Dithero Tšeo Di Tsošago Kgahlego

1 Re swanetše go bontšha kgahlego e borutho ya motho ka noši ka mehla bathong bao re gahlanago le bona bodireding bja tšhemo. Go botšiša kamoo ba bonago ditaba ka gona go bontšha go hlompha ga rena kgopolo ya bona. Taba yeo re e rolago le dipotšišo tšeo re di rotošago mo gongwe di ka hlohleletša menagano ya bona gomme tša ba dira gore ba nyake go ithuta ka mo go oketšegilego ka Modimo le morero wa gagwe ka batho.

2 Ka September re tla ba re lebiša tlhokomelo therešong mabapi le Mmopi wa rena le morero wa gagwe wa go fetola lefase le paradeise ge re dutše re sepediša puku ya O ka Phela ka mo go sa Felego Paradeiseng mo Lefaseng. Ba bantši ba rena re tlwaelane le puku ye. Lega go le bjalo, iphe nako ya go hlahloba puku ye wena ka noši gomme o kgethe dintlha tše di lebanego tšeo o tlago go di gatelela. Ge o ahla-ahla tsebišo e lego ka go Phela ka mo go sa Felego, e bule gomme o e nee mong wa ntlo. Lebiša tlhokomelo ditabeng tše itšego le diswantšhong. E-ba mafolofolo ge o bontšha bohlokwa bja puku ye e botse.

3 Ka morago ga go itsebiša ka borutho, o ka re:

◼“Ke’ng seo o naganago gore ke sa bohlokwa bathong gore ba tle ba hwetše khutšo ya kgonthe le lethabo mo lefaseng le? [Letela karabo.] Beibele e bolela gore re swanetše go boifa Modimo le go mo amogela bjalo ka Mmopi wa legodimo le lefase.” Bala Kutollo 14:7, ke moka o bule puku ya Phela ka mo go sa Felego go letlakala 8, gomme o bale serapa 6, o gatelela kgopolo ya gore lefase ga le a dulwa ka tsela yeo Mmopi a bego a le reretše yona mathomong. Ka go ithekga ka kgahlego ya mong wa ntlo, o ka bala gape le serapa 10 go letlakala 10 gomme o hlalose diswantšho tšeo di lego go matlakala 11-13. Hlalosetša motho yoo gore paradeise ya lefaseng e tla tloga e e-ba selo sa kgonthe. Sepediša puku gomme o dire dithulaganyo tša go boela moo kgahlego e bontšhitšwego gona.

4 Goba mo gongwe o ka re:

◼“Na o kile wa ipotšiša gore ke ka baka la’ng re tšofala le go hwa? Dihlare tše dingwe di phetše nywaga e dikete. Eupja batho ba phela feela nywaga e 70 goba 80 gomme ka morago ba a hwa. Na o kile wa ipotšiša gore ke ka baka la’ng? [Letela karabo] Mo go Ba-Roma 5:12 Beibele e re nea karabo. [Bala.] Na boemo bjo bo tla ka bja fetoga? Karabo ke ‘Ee,’ bjalo ka ge go ngwadilwe go Kutollo 21:3, 4. [Bala.]” Rola puku ya Phela ka mo go sa Felego, o lebiša tlhokomelo sehlogong gomme ka morago o phetle diswantšhong tše di lego go letlakala 162. Ka morago ga go hlalosa diswantšho tše, o ka rata go bala dirapa 19 le 20 go letlakala 165. Bontšha mong wa ntlo gape kamoo puku ye e botse e ka thušago yena le lapa la gagwe go phela nakong yeo ka yona go ka se sa hlwago go e-ba le lehu le nakong ya ge lefase le tla ba le fetotšwe paradeise. Sepediša puku gomme o dire dithulaganyo tše di tsepamego tša go boa.

5 Ge e ba mong wa ntlo a bontšha go belaela ka go ba gona ga Mmopi, mo gongwe o ka re:

◼“Batho ba bantši ba ikwa bjalo ka wena, kudu-kudu ka baka la tlaišego ka moka ye e lego gona lefaseng. Ge e ba Modimo a le gona, ke ka baka la’ng a dumeletše tlaišego? Na o ka nagana ka tlhaloso lege e le efe e kwagalago?” Go ithekgile ka karabo, mo gongwe o ka kgona go tšwela pele ka go diriša kgaolo 11 ya Phela ka mo go Felego go tšwetša poledišano pele. Dikarabo tše dingwe tšeo di ka holago di ka hwetšwa pukung ya Go Boledišana, letlakala 286.

6 Morero wa rena ga se go fo tsoša kgahlego ya go kgahlegela molaetša wa Mmušo, eupja gape le go thoma dithuto tše difsa tša Beibele. Re thaba gakaakang ge re e-na le puku e nago le diswantšho tše botse yeo e hlalosago therešo mabapi le Mmopi o Mogolo le morero wa gagwe wa go fetola lefase le paradeise! Eka re ka e diriša ka mo go holago go tsoša kgahlego bathong ba dipelo tše di botegago bao re gahlanago le bona ka September.