Thuto Ya Lapa E Tlišago Lethabo

Beibele e re: “Ké ka tsebô ’polokêlô xe di tlala thotô ya mehuta, ya bohlôkwa le matsaka.” (Diema 24:4) Dilo tše tša bohlokwa tša matsaka ga se feela mahumo a dilo tše di bonagalago, eupša di akaretša lerato la kgonthe, poifo ya go boifa Modimo le tumelo e tiilego. Dika tše bjalo di bopa bophelo bjo bo humilego bja lapa e le ka kgonthe. (Diema 15:16, 17; 1 Petro 1:7) Ka gona, gore re di hwetše re swanetše go tliša tsebo ya Modimo ka malapeng a rena.

HLOGO ya lapa e na le boikarabelo bja go nweletša tsebo ye dithong tša lapa. (Doiteronomio 6:6, 7; Ba-Efeso 5:25, 26; 6:4) E nngwe ya ditsela tše dibotse kudu ya go dira se ke ka thuto ya ka mehla ya lapa. Se e ka ba se se thabišago gakaakang go batšea-karolo ge thuto e swarwa ka tsela yeo bobedi e lego e rutago le e thabišago! Ka gona, anke re ahla-ahleng dilo tše dingwe tše bohlokwa tša go swara thuto e atlegago ya lapa.a

Thuto ya lapa ke e atlegago kudu ge e le ya ka mehla. Ge e ba e sa rulaganywe goba e le phetho yeo e dirwago ka motsotswana, gona go ka direga gore e se ke ya ba ya ka mehla. Ka gona le swanetše ‘go reka nako’ bakeng sa thuto. (Ba-Efeso 5:15-17, NW) Go tšweletša nako ya ka mehla e swanelago bohle e ka ba tlhohlo. Hlogo e nngwe ya lapa e dumela gore: “Re be re e-na le bothata bja go boloka thuto ya rena ya lapa e le ya ka mehla. Re ile ra leka dinako tše di fapanego go fihlela mafelelong re hwetša nako e swanetšego mantšiboa yeo e bego e re swanela. Mo nakong ye thuto ya rena ya lapa ke ya ka mehla.”

Ge le thoma le e-ba le nako e swanetšego, elang hloko gore le se ke la dumelela ditšhitišo di šitiša thuto. Mariab yo bjale a nago le nywaga e 33 o gopola gore: “Ge baeng ba be ba e-tla re sa dutše re le thutong, tate o be a ba kgopela gore ba lete go fihlela thuto e fela. Ge e le ka megala, o be a tla fo botša motho gore o tla mo leletša ka morago.”

Lega go le bjalo, se ga se bolele gore go ka se ke gwa ba le sebaka sa go feto-fetoga. Dilo tša tšhoganetšo goba ditiragalo tše sa letelwago di ka tšwelela gomme ka sewelo go ka nyakega gore thuto e se ke ya ba gona goba e šuthišwe. (Mmoledi 9:11) Eupša elang hloko gore le se ke la dumelela le ge e le sefe sa tše se šitiša mokgwa wa lena wa ka mehla.—Ba-Filipi 3:16.

Thuto e swanetše go tšea nako e kaaka’ng? Robert yo a godišitšego morwedi le morwa ka katlego o re: “Gantši dithuto tša rena di be di tšea iri. Ge bana e be e sa le ba banyenyane, re be re leka go gapa kgahlego ya bona nakong ya iri ka go ahla-ahla dilo tše di fapa-fapanego bjalo ka dirapa tše sego kae sehlogong se se ithutwago ka go Morokami, ditemana tše di kgethilwego Beibeleng le dikarolo tša dipuku tše dingwe.” Maria o gopola gore: “Ge nna le dikgaetšedi tša-ka tše pedi re be re sa le ba banyenyane kudu, thuto ya rena e be e le ya metsotso e ka bago 20 gabedi goba gararo ka beke. Ge re dutše re gola, thuto ya rena ya lapa ya beke le beke e be e tšea iri goba go feta moo.”

Re Swanetše go Ithuta Eng?

Go naganišiša ka potšišo ye ge bohle ba bokane bakeng sa thuto go tla feleletša ka kgakanego le go lahlegelwa ke nako e bohlokwa ya thuto. Ge e ba go be go le bjalo, bana ba ka se be le seo ba se fagahlelago ka go lebanya gomme ba ka lahlegelwa ke kgahlego ka pela. Ka gona kgethang e sa le pele e nngwe ya dipuku tša Mokgatlo yeo go tlago go ithutwa yona.

“Molaki e a bôtêxaxo yo bohlale” o tšweleditše dipuku tše dintši tše go ka kgethwago go tšona. (Mateo 24:45-47) Mohlomongwe le ka diriša puku yeo lapa le se la hlwago le ithuta yona. Ke mo go thabišago gakaakang go ahla-ahla dikarolo tše di kgethilwego go tšwa go Insight on the Scriptures ge e ba dibolumo tše di le gona ka leleme la lena! Ka mohlala, le ka hlahloba sehlogo se se lego mabapi le Selalelo sa Morena dibekeng tša pele ga Segopotšo. Malapa a mantši a thabela go lokišeletša Thuto ya Morokami bakeng sa beke yeo. Eupša dihlogo tša tlaleletšo ka go Morokami le tšona di nea taba e botse kudu bakeng sa thuto. Hlogo ya lapa yeo e tsebago dinyakwa tša moya tša lapa, e boemong bjo bobotse bja go dira phetho ya dipuku tšeo di swanetšego go ithutwa.

Maria o gopola ka gore: “Ka mehla re be re bala puku e kgethilwego e sa le pele. Eupša ge potšišo e tšwelela goba boemo bo rotoga sekolong, gona re be re tla fetela tsebišong e šomago.” Dilo tše di kgethegilego tšeo go tshwenyegwago ka tšona tše bjalo ka mathata ao bafsa ba lebeletšanago le ona sekolong, go beana mabaka le mediro yeo e lego ka ntle ga lenaneo-thuto le tše swanago le tšeo di a tšwelela. Ge se se direga, kgethang dihlogo goba dipuku tšeo di ahla-ahlago bothata bjo bo tšweletšego. Ge e ba le bona tsebišo tokollong ya morago bjale ya Morokami goba Phafoga! yeo le ka ratago go e akaretša le lapa di sa tloga fase, le se ke la dika-dika go rulaganya seo. Ee, o tla nyaka go tsebiša ditho tša lapa ka phetogo pele ga nako. Eupša kgonthišegang gore le boela tabeng e rulagantšwego gatee-tee ge senyakwa se etšwe hloko.

Boloka Moya o Fodile

Go ithuta go direga gakaone kudu ka tlase ga maemo a khutšo. (Jakobo 3:18) Ka gona hlagolelang moya wa boiketlo eupša e le o hlomphegago. Hlogo e nngwe ya lapa kua United States e re: “Go sa šetšwe gore re balela phapošing ya bodulo goba mathuding, re leka go dula re batamelane go e na le go phatlalala ka phapošing e kgolo. Se se tšweletša maikwelo a borutho go rena.” Maria o gopola ka lerato le legolo gore: “Nna le dikgaetšedi tša-ka re be re dumelelwa go kgetha lefelo ka ngwakong leo re bego re ka swarela thuto bekeng yeo go lona. Se se ile sa re dira gore re ikwe re iketlile.” Gopolang gore seetša se se swanetšego, thulaganyo e swanetšego ya go dula le tikologo e thabišago e se nago dilo tše di gašanego ka moka di tlaleletša boiketlong. Go ba le dilapološi bakeng sa lapa ka morago ga thuto le gona go thuša go dira gore mantšiboa e be a thabišago.

Ka sebaka se sengwe malapa a mangwe a bile a kgetha go ba le malapa a mangwe thutong ya ona, gwa okeletša kgahlego gotee le ditlhaloso tše di fapa-fapanego. Ge ba bafsa therešong ba laleletšwa go tšea karolo thulaganyong ye, ba ka holwa ke go bona hlogo ya lapa e nago le phihlelo e swere thuto ya lapa.

Dirang Gore Beibele e Phele

Dirang gore dinako tša thuto e be tše di kgahlišago go bana gomme ba tla fagahlela go tšona ka phišego. Le ka dira se ka go kgothaletša bana ba banyenyane gore ba thale diswantšho tša ditiragalo tša Beibele. Dirang gore bana ba diragatše ditiragalo le dipapadi tša Beibele ge go swanetše. Ga go nyakege gore go kgomarelwe mokgweng o tlwaelegilego wa dipotšišo le dikarabo le bana. Go bala goba go anega dikanegelo ka baanegwa ba Beibele ke tsela e thabišago ya go nweletša melao ya motheo ya go boifa Modimo. Robert yo a boletšwego pejana o gopola gore: “Ka dinako tše dingwe re be re bala ditemana tša Beibele, re šiedišana ka go bala dikarolo tše di fapa-fapanego tša ‘motheo’ tšeo di abilwego.” Bana ba ka laletšwa gore ba kgethe moanegwa yo ba nyakago go mo ekiša mmalong.

Go diriša mebapa le ditšhate go tla thuša bana ba ba godilego go bona ka mahlo a kgopolo mafelo le dibopego tša naga moo ditiragalo tše di ahla-ahlwago di diregilego gona. Go molaleng gore thuto ya lapa e nago le kakanyo-kgopolo e nyenyane e ka dirwa e kgahlišago le e fapanego. Bana ba tla hlologelwa Lentšu la Modimo.—1 Petro 2:2, 3.

Thušang yo Mongwe le yo Mongwe go Tšea Karolo

Gore bana ba thabele thuto, ba swanetše go ikwa le bona ba akaretšwa. Lega go le bjalo, go dira gore bana ba nywaga e fapanego ba tšee karolo e ka ba tlhohlo. Eupša molao wa motheo wa Beibele o re: “E a laolaxo a dirê ka phišêxô.” (Ba-Roma 12:8) Go ba yo a fišegago go a thuša, ka gobane phišego e a fetela.

Ronald o akaretša morwedi wa gagwe wa nywaga e mehlano Dina ka go dira gore a bale dihlogwana tabeng e ithutwago le go mo kgopela gore a hlalose diswantšho. Ngwagola ge Segopotšo sa lehu la Kriste se dutše se batamela, o ile a lebiša tlhokomelo diswantšhong tše di swanetšego tše di lego pukung ya Motho yo a Phagamego Kudu yo a Kilego a Phela.c O re: “Se se mo thušitše go kwešiša bohlokwa bja tiragalo.”

Ronald o gata mogato o tšwelago pele le morwedi wa gagwe wa nywaga e lesome, e lego Misha. Ronald o re: “Misha o gatetše pele go fihla moo a sa kwešišego feela seo diswantšho e lego sona, eupša le seo di se hlalosago. Ka gona ge re be re ahla-ahla puku ya Seremo se Segolo sa Kutollo se Batametše!,d re be re lebiša tlhokomelo go seo se bolelwago ke diswantšho gomme se se mo thušitše.”

Ge bana ba dutše ba golela nywageng ya bona ya mahlalagading, ba laletše gore ba hlalose tirišo e šomago ya taba e ahla-ahlwago. Ge dipotšišo di tšwelela nakong ya thuto, aba dikarolo tša nyakišišo. Robert o ile a dira seo ge morwa wa gagwe wa nywaga e 12, e lego Paul a be a botšiša ka sehlopha se se sa tšwago go hlongwa sa sekolo se se akaretšago papadi ya Dungeons and Dragons. Paul le ba bangwe ka lapeng ba ile ba nyakišiša tsebišo ba diriša Watchtower Publications Index gomme ba e hlahloba thutong ya bona ya lapa. Robert o re: “Ka baka leo, Paul o ile a kwešiša gatee-tee gore papadi e be e le e fošagetšego go Bakriste.”

Ka dinako tše dingwe Robert le yena o be a abelwa dinyakišišo. Mosadi wa gagwe Nancy o gopola ka gore: “Ge re be re nyakišiša ka baapostola ba Jesu, yo mongwe le yo mongwe wa rena o be a abelwa moapostola o tee beke e nngwe le e nngwe. E be e le mo go thabišago gakaakang go bona bana ba tliša pego ya bona thutong ya lapa ka phišego!” Go dira nyakišišo ya bona ka noši le go abelana tsebišo le lapa go thuša bana go ‘gola ba le pele ga Morena.’—1 Samuele 2:20, 21.

Go botšiša dipotšišo—pono ya motho gotee le dipotšišo tše di hlahlago—le yona ke tsela e botse kudu ya go akaretša bana. Morutiši yo Mogolo, Jesu o ile a botšiša dipotšišo tše di nyakago pono ya motho tše bjalo ka e rego, “Xo bya’ng xe O bôna?” (Mateo 17:25) Maria o gopola gore: “Ge yo mongwe wa rena a be a e-na le potšišo, le ka mohla batswadi ba rena ga se ba ka ba re araba ka go lebanya. Ba be ba botšiša dipotšišo tše di hlahlago ka mehla, ba re thuša go bolela mabaka tabeng yeo.”

Boledišanang—Le se ke la Kgopiša!

Lethabo la thuto ya lapa le a godišwa ge e ba bohle ba ba lego gona ba ka bolela dipono le maikwelo a bona ka ntle le go boifa go kwerwa. Eupša tate yo mongwe o re: “Poledišano e botse nakong ya thuto ya lapa e a kgonega ge feela megala ya poledišano e bulegile ka dinako tše dingwe. O ka se kgone go ba le yona feela bakeng sa nako ya thuto.” Phema ditlhaloso tše di se nago tlhaologanyo tšeo di hlabago tše bjalo ka tše rego, ‘Ke sona seo feela? Ke be ke nagana gore e be e le selo sa bohlokwa’; ‘Seo ke bošilo’; ‘Motho a ka letela’ng go wena? Le gona o fo ba o le ngwana.’ (Diema 12:18) E-bang le kwelobohloko le kgaugelo go bana ba lena. (Psalme 103:13; Maleaki 3:17) Thabišwang ke bona gomme le ba thekge ge ba dutše ba katanela go diriša seo ba ithutago sona.

Moya wa thuto ya lapa o swanetše go ba ka tsela yeo e lego gore monagano wa ngwana o ka amogela thuto. Motswadi yo mongwe yo a atlegago wa bana ba bane o hlalosa gore: “Ge o thoma go phošolla bana, o ba le batheetši ba befetšwego ka tsela e itšego.” Moyeng o bjalo, mohlomongwe tsebišo e ka se ke ya nwelela. Ka gona phema go dira dinako tša thuto mananeo a tayo le kotlo. Ge e ba tše di nyakega, di diriše ka morago le go motho ka o tee ka o tee.

Boiteko ke bja Bohlokwa

Go aga lapa le le humilego moyeng go nyaka nako le boiteko. Eupša mopsalme o re: “Ka kxonthe, bana ba motho ké neô ya Morêna; kenyô ya mmele ké mphô.” (Psalme 127:3) Le gona batswadi ba gafetšwe boikarabelo bja “xo . . . etetša [bana] ka xo ba ruta le xo ba eletša tša Morêna.” (Ba-Efeso 6:4) Ka gona hlagolelang bokgoni bja go swara thuto e atlegago le e thabišago ya lapa. Dirang sohle seo le ka se kgonago go nea “lebese la Lentšu lé le sa forexo,” e le gore bana ba lena ba ka ‘fihlela phološo.’—1 Petro 2:2; Johane 17:3.

[Mengwalo ya tlase]