Na o ka “Tshelela Matsedonia”?

1. Ke’ng seo se dirilego gore Paulo le badirišani ba gagwe ba ye Matsedonia?

¹ Mo e ka bago ka ngwaga wa 49 C.E., moapostola Paulo o ile a tloga Antiokia ya Siria a tšea leeto la gagwe la bobedi la boromiwa. Morero wa gagwe e be e le go etela Efeso le metse e mengwe ya Asia Minor. Lega go le bjalo, o ile a amogela taletšo e bego e hlahlwa ke moya ya gore a ‘tshelele Matsedonia.’ Yena le badirišani ba gagwe ba ile ba amogela taletšo yeo ka lethabo, gomme ba ile ba ba le tokelo ya go hloma phuthego ya pele tikologong yeo. (Dit. 16:9, 10; 17:1, 2, 4) Lehono, dikarolo tše dingwe tša tšhemo ya lefase ka bophara di tloga di nyaka babuni ba oketšegilego. (Mat. 9:37, 38) Na o ka kgona go thuša?

2. Ke ka baka la’ng ba bangwe ba se ba tšwa ba nagana ka taba ya go hudugela nageng e šele?

² Mohlomongwe o na le moya woo Paulo a bego a na le wona wa boromiwa eupša ga se wa ka wa naganišiša ka taba ya go hudugela nageng e šele. Ka mohlala, go ka direga gore o ka se tlwaeletšwe boromiwa Gilead ka baka la nywaga ya gago goba ka gobane o le kgaetšedi yo a sa nyalwago goba o na le bana ba banyenyane. Mohlomongwe ga se wa ka wa nagana ka taba ya go hudugela nageng e šele ka gobane o tšhaba gore o ka se kgone go ithuta leleme le lengwe. Goba mohlomongwe e ka ba e le gore nageng yeo o dulago go yona gona bjale o mofaladi ka mabaka a tša boiphedišo gomme o dikadika go tloga moo. Lega go le bjalo, ka morago ga go naganišiša ka taba ye le go e rapelela, o ka hwetša gore maemo ao ga se a swanela go ba lepheko la gore o ye nageng e šele moo go nyakegago thušo e kgolo.

3. Ke ka baka la’ng go tlwaeletšwa boromiwa e se selo se segolo seo se nyakegago gore motho a bolele ditaba tše dibotse ka katlego nageng e šele?

³ Na Senyakwa se Segolo ke Gore Motho a Tlwaeletšwe Boromiwa? Ke’ng seo se thušitšego Paulo le badirišani ba gagwe gore ba atlege? Ba be ba ithekgile ka Jehofa le moya wa gagwe o mokgethwa. (2 Bakor. 3:1-5) Ka gona, le ge maemo a gago a sa go dumelele gore o hwetše tlwaetšo e kgethegilego, o sa dutše o ka bolela ditaba tše dibotse ka katlego nageng e šele. Le gona, gopola gore o dula o tlwaetšwa Sekolong sa Bodiredi sa Pušo ya Modimo le Sebokeng sa Tirelo. Godimo ga moo, ge e ba pakane ya gago ke go ya Gilead goba sekolong se sengwe se se swanago le seo, go ya ga gago nageng e šele gore o latswe tirelo ya boromiwa go tla go thuša go ba le phihlelo e bohlokwa yeo o ka e dirišago ka morago ge e ba o ka tla wa amogela tlwaetšo e oketšegilego.

4. Ke ka baka la’ng bao ba šetšego ba godile ba sa swanela go nagana gore ba ka se tsoge ba hudugetše nageng e šele?

⁴ Bao ba Šetšego ba Godile: Batho bao ba godilego bao ba gotšego moyeng e bile ba sa tshwenywe ke malwetši ba ka thuša kudu dinageng tšeo di nyakago thušo. Na o šetše o rotše modiro? Ba bangwe bao ba hwetšago mo-tla-o-dutše ba kgona go phela gabotse nageng yeo e golago ka tša kgwebo moo ditshenyagalelo tša bona, go akaretša le ditefo tša kalafo ya maemo a kaone, di lego tlase kudu ge di bapetšwa le tša nageng ya gabo bona.

5. Anega phihlelo ya ngwanabo rena yo a rotšego modiro gomme a hudugela nageng e šele.

⁵ Ngwanabo rena yo mongwe yo a rotšego modiro e bile a etšwa nageng yeo go bolelwago Seisemane, yo e bilego e le mogolo le mmulamadibogo, o ile a hudugela lefelong le lengwe leo le ratwago ke baeti ka Borwabohlabela bja Asia gore a thuše sehlopha sa bagoeledi ba senyane seo se dirišago Seisemane. Sehlopha seo se ile sa boledišana le batho ba šele ba 30 000 bao ba bego ba dula tikologong yeo. Ka nywaga e mebedi feela, ke ge ba 50 ba e ba gona dibokeng. Ngwanabo rena yoo o ngwadile gore: “Go ba ga ka mo go ntlišeditše ditšhegofatšo tše di kgahlišago kudu tšeo nkilego ka di thabela. Ga ke tsebe gore nka thoma kae ka fetša kae!”

6. Anega phihlelo ya kgaetšedi yo a sa nyalwago yo a ilego a hudugela nageng yeo go bego go nyakega thušo.

⁶ Dikgaetšedi tše sa Nyalwago: Jehofa o dirišitše dikgaetšedi ka tsela e matla gore di phatlaletše ditaba tše dibotse dinageng tšeo go nyakegago thušo e kgolo. (Ps. 68:11) Kgaetšedi yo mongwe o mofsa yo a sa nyalwago o be a na le pakane ya gore a katološe bodiredi bja gagwe ka go ya nageng e šele, eupša batswadi ba gagwe ba be ba tshwenyegile ka tšhireletšego ya gagwe. Ka gona o ile a kgetha naga yeo e bego e tsepame ditabeng tša dipolitiki le tša boiphedišo, a ngwalela ofisi ya lekala gomme a newa tsebišo e holago yeo a bego a e nyaka. Nywageng e tshela yeo a e feditšego a phela nageng yeo, o ile a thabela ditšhegofatšo tše dintši. O re: “Nkabe ke bile le dithuto tše sego kae tša Beibele ge e ba ke be ke le gae. Eupša go hlankela ga ka mo go nyakegago thušo e kgolo go nthušitše gore ke be le dithuto tše dintši le go kaonafatša kudu bokgoni bja ka bja go ruta.”

7. Anega phihlelo ya lapa leo le ilego la hudugela nageng e šele.

⁷ Malapa: Ge e ba o na le bana, na se se sa ra gore o ka se kgone go hudugela nageng e šele go yo phatlalatša ditaba tše dibotse? Lapa le lengwe leo le bego le na le bana ba babedi ba nywaga e seswai le e lesome, le ile la dira phetho ya go leka seo. Mma wa lapa leo o ngwala phihlelo ya bona ka gore: “Re thabela gore re ile ra godišetša bana ba rena mo, ka gobane ba gwerane le babulamadibogo ba kgethegilego le baromiwa. Maphelo a rena a humišitšwe ke gore re hlankela moo go nyakegago thušo e kgolo.”

8. Na go a kgonega go hlankela nageng e šele ntle le gore o ithute leleme le lengwe? Hlalosa.

⁸ Bothata bja Leleme: Na taba ya go ithuta leleme le šele e go thibela gore o hudugele nageng e šele? Go ka direga gore segageno se bolelwa le dinageng tšeo di nyakago bagoeledi ba oketšegilego ba Mmušo. Banyalani ba bangwe bao ba bolelago Seisemane ba ile ba hudugela nageng yeo go bolelwago Sepanishe moo go nago le palo e kgolwanyana ya bafaladi bao ba bolelago Seisemane. Ka morago ga go hwetša tsebišo e tšwago ofising ya lekala ka diphuthego tša Seisemane tšeo di bego di nyaka thušo, ba ile ba kgetha e nngwe ya tšona gomme ba e etela gabedi. Ba ile ba boela gae, ba fokotša ditshenyagalelo tša bona tša kgwedi le kgwedi, gomme ba boloka tšhelete ngwaga ka moka. Ge ba be ba itokišeditše go huduga, bana babo bona ba tikologong yeo ba ile ba ba nyakiša madulo ao a sa bitšego.

9, 10. Ke’ng seo bao ba tlogilego dinageng tša gabo bona ba ka naganišišago ka sona, gomme ka baka la’ng?

⁹ Bafaladi: Na o falaletše nageng e nngwe, mohlomongwe pele ga ge o ka tseba therešo? Go ka ba go nyakega babuni ba bantši nageng ya geno. Na o ka naganišiša ka taba ya gore o boele morago go yo thuša? Go bonagala go tla ba bonolo go wena gore o hwetše mošomo le madulo go fapana le motho yo a tšwago nageng e nngwe. Mohlomongwe o šetše o kgona go bolela polelo ya moo. Go oketša moo, batho ba ka ikemišetša kudu go theetša molaetša wa Mmušo ge o bolelwa ke wena go e na le ge o bolelwa ke motho yo ba mo tšeago e le yo šele.

¹⁰ Monna yo mongwe o ile a falalela Italy a etšwa Albania, a hwetša mošomo o lefago gabotse, gomme a kgona go romela lapa la gagwe tšhelete kua Albania. Ka morago ga gore a amogele therešo, o ile a thoma go ruta sehlopha sa babulamadibogo ba kgethegilego ba Mataliana polelo ya Sealbania; babulamadibogo bao ba be ba tlo hudugela moo e le gore ba hlankele mo go nyakegago thušo e kgolo. Ngwanabo rena o ngwala gore: “Ba be ba eya tšhemong yeo nna ke bego ke e tlogetše. Ba be ba sa tsebe leleme leo eupša ba be ba thabetše go tloga. Nna ke Moalbania e bile ke bolela Sealbania. Ke ile ka ipotšiša gore ke dira’ng Italy?” Ngwanabo rena yoo o ile a dira phetho ya go boela Albania go yo thuša go phatlalatša ditaba tše dibotse. O re: “Na ke itsholela gore ke ile ka tlogela mošomo Italy le tšhelete yeo ke bego ke e hwetša? Le ganyenyane! Ke hweditše mošomo wa kgonthe Albania. Go ya ka nna, mošomo wa bohlokwa kudu le woo o tlišago lethabo la sa ruri ke wa go hlankela Jehofa ka sohle seo o nago le sona!”

11, 12. Bao ba naganelago go hudugela nageng e šele ba swanetše go dira’ng?

¹¹ Kamoo o ka Dirago Seo ka Gona: Pele ga ge Paulo le badirišani ba gagwe ba ka ya Matsedonia, ba be ba ikemišeditše go leba thoko ya bodikela, eupša ‘ba ile ba iletšwa ke moya o mokgethwa,’ ka gona ba ile ba leba thoko ya leboa. (Dit. 16:6) Ge ba be ba le kgauswi le Bithinia, Jesu o ile a ba thibela. (Dit. 16:7) Jehofa o sa dutše a okametše modiro wa boboledi a diriša Jesu. (Mat. 28:20) Ka gona, rapelela tlhahlo ya Jehofa ge e ba o naganela go hudugela nageng e šele.—Luka 14:28-30; Jak. 1:5; bona lepokisi le le rego: “Kamoo o ka Tsebago ge e ba Naga Yeo o Naganelago go ya go Yona e Nyaka Thušo.”

¹² Kgopela bagolo ba phuthego ya geno goba Bakriste ba bangwe ba godilego moyeng gore ba go botše se tšwago mafahleng a bona ge e ba o tla atlega kabelong e bjalo. (Die. 11:14; 15:22) Bala dihlogo tšeo re di gatišitšego tšeo di bolelago ka go hlankela nageng e šele, o be o dire nyakišišo ka dinaga le ge e le dife tšeo o naganelago go hudugela go tšona. Na o ka kgona go etela naga yeo o ratago go hudugela go yona, mohlomongwe wa e etela ka lebaka le leteletšana? Ge e ba o tloga o nyaka go hudugela nageng e šele, o ka ngwalela ofisi ya lekala ya naga yeo gore e go nee tsebišo e oketšegilego, o diriša aterese yeo e lego ka go Yearbook ya morago bjale. Lega go le bjalo, go e na le gore o romele lengwalo la gago ka go lebanya ofising yeo ya lekala, le nee bagolo ba phuthego ya geno pele, gomme bona ba tla tsenya ditlhaloso tša bona pele ga ge ba ka le romela.—Bona puku ya Go Rulaganyetšwa go Dira Thato ya Jehofa, matlakala 111-112.

13. Ofisi ya lekala e tla go thuša bjang, eupša boikarabelo bja gago ke bofe?

¹³ Ofisi ya lekala e tla go romela tsebišo yeo e ka go holago ya mabapi le naga yeo go go thuša gore o dire diphetho, eupša e ka se go nee lengwalo la gore e go thekga ka ditšhelete goba ya kgonthišetša gore o tla dula nako e kaakang, ya go direla visa goba difomo le ge e le dife tše di nyakwago ke molao, goba ya go nyakela mafelo a bodulo. Tše ke dilo tšeo o swanetšego go itirela tšona tšeo di tla nyakago gore o di hlahlobišiše pele ga ge o ka huduga. Go oketša moo, o tla ikarabela ka go ikgokaganya le diofisi tša botseta gore o hwetše tsebišo ya kamoo o ka hwetšago visa le dipampiri tša go go dumelela go šoma moo. Bao ba hudugago ba swanetše go kgona go itlhokomela le go lefelela ditaba tšeo di sepedišanago le tša molao.—Bagal. 6:5.

14. Ke dilo dife tšeo re swanetšego go di šetša ge re etela goba re hudugela nageng yeo modiro o thibetšwego?

¹⁴ Dinageng Tšeo Modiro o Thibetšwego: Dinageng tše dingwe, bana babo rena le dikgaetšedi ba moo ba swanetše go ba šedi kudu borapeding bja bona. (Mat. 10:16) Bagoeledi bao ba etelago moo goba bao ba hudugelago moo ba ka gogela mahlo a batho modirong wa rena ba sa ikemišetša gomme seo sa bea polokego ya bana babo rena ba moo kotsing. Ge e ba o naganela go hudugela nageng e bjalo, hle ngwalela ofisi ya geno ya lekala gomme o nee bagolo ba geno lengwalo leo pele ga ge o ka gata mogato le ge e le ofe.

15. Bao maemo a bona a sa ba dumelelego go huduga ba ka katološa bjang bodiredi bja bona tikologong ya gabo bona?

¹⁵ Ge e ba o ka se Kgone go Huduga: Ge e ba ga bjale o ka se kgone go hudugela nageng e nngwe, o se ke wa nyama. Mohlomongwe o bulegetšwe ke “mojako [o mongwe] o mogolo o išago modirong.” (1 Bakor. 16:8, 9) Molebeledi wa geno wa tikologo a ka ba a tseba ka lefelo leo go nyakegago thušo go lona leo le lego kgauswi le moo o lego gona. Na o ka kgona go ithuta leleme le lengwe la nageng ya geno gomme wa ithaopela go thuša phuthegong goba sehlopheng seo se bolelago leleme leo? Mohlomongwe o ka thuša phuthegong goba sehlopheng sa kgauswi le wena sa polelo ya diatla, goba ya leleme le šele le bjalo ka se-China, Sefora goba Sepotokisi. Goba mohlomongwe o ka kgona go katološa bodiredi bja gago o le phuthegong yeo o lego go yona ga bjale. Go sa šetšwe gore maemo a gago ke afe, selo se bohlokwa ke gore o tšea karolo ka moya ka moka borapeding bja gago.—Bakol. 3:23.

16. Re swanetše go itshwara bjang ge re ekwa ka bao ba ratago go hudugela nageng e šele?

¹⁶ Na o tseba Mokriste yo a gotšego moyeng yoo pakane ya gagwe e lego go hlankela nageng e šele? Gona mo thekge le go mo kgothatša! Ge Paulo a be a tloga Antiokia ya Siria, motse woo e be e le wa boraro ka bogolo Mmušong wa Roma (o fetwa ke Roma le Aleksandria). Ka baka la tšhemo yeo e kgolo, ga go pelaelo gore phuthego ya Antiokia e be e hloka thušo ya Paulo gomme e be e tla mo hlologela kudu ge a be a ka tloga. Lega go le bjalo, Beibele ga e bontšhe gore bana babo rena ba moo ba ile ba kgothaletša Paulo gore a se tloge. Go bonagala eka go e na le gore ba naganele tikologo ya gabo bona feela, ba ile ba gopola gore “tšhemo ke lefase.”—Mat. 13:38.

17. Ke mabaka afe ao re nago le ona a go naganela go “tshelela Matsedonia”?

¹⁷ Paulo le badirišani ba gagwe ba ile ba šegofatšwa kudu ka ge ba ile ba amogela taletšo ya gore ba tshelele Matsedonia. Ge ba be ba le motseng wa Matsedonia wa Filipi, ba ile ba hwetša Lidia, gomme “Jehofa a bula pelo ya gagwe gore a ele hloko dilo tšeo Paulo a bego a di bolela.” (Dit. 16:14) Nagana ka lethabo la Paulo le badirišani ba gagwe ba baromiwa ge Lidia le lapa la gagwe ka moka ba be ba kolobetšwa! Dinageng tše dintši go na le ba dipelo tše di botegago go swana le Lidia eupša ga se ba tšwa ba ekwa molaetša wa Mmušo. Ge e ba o “tshelela Matsedonia,” o ka thabela go ba hwetša le go ba thuša.

[Box on Page 5]

Kamoo o ka Tsebago ge e ba Naga Yeo o Naganelago go ya go Yona e Nyaka Thušo

• Bala Yearbook ya morago bjale. Hlahloba ka kelohloko palo ya tekanyo ya mogoeledi go baagi.

• Diriša Index go nyakišiša dihlogo le diphihlelo tša go tšwa nageng yeo.

• Boledišana le bagoeledi bao ba kilego ba etela naga yeo goba ba dula gona.

• Ge e ba o naganela go ya nageng yeo o tla kgonago go bolela ditaba tše dibotse ka segageno, gona hlahloba methopo ya lefase yeo e ka go neago tsebišo e oketšegilego, e bjalo ka Inthanete, gore o bone gore ke batho ba bakae nageng yeo bao ba bolelago segageno.

• Kua Botswana le Namibia go nyakega ka mo go kgethegilego malapa a tiilego moyeng le babulamadibogo ba ka mehla.