Retang Jehofa Ka Mehla
1 Go na le mediro e sego kae yeo e lego bohlokwa kudu moo e swanelwago ke tlhokomelo ya rena ka mehla. Gare ga yona re akaretša go ja, go hema le go robala. Ye ke ya bohlokwa ge e ba re tla imatlafatša mmeleng. Moapostola Paulo o beile boboledi bja ditaba tše di lokilego legorong le le swanago ge a be a kgothaletša gore: “A re beeleng Modimo . . . ka mehla sehlabelo sa theto.” (Ba-Heb. 13:15, PK; mongwalo o sekamego ke wa rena.) Ka gona, go reta Jehofa go swanelwa le ke tlhokomelo ya rena e sa kgaotšego. Ke selo seo re swanetšego go leka go se dira letšatši le lengwe le le lengwe, re rete Tatago rena wa legodimong ka mehla.
2 Ge ba bangwe ba be ba leka go aroša tlhokomelo ya gagwe mafelong a mangwe, Jesu o ile a araba ka gore: “Ke swanetše go bolela ditaba tše di lokilego tša mmušo wa Modimo.” (Luka 4:43, NW) Nakong ya bodiredi bja gagwe bja nywaga e meraro le seripa, selo se sengwe le se sengwe seo a bego a se dira letšatši le letšatši se be se kgokagane ka go lebanya ka tsela e itšego le go tumiša Modimo. Re a tseba gore Paulo o ile a ikwa ka tsela ye, go ya ka kgopolo yeo a e hlalositšego go 1 Ba-Korinthe 9:16: “Nka ba yo madi-mabe xe nka lesa xo bolêla Ebangedi.” Bakriste ba bangwe ba ba botegago ba ile ba kgothaletšwa gore ka mehla ba itokišetše go emela kholofelo ya bona go ba bangwe. (1 Pet. 3:15) Lehono babulamadibogo ba mafolofolo ba makgolo a dikete le bagoeledi ba phuthego ba dimilione ba katanela go ekiša mehlala e bjalo e mebotse.
3 Ge re akanya ka phišego ya pelo ka moka yeo e bontšhitšwego ke Jesu Kriste Mohlala wa rena, re tutueletšega go latela dikgato tša gagwe kgaufsi. (1 Pet. 2:21) Ka dinako tše dingwe re ka nolega moko ge re swanelwa ke go lebeletšana le mathata a bophelo bja letšatši le lengwe le le lengwe. Re ka diriša bjang ka mehla ka mo go holago dibaka tša go reta Jehofa ge re šoma ka nako e tletšego modirong wa boiphedišo? Re ka se ke ra tlogela boikarabelo bja ka lapeng bjo bo nyakago nako ya rena e ntši. Bafsa ba bantši ba swaregile ka go tsena sekolo mo go nyakegago letšatši le letšatši. Ba bangwe ba ka nagana gore ga go kgonege go reta Jehofa phatlalatša letšatši le lengwe le le lengwe. Ka dinako tše dingwe, ba bangwe ba ka fetša kgwedi ka moka ka ntle le go tšea karolo ditabeng tše di lokilego ka tsela e itšego.
4 Jeremia e be e le yo mongwe yo a bego a sa kgone go tlogela. Ge a be a palelwa ka nakwana go bolela ka leina la Jehofa, o be a e-kwa mollo o sa kgotlelelegego o tuka ka gare go yena. (Jer. 20:9) Ge a be a lebeletšane le seo se bego se bonala e le maemo a thata a nolago moko, ka mehla Jeremia o be a hwetša tsela e itšego ya go bolela molaetša wa Jehofa go ba bangwe. Na re ka ekiša mohlala wa gagwe wa sebete gomme ra phegelela go tsoma dibaka tša go reta Mmopi wa rena letšatši le lengwe le le lengwe?
5 Go bolela ga rena ka Jehofa ga se gwa swanela go lekanetšwa dinakong tše rulaganyeditšwego, tše rerilwego e sa le pele bakeng sa go nea bohlatse le bagoeledi ba bangwe tšhemong ya phuthego. Selo feela seo re se nyakago ke tsebe e theetšago. Re gahlana le batho ka go se kgaotše letšatši le lengwe le le lengwe—ba tla magaeng a rena, re šoma le bona modirong, re ema le bona mothalading mabenkeleng goba re sepela le bona ka pese. Selo feela se se nyakegago ke tumedišo ya bogwera le potšišo goba tlhaloso yeo e šišinyago kgopolo yeo e tlago go thoma poledišano. Ba bantši ba hweditše se e le sebopego se se enywago kudu sa go nea ga bona bohlatse. Ge re e-na le dibaka tše dintši tša go bolela le ba bangwe ka ditaba tše di lokilego, e tla ba selo se se sa kgonegego go rena go fetša kgwedi ka moka ka ntle le go nea bohlatse bja Mmušo. E bile ke gabohlokwa go bega tirelo ya rena kapejana bofelong bja kgwedi e nngwe le e nngwe.
6 Tokelo ya go reta Jehofa e ka se ke ya kgaotša le ka mohla. Go etša ge mopsalme a bontšhitše, selo se sengwe le se sengwe se se bušago moya se swanetše go reta Jehofa gomme re tloga re nyaka go akaretšwa. (Ps. 150:6) Ge e ba pelo ya rena e re tutueletša go dira bjalo ka mehla, re tla diriša dibaka ka mo go holago letšatši le letšatši bakeng sa go bolela ka Jehofa le Lentšu la gagwe.