Go Thabela Koketšego Yeo Modimo A E Neago
1 Bakriste lekgolong la pele la nywaga e be e le baboledi ba Mmušo ba fišegago. Ba ile ba thaba ge ‘diphuthego di be di oketšega palong ka mehla.’ (Dit. 16:5, PK) Go bolela ga bona ka sebete go ile gwa katologela Asia, Yuropa le Afrika, gwa feleletša ka puno e kgolo ya badumedi.
2 Jesu o ile a bolela e sa le pele gore mehleng ya bofelo, modiro wa boboledi o be o tla fihla ‘lefaseng ka moka leo go agilwego go lona le ditšhabeng ka moka’! (Mat. 24:14, NW) Ngwageng wa tirelo wa 1996, re tšwetše pele go amogela dipego tša dikoketšego tše di kgahlišago le ditlhora tše difsa tša bagoeledi go tšwa dinageng tša go dikologa lefase ka moka. Go hlomilwe diphuthego tše dintši tše difsa. Koketšego ye ya ka bjako e dirile gore go nyakege gore go agwe makgolo-kgolo a Diholo tša Mmušo le Diholo tša Kopano gotee le go katološa bontši bja meago ya makala.
3 Tirelo ya Rena ya Mmušo ya August 1996 e begile ka modiro o mogolo wa go aga woo o dirwago Afrika. Modiro o swanago o tšwela pele Latin America ka moka. Bakeng sa ngwaga wa tirelo wa 1996, Mexico e bega tlhora e kgahlišago ya bagoeledi ba 470 098 le palogare ya dithuto tša Beibele tše 600 751 tšeo di nyakago go bopša ga diphuthego tše difsa tše 466! Katološo ya meago ya bona ya lekala go rulaganyeditšwe gore e fele go ya bofelong bja 1999. Kgolo e swanago dinageng tše dingwe tše dintši ga e dumelele go kgaotša mehuteng e fapa-fapanego ya mediro ya go aga ya pušo ya Modimo.
4 Ditshenyagalelo tša go aga ke tše di phagamego kae le kae, gomme banababo rena dinageng tše dintši ba na le go gonyenyane mo ba ka go neelago ge e le ka dilo tše di bonagalago. Lega go le bjalo, ka phišego ya bona e kgolo ya go fišegela tirelo ya Jehofa, ruri ba gola moyeng gotee le go oketšega ka dipalo tše kgolo. Diema 28:27 e re kgonthišetša gore “thlalla-badiidi a ka se kê a bá a hlôka.” Go rata ga rena go thuša go lefelela ditshenyagalelo tše tša go aga go feleletša ka ‘go lekantšhwa’ ga dilo tše di bonagalago, e lego seo se dirago gore bohle ba hwetše lethabo leo le tlišwago ke go nea gotee le lethabo leo le tlišwago ke go bona koketšego yeo Jehofa a e neago!—2 Ba-Kor. 8:14, 15; Dit. 20:35.
Lekala la Paraguay
Lekala la Ecuador
Katološo ya Mexico e a Agwa
Lekala la Dominican Republic
Lekala la Brazil le Katološo
Lekala la Uruguay le a Agwa
Mohlala wa Diholo tša Mmušo tša Theko-fase kua Latin America
1. Brazil
2. Nicaragua
3. Chile
4. Colombia
5. Mexico
6. Brazil
7. Peru
8. Venezuela
9. Mexico