Go Tsoma Bao ba Swanelegago
1 Ditaelo tša Jesu mabapi le go dira modiro wa boboledi di re tlišetša tlhohlo. O itše: “Xe Le tsêna motseng xoba motsaneng, Le botšišê xe xo ka ba le e a swanetšexo xo iwa xo yêna.” (Mat. 10:11) Re ka phetha bjang ka katlego modiro wo wa go tsoma batho mola e le gore batho lehono ba fetša nako e nyenyane ba le magaeng a bona?
2 Seka-sekang Tšhemo ya Lena: Thomang ka go seka-seka tšhemo ya lena. Batho ba hwetšagala neng magaeng? Ba ka hwetšwa kae mosegare? Na go na le letšatši le lengwe mo bekeng goba nako mo letšatšing moo ba ka thabelago go amogela ketelo? Go dumelelanya bodiredi bja gago le bophelo le maemo a batho bao ba lego tšhemong ya geno go ka go thuša gore o be le mafelelo a mabotse.—1 Ba-Kor. 9:23, 26.
3 Bagoeledi ba bantši ba ile ba atlega ka go hwetša batho e sa le ka pela mantšiboa. Ka nako yeo, ba bangwe ba beng ba dintlo ba iketlile gomme ba thabela go theetša. Go nea bohlatse ka mogala (moo go dumeletšwego) dinakong tša mantšiboa dikgweding tša marega e ka ba mo go atlegago. Go šoma mafelong a kgwebo le go nea bohlatse mafelong a batho bohle ke tše dingwe tša ditsela tša go fihlelela batho ka ditaba tše dibotse.
4 Phuthego e nngwe e ile ya rulaganya go nea bohlatse e šetše e le thapama kudu ka Mekibelo le Disontaga le go nea bohlatse mantšiboa ka bo-Laboraro le bo-Labohlano dikgweding tša mediro e kgethegilego. Ba ile ba rulaganya gape le go nea bohlatse ka mogala le go šoma mafelong a kgwebo. Dithulaganyo tše di ile tša dira gore phuthego e be mafolofolo kudu bakeng sa bodiredi mo e lego gore phuthego e ile ya phetha ka go tšwela pele ka tšona.
5 Dira Maeto a go Boela ka Mafolofolo: Ge e ba e le tlhohlo tšhemong ya lena go hwetša batho gae ge le dira maeto a go boela, mafelelong a ketelo e nngwe le e nngwe leka go bea nako e lebanyago ya go boa, go akaretša le ketelong ya pele. Le gona, kgonthišetša gore o a boela. (Mat. 5:37) Ge e ba go swanetše, o ka kgopela dinomoro tša mogala tša mong wa ntlo. Se le sona se tla go thuša gore o kgone go boledišana le motho yoo gape.
6 Maiteko a rena a mafolofolo a go tsoma bao ba swanelegago le go hlagolela kgahlego yeo re e hwetšago a tla šegofatšwa ke Jehofa.—Die. 21:5.