Lentšu la Modimo le na le Matla

¹ Beibele e tutueditše kudu maphelo a ba dimilione. Seo e se bolelago ke se se tutuetšago kudu go feta selo lege e le sefe seo motho a bego a ka se tšweletša. (Ba-Heb. 4:​12) Bona seo e re diretšego sona. Ruri, mohola wa yona ga se o ka bapišwago.

² Dihlatse tša Jehofa ke barutwana ba eteletšego pele le baboleledi ba Beibele. Re swanetše go lebelela go bala Beibele e le karolo e bohlokwa ya lenaneo la rena la ka mehla la pušo ya Modimo, re go etiše pele ga go bogela thelebišene le mediro e mengwe ka moka ya boitapološo.

³ Go Dire Mokgwa wa ka Mehla: Batho ba Jehofa ba lemogile tutuetšo e matla yeo go bala Beibele ka mehla go e tšweletšago. Ka nywaga e mentši leswao le legolo le le lego go o mongwe wa meago ya rena ya feketori kua Brooklyn le be le dutše le kgothaletša bafeti ba tsela go “Bala Lentšu la Modimo Beibele e Kgethwa Letšatši le Letšatši.” Ditho tše difsa tša lapa la Bethele di laelwa gore di bale Beibele ka moka ngwageng wa tšona wa mathomo wa tirelo ya Bethele.

⁴ Go sa šetšwe lenaneo le le tletšego, na o sepedišana le mmalo wa Beibele o šišintšwego o bontšhitšwego ka go Lenaneo la Sekolo sa Bodiredi sa Pušo ya Modimo? Ge e ba o bile le bothata bja go dira se, ke ka baka la’ng o sa katanele go se kaonefatša ka November? Mmalo wa Beibele wa kgwedi ka moka ke Dipsalme 95-109, wo o nyakago gore go balwe matlakala a ka bago a mararo goba a mane ka beke. Ba bangwe ba kgetha go bala go se nene letšatši le lengwe le le lengwe, mohlomongwe e sa le ka pela mesong goba bošego pele ga ge ba robala. Go sa šetšwe kamoo o go dirago ka gona, selo sa bohlokwa ke gore o buna mehola e agago yeo o tlago go e hwetša ka go bala Lentšu la Modimo ka mehla.

⁵ Sepedišang Puku ya Lentšu la Modimo ka November: Batho ba bantši ba sa dutše ba hlompha Beibele e bile ba rata go theetša ge re e bala. Ka November re tla be re sepediša puku ya Beibele​—⁠Na ke Lentšu la Modimo Goba la Motho? Se se tšweletša sebaka se sebotse kudu sa go bontšha batho ba dipelo tše di botegago mohola wa Lentšu la Modimo. Fišegela go dira seo.

⁶ Lokišetša ditlhaloso tše di naganišišitšwego ka mohola o lemogegago wa puku ya Lentšu la Modimo, tšeo di tlago go tutuetša kgahlego ya batho gore ba ikhweletše yona. Ke ka baka la’ng o sa kgethe matseno ka pukung ya Go Boledišana, letlakala 9 ka tlase ga sehlogo se se rego, “Beibele/​Modimo”? Go matlakala 52-⁠62 o tla hwetša tsebišo e thušago e nabilego ka Beibele. Ke ka baka la’ng le sa boeletše tsebišo ye le le lapa pele ga ge le ka ya tirelong? Le ka ba la ba le lenaneo la go itlwaetša, le diriša matseno a lego ka pukung ya Go Boledišana goba a mangwe ao le hweditšego a atlega tšhemong ya lena.

⁷ Kgonthišetša gore o hlalosa mohola wa kgonthe wa Beibele bjalo ka ge o hlaloswa go kgaolo 12 ya puku ya Lentšu la Modimo. Ka baka la go phuhlama ga maemo a tša boiphedišo lefaseng ka bophara, batho ba bantši ba dira gore go hwetša tšhelete le dithoto tša dilo tše di bonagalago e be selo seo ba se kgahlegelago kudu. O ka lebiša tlhokomelo ya mong wa ntlo go dirapa 3 le 4 kgaolong ye, o gatelela keletšo e leka-lekanego le e bohlale e lego Lentšung la Modimo.

⁸ Ee, Beibele ke Lentšu la Modimo. Ge e ba re e bala, re e dumela e bile re diriša keletšo ya yona maphelong a rena, re tla buna mehola e megolo. E ngwaletšwe go re nea thuto le kholofelo. (Ba-Roma 15:⁠4) Ke gabohlokwa gore re e bale letšatši le lengwe le le lengwe le gore re itokišetše go e dirišetša go ruta ba bangwe.