Ba tla kwa Bjang ge re sa Boele?
1 “Ba tlo kwa bya’ng, xe xo se sexoeledi?” (Ba-Roma 10:14) Ee, ba tla kwešiša bjang seo se bolelwago ke therešo ge re sa dire maeto a atlegago a go boela? Ketelo lege e le efe yeo go yona re ilego ra kgona go boledišana le mong wa ntlo ka molaetša wa Mmušo e swanelwa ke go direlwa leeto la go boela. Kgweding ye re ka kgona go tšwetša pele poledišano ya rena ya mathomo ka dikgopolo tše di oketšegilego tša Mangwalo tše di tšwago pukwaneng lege e le efe yeo re e sepedišitšego, gomme seo mo gongwe se ka lebiša ka katlego thutong ya Beibele.
2 Ge e ba o sepedišitše pukwana e rego, “Bokamoso bjo bo Bolokegilego—Kamoo o ka bo Hwetšago ka Gona,” o ka kgona go thoma poledišano e tlago go lebiša thutong ya Beibele ka tsela ye. O šupa letlakaleng la ka ntle la ka pele, o ka botšiša gore:
◼ “Na o be o tla rata go phela lefaseng leo go lona bokamoso bjo bo bolokegilego bo kgonthišeditšwego bakeng sa gago le lapa la gago? [Dumelela karabo. Ka morago phetla go serapa 2.] Ka moka ga rena re na le kganyogo ye, gaešita lege ba bantši ba belaela ge e ba e tla ka ya kgonega. Go Modimo yo a holofetšago go phethagatša se, ga se mo go sa kgonegego.” Bala Jesaya 32:17, 18 bjalo ka ge e tsopotšwe go serapa 2, goba o e bale go tšwa Beibeleng ya gago. Tšwela pele o hlalosa gore go na le batho lefaseng ka bophara ba ba šetšego ba e-na le lethabo le khutšo ya monagano tše di tlišwago ke kholofelo e kgonthišeditšwego ya bokamoso. Ahla-ahla dikgopolo tša Mangwalo tše di lego go serapa 3 ke moka o hlalose kamoo go ithuta pukwana go ka thušago mong wa ntlo ka gona go ithuta mo gontši. Ge e ba motho a thabela, dira dithulaganyo tša leeto la go boela kapejana go tla go tšwetša poledišano pele.
3 Ge o boela ka morago ga ge o sepedišitše pukwana e rego, “Na go na le Modimo yo a Hlokomelago?,” mohlomongwe selo se se swanago le se se tla šoma:
◼ “Ge ke be ke etetše nakong e fetilego re ile ra ahla-ahla potšišo e rego, Na go na le Modimo yo a hlokomelago? Na o nagana gore Modimo o tshwenyega ka rena ka mo go lekanego moo a ka fedišago tlaišego le bošoro? [Ka morago ga ge motho a arabile, phetla go serapa 32 gomme o tšwele pele.] Modimo o holofeditše go tliša lefase le lefsa sebakeng sa le le kgopo, le le tlago go dulwa ke batho ba ba lokilego ba ba tlago go kgona go phela ka khutšo. [Bala Psalme 37:11.] Nna le wena re ka ba ra thabela bophelo lefaseng leo le lefsa ge e ba re dumela Beibele gomme re diriša keletšo ya yona.” Hlalosa lenaneo la rena la go thuša batho go ithuta Beibele.
4 Ge o dira leeto la go boela ka morago ga go sepediša poroutšha e rego, ‘Bonang! Dilo ka Moka ke di Dira tše Mpsha,’ mo gongwe o ka thoma ka go bontšha seswantšho se se lego letlakaleng la ka ntle ke moka wa botšiša potšišo:
◼ “O nagana gore go tla ba bjang go phela lefaseng le le phethagetšego? [Hwetša ditlhaloso tša mong wa ntlo.] Se o se bonago seswantšhong se ga se kakanyo ya boikgopolelo feela; se theilwe dikholofetšong tše di kgonthišeditšwego tše di boletšwego ka Beibeleng. [Bala Kutollo 21:4 le Psalme 37:11, 29.] Ke tla rata go go hlalosetša kamoo wena le lapa la gago le ka thabelago tšhegofatšo ye ka gona.” Ge e ba mong wa ntlo a bontšha kgahlego, tšwetša poledišano pele ke moka o šišinye thuto ya Beibele.
5 Ge re hwetša batho ba ba botegago ba ba tsomago therešo, re bontšha lerato la rena la kgonthe ka go boela go ya go ba thuša go gata mogato ka seo ba se kwelego. Re diriša ditherešo tše kgethwa tšeo re di neilwego bakeng sa tšhegofatšo ya ka mo go sa felego ya rena le ba ba theetšago.—1 Tim. 4:16.