“Seetša sa Lena a se Bonege”
1. Re na le tokelo ya go dira eng?
1 Go tloga ge le hlaba go fihla ge le dikela, botse bja seetša sa kgonthe bo tumiša Jehofa Modimo. Lega go le bjalo, Jesu o ile a laletša barutiwa ba gagwe gore ba be le seetša se se fapanego le seo—“seetša sa bophelo.” (Joh. 8:12) Go ba le seetša se sa moya ke tokelo e kgethegilego yeo e akaretšago gore motho a be le boikarabelo. Jesu o laetše gore: “Seetša sa lena a se bonege pele ga batho,” e le gore ba bangwe ba holege. (Mat. 5:16) Leswiswing le lesoleso la moya la mehleng ya lehono, seetša se swanetše go bonegwa, gomme se nyakega go feta le ge e le neng pele! Re ka bonega bjang seetša sa rena ka go swana le Kriste?
2. Jesu o bontšhitše bjang bohlokwa bja go bontšha ba bangwe seetša sa moya?
2 Ka go Bolela: Jesu o ile a diriša nako ya gagwe, matla a gagwe le dilo tše a nago le tšona gore seetša sa therešo se tsebje ke batho ka malapeng a bona, marekišetšong le dintlheng tša dithaba—kae le kae moo ba bego ba ka hwetšwa gona. O ile a lemoga bohlokwa bjo bogolo bja gore a a bontšhe batho seetša sa kgonthe sa moya. (Joh. 12:46) Gore go fihlelelwe batho ba bangwe ba bantši, Jesu o ile a hlama barutiwa ba gagwe gore e be “seetša sa lefase.” (Mat. 5:14) Ba ile ba dira gore seetša sa bona se bonege ka gore ba sware baagišani ba bona gabotse le ka go ba ruta ditherešo tša moya.
3. Re ka bontšha bjang gore re tloga re leboga seetša sa therešo?
3 Batho ba Modimo ba tšeela godimo boikarabelo bja go ‘tšwela pele ba sepela e le bana ba seetša,’ gomme ba bolela gohle moo batho ba ka hwetšwago gona. (Baef. 5:8) Go fo bala Beibele goba dikgatišo tša rena tša Bokriste moo batho ba ka go bonago nakong ya go khutša mošomong goba sekolong, go ka bula sebaka sa gore o thome go boledišana le yo mongwe ka Mangwalo. Ka go dira sona se, kgaetšedi yo mongwe yo mofsa o ile a thoma thuto ya Beibele gomme a sepedišetša bao a tsenago le bona ka klaseng dipuku tše 12!
4. Ke ka baka la’ng ‘go dira ga rena gore seetša sa rena se bonege’ go akaretša boitshwaro bjo bobotse?
4 Ka Mediro e Mebotse: Go dira gore seetša sa rena se bonege go akaretša le boitshwaro bja rena bja letšatši le letšatši. (Baef. 5:9) Mošomong, sekolong le mafelong a mangwe a batho bohle, ba bangwe ba kgona go bona boitshwaro bja motho bja Bokriste gomme seo se bula dibaka tša gore go bolelwe ka ditherešo tša Beibele. (1 Pet. 2:12) Ka mohlala, boitshwaro bjo bobotse bja mošemanyana yo mongwe wa nywaga e mehlano bo ile bja tutueletša morutišigadi wa gagwe gore a leletše batswadi ba gagwe mogala. O itše: “Le ka mohla ga se ka ka ka bona ngwana yo a tsebago go itshwara gabotse ka tsela ye!” Ee, bodiredi bja rena le boitshwaro bja rena bjo bobotse di gogela batho ‘seetšeng sa bophelo’ gomme bo dira gore Modimo wa rena a tumišwe.