Go Šoma Tšhemo Yeo e Akaretšwago Leboelela
1 Re thabela go amogela dipego tša gore diphuthego tše dintši di šoma tšhemo ya tšona leboelela. (Mat. 24:14; 1 Tim. 2:3, 4) Gaešita lege se se tšweletša tlhohlo ya kgonthe, fela phihlelo e bontšha gore se se ka dirwa ka katlego ge e ba re itokišeditše e bile re hlametšwe gabotse go lebeletšana le maemo a a fapa-fapanego ao a tšwelelago.
2 Matseno ao a Tutuetšago ke Senotlelo: Ke gabohlokwa kudu go itokišetša go diriša matseno a tee goba go feta moo ao a naganišišitšwego gabotse. A swanetše go akaretša dipolelo tše di lebanyago tšeo di bontšhago gabotse mabaka a bohlokwa a go etela ga rena leboelela.
3 Puku ya Go Boledišana e nea mehlala e mentši e mebotse ya matseno a swanetšego ao a ka dirišwago. A mararo a lokeleditšwe go letlakala 15 ka tlase ga sehlogo se se rego “Tšhemong Yeo e Dirwago ka Mehla.” Boeletša ao o tla ratago go a diriša tšhemong ya geno.
4 Bagoeledi ba bangwe ba hwetša katlego ka go diriša ditaba tše di tšwago kuranteng ya lefelong la gabo bona go thoma dipoledišano tšhemong yeo e šongwago leboelela. Puku ya Go Boledišana e nea mehlala e meraro ya kamoo se se ka dirwago ka gona. Ela hloko matseno a bobedi ka tlase ga sehlogo se se rego “Bokebekwa/Go Lotega” go letlakala 10 le matseno a mabedi a pele ka tlase ga sehlogo se se rego “Ditiragalo tša mo Nakong ye” go matlakala 11 le 12.
5 Matseno ao o a Lokišetšago: Ikwe o lokologile go hlama le go diriša ditlhaloso tše di swanetšego tša matseno ao a swanago le ao a bontšhitšwego pukung ya Go Boledišana. Bolela matseno a ka tsela ya gago ya tlhago, o diriša mantšu a gago. O ka a boeletša le mogoeledi yo a nago le phihlelo pele ga ge o ka a diriša tšhemong.
6 Ka mohlala, mo gongwe o ka bolela se sengwe se se swanago le se:
◼ “Go tloga ge re be re go etetše nakong e fetilego [bolela tiragalo ye e sa tšwago go direga yeo batho ba lefelong ba bolelago ka yona]. Ka ge ka moka ga rena re kgomega ka tsela e itšego, bontši bja baagišani ba rena ba bontšhitše ba tshwenyegile kudu. Mohlomongwe le wena o ile wa nagana ka yona. [Khutša ganyenyane bakeng sa go dumelela karabo yeo e ka bago gona.] Ka baka la maemo a lefase lehono, na o be o ka se ke wa dumelelana le seo moporofeta Jeremia a se ngwadilego go kgaolo 10, temana 23?” Ka morago ga ge o badile temana, dira gore mong wa ntlo a bolele tšeo a di hlokometšego, ke moka o lebiše tlhokomelo temaneng e itšego yeo e bontšhago ka mo Jehofa a tlago go rarolla bothata bjoo bjo bo ahla-ahlwago.
7 Goba o ka re:
◼ “Ga go pelaelo gore ditabeng lehono o hlokometše [bolela tiragalo e itšego]. Mohlomongwe o tla dumela gore se se re kgoma ka moka ga rena. [Khutša ganyenyane bakeng sa karabo yeo e ka bago gona.] Re ka holofela gore mebušo e tšweletše kalafo ya nakwana; lega go le bjalo, Beibele e bontšha kamoo bothata bo tlago go rarollelwa sa ruri ka gona.” Lebiša tlhokomelo temaneng e itšego yeo e hlalosago seo Modimo a tlago go se dira.
8 “Ke ka Baka La’ng le Etela Leboelela Gakaakaa?” Dikarabo tše di swanetšego go motho yo yo e ka bago mošitiši wa poledišano di neilwe ka pukung ya Go Boledišana go letlakala 20 ka tlase ga sehlogo se se rego “Ke ka Baka La’ng Batho Tenang le Etela Gantši?” Gaešita ka ntle le go botšišwa, re ka nea bohlatse bjo bobotse ge e ba re diriša sebaka se sengwe le se sengwe se se swanetšego go thuša ba bangwe go lemoga gore lerato la kgonthe la Modimo le moagišani le re tutueletša go etela gantši ka mo go kgonegago. Go ahla-ahlwa ga mantšu a Jesu a lego go Johane 21:15-17 go ka ipontšha e le mo go holago kudu tabeng ye.
9 Anke re tšweleng pele re lebeletšane le tlhohlo ya go šoma tšhemo yeo e akaretšwago leboelela, go fihla ge Jehofa a re go lekane. Ka boikemišetšo bjo, re ka kgodišega ka tlhahlo, tšhireletšo le tšhegofatšo ya gagwe go fihla bofelong.—Mat. 28:19, 20.