Aga Matseno A Tutuetšago
1 Morokami gotee le Phafoga! ke tše holago tabeng ya go bjala dipeu tša therešo menaganong le dipelong tša babadi. Ka gona, re nyaka go ba le ditsela tše di atlegago tša go iša dimakasine tše magaeng a batho bao ba kago go holwa ke mahumo a moya ao di a huperego.
2 Beng ba dintlo ba ka tutuetšwa bjang gore ba amogele le go bala dimakasine tša rena? Go gontši go ithekgile ka tsela yeo re di rolago ka yona. Ditšhišinyo tše kgahlišago kudu tša go lokišeletša matseno a atlegago di hwetšwa go puku ya Go Boledišana, matlakala 9-15.
3 Ge o sepediša Morokami wa October 1, mo gongwe o ka leka go diriša tšhišinyo ya boraro ka tlase ga sehlogo se se rego, “Ditiragalo tša mo Nakong ye” go matlakala 11-12 a puku ya Go Boledišana.
Ka morago ga go itsebiša, mo gongwe o ka re:
◼“Ge e ba o be o ka ikgethela, ke bothata bofe bja mathata a mantši ao a lebanego le lefase mo nakong ye bjo o bego o ka rata go bona bo lokišwa pele?” Theetša karabo ya mong wa ntlo, gomme o dumele go tshwenyega ga gagwe. Ke moka o ka tšwela pele ka go bolela selo sa go swana le se: “Ela hloko seo Beibele e se holofetšago e le tharollo ya mathata a bjalo. [Bala Jesaya 9:5, 6.] Ka gona tharollo ya kgonthe ya mathata a motho e ithekgile pušong ya go loka ya Mesia, Jesu Kriste.” Ke moka bula go letlakala 8 gomme o lebiše tlhokomelo go dirapa tše tharo tša mafelelo tša sehlogo se se rego “Mesia—Na ke Kholofelo ya Kgonthe?”
4 Matseno a mangwe a mabedi ao o ka a dirišago le Morokami wa October 1, a hwetšwa go matlakala 13-14 a puku ya Go Boledišana, ka tlase ga sehlogo se se rego “Modiro/Madulo.” O ka bolela dikgopolo tše le dipotšišo ka mantšu a gago ka noši goba wa fo boeletša seo se boletšwego pukung ya Go Boledišana. Ka morago ga go dumela karabo ya motho, tšwela pele ka go abelana le yena ntlha e kgahlišago yeo e bontšhitšwego serapeng sa pele go letlakala 4 ka tlase ga sehlogwana se se rego, “Na ga go na Tharollo?” Ke moka ge o bala Jesaya 65:21-23, šupa ditšhegofatšo tšeo pušo ya Mesia e tlago go di tliša.
5 Ge e ba o diriša Phafoga! ya October 8 yeo e bolelago ka “O ka Kgona go Fenya Maikwelo a go se Thabe,” o ka leka matseno a boraro ka tlase ga sehlogo se se rego “Bophelo/Lethabo” go letlakala 11 la puku ya Go Boledišana. Ka morago ga go kgokaganya Psalme 1:1, 2, o ka lebiša tlhokomelo ntlheng ye e swanetšego makasineng wa Phafoga!
6 Mohlomongwe o tla kopana le beng ba dintlo bao ba bolelago gore ba na le dipuku tša bona tša bodumedi. O ka hlalosa gore le rena re na le dipuku tšeo e lego tša go dirišwa ke rena ka noši (tše bjalo ka Tirelo ya Rena ya Mmušo); lega go le bjalo, dimakasine tša rena di balwa ke batho ba dimilione bao e sego Dihlatse tša Jehofa.
7 Paulo o itše go 1 Ba-Korinthe 3:6: “Nna ke byetše; Apôllô ó nošeditše; xomme Modimo ké Yêna a medišitšexo.” Ge e ba re nyaka gore Jehofa a mediše dipeu tša therešo dipelong tša batho ba thabelago, gona re swanetše go ela hloko gore re bjale dipeu tše ka mo go atlegago ka go diriša matseno a tutuetšago.