Swara Dithuto Tša Beibele Ka Puku Ya Phela Ka Mo Go Sa Felego

1 Mosadi o mongwe o ile a kgotsa mabapi le puku ya Phela ka mo go sa Felego ka gore: “Go latela Beibele ka boyona, ke hweditše puku ye e le e nepagetšego kudu, e šušumetšago le e tutuetšago yeo nkilego ka e bala!” Ka moka ga rena re a dumela gore puku ye ke e nngwe ya tše botse kudu tšeo di kilego tša gatišwa bakeng sa go thuša batho go kwešiša Beibele le go ba tutuetša ka mo go kgethegilego gore e be bareti ba mafolofolo ba Jehofa.

2 Ka 1982, e lego ngwaga wo puku ya Phela ka mo go sa Felego e gatišitšwego ka wona, bagoeledi ba 28 783 ba be ba swara palo-gare ya dithuto tše 17 791 tša Beibele Afrika Borwa. Mo nakong ye, bagoeledi ba 54 939 ba swara dithuto tše 53 352 tša Beibele. Go fihla le lehono, dikopi tše dimilione tše 62 tša puku ya Phela ka mo go sa Felego di be di dutše di gatišwa ka maleme a 115. Puku ye e na le mafelelo a mabotse gakaakang modirong wa rena wa lefase ka bophara!

3 Bea Dipakane: Koketšego ye e kgolo e bakwa ke tšhegofatšo ya Jehofa le go fišegela ga batho ba gagwe go thuša batho ba ba botegago ka molaetša wa Beibele wo o phološago bophelo. (Ba-Roma 10:13-15; 1 Tim. 2:4) Re lemoga go akgofa ga dinako le go nyakega ga mafolofolo go goeletšeng Mmušo wa Modimo.

4 Mola mokgatlo o tšwela pele, rena re le batho ka o tee ka o tee re tšwela pele bjang? Na re ikemišeditše go ba le karolo e tletšego modirong o bohlokwa wa go dira barutiwa? Gore re phethe se, re swanetše go ipeela dipakane. Na re ka ba ba mafolofolo kudu go lateleleng kgahlego? Ke ka baka la’ng re sa bee pakane ya go thoma thuto e mpsha ya Beibele kgweding ya February?

5 Ke Mang yo a ka Swarago Thuto ya Beibele?: Bagoeledi ba bantši bao ba nago le ditšo tše di fapa-fapanego ba ile ba thabela go swara thuto ya Beibele ka puku ya Phela ka mo go sa Felego. Bonolo bja yona bo dira gore go swara thuto go be bonolo kudu, go dira gore gaešita le bagoeledi ba bafsa kudu ba kgone go tšea karolo modirong wo o bohlokwa. Go oketša moo, bontši bja rena re ithutile yona rena ka noši, ka gona re tlwaelane le dikagare tša yona. Mogoeledi o mongwe yo a bego a se a ka a swara dithuto tša Beibele pele a diriša puku ya Phela ka mo go sa Felego o ile a ngwala ka tebogo gore: “Ke na le dithuto tše tharo gomme ya bone e tla tloga e thoma. Ke hlaelelwa ke mantšu a go le leboga ka baka la go dira gore go be bonolo gakaakaa go swara dithuto tša Beibele.”

6 Bafsa le bona ba tšea karolo ka mafolofolo modirong wa thuto ya Beibele ka go diriša puku ya Phela ka mo go sa Felego. Ngwanabo rena o mongwe wa mofsa o tlogela puku tesekeng ya gagwe sekolong. Se se butše tsela ya dipoledišano tše botse le dithuto tše mmalwa tša Beibele. Bafsa ba bangwe ba diriša poledišano e lebanyago ka go kgopela tumelelo ya batswadi bao ba gahlanago le bona bodireding bja ntlo le ntlo ya go ba le thuto ya Beibele le bana ba bona. Bana ba rena le ka mohla ga e ke e e-ba ba banyenyane kudu go ka bolela ka kholofetšo ya Jehofa ya bophelo bjo bo sa felego paradeiseng ya lefase.

7 O ka ba o le mofsa goba o le motho o mogolo, lethabo le lengwe le legolo leo motho lege e le ofe a ka bago le lona bodireding ke la go swara thuto ya Beibele ya legae. Ka gona eka ka moka ga rena re ka rapelela thušo ya Jehofa, gomme ra diriša sebaka se sengwe le se sengwe ka mo go holago bakeng sa go tsebatša kholofelo ya rena phatlalatša. Dirišang puku ya Phela ka mo go sa Felego go thuša ba bangwe go ithuta kamoo ba ka bago le karolo ka gona go reteng Modimo wa rena, Jehofa.—Ps. 148:12, 13.