E Boloke
Na o Diriša Diporoutšha tše?
Beibele—E na le Molaetša Ofe?
E reretšwe go gogela bao ba tsebago go se nene ka Beibele, kudukudu bao ba lego madumeding ao e sego a Bokriste
Kamoo e ka sepedišwago ka gona: “Re rata go kwa kgopolo ya gago ka seo se bolelwago ka mo Mangwalong (goba ka mo pukung ye e kgethwa). [Bala Psalme 37:11, yeo go bolelwago ka yona go karolo 11.] O nagana gore lefase le tla ba bjang ge boporofeta bjo bo phethagala? [Dumelela karabo.] Wo ke mohlala wa kholofelo le khomotšo tšeo batho ba ditšo ka moka le ditumelo ka moka ba ka di hwetšago ka Beibeleng.” Bala serapa seo se lego mathomong a letlakala 3, gomme o nee motho yoo poroutšha.
Mohlomongwe o ka leka se: Ge e ba o swara thuto ya Beibele le motho yo a lego bodumeding bjo e sego bja Bokriste o diriša puku ya Seo Beibele e se Rutago, fetša metsotso e sego kae mathomong goba mafelelong a thuto e nngwe le e nngwe ya lena gore o ahlaahle karolo e tee ya poroutšha ye e le gore o mmontšhe kakaretšo ya seo Beibele e lego sona.
Tsela e Išago Bophelong bjo bo sa Felego—Na o e Hweditše
E reretšwe go thuša batho go lemoga gore ga se mehuta ka moka ya borapedi yeo Modimo a e amogelago
Kamoo e ka sepedišwago ka gona: Go na le mehuta e mentši ya borapedi. Na Modimo o amogela ditsela ka moka tše di thulanago tšeo batho ba naganago gore ba mo rapela ka tšona? Bala Mateo 7:13, 14. Moporofeta wa Modimo e lego Jesu o boletše gore go na le ditsela tše pedi feela, e nngwe e le e išago bophelong bjo bo sa felego gomme e nngwe e le e išago tshenyegong. Morero wa poroutšha ye ke go go thuša go hwetša tsela e išago bophelong bjo bo sa felego.
Mohlomongwe o ka leka se: Kgopela mong wa ntlo gore o rata go boa gomme le tle le bale poroutšha ye, le bale mangwalo le diriša Beibele ya gagwe ka noši. Ge go swanetše, bontšha mong wa ntlo puku ya Seo Beibele e se Rutago.
O ka ba Mogwera wa Modimo!
E reretšwe go gogela bao ba nago le thuto e lekanyeditšwego goba bao ba sa kgonego go bala gabotse
Kamoo e ka sepedišwago ka gona: “Na o nagana gore go a kgonega gore re be bagwera ba Modimo? [Dumelela karabo. Ke moka o bale Jakobo 2:23.] Poroutšha ye e reretšwe go re thuša gore re kgone go ba bagwera ba Modimo, go swana le Aborahama.”
Mohlomongwe o ka leka se: Bontšha motho kamoo thuto ya Beibele e ka swarwago ka gona ge o thoma go ya go yena ka lekga la pele goba ge o boela go yena ka gore le ahlaahle thuto 1 goba karolo e nngwe ya yona.
Meoya ya Bahu—Na e ka go Thuša Goba ya go Gobatša? Na ge e le Gabotse e Gona?
E reretšwe go nea bohlatse bjo bo kgodišago bja gore ga go na seo batho ba swanetšego go se boifa ka bahu. E nea bohlatse bja gore bahu ga ba kgone selo
Kamoo e ka sepedišwago ka gona: Batho ba bantši ba boifa bahu ka ge ba dumela gore ba sa dutše ba na le tšhušumetšo e itšego go bao ba phelago. Ke eng seo Beibele e se rutago? Bala Mmoledi 9:5, 6, 10. Go ya ka lengwalo le, na bahu ba ka bontšha lerato la bona goba lehloyo go bao ba phelago? Poroutšha ye e nea dikarabo tše kwagalago le tše kgotsofatšago tša dipotšišo tšeo ba bantši ba ipotšišago tšona ka boemo ba bahu.
Mohlomongwe o ka leka se: Ge eba mong wa ntlo a amogela poroutšha, kgopela go boa gore le tle le ahlaahle taba ye gomme o arabe dipotšišo tšeo a ka bago a na le tšona. Mmontšhe puku ya Seo Beibele e se Rutago ka pela kamoo go ka kgonegago.
Real Faith—Your Key to a Happy Life
E reretšwe go gogela Mamoseleme ao a dulago tikologong yeo a ka ikwago a lokologilego go ithuta Beibele
Kamoo e ka sepedišwago ka gona: Bontšha motho seswantšho seo se lego go matlakala 16-17 gomme o re: “Seo o se bonago mo se fapane kudu le seo re se bonago lefaseng lehono. Na o nagana gore go a kgonega gore lefase le be ka tsela ye ka le lengwe la matšatši? [Dumelela karabo.] Ela hloko seo puku ye ya Modimo e se holofetšago. [Diriša Beibele ya gago go bala le lengwe la mangwalo ao a tsopotšwego.] Poroutšha ye e re thuša gore re hlagolele tumelo ya kgonthe ya gore dikholofetšo tše bjalo di tla phethagala.”
Mohlomongwe o ka leka se: Mafelelong a ketelo ya gago ya pele, kgopela mong wa ntlo go kgetha e nngwe ya dipotšišo tše di lego letlakaleng la ka morago. Ke moka o dire dithulaganyo tša gore ge o boa o tle o ahlaahle karabo ya potšišo yeo o diriša poroutšha ye.
The Guidance of God—Our Way to Paradise
E reretšwe go gogela Mamoseleme ao a dulago tikologong yeo a ikwago a lokologile go ka ithuta Beibele
Kamoo e ka sepedišwago ka gona: “Ke a lemoga gore Mamoseleme a dumela go Modimo o tee wa therešo le go baporofeta ka moka. Na ke nepile? [Dumelela karabo.] Ke rata go boledišana le wena ka boporofeta bjo bo bolelago gore lefase le tla fetošwa paradeise. Na nka go balela seo moporofeta yo a se ngwadilego? [Bala Jesaya 11:6-9.] Batho ba bantši ba ipotšiša gore Modimo o tla tliša bjang diphetogo tše mo lefaseng. Poroutšha ye e bontšha seo baporofeta ba se bolelago ka taba ye.”
Mohlomongwe o ka leka se: Ge e ba mong wa ntlo a amogela poroutšha yeo, mmotše gore: “Puku ye ya Modimo e hlalosa gore mathomong, motho o be a dula paradeiseng. Nakong e tlago ge re kopana, nka rata go araba potšišo ye: ‘Motho o hlanogetše bjang tlhahlo ya Modimo gomme a lahlegelwa ke paradeise?’” Ge o boela go yena, ahlaahla taba yeo e lego mathomong a karolo yeo e thomago letlakaleng la botshelela.
The Pathway to Peace and Happiness
E reretšwe go gogela Mabuddha
Kamoo e ka sepedišetšwago motho yo mogolo yoo e lego Mobuddha: “Mohlomongwe o tshwenyegile go swana le nna ka dikgopolo tše dintši tše di fošagetšego tšeo di lego gona ga bjale le mafelelo ao di bago le ona baneng ba rena. O nagana gore ke ka baka la’ng palo e kgolo gakaaka ya bafsa e hloka boitshwaro? [Dumelela karabo.] Na o be o tseba gore se se boletšwe e sa le pele ka pukung yeo e thomilwego go ngwalwa nako e telele pele ga ge go ka thewa madumedi a Bokriste, Bohindu le Bomoseleme? [Bala 2 Timotheo 3:1-3.] Hlokomela gore maemo a a fo tšwela pele go sa šetšwe gore batho ba tšwela pele ba ithuta. [Bala temana 7.] Tsebišo e lego ka kgatišong ye e nthušitše go kwešiša ditherešo tšeo batho ba bantši ba sa ithutego tšona. Na o ka rata go e bala?”
Mohlomongwe o ka leka se: Leetong le le latelago la go boela, ka morago ga ge o hlagoletše kgahlego ya Beibele ya mong wa ntlo, mmontšhe dipotšišo tše di lego letlakaleng la ka morago la poroutšha gomme o mo šupetše setlankana sa go kgopela puku ya Seo Beibele e se Rutago. Mo hlalosetše gore o swere kopi ya yona ge e ba a nyaka go e bona. Mmontšhe lelokelelo la dikagare la puku yeo gomme o ahlaahle serapa goba tše pedi kgaolong yeo a e kgethago.
Why Should We Worship God in Love and Truth?
E reretšwe go gogela Mahindu
Kamoo e ka sepedišwago ka gona: “Thapelo e tumilego kudu ya Maindia e akaretša kgopelo ya gore go hwetšwe therešo le seetša. Na o nagana gore ke gabohlokwa go rapela Modimo ka lerato le ka therešo? [Dumelela karabo.] Ela hloko seo Jesu a se boletšego ka taba ye.” Bala Johane 4:24. Ke moka bala serapa 4 go letlakala 3 gomme o nee motho poroutšha ye.
Mohlomongwe o ka leka se: Ge e ba mong wa ntlo a amogela poroutšha ye, mmotše gore: “Dihlalefi tše dingwe tša Mahindu di re therešo e utilwe ka dipelong tša rena. Tše dingwe di re therešo e hwetšwa ka lengwalong le lekgethwa. Nakong e tlago ke tla rata go ahlaahla le wena potšišo yeo e lego mafelelong a serapa 3 go letlakala 4, e rego: ‘Re ka hwetša kae therešo e tšwago go Modimo?’”
Lasting Peace and Happiness—How to Find Them
E reretšwe go gogela maChina
Kamoo e ka sepedišwago ka gona: “Bophelo bja lehono bo tletše ka diteko tše dintši tšeo di ka re amogago lethabo. Ke eng seo se go tlišetšago lethabo go sa šetšwe mathata ao o lebeletšanago le ona? [Dumelela karabo.] Batho ba bantši ba hweditše lethabo ka go diriša keletšo yeo e lego ka Beibeleng. [Bala Psalme 119:1, 2.] Ba bangwe ba re Beibele ke puku ya makgowa. Eupša hlokomela se. [Ahlaahla serapa 16 go letlakala 17.] Poroutšha ye e hlalosa kamoo re ka hwetšago khutšo le lethabo tše di sa felego.”
Mohlomongwe o ka leka se: Ge e ba mong wa ntlo a amogela poroutšha, bala le yena mafoko a mathomo a mararo serapeng sa 18 go letlakala 17 gomme o mmotše gore: “Nakong e tlago ge ke boa, ke be nka rata go go bontšha seo re ka se letelago go ya ka Beibele.” Ge o boela, ahlaahlang e tee ya dintlha tšeo di lego go letlakala 30 serapeng sa botshelela.