“A Re Yeng Ngwakong Wa Jehofa”

1 Dafida o ile a arabela ka phišego taletšong ye e rego: “A re yeng ngwakong wa Jehofa.” (Ps. 122:1, PK) ‘Ngwako’ wa Jehofa, wo o emelwago ke tempele, e be e le lefelo la go bokana la ba ba bego ba kganyoga go rapela Modimo wa therešo. E be e le lefelo le lekgethwa la polokego le khutšo. Lehono, phuthego ya lefase ka moka ya Bokriste ke ‘ngwako’ wa Modimo, e lego “kôkwanê le mothêô wa therešô.” (1 Tim. 3:15) Ditokišetšo ka moka bakeng sa phološo di hwetšwa ka mokero wo. Ka lebaka leo, “dithšaba tšohle di [“swanetše go,” NW] thšoloxêla mo xo yôna” ge e ba di kganyoga go hwetša ditšhegofatšo tše di holofeditšwego ka tlase ga pušo ya Mmušo wa Modimo.—Jes. 2:2.

2 ‘Ngwako’ wo o dirilwe ka diphuthego tše fetago 69 000 dinageng tše 229. Mabati a Diholo tša Mmušo go dikologa lefase a bulegile, ka bašomi ba mafolofolo ba fetago dimilione tše nne ba dira taletšo ye: “Tla! . . . Yo a ratago a tšee fela meetse a bophelo.” (Kut. 22:17, PK) Ba bantši ba kwele molaetša wo gomme ba ile ba arabela ka tebogo. Ba bangwe ba ile ba kgomega eupja ga se ba hlwa ba e-tla ngwakong wa Jehofa ka go kopanela le phuthego ya Bokriste. Ba ba bjalo ba na le “dinyakwa . . . tša moya” tšeo di ka kgotsofatšwago ka ditokišetšo tšeo di hwetšwago feela ka phuthegong. (Mat. 5:3, NW) Re phela mehleng ya mathata, ya ge bofelo bja tshepedišo ye bo batamela ka lebelo. Mokgwa wa go se šetše goba wa go se rate o ka baka tiego yeo e tswalago tahlego. Go akgofile gore batho ba katanele go ‘batamela Modimo’ ka go batamela kgaufsi le mokgatlo wa gagwe. (Jak. 4:8) Re ka ba thuša bjang?

3 Go Lebiša Kgahlego go Mokgatlo: Go tloga ge re kopana le batho ba thabelago la mathomo, re swanetše go ba hlokomediša ka mokgatlo. Le ge rena ka noši re ka kgona go hwetša mo mangwalo a lego gona le go hlalosa dithuto tša motheo, ga re mothopo wa tsebo e bjalo. Selo se sengwe le se sengwe seo re ithutilego sona se tšwa go mokgatlo, se sepedišwa ka sehlopha sa molaki se se neago “dijô ka lebaka la xôna.” (Mat. 24:45-47) Di sa tloga fase, batho ba ba thabelago ba swanetše go lemoga gore borapedi bjo bo sekilego ga bo akaretše rena feela goba gaešita le phuthego ya lefelong; go na le mokgatlo wa lefase ka moka wo o rulagantšwego le wa pušo ya Modimo wo o šomago ka tlase ga tlhahlo ya Jehofa.

4 Tlhahlo yeo re e amogelago e tšwa go Jehofa, yo a holofeditšego go re hlahla le go re ruta. (Ps. 32:8; Jes. 54:13) Tlhahlo ye e phatlalatšwa kudu-kudu ka dipuku tša rena. Ge e ba re ka thuša ba ba thabelago gore ba tšeele godimo kudu dipuku tše, ba di tšee e le mothopo wa tlhahlo e phološago bophelo, go ka direga gore ba di bale e le ruri le go diriša molaetša wa tšona go e na le go di lahla ka pela. Ka mehla re swanetše go sepediša dipuku tše le go di diriša ka tsela yeo e tla dirago gore di hlompšhwe. Tše di ruta ba bafsa go tseba mokgatlo le go ithekga ka ditokišetšo tša wona.

5 Tsebiša ba ba thabelago gore go na le lefelo la motheo la diboka mo motseng moo tlhahlo e newago ka mehla. Ba nee aterese ya Holo ya Mmušo le dinako tša diboka. Hlalosa phapano magareng ga diboka tša rena le dipokano tša bodumedi tšeo mo gongwe ba bego ba e-ya go tšona nakong e fetilego. Mang le mang o a amogelwa; ga go ntšhwe dikoleke goba go kgopela batho tšhelete. Gaešita lege badiredi ba ba kgethilwego ba swara mananeo, mang le mang o ba le sebaka sa go ba le karolo ka go nea dikarabo le go tšea karolo dikarolong tša lenaneo. Malapa a a amogelwa; bana ba a akaretšwa dipoledišanong tša rena tša Beibele. Bahlanka ba rena ga ba apare diaparo tše kgethegilego. Holo ya Mmušo e kgabišitšwe gabotse gomme ga e na dikerese, dihlwa-di-eme goba diswantšho. Bontši bja bao ba bago gona ke badudi ba mo motseng.

6 Lebiša Kgahlego ka mo go Tšwelago Pele Dithutong tša Beibele: Morero o mogolo wa thuto ya Beibele ke go ruta therešo ya Lentšu la Modimo. Le gona, e swanetše go aga tebogo ya go leboga mokgatlo wa Jehofa ka go morutwana le go mo lemoša bohlokwa bja go ba karolo ya yona. Modiro o mogolo wo o dirilwego ke Jesu le barutiwa ba gagwe lekgolong la pele la nywaga o ile wa ba le kgogedi bathong ba botegago le go ba kopantšha bakeng sa modiro ka tlase ga sehlopha sa motheo se bušago. Ditikologong tšeo go arabela go bego go kgahliša, diphuthego di ile tša hlongwa e le gore go newe tlwaetšo ya ka mehla le tlhahlo. Bao ba bego ba kopanela ba be ba matlafatšwa moyeng, ba thušwa go kgotlelela dinakong tša tlaišego. (Ba-Heb. 10:24, 25; 1 Pet. 5:8-10) Mehleng ya rena ke morero wa Jehofa “xore dilô tšohle . . . a di hlatlaxanyê xore di bušwe ke Yêna Kriste.” (Ba-Ef. 1:9, 10) Ka baka leo, re na le “mokgatlo . . . wa barwarre.”—1 Pet. 2:17, NW.

7 Thuto ya Beibele ya beke le beke e swanetše go akaretša tlhahlo ye e tlago go thuša barutwana go tseba mokgatlo le go diriša ditokišetšo ka mo go holago bakeng sa phološo ya bona. Diriša metsotso e sego kae bekeng e nngwe le e nngwe o anega goba o hlalosa selo se sengwe ka mokgatlo le ka tsela yeo o šomago ka yona. O ka hwetša dintlha tše bohlokwa tšeo di hlalosago ka go Morokami wa November 1, 1984. Dipukwana Dihlatse tša Jehofa Lekgolong la Nywaga la Masome-pedi le Dihlatse tša Jehofa ba Dira Thato ya Modimo ba le Batee Lefaseng ka Moka di hlalosa dibopego tše kgolo tša mokgatlo le kamoo di ka re holago ka gona. Go rulaganya gore barutwana ba Beibele ba boge video ya Jehovah’s Witnesses—The Organization Behind the Name go tla dira gore ba iponele ka bobona seo mokgatlo o se phethago. Dipego tše kgethilwego le diphihlelo tše tšwago ka go Yearbook di ka bontšha katlego ya modiro dinageng tše dingwe le ditšong tše dingwe ka ntle le tša gabo rena. Dipuku tše dingwe le tšona di ka dirišwa. Ge nako e dutše e e-ya, tšwela pele o hlalosa dilo tše bjalo ka lebaka leo ka lona re yago ka ntlo le ntlo, morero wa diboka tša rena, ka moo re thekgago ka gona modiro wa rena ka tša ditšhelete le bogolo bja modiro wa rena wa lefase ka bophara.

8 Go ba tlwaelanya le Dihlatse tše dingwe go ka tutuetša ba bafsa, gwa atološa pono ya bona ka phuthego. Gore ba fihle bokgoleng bjoo, laletša bagoeledi ba bangwe gore ba be le wena thutong nako le nako. Motho o mongwe ka phuthegong yo a nago le boitemogelo bjo bo bjalo goba dikgahlego tše bjalo a ka atološa pono ya morutwana wa gago. Mohlomongwe mogolo a ka sepela le wena e le feela gore a tlwaelane le yena. Go rulaganya gore molebeledi wa tikologo goba mosadi wa gagwe a etele motho yo o ithutago le yena e ka ba tšhegofatšo ya kgonthe. Ge e ba go e-na le Dihlatse tšeo di dulago kgaufsi, go ba tlwaelanya le morutwana wa Beibele go ka tšweletša kgothatšo e oketšegilego ya gore morutwana a be gona dibokeng tša phuthego.

9 Kgothaletša ba Bafsa go tla Dibokeng: Ba bafsa ba swanetše go lemoga ka moo e lego bohlokwa ka gona go ba gona dibokeng. Leka go bešeletša kgahlego ya bona. Šupa dintlha tšeo di tlago go akaretšwa Thutong ya Morokami. Bolela dihlogo tša dipolelo tše sa tlago go neelwa. Anega dintlha tše kgolo tša ditaba tšeo di tlago go akaretšwa Sekolong sa Bodiredi sa Pušo ya Modimo le Thuto ya Puku ya Phuthego. Hlalosa kamoo o ikwago ka gona ka seo o ithutago sona dibokeng tše le lebaka leo ka lona o naganago gore o swanetše go ba gona go tšona. Ge e ba o ka kgona, mo lokišetše senamelwa. Go mo leletša mogala pele ga seboka go ka mo hlohleletša kudu go ba gona.

10 Ge morutwana wa Beibele a tlile sebokeng, dira gore a ikwe a amogelegile. Mo tsebiše ba bangwe, go akaretša le bagolo. Ge e ba o tlile polelong ya phatlalatša, mo tsebantšhe le seboledi. Mmontšhe ka Holong ya Mmušo. Hlalosa morero wa ditafola tša dipuku le dimakasine, mapokisi a meneelo, bokgobapuku le temana ya ngwaga. Mo tsebiše gore holo ga se feela ngwako wa borapedi eupja e bile ke lefelo leo modiro wa go bolela o rulaganywago go lona mo lefelong.

11 Hlalosa kamoo diboka tša rena di swarwago ka gona. Bontšha morutwana dipuku tše re di dirišago. Hlalosa gabotse gore Beibele ke puku ya rena ya motheo ya go ithuta. Mang le mang a ka ba le karolo, go akaretša le bana ba banyenyane. Hlalosa gore mmino ka moka le mantšu a dikopelo tše di lego ka pukung ya rena ya dikopelo a hlamilwe ke Dihlatse tša Jehofa gore a dirišwe borapeding bja rena. Mo hlokomediše ditlogo tše fapa-fapanego tša bao ba bago gona. Bolela gabotse ka moya wa bogwera le mokgwa wa go amogela baeng. Kgahlego ye e botho le yeo e lego ya kgonthe e ka ba le lengwe la mabaka a tiilego kudu ao a ka tutueletšago morutwana go tla gape.

12 Lebaka Leo ka Lona ba Bangwe ba ka Bago ba Dika-dikago: Gantši, go sa šetšwe dilo ka moka tšeo o di dirago, ba bangwe ga ba nyake go batamela mokgatlo kutšwanyana. O se ke wa hloboga ka pela. Leka go ipea maemong a bona. Go fihla mo nakong ye, mohlomongwe ba ka ba ba sešo ba bona e le ka kgonthe bohlokwa bja go ba gona ditirelong tša bodumedi ge e se feela ditiragalo tše kgethegilego. Ditho tša lapa goba bagwera ba kgaufsi ba mo gongwe ba ka ba ba ba beile ka tlase ga kgateletšo. Ba ka fo ba ba tšhošetšwa ke baagišani bao ba bolelago mantšu ao a nyefolago. Le gona, ke therešo gore ba ka fo ba ba e-na le ditšhitišo tše fapa-fapanego tše lego mabapi le go phegelela dilo tša tša leago le tša boitapološo. Ba ka lebelela dilo tše e le mapheko ao a sa kgonegego; o swanetše go ba thuša gore ba bone dilo ka leihlo le lebotse gomme o ‘ele hloko dilo tše lego tša bohlokwa bjo bogolo.’—Ba-Fil. 1:10, NW.

13 Nea mabaka a Mangwalo a go kgotlelela. Gatelela gore ka moka ga rena re nyaka kgothatšo ka mo go akgofilego le go agwa moyeng tšeo re di hwetšago ka go bokana ga rena. (Ba-Roma 1:11, 12) Jesu o bontšhitše gabotse gore kganetšo ka lapeng ga se lebaka le kwagalago la go šitiša motho. (Mat. 10:34-39) Paulo o re kgothaletša gore re se ke ra lewa ke dihlong tša go itsebiša phatlalatša gore re barutiwa ba Jesu. (2 Tim. 1:8, 12-14) Dilo tšeo motho ka noši a di phegelelago le ditšhitišo di swanetše go laolwa; go sego bjalo di fetoga sefu. (Luka 21:34-36) Bao ba swanelwago ke tšhegofatšo ya Jehofa ba swanetše go mo direla ka pelo ka moka, e se ke ya ba ba pelo-pedi. (Ba-Kol. 3:23, 24) Go ba lemoša melao e bjalo ya motheo ya Beibele go ka bula tsela ya gore ba dire tšwelopele moyeng.

14 Mabati a Bulegile: Ngwako wa Jehofa wa borapedi bja therešo o phagamišeditšwe ka godimo ga e mengwe ka moka. Taletšo ye e rego: “A re yeng re rotogeleng thabeng ya Jehofa, . . . a re rute ditsela tša gagwe, re sepele mebileng ya gagwe” e kwatšwa dinageng tše 229 go dikologa lefase. (Jes. 2:3, PK) Go arabela gabotse ga batho ba bafsa go ka phološa bophelo bja bona. Go lebiša kgahlego ya bona mokgatlong wa Jehofa ke e nngwe ya ditsela tše kaone kudu tšeo re ka ba thušago ka tšona.