E-ba Yo A Agišago
1 Ka ge re phela ‘dinakong tše hlobaetšago tšeo go lego thata go lebeletšana le tšona,’ ka moka ga rena re nyaka kgothatšo. (2 Tim. 3:1, NW) Ka go hlokomela kudu senyakwa se gaešita le mehleng ya gagwe, Paulo o be a fišegela go diriša ditswalano le banababo e le dibaka bakeng sa “go kgothatšana.” O ile a kgothaletša banababo gore ba ‘phegelele tše ba ka agišanago ka tšona.’ (Ba-Roma 1:11, 12, NW; 14:19) Maiteko a a ile a atlega ka go ‘tiiša dipelo tša barutiwa, a ba kgothatša gore ba tielele tumelong.’ (Dit. 14:22) Lehono re nyaka kudu kgothatšo ya mohuta woo.
2 Re ka ba bao ba agišago go ba bangwe ka seo re se bolelago. Ge a dirišwa ka mo go swanetšego, mantšu a rena a ka ba “byalo ka matsaka a thsipi e khwibidu moxopyaneng wa thsipi-thsêhla.” (Die. 25:11) Ka go tšea karolo dibokeng, re a “kgothatšana.” (Ba-Heb. 10:25, NW) Leleme la rena le ka dirišwa ka tsela e nepagetšego ge re abelana diphihlelo, re reta ba bangwe goba re bolela ka ditaba tša moya. Tirišo e bjalo e holago ya leleme ke e ‘botse go agiša ka mo go swanetšego, gore e natefele ba ba kwago.’—Ba-Ef. 4:29, PK.
3 Bolela ka Dilo tše di Agišago: Go Ba-Filipi 4:8 (NW), Paulo o neile tlhahlo e holago bakeng sa poledišano ya rena. O boletše gore re swanetše go nagana ka dilo le ge e le dife tše e lego tša therešo, tšeo di naganwago ka go tia, tša toko, tše di hlwekilego, tše di rategago, tše go bolelwago gabotse ka tšona, tša bokwala le tše di tumišegago. Ka mehla re tla kgodišega gore seo re se bolelago e tla ba sa therešo le seo se holago ba bangwe ge e ba se theilwe Lentšung la Modimo. (Joh. 17:17) Boineelo bja rena bja Bokriste, seo re ithutago sona dibokeng tša phuthego, tsela yeo ka yona re phethago bodiredi bja rena ka mo go tletšego le ditaba tše dingwe tše bjalo ke dilo tše di naganwago ka go tia. Dipoledišano tše di agišago mabapi le ditekanyetšo le melao ya motheo ya Lentšu la Modimo ke tšeo di kgonthišeditšwego go thuša go re “hlalefišetša pholoxô.” (2 Tim. 3:15) Re ka bontšha tebogo ya rena ya go leboga boitshwaro bjo bo hlwekilego bjo bo bontšhwago ke bao ba lego mokgatlong o hlwekilego wa Jehofa. Re ka tumiša ditiro tše di rategago tša botho tšeo di dirwago ke banababo rena. (Joh. 13:34, 35) Dilo tše go bolelwago gabotse ka tšona di akaretša dika tša go loka tša Bokriste tša tumelo, lethabo, khutšo le kgotlelelo tšeo re di lemogago go banababo rena. Go boledišana ka dilo tše bjalo tša bokwala le tše di tumišegago ke mo go ‘lokilego bakeng sa go agiša’ ba bangwe.—Ba-Roma 15:2.
4 Letšatši le lengwe le le lengwe re lebeletšana le dipelaelo tše di nyamišago tša lefase. Ke mo go lapološago gakaakang go beela dilo tše ka thoko gomme ra abelana tswalano e lerato le banababo rena! Nako e bohlokwa yeo re kgonago go e diriša re le gotee ke lehumo leo le swanetšego go tšeelwa godimo. Ge e ba ka mehla re le bao ba kgothatšago le bao ba agišago, ba bangwe ba tla bolela ka mo go nepagetšego ka rena gore: “Ba khutšišitše môya wa-ka.”—1 Ba-Kor. 16:18.