Kgwedi E Kgethegilego Bakeng Sa Tirelo Ya Tšhemo

1 Na December e ka ba kgwedi e kgethegilego bakeng sa tirelo ya tšhemo go wena? Mo gongwe go ka nyakega gore o dire diphetogo tše itšego thulaganyong ya gago ya ka mehla, eupja na dipoelo di be di ka se dire gore e be mo go swanetšego?

2 Ba bangwe ba bagoeledi ba bafsa bao ba kolobeditšwego ba tla ba le matšatši a oketšegilego a go se ye sekolong gomme ba tla rata go ngwadiša e le babulamadibogo ba go thuša kgweding yeo. E tla ba mo go kgothatšago gakaakang go bona go ba le ba bangwe ba bagolo, bahlanka ba bodiredi le bagoeledi ba bangwe ba šoma le bona tšhemong! Ge e ba maemo a gago a sa go dumelele go bula madibogo kgweding yeo, na go a kgonega gore o diriše diiri tše sego kae tše oketšegilego tirelong le bao ba tlago go ba ba bula madibogo? Se e tla ba go kgothatšana e le ka kgonthe.

3 Gape re nyaka tirišano ya gago bakeng sa go kgonthišetša gore dipego ka moka tša tirelo ya tšhemo bakeng sa December di tlišwa ka nako. Re tla be re e-na le Dikopano tša rena tša Selete tša “Thuto ya Modimo” ka December gomme ba bangwe ba kopanya nako ya bona ya maikhutšo ya ngwaga le ngwaga le ya go ya kopanong. Ge e ba o tla be o se gona phuthegong ya geno mafelelong a December, kgonthišetša gore o ba le karolo bodireding mathomong a kgwedi. Tliša pego ya gago ya tirelo ya tšhemo pele o e-ya maikhutšong goba o e romele go mongwaledi wa phuthego nako e sa le gona gore e akaretšwe go Pego ya Phuthego ya kgwedi yeo.

4 Ge e ba bagoeledi ka moka ba dira boiteko bjo bo oketšegilego, mo gongwe bagolo ba ka kgona go rulaganyetša go nea bohlatse ka sehlopha letšatši le lengwe le le lengwe sehleng sa maikhutšo e le gore bao ba kgonago go bula madibogo ba tle ba be le motho yo ba šomago le yena tirelong ya tšhemo ka mehla. Re le motho ka o tee le ka dihlopha tša malapa gotee le ka phuthego, bjale ke nako ya go rulaganyetša go dira December kgwedi e kgethegilego bakeng sa tirelo ya tšhemo phuthegong ya lena.