Tšwelang Pele Le Re: “Tlaa!”

1 Jehofa o dirile tokišetšo e botse gakaakang ka sehlabelo sa Jesu sa topollo! Re hwetša go sona motheo wa sohle seo se nyakegago bakeng sa go dira batho gore ba thabe e le ka kgonthe. (Joh. 3:16) Lega go le bjalo, ka manyami ke ba sego kae feela bao ba tsebago le go dumela therešo ye ka go tia. Eupja ka go tshwenyega ga gagwe ka lerato ka batho, Jehofa o lokišeditše go tsebatša ditaba tše tše di lokilego go batho kae le kae. Ka Morwa wa gagwe Jesu Kriste, o neile bohle sebaka sa go hwetša lethabo le kholofelo ya bophelo bjo bo sa felego.—Joh. 17:3.

2 Ka nywaga e dikete, Yo a bego a tla lopolla batho sebeng le lehung o be a sa tsebje. E be e le “sephiri se sekgethwa” go fihlela ge Kriste Jesu a e-tla gomme a “hlabiša seetša bophelong le go se hwe ka ditaba tše tše di lokilego.” (Ba-Roma 16:25, NW; 2 Tim. 1:10, NW) Balatedi ba Jesu ba ile ba goeletša ditaba tše tše di lokilego lekgolong la pele la nywaga; mo nakong ye rena bao re phelago mehleng yeno re na le tokelo e thabišago kudu ya go tsebatša ditaba tše tše di swanago tše di lokilego. Ge re bolela molaetša wa Mmušo, re tšea karolo gotee le Jehofa Modimo, Jesu Kriste le banababo Kriste bao ba laletšago batho ba ditšo ka moka ka gore: “Tlaa! . . . [o] tšeê meetse a bophelô à fo fiwa fêla.”—Kut. 22:17.

3 Ee, ga se bohle bao ba tlago go theetša ditaba tše tše di lokilego. Ke ba sego kae kudu bao ba theetšago ka šedi. Ba bangwe ba gana bahlanka ba Modimo ka bogale, bao ba ba laleletšago go holwa ke meetse ao a neago bophelo a therešo. Lega go le bjalo, ka matla ao a tšwago go Jehofa re phegelela modiro wo. Re a tseba gore go ikemišetša ga rena go bolela therešo le go thuša batho lege e le bafe bao ba tlago go kwa ke mo go kgahlišago Jehofa gomme go tliša tšhegofatšo ya gagwe.

4 Bodireding bja rena ka March, re tla kgothaletša bao ba tsomago therešo go bala puku ya Seremo sa Kutollo gomme ba thabe kholofelong yeo e e neago. Ba tla hwetša ditšhegofatšo tše dintši ka go dira bjalo. Go feta tšohle, puku ya Kutollo e mabapi le bokamoso—bokamoso bja bona le bja rena. Ba bangwe bao ba ineetšego go Jehofa mo nakong ye ba ile ba thoma ka go kgahlegela therešo ka morago ga go bala ditlhaloso tša puku ya Kutollo go e nngwe ya dipuku tša Mokgatlo. Ka ge re sa tšwa go ithuta ka mo go nabilego puku ya Seremo sa Kutollo rena ka noši, re ka lemoga bohlokwa bja yona go batho ba dipelo tše di botegago bao ba swerwego ke tlala ya therešo. Ge re hwetša batho ba bjalo bodireding bja rena, re tla katanela go hlalosa ntlha e tee goba tše pedi tše kgolo tšeo di tšwago pukung ya Seremo sa Kutollo bakeng sa go ba bontšha bohlokwa bja yona. Gare ga dilo tše dingwe, re ka šupa ditlhalosong tša yona tše di kwalago tša diporofeto tša Beibele tšeo di phethagaditšwego lekgolong le la bo-20 la nywaga, tše bjalo ka go kata mo go kgahlišago ga banamedi ba dipitsi ba seswantšhetšo bao ba hlaloswago kgaolong ya botshelela ya Kutollo.

5 Ke mo go swanetšego kudu gore re bolele ka ditokišetšo tša Jehofa tše lerato bakeng sa batho ge re dutše re lokišeletša go bina monyanya wa Segopotšo sa lehu la Kriste ka April 6. Go sa šetšwe ge e ba batho ba kgetha go theetša goba go se bjalo, re phegelela kabelong ya rena yeo re e neilwego ke Modimo go fetišetša taletšo yeo e kgomago pelo go mang le mang yo a ratago ka gore: “Tlaa! . . . [o] tšeê meetse a bophelô à fo fiwa fêla.”