tšeo di nago le tšhireletšo e kgolo. Modudi yo mongwe le yo mongwe o ile a ngwalelwa lengwalo la gagwe ka noši, gomme ka gare ga lona go tsentšhitšwe dipampišana tše pedi. Mafelelong a lengwalo, go neilwe kholofetšo ya go swara thuto ya legae ya Beibele gomme go be go akaretšwa nomoro ya mogala ya lefelong leo e le gore moamogedi a ka kgona go arabela. Matšatšing a sego kae, lesogana le ile la letša mogala le kgopela thuto. Leeto la go boela le ile la dirwa letšatšing le le latelago gomme gwa thongwa thuto ka puku ya Tsebo. Bošegong bjona bjoo o ile a ba gona Thutong ya Puku ya Phuthego, gomme o ile a tšwela pele a e-ba gona dibokeng ka moka. Mo e nyakilego go ba gatee-tee, o ile a thoma go bala Beibele letšatši le letšatši gomme a dira tšwelopele e sa kgaotšego e lebišago kolobetšong.
10 Bagoeledi sehlopheng se sengwe sa koloi ba ile ba rulaganya go dira maeto a go boela ba le gotee. Ge kgaetšedi a be a dira e nngwe ya diketelo tša gagwe, motho yo a bego a mo nyaka o be a se gona gae, eupša mosadi yo mongwe yo mofsa o ile a ba bulela mojako a re: “Ke be ke dutše ke le letetše.” Mong wa ntlo o be a ile a amogela puku ya Tsebo pejana go motho yo a tlwaelanego le yena. Ka nako ya ge dikgaetšedi di mo etela, o be a šetše a badile puku ka moka ka makga a mabedi gomme o be a tloga a makaditšwe ke tsebišo yeo e nago le yona. O ile a re o be a se a makatšwa ke go bona Dihlatse di mo etetše letšatši leo ka gobane o be a dutše a rapelela gore di tle gomme di ithute Beibele le yena. Thuto e ile ya thongwa, o ile a thoma go ba gona dibokeng tša phuthego, gomme o ile a dira tšwelopele ka pela.
11 Kgaetšedi yo a kolobeditšwego mo e ka bago ka nywaga e 25, morago bjale o ile a nea mmagwe puku ya Tsebo. Mmagwe yo e lego setho sa kereke o ile a thoma go bala puku. Ka morago ga ge a feditše dikgaolo tše pedi, o ile a leletša morwedi wa gagwe mogala gomme ka go tlaba morwedi a re: “Ke nyaka go ba yo mongwe wa Dihlatse tša Jehofa!” Mma o ile a thoma go ithuta gomme gona bjale o kolobeditšwe.
12 Leka Ditšhišinyo tše: Na o kile wa diriša matseno a lebanyago bakeng sa go thoma dithuto? O ka fo bolela ka go lebanya gore: “Ge e ba o rata go ba le thuto ya legae ya Beibele e sa lefelelwego, nka go bontšha ka metsotso e sego kae feela kamoo se se dirwago ka gona. Ge e ba o e thabela, re ka tšwela pele.” Batho ba bantši ga ba dika-dike go amogela mpho e bjalo, gomme ba bogela ka go ikemišetša pontšho ya thuto ya Beibele.
13 Mathomong a thuto, bontšha morutwana kamoo a ka lokišetšago ka gona e sa le pele ka go bala mangwalo ao a bontšhitšwego le go thalela mantšu a motheo e le go araba dipotšišo tšeo di gatišitšwego. Lebiša tlhokomelo dintlheng tše dikgolo feela. Gaešita le ge go ka nyakega gore re be bao ba feto-fetogago le maemo mananeong a sego kae a mathomo, ke gabohlokwa gore thuto ya Beibele e swarwe ka mehla. Nagana kamoo o tlago go rola thapelo e le karolo ya bohlokwa ya thuto le kamoo o tlago go hlama morutwana ka Mangwalo bakeng sa kganetšo. Dira sohle se se lego matleng a gago go dira gore thuto e be e kgahlišago!
14 Go ba gona, ga se barutwana ka moka ba Beibele bao ba dirago tšwelopele ka tekanyo e swanago. Ba bangwe ga se ba sekamela dilong tša moya kudu go swana le ba bangwe, le gona ga se bao ba monyago ka pela dilo tšeo di rutwago. Ba bangwe ba phela maphelo a leema-ema kudu gomme ba ka ba ba sa kgone go gafa nako e nyakegago go akaretša kgaolo e tletšego beke e nngwe le e nngwe. Ka go rialo, mabakeng a mangwe go ka nyakega gore go tšewe se se fetago lenaneo le tee la thuto bakeng sa go akaretša dikgaolo tše itšego le dikgwedi tše oketšegilego go fetša puku. Maemong a mangwe re ka ithuta poroutšha ya Seo Modimo a se Nyakago pele gomme ka morago ra tšwela pele ka puku ya Tsebo. Se, se tlaleletšwa ke go ba gona ga bona dibokeng tša phuthego, se tla thuša morutwana yo mongwe le yo mongwe gore a be le motheo o tiilego therešong.
15 Ka godimo ga tšohle, rapelela thuto ya Beibele! (1 Joh. 3:22) E nngwe ya diphihlelo tše putsago kudu go Mokriste ke go dirišwa ke Jehofa go thuša motho yo mongwe gore e be morutwana wa Jesu Kriste. (Dit. 20:35; 1 Ba-Kor. 3:6-9; 1 Ba-Thes. 2:8) Ga bjale ke nako ya go bontšha phišego e kgolo modirong wa thuto ya Beibele, re kgodišegile ka mo go tletšego ka tšhegofatšo e humilego ya Jehofa maitekong a rena a go thoma dithuto tše oketšegilego!
Na o rapelela go thoma thuto e mpsha ya Beibele?