Lenaneo Le Lefsa La Kopano Ya Tikologo
1 Go thoma ka September, sehlogo bakeng sa dikopano tša tikologo e tla ba se se rego “E-kwa Gomme o Ithute go Lota Lentšu la Modimo.” Sehlogo se seo se theilwego go Doiteronomio 31:12, 13, se nea motheo o swanelago bakeng sa lenaneo ka moka go gatelela dithuto tšeo re swanetšego go ithuta tšona le go di diriša.
2 Le ge batho lehono ba theetša dipolelo tšeo di arošago tše di buduletšwego, ke mo go nyakegago kudu go yo mongwe le yo mongwe wa rena gore re theetše Lentšu la Modimo le go ithuta go le lota. (Luka 11:28; 1 Tim. 4:1) Ka go gopola se, lenaneo la kopano ya tikologo le reretšwe go nea kgothatšo le thušo go bagoeledi, malapa, bagolo le babulamadibogo. Ka Mokibelo go tla ba le polelo ya go šiedišana ya dikarolo tše nne e theilwego tabeng e rego, “Go Lebeletšana le Mathata a Rena—Ka go Theetša Lentšu la Modimo ka Šedi.” Ka Sontaga mesong, go tla ba le polelo ya go šiedišana e nago le sehlogo se se rego “Kamoo Mangwalo a Layago ka Gona ka go Loka.” Lenaneo ka moka le tla nea kgothatšo ya moya yeo wena le lapa la gago le sa swanelago go e foša.
3 Bobedi ka Mokibelo le ka Sontaga, ditšhišinyo tše di šomago bakeng sa bodiredi bja tšhemo di tla newa le go direlwa dipontšho. Diphihlelo tše di kgothatšago le tše di rutago gotee le dipoledišano le tšona di tla newa. Ka gona, ka go ba gona le ka go theetša ka kgopolo ya go diriša se o ithutago sona, o tla ba boemong bjo bokaone bja go lota melao ya Lentšu la Modimo ka mo go tletšego.
4 E nngwe ya dintlha-kgolo tša kopano ya tikologo e tla ba go kolobetšwa ga banababo rena le dikgaetšedi bao ba sa tšwago go ineela. Pele ga boipolelo bjo bja phatlalatša bja boineelo bja bona, bao ba yago kolobetšong ba swanetše go bolela kganyogo ya bona ya go kganyoga go kolobetšwa go molebeledi yo a okamelago gore a kgone go lokišeletša bagolo gore ba kopane le bona.
5 Polelo ya phatlalatša bakeng sa lelokelelo le la dikopano tša tikologo e na le sehlogo se se rego “Ke ka Baka La’ng re Swanetše go Hlahlwa ke Beibele?” Laletša batho bao ba thabelago gore ba be gona. Ka go fagahlela kgothatšo le thušo tše di nyakegago kudu tšeo wena le lapa la gago le tlago go di hwetša, dira ditokišetšo tše di kgonthišeditšwego tša go ba gona bakeng sa lenaneo ka moka.