Beibele—Mothopo wa Khomotšo le Kholofelo Lefaseng le le Tlaletšwego
1 Lefase le le dira gore batho ba dule ba le ka tlase ga kgateletšo e kgolo gomme ba nyaka khomotšo le kholofelo. Beibele ke yona mothopo o nnoši wa khomotšo ya kgonthe. E nea kholofelo bakeng sa lefase le lefsa la go loka. (Ba-Roma 15:4; 2 Pet. 3:13) Puku ya Insight, Bolumo 1, letlakala 311 e re: “Ka ntle le Beibele nkabe re sa tsebe Jehofa, nkabe re sa tsebe mehola e mebotse e tlišwago ke sehlabelo sa topollo sa Kriste e bile nkabe re sa kwešiše dinyakwa tše di swanetšego go kgotsofatšwa gore re hwetše bophelo bjo bo sa felego Mmušong wa Modimo wa go loka goba ka tlase ga wona.”
2 Ka November re tla lebiša tlhokomelo e kgethegilego temeng yeo Lentšu la Modimo, Beibele le e kgathago go thušeng batho go lebeletšana ka katlego le dikgateletšo tše di tšwago lefaseng. Re tla sepediša puku ya Beibele—Na ke Lentšu la Modimo Goba la Motho? Re ka bolela’ng seo se tlago go thuša batho ba ba sekametšego go lokeng go lemoga mohola wa Beibele?
3 Ka morago ga ge o itsebišitše, o ka bolela selo se se swanago le se:
◼ “Go ka direga gore o dumela gore re dikologilwe ke mathata ao a re amogago khutšo ya monagano. Re ka hwetša kae keletšo e šomago e tlago go re bontšha kamoo re ka lebeletšanago ka gona le mathata a? [Dumelela karabo.] Ke hweditše Beibele e le e kgonthišetšago ka gobane e re ruta kamoo re ka bago ba ba thabilego ka gona. [Bala Luka 11:28.] Morero wa modiro wa rena ke go kgothaletša batho go bala Beibele gomme ba holwe ke thuto ya yona. Thušo ye ya go ithuta Beibele e rego, Beibele—Na ke Lentšu la Modimo Goba la Motho? e ka go thuša go dira seo. Ela hloko seo e se bolelago mabapi le sebaki sa mathata a mantši a lefase. [Bala lefoko la bobedi la serapa 9 go letlakala 187.] Ge e ba o tla rata go bala puku ye, ke tla thabela go go tlogelela kopi ye ka moneelo wa R3,50.”
4 Mo gongwe o ka kgetha go diriša matseno a bonolo a swanago le a:
◼ “Re kgahlegela go kgothaletša tlhompho e kgolo Lentšung la Modimo, Beibele. Ke tla rata go go nea kopi ya pampišana ye e rego, Lebaka Leo ka Lona o ka Botago Beibele. E hlalosa lebaka leo ka lona re ka lebelelago ka Beibeleng gore re hwetše kholofelo e kgonthišeditšwego ya lefase le le kaone. [Phetla go letlakala 6 gomme o bale Psalme 37:29 gotee le serapa sa mafelelo.] Ipalele pampišana ye, gomme nakong e tlago ge ke etela o mpotše seo o se naganago ka kholofelo yeo Beibele e e neago.”
5 Bagoeledi ba bangwe ba ka nyaka go diriša matseno a ao a lebanyago bakeng sa go thoma thuto ya Beibele:
◼ “Ke go etetše go tla go ithapela go go nea thuto e sa lefelelwego ya legae ya Beibele. Beibele e buduletšwe ke Modimo gomme thuto ya yona e ka re thuša go lokiša dilo. Ka thušo ye ya go ithuta Beibele e rego, Beibele—Na ke Lentšu la Modimo Goba la Motho?, ke tla rata go go bontšha kamoo o ka ithutago Beibele ka gona. [Phetla go letlakala 175 ke moka o ahla-ahle dirapa 1-3 le mong wa ntlo. Go ithekgilwe ka kgahlego e bontšhwago, bala lengwalo le tee goba a mabedi gomme o hlalose ntlha e tšweletšwago. Hlalosa kamoo go bala ditemana tše di bontšhitšwego go tlago go thuša mong wa ntlo ka gona go tseba dikgopolo tša Modimo ka ditaba.] Ke tla thabela go boa gomme re ahla-ahle taba ye go ya pele. O ka ikhweletša puku ye ka moneelo wa R3,50 feela.”
6 Beibele ke mothopo wa khomotšo le kholofelo gotee le therešo e ka re išago bophelong bjo bo sa felego. (Joh. 17:3, 17) Go abelana le ba bangwe tsebo ya Beibele go kgahliša Jehofa, “yo a ratago gore batho ka moka ba phološwe.”—1 Tim. 2:4, PK.