Lenaneo le Lefsa la Kopano ya Tikologo
1 E le gore re kgone go ema re tiile tumelong lefaseng le sa tsepamago, re swanetše go bota Jehofa. Re ka bonagatša bjang go mmota maphelong a rena a letšatši le letšatši? Go bota Jehofa go kgoma bjang maphelo a rena ka noši le a malapa a rena? Go re thuša bjang go phema tutuetšo ya lefase la Sathane? Lenaneo la kopano ya tikologo la ngwaga wa tirelo wa 2003 le araba dipotšišo tše. Sehlogo sa lona se re “Bota Jehofa, Gomme o Dire tše Dibotse.”—Ps. 37:3, PK.
2 Go bota ga rena Jehofa ga go bontšhwe feela dinakong tše di kgethegilego goba dinakong tša tlalelo. Go kgoma maphelo a rena a letšatši le letšatši. Se se gatelelwa polelong ya mathomo e rego, “Bota Jehofa ka Dinako Tšohle.” (Ps. 62:8) Tšhiedišano ya dikarolo tše nne e nago le sehlogo se se rego “Go Bontšha go Bota Jehofa” e tla re bontšha kamoo re ka hwetšago le go diriša tsebišo yeo e theilwego ka Beibeleng yeo e ka re thušago go aga lenyalo le le atlegilego, go lebeletšana ka katlego le mathata ao a tšwelelago ka lapeng le go kgotsofatša dinyakwa tša rena tša dilo tše di bonagalago.
3 Lefase la Sathane le leka go tšweletša ka go rena pono e kgopamego ya se se lokilego le se se fošagetšego le go re gakantšha ka go tseba seo e lego sa bohlokwa le seo e sego sa bohlokwa. (Jes. 5:20) Dipolelo tše di nago le dihlogo tše di rego “Itišeng Malebana le Dilo tša Lefeela tša Bophelo” le “Phemang Bobe—Le Direng Botse” di tla matlafatša boikemišetšo bja rena bja go kgomarela ditekanyetšo tše phagamego tša Jehofa.—Amosi 5:14.
4 Ge Jehofa a fediša tshepedišo ye e kgopo ya dilo, Bahlanka ba Modimo ba tla swanelwa ke go mmota ka mo go feletšego. Se se gatelelwa polelong ya phatlalatša, “Go Phološwa Kgateletšong ya Lefase go Kgaufsi.” Ka morago ga moo, re tla kgopelwa gore re itlhahlobe karolong e rego “Na o tla Balwa o le yo a Swanelwago ke Mmušo wa Modimo?” Lenaneo le phetha ka kgothatšo ya go “Bota Dikholofetšo tša Jehofa.”
5 Tiragalo e kgahlišago kudu kopanong e nngwe le e nngwe ke polelo ya kolobetšo. Mang le mang yo a kganyogago go kolobetšwa o swanetše go botša molebeledi yo a okamelago ka pela ka mo go ka kgonegago e le gore go ka dirwa dithulaganyo tše di nyakegago.
6 Dinakong tše tše di sa kgonthišetšwego, Jehofa ke yena feela mothopo wa kholofelo le go tsepama. (Ps. 118:8, 9) Eka ka moka re ka matlafatša go mmota ga rena ka go ba gona lenaneong ka moka la kopano ya tikologo.