Thuša ba Bangwe go Ithuta Therešo
1 Jesu o tlile lefaseng go tla go hlatsela therešo. Go dira gore therešo e bolelwe go ba bangwe, o ile a tlwaetša barutiwa ba gagwe gore e be barutiši. O be a kgodišegile kudu ka katlego ya bona go ruteng ba bangwe moo a ilego a ba bitša ‘barutiši ba phatlalatša.’ (Mat. 13:52, NW) O ile a swantšha yo mongwe le yo mongwe le monna yo a rutegilego yo a nago le polokelo ya kgonthe ya lehumo leo a ntšhago go lona. Barutiwa ba Jesu lehono ba diriša dipuku tše di gatišitšwego go akgofiša modiro wa go bolela ka Mmušo. Ka mohlala, diphuthego tše dintši di na le dipukwana ka mehuta-huta ya tšona tšeo di ka di dirišago go thušeng ba bangwe gore e be barutiwa. Didirišwa tše tše bohlokwa di ka dirišwa bjang?
2 Go thoma poledišano e lebišago go neeleng pukwana e rego, “Bokamoso bjo bo Bolokegilego—Kamoo o ka bo Hwetšago ka Gona,” mo gongwe o ka botšiša gore:
◼ “Na o kile wa ipotšiša lebaka leo ka lona ditebelelo tša bokamoso bjo bo bolokegilego di bonalago di fsifsetše gakaakaa go sa šetšwe maiteko ka moka ao batho ba a dirago? [Dumelela karabo.] Beibele e hlalosa lebaka leo ka lona maiteko a mantši gakaakaa a paletšwego.” Bala Psalme 146:3, 4. Ka morago ga go bontšhana mabaka le mong wa ntlo ka tsebišo e lego go serapa 6, o ka botšiša gore: “Ke mang yoo ruri a kgonago go re nea tšhireletšo ya nako e telele?” Go ithekgile ka karabo ya mong wa ntlo, mo gongwe o ka dira phetho ya go ahla-ahla dintlha tše di swanetšego tše di tšwago go serapa 7 goba wa rulaganyetša go dira seo nakong e tlago.
3 Tsela e nngwe yeo ka yona o ka kgonago go diriša pukwana e rego, “Na go na le Modimo yo a Hlokomelago?” še:
◼ “Batho ba bantši ba botšišitše potšišo e tšwelelago tlhalosong e lego ka tlase ga diswantšho tše tše pedi. [Bala potšišo e lego botlaseng bja matlakala 6 le 7 gomme o dumelele karabo.] Ka ge Modimo yo lerato a be a ka se godiše bobedi go loka le bobe ka nako e swanago, o nagana’ng ka kholofetšo ya gagwe e begilwego go Jesaya 65:21-24?” Ge e ba o hwetša tlhaloso e bontšhago tekanyo e itšego ya kgahlego, phetla go serapa 37 gomme o hlalose seo se tlago go fihlelelwa ke Mmušo wa Modimo.
4 Ge o neela pukwana e rego, “Go na le go Gontši Bophelong!,” o ka re:
◼ “Go ba bantši bohlokwa bja bophelo bo fetogile modiro o nyamišago, o sa fetogego o lešago bodutu. O nagana gore go nyakega’ng go dira gore bophelo e be bjo bo nago le morero kudu? [Dumelela mong wa ntlo gore a hlalose kgopolo ya gagwe.] Beibele e bontšha gore Modimo o re boloketše dilo tše kaone. Bona seo a se bolelago mo go Kutollo 21:4, 5.” Ge e ba go swanetše, tšwetša poledišano pele ka dintlha tše di tšwago go serapa 42 sa pukwana.
5 Mogoeledi yo e lego mofsa a ka botšiša a diriša poroutšha e rego, “Thabela Bophelo Lefaseng ka mo go sa Felego!” gore:
◼ “Na o be o tla rata go phela lefaseng la paradeise le le swanago le le? [Bontšha letlakala la ka ntle ka pele le ka morago gomme o dumelele tlhaloso.] Nna le lapa lešo re fagahletše go phela moo ka baka la seo Beibele e se bolelago mo go Johane 17:3.” Ka morago ga go bala lengwalo, ithapele go tlogelela motho yoo poroutšha gore a e bale ka moneelo wa disente tše 90.
6 Ge e ba o diriša dipukwana tše dingwe goba diporoutšha bodireding bja gago kgweding ye, mo gongwe o ka rulaganya matseno le dithero tša gago go ya ka ditšhišinyo tše di boletšwego pele. Gopola go bolela ka boripana le go nea ditlhaloso tše di nepagetšego le tše di agago gore o tsoše kgahlego ya beng ba dintlo.
7 Jehofa o re neile therešo. Re swanetše go diriša dibaka tše di re bulegelago ka mo go holago bakeng sa go e abelana le ba bangwe e gatišitšwe le ka dipoledišano tša rena le batho bao re gahlanago le bona. Ka tsela ye re tla ipontšha re le barutiši ba phatlalatša bakeng sa go hola ba bangwe ka mo go sa felego.—Mat. 28:19, 20.