Go Thoma Dithuto tša Beibele ka Puku ya Phela ka mo go sa Felego
1 Lerato la go rata batho le swanetše go re tutueletša go akgofela go boela go ya go thuša ba ba swerwego ke tlala le go nyorelwa therešo. (Mat. 5:6) Re swanetše go lemoga gomme re hlagolele hlase lege e le efe ya kgahlego yeo re ka e hwetšago ge e ba re sa nyake ge e hwelela. Go lokišetša ke senotlelo se se išago katlegong.
2 Re swanetše go ba le pakane ya go thoma dithuto tša Beibele. (Mat. 28:20) Dikgatišo tša mathomo tša puku ya Phela ka mo go sa Felego di be di e-na le ditlhaloso tše tša matseno a: “Ka kgonthe ye ke puku e botse kudu e ka dirišwago go ithuta le yo mongwe le yo mongwe, yo monyenyane goba yo mogolo go sa šetšwe maemo a bona a tša thuto.” E ngwadilwe ka tsela e dirago gore go swara dithuto go be bonolo, e dira gore le bagoeledi ba bafsa ba kgone go tšea karolo. Go atlega ga rena go thoma dithuto tše difsa go ithekgile ka go atlega ga rena go dira maeto a go boela.
3 Re ka Thoma Dithuto Bjang? Ge re boela, gantši ke mo gobotse go kgokaganya poledišano ya rena le ntlha goba potšišo e itšego e boletšwego ketelong ya rena ya mathomo. Mohlomongwe o ile wa ahla-ahla boemo bja bahu gomme wa tlogela potšišo e rego, “Go na le kholofelo efe bakeng sa baratiwa ba rena ba ba hwilego?” Hlalosa gore tsogo ga se kholofelo e se nago motheo; Beibele e bega mehlala e mentši ya ditsogo tše di šetšego di kile tša direga. Hlahloba diswantšho tše di lego go matlakala 167-9. Ka morago, ahla-ahla se se bolelwago go dirapa 1 le 2 go letlakala 166. Ge e ba go e-na le kgahlego, ithapele go boa bakeng sa go tšwetša poledišano pele.
4 O ka ba o boledišane le motswadi yo a bontšhitšego go kgomega ka mathata a oketšegago a go lebanwago le ona ge go godišwa bana. Mo gongwe o ka bolela ka mantšu a gago, selo se se swanago le se:
◼ “Batswadi ka moka ba nyakela bana ba bona tše kaone kudu. Beibele e swere thuto e ka thušago batswadi go tlwaetša bana ba bona gore ba hwetše bophelo bjo bo kgotsofatšago bjo bo nago le seo bo se bolelago le morero. Ka baka leo, re kgothaletša malapa ka go tia gore a ithute Beibele gotee. [Šupa go serapa 23 go letlakala 246.] Tsebo e hwetšwago e ka tliša ditšhegofatšo tša ka mo go sa felego go lapa ka moka.” Bala Johane 17:3. Hlalosa go rata ga gago go boa go tla go bontšha lapa kamoo le ka thomago thuto ya lona ka gona.
5 Ge e ba o le mogoeledi yo monyenyane goba yo mofsa gomme o boletše ka boripana ka kholofelo ya Paradeise ketelong ya mathomo, hlalosa ka bonolo selo se se swanago le se puku e phetlilwe go letlakala 3:
◼ “Beibele e holofetša gore bao ba dirago thato ya Modimo ba ka fagahlela go phela lefaseng le le swanago le le, leo go lona go tlago go ba le lethabo le khutšo. Puku ye e bontšha seo re swanetšego go se dira bakeng sa go thabela tšhegofatšo yeo.” Hlalosa ka boripana tshepedišo ya rena ya thuto gomme o ithapele go e bontšha.
6 Re le barutiwa ba Jesu, re na le boikarabelo bja go thuša batho. (Ba-Roma 10:14) Ge e ba re sepedišitše dipuku goba re upša re bile le poledišano e botse, re na le boikarabelo bja go hlagolela kgahlego. (Mat. 9:37, 38) Ge e ba re phetha kabelo ye ka tshwanelo, bohle ba ka hwetša ditšhegofatšo tše di tšweletšwago ke seo.—1 Tim. 4:16.