Lenaneo la Lapa—Thuto ya Lapa

¹ Mpho e kgolo kudu yeo wena bjalo ka motswadi wa Mokriste o ka e neago bana ba gago ke lerato la gago la go rata Jehofa. Tikologo e bohlokwa yeo o ka ba neago se go yona ke ge “o dutše ngwakong wa xaxo” bakeng sa thuto ya lapa ya Beibele ya beke le beke. (Doit. 6:5-7) Go sa šetšwe gore o na le molekane yo a lego bodumeding bjo tee le wena, o dula lapeng leo le aroganego ka tša bodumedi goba o motswadi yo a se nago molekane, o ka thuša bana ba gago go batamela kgaufsi le wena le go Jehofa ka go ba le thuto ya ka mehla ya lapa.

² Go Thoma Thuto: Mogato wa pele ke go thea mokgwa wa go ithuta le le lapa. Ge e ba o sa kgodišege ka nako yeo le ka swarago thuto ka yona, ke ka baka la’ng le sa boledišane ka se le le lapa? (Die. 15:22) Ge e ba le e-na le bana ba banyenyane le ka rata go ba le mananeo a mmalwa a makopana a go ithuta mo bekeng. Kgethang lenaneo leo le le swanelago. Beang nako e tsepamego lenaneong la lena la lapa bakeng sa thuto, gomme le ikemišetšeng go e kgomarela.

³ Ke’ng seo le ka ithutago sona? Ba bangwe ba lokišeletša thuto yeo e tlago go ithutwa Thutong ya Puku ya Phuthego goba Thutong ya Morokami. Ba bangwe ba thabela go ithuta dihlogo tšeo di hlametšwego bafsa ka mo go kgethegilego. Tate yo a nago le morwa le morwedi o rile: “Selo seo se dirago gore thuto ya rena e be tiragalo e kgahlišago mo bekeng go bana ke gore re diragatša dikarolo tše di tšwago go Puku Ya-ka ya Ditaba tša Beibele. Go kgomega ka mo go tseneletšego le kwešišo tšeo seo di se tlišago di bohlokwa kudu go feta tekanyo ya dirapa tšeo re di akaretšago.”

⁴ Ithuteng Beke e Nngwe le e Nngwe: Thuto ya lapa e swanetše go swarwa ka mehla le go letelwa ka phagahlo ke ditho ka moka tša lapa. Go ka nyakega go feto-fetoga le maemo mabapi le letšatši le nako e le gore go swaraganwe le dilo tše dingwe tše sa letelwago. Le gona go ka ba le dinako tše dingwe moo go ka nyakegago gore taba yeo e ithutwago e fetolwe. Eupša peakanyo le ge e le efe yeo e nyakegago ga se ya swanela go dira gore lenaneo leo le hlomilwego la thuto ya lapa le šitišege ka nako e telele. Morwedi wa lapa le lengwe o bolela gore: “Ge e ba nako ya thuto ya rena e swanetše go fetošwa, ka mehla tate o bea nako e mpsha lebating la setšidifatši, e le gore ka moka ga rena re tsebe nako yeo thuto e tlago go ba ka yona.” Maiteko a bjalo a go kgomarela thuto ya ka mehla ya lapa a retwa gakaakang! Ge o dutše o tšwela pele go godiša bana ba gago ka “go ya ka tayo le tlhahlo ya monagano ya Jehofa,” o bontšha lerato la gago la go ba rata le la go rata Tatago rena wa legodimong.—Ba-Ef. 6:4, NW.