Nweletšang Kholofelo Ya Bophelo Bjo Bo Sa Felego Ka Go Ba Bangwe
1 Gaešita le ge motho a ile a tsoma ditsela tša go diegiša mosepelo wa go tšofala gomme a oketša tekanyo ya bophelo bja gagwe, botšofadi le lehu e sa dutše e le tšeo di sa phemegego. Re thaba gakaakang gore Beibele e hlalosa lebaka leo ka lona batho ba tšofalago le go hwa, gaešita le kamoo ditshenyo tše di bakilwego ke botšofadi di tlago go dirollwa ka gona gomme lehu la fedišwa. Ditherešo tše di neilwe ka mo go kgodišago ka pukung ya Tsebo e Išago Bophelong bjo bo sa Felego. Puku ye e araba ka mo go kwalago dipotšišo tše di gakantšhago tšeo di lego mabapi le bophelo le lehu, e lebiša mmadi nakong yeo ka yona Paradeise e tlago go tsošološwa.
2 Ka March re tla sepediša puku ya Tsebo ka maikemišetšo a go thoma dithuto tša Beibele tša legae. (Mat. 28:19, 20) Ke moka ra dira maeto a go boela go bohle bao ba bontšhago kgahlego molaetšeng wa Mmušo. Ka tsela ye re ka nweletša ka go ba bangwe kholofelo ya bophelo bjo bo sa felego. (Tito 1:2) O ka hwetša ditšhišinyo tše di latelago e le tše holago bakeng sa go phethagatša se.
3 Ge o dira ketelo ya pele, mo gongwe o ka botšiša potšišo ye:
◼“Na o kile wa ipotšiša lebaka leo ka lona batho ba hlologelago bophelo bjo botelele? [Dumelela karabo.] Ma-Bhuda, Bakriste, ma-Hindu, Mamoseleme le ba bangwe ka moka ba na le kholofelo ya bophelo ka morago ga lehu.” Phetla puku ya Tsebo go kgaolo 6 e rego, “Ke ka Baka La’ng re Tšofala le go hwa?” gomme o bale serapa 3. Bontšha mabaka ka mangwalo ao a bontšhitšwego. O lebišitše dipotšišong tše pedi tšeo di lego mafelelong a serapa, botšiša mong wa ntlo ge e ba a ka rata go iponela dikarabo ka boyena. Ge e ba a rata go dira seo, tšwela pele o ahla-ahla dirapa tše sego kae tše di latelago. Thuto e thomilwe! Sepediša puku ka moneelo wa R4,00, gomme o dire dithulaganyo tša go boela, go kgethwa gore e be lebakeng la letšatši le tee goba a mabedi bakeng sa go ahla-ahla dikarabo.
4 Ge o boela mo go sepedišitšwego puku ya “Tsebo,” o ka re:
◼“Ke boile bakeng sa go tlo hlahloba dipotšišo tše pedi tšeo di lego mabapi le lehu tšeo re di tlogetšego di se tša arabja.” Gopotša mong wa ntlo dipotšišo. Ke moka ahla-ahla tsebišo e lego go kgaolo 6 ka tlase ga sehlogwana se se rego, “Maano-mabe a Boifišago.” Go ithekgile ka maemo, o ka tšwetša thuto pele goba wa diriša potšišo ya mafelelo bofelong bja serapa 7 go thea motheo bakeng sa lenaneo le le latelago. Dira dithulaganyo tše di tiilego tša go boela. Nea mong wa ntlo pampišana ya taletšo, gomme ka boripana o hlalose kamoo diboka tša phuthego di swarwago ka gona. Mo laletše ka borutho gore a be gona.
5 Modirong wa ntlo le ntlo goba go neeng bohlatse bjo bo sa rulaganyetšwago, o ka thoma poledišano ka gore:
◼“Na o kile wa ipotšiša gore ke’ng seo bokamoso bo re huparetšego sona le seo bo se huparetšego lefase? [Dumelela karabo.] Beibele e akaretša bokamoso ka lentšu le tee—Paradeise! E hlalosa gore mathomong, Modimo o dirile karolo ya lefase paradeise e botse moo a ilego a bea banyalani bao a ba bopilego. Ba be ba swanetše go tlatša lefase ka moka, ganyenyane-ganyenyane ba le fetoše paradeise. Ela hloko tlhaloso ye mabapi le kamoo e bego e swanetše go ba ka gona.” Phetla puku ya Tsebo go letlakala 8, gomme o bale serapa 9 ka tlase ga sehlogwana se se rego, “Bophelo Paradeiseng.” Ke moka ahla-ahla dintlha go serapa 10, gomme o bale mangwalo a bontšhitšwego, Jesaya 55:10, 11. Ithapele go tšwetša pele poledišano ya kamoo bophelo Paradeiseng e tsošološitšwego bo tlago go ba ka gona gomme le akaretše dirapa 11-16 le le gotee. Sepediša puku ka moneelo wa R4,00. Kgothaletša motho gore a ipalele yona ka boyena, gomme o rulaganyetše gore le kopane gape gomme le e ahle-ahle.
6 Ge e ba thuto e be e se ya hlongwa mathomong, o ka leka go dira seo leetong la go boela ka gore:
◼“Go etša ge re ahla-ahlile se poledišanong ya rena ya nakong e fetilego, ke morero wa Modimo gore lefase ka moka le fetošwe paradeise. Seo se rotoša potšišo e rego, Paradeise e tla ba bjang?” Phetla puku ya Tsebo go kgaolo 1, gomme le ithute dirapa 11-16 ka tlase ga sehlogwana se se rego, “Bophelo Paradeiseng e Tsošološitšwego.” Ka morago ga moo, bontšha seswantšho seo se lego go matlakala 4-5, gomme o botšiše motho ge e ba a ka rata go phela tikologong e bjalo e botse. Ke moka bala lefoko la pele la serapa 17 go letlakala 10. Go ithekgile ka maemo, tšwetša pele thuto goba bolela gore ketelong e latelago o tla hlalosa seo se nyakegago e le gore motho a phele Paradeiseng e tsošološitšwego. Tlogela pampišana ya taletšo, hlalosa thulaganyo ya diboka, gomme o laletše motho ka borutho gore a be gona Holong ya Mmušo.
7 Puku ya Tsebo ke sedirišwa se sebotse kudu seo se ka dirišetšwago go utollela ba bangwe “bophelô byo bo sa felexo” bjo bo holofeditšwego ke Modimo. Go swara ga gago dithuto tša Beibele tša legae le batho go ka nweletša ka go bona kholofelo ye e kgahlišago yeo e buduletšwego ke Modimo “yo a sa forego.”—NW.