Poroutšha e Mpsha Yeo e Tlago go Sepedišwa!
1. Re tla sepediša’ng ka November, gona morero wa kgatišo ye ke ofe?
1 Kopanong ya Selete ya 2009 ya “Dulang le Phakgame!” go lokolotšwe poroutšha e mpsha e nago le sehlogo se se rego Beibele—E na le Molaetša Ofe? Ka November, e tla ba e le la mathomo diphuthego lefaseng ka bophara di e sepediša. Batho ba tšhemong ya rena ba tla thušwa bjang ke kgatišo ye? Batho ba bantši, kudu-kudu bao ba lego madumeding ao e sego a Bokriste, ga ba tsebe Beibele. Ka baka leo, go letlakala 3, poroutšha ye e hlalosa gore e hlametšwe go nea “tsebo ya motheo ya Beibele.”
2. Re ka sepediša poroutšha ye bjang?
2 Kamoo re ka e Sepedišago: Re ka re: “Re ka rata go kwa seo o se naganago ka taba ye. [Bala 2 Timotheo 3:16.] Ba bantši bao re boledišanago le bona ba dumelelana le mantšu a; ba bangwe ba nagana gore Beibele e fo ba e le puku e botse. O nagana gore Beibele ke puku ya mohuta mang? [Dumelela karabo.] Go sa šetšwe seo re ka bago re se dumela ditabeng tša bodumedi, go na le mabaka a kwagalago a gore re itlhahlobele Beibele. [Bala serapa sa matseno se se lego mathomong a letlakala 3.] Ge o dutše o bala kakaretšo e kgahlišago ya Beibele ye e hwetšwago poroutšheng ye, selo se se tla go kgahlago ke gore: Molaetša wa Beibele ke o tee le sehlogo sa yona ke se tee.”
3. Thero e nngwe yeo re ka e dirišago ke efe, kudu-kudu go batho ba bantši bao ba lego madumeding ao e sego a Bokriste?
3 Mokgwa o mongwe ke wo, kudu-kudu ge re dira boboledi go batho ba bantši bao ba lego madumeding ao e sego a Bokriste: “Re ka rata go kwa seo o se naganago mabapi le seo se boletšwego mo Mangwalong (goba pukung ye e kgethwa). [Bala Psalme 37:11.] O nagana gore lefase le tla ba bjang ge go phethagatšwa boporofeta bjo? [Dumelela karabo.] Wo ke mohlala wa kholofelo le khomotšo tšeo batho ba ditšo le ditumelo ka moka ba ka di hwetšago ka Beibeleng.” Bala serapa se se lego mathomong a letlakala 3 ke moka o sepediše poroutšha ye.
4. Re ka diriša poroutšha ye bjang go thoma thuto ya Beibele?
4 Thoma Thuto ya Beibele: Ge re boela, re ka gopotša mong wa ntlo ka poledišano ya rena ya nakong e fetilego gomme ra boledišana ka serapa se setee goba tše pedi tabeng yeo re boledišanego ka yona, re diriša dipotšišo tše di lego mafelelong a karolo yeo. Goba ge e ba re rata go mo sepedišetša puku ya Seo Beibele e se Rutago ka yona nako yeo, re ka bala le yena karolo ya ka morago ya poroutšha ye, ra mo nea puku gomme ra mmotšiša gore ke dikgaolo dife tšeo di mo kgahlago ke moka ra ahla-ahla le yena serapa se tee goba tše pedi kgaolong yeo. Eka ka moka ga rena re ka ba le karolo ka botlalo go sepedišeng poroutšha ye ka November!