“Seetša sa Lena se Bonege”
1 Lefase leo le re dikologilego le lefsifsing boitshwarong le moyeng. Seetša sa therešo se pepentšha ‘mediro e sa tšweletšego dienywa tša selo’ ya lefsifsi e le gore mapheko a ao a bolayago a ka phengwa. Ka baka leo, moapostola Paulo o ile a kgothaletša Bakriste gore: “Swarang tsela bo-ka bana ba seetša.”—Ba-Ef. 5:8, 11.
2 ‘Dienywa tša seetša’ di fapane kudu le lefsifsi la lefase. (Ba-Ef. 5:9) Gore re tšweletše dienywa tše go nyakega gore re be mehlala e lemogegago ya bophelo bja Bokriste, e lego mohuta wa batho bao Jesu a ba amogelago. Gape re swanetše go bontšha dika tše bjalo ka go botega, go ba ka pelo ka moka le go fišegela therešo. Go nyakega gore dienywa tše di bonagatšwe bophelong bja rena bja letšatši le letšatši le bodireding bja rena.
3 Bonegang ka Sebaka se Sengwe le se Sengwe: Jesu o ile a botša barutiwa ba gagwe gore: “Seetša sa lena se bonege pele ga batho.” (Mat. 5:16, PK) E le go ekiša Jesu, re bonagatša seetša sa Jehofa ka go bolela ka Mmušo wa Modimo le merero ya gagwe. Re bonega bjalo ka dietša ge re etela magaeng a batho le ge re aba therešo mošomong, sekolong, go baagišani ba rena goba kae le kae moo re hwetšago sebaka.—Ba-Fil. 2:15.
4 Jesu o ile a bolela gore ba bangwe ba be ba tla hloya seetša. (Joh. 3:20) Ka gona ga re nyamišwe ke ge ba bantši ba gana ge “lebônê la Ebangedi ya letaxô la Kriste” le ba bonegela. (2 Ba-Kor. 4:4) Jehofa o bala dipelo tša batho gomme ga a nyake badiri ba go hloka toka gare ga batho ba gagwe.
5 Ge re latela ditsela tša Jehofa gomme re thabela seetša sa moya, re ka se bonešetša ba bangwe. Ge e ba ba lemoga ka boitshwaro bja rena gore re “[na] le seetša sa bophelô,” gona le bona ba ka tutueletšega go dira diphethogo tše di nyakegago e le gore e be barwadi ba seetša.—Joh. 8:12.
6 Ka go dira gore seetša sa rena se bonege, re tlišetša Mmopi wa rena theto le go thuša ba dipelo tše di botegago gore ba mo tsebe gomme ba hwetše kholofelo ya bophelo bjo bo sa felego. (1 Pet. 2:12) Ka ge re e-na le seetša, anke re se dirišetšeng go thuša ba bangwe gore ba bone tsela ya go tšwa lefsifsing la moya gomme ba tšweletše mediro yeo e lego ya seetša.