Matseno Ao A Tsošago Kgahlego

1 Mokgwa woo Jesu a bego a diriša matseno ka wona e be e le wa bothakga. Go sa šetšwe gore o be a bolela le sehlopha se segolo goba le motho o tee, Jesu o be a tanya tlhokomelo ya batho ba ba mo theeditšego ka go ba tsenya tabeng. O be a bontšha batheetši ba gagwe mohola wa taba yeo a bego a e bolela.—Mat. 5:3-12; Joh. 4:7-30.

2 Go Lokišetša e sa le Pele go a Nyakega: Gore re dire gore molaetša wa rena o kgahliše, re swanetše go feto-fetola matseno a rena gore a akaretše motho yo re boledišanago le yena, a lebantšhe dilong tše di mo tshwenyago gomme a bontšhe gore molaetša wa Mmušo o tla mo thuša.

3 Ge o lokišeletša go ya bodireding, nagana ka dilo tšeo ka go lebanya batho ba lefelong leo ba tshwenyegilego ka tšona. Na go na le taba ye e sa tšwago go tšwelela kuranteng yeo batho ka moka ba bolelago ka yona? Ke taba efe yeo e ka kgahlago motho o mofsa? Yeo e ka kgahlago motho o mogolo yona ke efe? Le gona, yeo e ka kgahlago banna ba ba nyetšego, basadi ba ba nyetšwego goba batswadi ke efe? Go e na le go diriša matseno a swanago kae le kae moo re tsenago gona, gantši se se šomago ke go lokišetša matseno a sego kae a fapa-fapanego le go ikemišetša go a fetola ge o dutše o lebeletše tsela yeo beng ba dintlo ba arabelago ka yona. Bagoeledi ba bangwe ba bile le katlego e botse ka go lokišeletša le go diriša matseno a fapa-fapanego a lego ka pukung ya Go Boledišana ka mehla ge ba e-ya bodireding bja ntlo le ntlo. (rsSE matl. 9-15) Se se dira gore matseno a bona e dule e le a mafsa le a kgahlišago.

4 Kgweding ya August, mo gongwe o ka rata go diriša thero e bjalo ka ye:

◼“Re a tamiša. Re be re dutše re boledišana le ba bangwe ba baagišani ba rena ka taba ya gore ke dika dife tšeo ba ka ratago gore motho yo a bušago ba bangwe a be le tšona. Na nka go botšiša gore ke seka sefe se setee goba tše pedi tšeo o bonago e le tše bohlokwa kudu? [Emela karabo. Leboga dintlha tše di boletšwego. Dumela ge e ba go swanetše.] Na o be o tseba gore Beibele e hlalosa ditshwanelo tša Yo a beilwego gore e be mmuši wa batho? Seo se ngwadile mo, go Jesaya 9:5, 6. [Bala.] O nagana gore go tla ba bjang go phela ka tlase ga mmuši wa mohuta wo?” Emela karabo gomme o lebiše tlhokomelo go Psalme 146:3, 4 le tabeng ye e lego pukung ya Go Boledišana go matlakala 378-9 ye e bolelago ka go tia mo go kgonthišeditšwego ga pušo ya Jesu. Kgaolo 133 pukung ya Motho yo a Phagamego Kudu le yona e ka dirišwa bakeng sa go tšwetša pele poledišano.

5 Ge e ba o boledišana le batho bao ba sekametšego bodumeding, thero e latelago e ka šoma gabotse ge o neela puku ya Motho yo a Phagamego Kudu.

Ka morago ga go dumediša ka mokgwa wa tlwaelo, mo gongwe o ka re:

◼“Modimo o nyaka gore rena Bakriste re dire’ng? Beibele e re laela gore re ekiše mohlala wa motho o mogolo kudu yo a kilego a ba gona lefaseng, e lego Jesu Kriste. [Bala 1 Petro 2:21.] O rutile balatedi ba gagwe gore ba rate baagišani ba bona, ba be le boitshwaro bjo bo hlwekilego, gomme ba rapelele go tla ga Mmušo wa Modimo. Go phološwa ga rena go ithekgile ka go amogela Jesu le go mo kwa bjalo ka Mophološi wa rena. [Bala Johane 14:6.] Jesu o be a sa swane le motho lege e ka ba ofe. Puku ye e re ke motho yo a phagamego kudu yo a kilego a phela. Ka ge phološo re e hwetša ka yena, na ga o nagane gore go nyakega gore re ithute mo gontši ka mo re ka kgonago ka gona ka modiro wa gagwe le ka seo a ilego a se ruta? Puku ye e diretšwe sona seo, gomme nka thabela go dira gore o hwetše kopi ye.”

6 Ka go ekiša mekgwa ya Jesu ya go tanya kgahlego ya batho le ka go tsenya batheetši poledišanong, re bontšha batho ba ba nago le dipelo tše di botegago mohola wa dilo tša moya.