Mohola Wa Beibele Lefaseng La Mehleng Yeno

1 Ba bantši lehono ba lebelela Beibele e le yeo e fetilwego ke nako le yeo e se nago mohola. Gaešita lege e le yeo e abilwego ka gohle le puku yeo e fetoletšwego kudu historing ka moka, ke ba sego kae kudu bao ba e balago gomme ba sego nene kudu ba sa dutše ba latela tlhahlo ya yona.

2 Ka mo go fapanego, re hlompha Beibele e le Lentšu la Modimo. Ditherešo di bontšha gore ke ya therešo go ya ka histori. Go oketša moo, go dumelelana ga yona mo go lemogegago, diporofeto tša yona, bohlale bja yona le go ba ga yona matla a nago le tutuetšo e holago maphelong a batho ka moka di bontšha gore Beibele e “buduletšwe ke Modimo.” (2 Tim. 3:16, PK) Phihlelo ya rena ka noši le go leboga ga rena mpho ye e botse go swanetše go re tutueletša go kgothaletša ba bangwe go nyakišiša mohola wa yona.

3 Matseno a mangwe e ka ba a rego:

◼“Ka baka la mathata a magolo ao batho ba lebeletšanego le ona, batho ba bantši ba hwetša go le thata go dumela go Modimo, goba ba belaela bokgoni bja Modimo bja go rarolla mathata ao re lebeletšanego le ona. O ikwa bjang ka seo? [Dumelela karabo.] Ela hloko sehlogo sa pampišana ye se se rego, Lebaka Leo ka Lona o ka Botago Beibele.” Lebiša tlhokomelo seswantšhong se se lego letlakaleng la ka ntle ke moka o bale serapa sa pele le sa bobedi go letlakala 2. Ge e ba mong wa ntlo a bontšha kgahlego, o ka bala gomme o ahla-ahle ditemana tšeo di bontšhitšwego serapeng sa bobedi. Dira dithulaganyo tša go boela go ya go ahla-ahla pampišana ka mo go tšwelago pele—mohlomongwe o diriša se sengwe sa dihlogwana ka mokgwa wa potšišo e le gore o tsoše kgahlego.

4 Matseno a mangwe e ka ba se sengwe se se swanago le se:

◼“Na ga o dumele gore moloko wa batho o nyaka tlhahlo tabeng ya go lebeletšana le mathata a bophelo? [Dumelela karabo.] Nakong e fetilego, gantši batho ba be ba lebelela Beibeleng bakeng sa tlhahlo, eupja mehla e fetogile. Na o nagana gore Beibele e na le mohola wa kgonthe lehono? [Dumelela karabo.] Hlokomela seo se boletšwego go 2 Timotheo 3:16. [Bala.] Ga se feela gore Lentšu la Modimo leo le ngwadilwego le re thuša go dira diphetho tše bohlale eupja gape le nea kholofelo e botegago ya bokamoso.” Bala Johane 17:3. Hlalosa ntlha e tee goba tše pedi tše di kgethegilego tšeo o di kgethilego pukung ya Beibele—Na ke Lentšu la Modimo Goba la Motho? nakong e fetilego go hlalosa mohola wa kgonthe wa Beibele.

5 Mo gongwe o tla hwetša e le mo go holago go diriša a mangwe a matseno ao a hlalositšwego go letlakala 9 la puku ya Go Boledišana ka tlase ga sehlogwana se se rego “Beibele/Modimo.” Go newa tsebišo e oketšegilego go matlakala 52-62, yeo e ka thušago go arabeng dipotšišo tša beng ba dintlo goba go fenyeng dikganetšo tša bona.

6 Go Sepediša New World Translation:Batho ba bantši ba thabela go hwetša phetolelo ya mehleng yeno ya Beibele ya Seisemane. Ke ka baka la’ng o sa ba sepedišetše kopi ya New World Translation? Ge e ba o swere kopi ya gago ya motho ka noši, o ka lebiša tlhokomelo go tše dingwe tša dikarolo tše di thušago tša New World Translation. O ka gatelela ntlha e tee goba tše pedi go tšwa go matlakala 353-7 a puku ya Go Boledišana. Tsebiša mong wa ntlo gore o tla thabela go mo tlogelela New World Translation gotee le Beibele—Na ke Lentšu la Modimo Goba la Motho? ka moneelo wa R15,00. Gape o ka hwetša barutwana ba sekolong se se phagamego bao ba ka ratago go ba le kopi ya New World Translation.

7 Phafogela dibaka tša go kgothaletša batho go bala Beibele. Thuša batho bao ba thabelago go aga tlhompho le lerato bakeng sa Lentšu la Modimo leo le ngwadilwego. Ka go diriša melao ya lona ya motheo maphelong a bona ka noši le ka go fihlelela tsebo ya therešo, ba tla hwetša mehola e mentši bobedi gona bjale le nakong e tlago.—Ps. 119:105.