Na o ka Tshelela Matsedonia?

GE A be a le kua Asia Minor motseng wa boema-kepe wa Teroa, moapostola Paulo o ile a bona pono. Monna yo mongwe wa Matsedonia o ile a mo lopa a re: “Tshelela Matsedonia gomme o re thuše.” Gatee-tee ge Paulo a bone pono yeo, yena le basepedi-gotee le yena ba ile ba ‘fihlelela phetho ya gore Modimo o ba bileditše go tsebatša ditaba tše dibotse’ Matsedonia. Mafelelo e bile afe? Motseng o mogolo wa Matsedonia e lego Filipi, Lidia le ba lapa la gagwe ba ile ba fetoga badumedi. Ba bangwe profenseng yeo ya Roma ya Matsedonia le bona ba ile ba fetoga badumedi.—Dit. 16:9-15.

Dihlatse tša Jehofa lehono di bontšha moya o swanago wa phišego. Tše dintši di dirišitše ditšhelete tša tšona go hudugela moo go nyakegago bagoeledi ba oketšegilego ba Mmušo. Ka mohlala, Lisa o be a nyaka gore bodiredi e be selo sa bohlokwa bophelong bja gagwe. O ile a tloga Canada gomme a hudugela Kenya. Trevor le Emily bao le bona ba tšwago Canada ba ile ba hudugela Malawi e le gore ba katološe bodiredi bja bona. Paul le Maggie bao ba tšwago Engelane, ba ile ba bona go rola ga bona modiro e le sebaka se sebotse sa go dira mo go oketšegilego tirelong ya bona go Jehofa gomme ba hudugela Bohlabela bja Afrika. Na o na le moya wa boikgafo? Na o ka hudugela moo go nyakegago bagoeledi ba oketšegilego? Ge e ba go le bjalo, ke melao efe ya motheo ya Beibele le ditšhišinyo tše šomago tšeo di ka go thušago go atlega?

Itlhahlobe

Selo se sengwe seo o ka swanelago go se dira ke go hlahloba maikemišetšo a gago. Jesu o itše taelo e kgolo-kgolo ke e rego: “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.” Mabaka a go hlankela moo go nyakegago bagoeledi ba oketšegilego e swanetše go ba go rata Modimo le go kganyoga go phetha thomo ya go dira barutiwa. Jesu o ile a tšwela pele ka gore: “Ya bobedi ya go swana le yona ke ye, ‘O rate moagišani wa gago go etša ge o ithata.’” Lerato leo re ratago baagišani ba rena ka lona le bontšhwa ka kganyogo e tšwago pelong ya go nyaka go thuša. (Mat. 22:36-39; 28:19, 20) E le gore o hlankele mo go nyakegago bagoeledi ba oketšegilego, o swanetše go šoma ka thata le gore o be le moya wa boikgafo. Ga se feela leeto la go yo bona naga. O swanetše go tutuetšwa ke lerato. Remco le Suzanne bao ba tšwago Netherlands gomme ga bjale ba hlankelago kua Namibia, ba akaretša taba ye ka gore, “Seo se re bolokago re le mo ke lerato.”

Willie yo a hlankelago e le molebeledi wa tikologo kua Namibia o re: “Bao ba ilego ba kgona go dula moo go nyakegago bagoeledi ba oketšegilego ke bao ba bego ba sa letela gore bana babo rena ba ba hlokomele. Ba tlile ba e-na le kgopolo ya go tlo hlankela gotee le bana babo rena gaešita le go ba thuša modirong wa boboledi.”

Ka morago ga go hlahloba maikemišetšo a gago, ipotšiše gore: ‘Ke phihlelo efe yeo ke nago le yona yeo e ka thušago moo go nyakegago bagoeledi ba oketšegilego? Na ke modiredi yo a atlegago? Ke kgona go bolela maleme afe? Na nka rata go ithuta leleme le lengwe?’ Boledišana le ba lapa la gago ka taba ye. Ikopanye le bagolo ba phuthego ya geno. Mafelelong, botša Jehofa taba yeo ka thapelo. Go itlhahloba mo go bjalo ka potego go tla go thuša go bona ge e ba o e-na le bokgoni gaešita le maikemišetšo a go hlankela moo go nyakegago bagoeledi ba oketšegilego.—Bona lepokisi le le rego, “Itsebe.”

Moo o ka Hlankelago Gona

Paulo o ile a biletšwa Matsedonia ka pono. Lehono Jehofa ga a diriše tsela ya mohlolo e le go re laetša moo re swanetšego go ya gona. Lega go le bjalo, ka makasine wo gotee le dikgatišo tše dingwe, bahlanka ba Modimo ba kgona go tseba ka mafelo a mangwe ao go wona go nyakegago bagoeledi ba oketšegilego. Ka gona, thoma ka go ngwala lelokelelo la mafelo ao. Ge e ba o ka se kgone go ithuta leleme le lengwe goba o ka se dule nako e telele nageng e šele, lebelela gore ke tikologo efe nageng yeo moo o ka hlankelago gona moo leleme leo o le tsebago le bolelwago kudu. Ke moka, nagana ka dilo tše bjalo ka setempe seo se go neago tumelelo ya go tsena goba go tšwa ka nageng (visa), dinamelwa, tšhireletšego, maemo a tša boiphedišo le maemo a leratadima. O ka hwetša e le mo go holago go boledišana le ba bangwe bao ba šetšego ba tšere kgato yeo. Rapelela thušo ya Jehofa ge o dutše o dira bjalo. Gopola gore Paulo le badirišani ba gagwe “ba be ba ileditšwe ke moya o mokgethwa go bolela lentšu seleteng sa Asia.” Le ge ba ile ba leka go ya Bithinia, ‘moya wa Jesu ga se wa ka wa ba dumelela’ go dira bjalo. Ka mo go swanago, go ka tšea nako e telele gore o bone moo o ka thušago gona e le ka kgonthe.—Dit. 16:6-10.

Mohlomongwe ga bjale o ka ba o hweditše ditsela tše dingwe tšeo o ka di dirišago. Ge e ba o ikemišeditše go hlankela nageng e šele, ngwalela ofisi ya lekala ya Dihlatse tša Jehofa ya nageng yeo o nyakago go ya go yona. Hlalosa phihlelo yeo o nago le yona ka mokgatlong wa Modimo gaešita le dipotšišo tšeo o ka bago o e-na le tšona mabapi le maemo a tša boiphedišo, mohuta wa madulo ao o ka kgonago go a hwetša, mafelo a tša kalafo le dibaka tša go hwetša mošomo. Ke moka, fetišetša lengwalo goba mangwalo a gago go komiti ya tirelo phuthegong ya geno. Bana bao babo rena ba tla tlaleletša ka lengwalo la bona la go go bolelela gomme ba a romela diofising tša makala tšeo o di kgethilego. Karabo yeo o tlago go e hwetša e tla go thuša go bona gore ke kae moo o ka kgonago go thuša gona.

Willie yo a tsopotšwego pejana, o re: “Bao ba ilego ba atlega ba ile ba etela naga ye pele gomme ba lekola mafelo ao ge e le gabotse ba ka thabelago go dula go ona. Banyalani ba bangwe ba ile ba lemoga gore ba ka se kgone go dula motseng wo o lego lekatana. Ka gona, ba ile ba dula toropong e nyenyane mo go bego go nyakega bagoeledi ba oketšegilego eupša e le moo ba ka kgonago go phela mohuta wa bophelo bjo ba ka bo thabelago.”

Go Lebeletšana le Ditlhohlo tše Difsa

Ga go na pelaelo gore go tloga gae le go hudugela lefelong le lefsa go tla go tlišetša ditlhohlo. Lisa yo go boletšwego ka yena pejana o re: “Go ka ba thata kudu go lebeletšana le go lewa ke bodutu.” Ke’ng seo se mo thušago? Go ba kgaufsi le phuthego ya moo a dulago gona ga bjale. O ile a ipeela pakane ya go tseba leina la yo mongwe le yo mongwe ka phuthegong. E le gore a fihlele se, o be a fihla e sa le pele dibokeng gomme a šala gape ka morago ga diboka gore a boledišane le bana babo le dikgaetšedi. Lisa o ile a šoma le ba bangwe bodireding, a laletša ba bantši mo a dulago gona gomme a hwetša bagwera ba bafsa. O re: “Ga ke itsholele boikgafo bjo ke bo dirilego. Jehofa o ntšhegofaditše e le ka kgonthe.”

Ka morago ga gore ba godiše bana ba bona, Paul le Maggie ba ile ba tlogela ntlo yeo ba dutšego go yona ka nywaga e 30. Paul o anega ka gore: “Go kgaogana le dithoto tša rena go bile bonolo ka tsela yeo re bego re sa e letela. Eupša go kgaogana le ditho tša lapa la rena e bile tlhohlo e kgolo kudu go feta kamoo re bego re letetše. Re ile ra lla kudu ge re be re le ka sefofaneng. Go bonolo kudu go nagana gore, ‘Ga ke bone gore re tla kgona.’ Eupša re ile ra ithekga ka Jehofa. Go hwetša bagwera ba bafsa go oketša boikemišetšo bja gago bja go tšwela pele.”

Greg le Crystal ba ile ba kgetha go huduga go tloga Canada go ya Namibia ka ge ba be ba bolela Seisemane, e lego leleme la semmušo nageng yeo. Lega go le bjalo, ka morago ba ile ba lemoga gore go ka ba hola kudu gore ba ithute leleme leo le bolelwago ke batho ba lefelong leo. Ba re: “Ka dinako tše dingwe re be re nyama. Lega go le bjalo, ke feela ka morago ga go ithuta leleme la batho ba tikologong ye moo re ilego ra kwešiša setšo sa bona. Go gwerana le bana babo rena go re thušitše go tlwaela tikologo ya rena e mpsha.”

Tsela e bjalo ya boikokobetšo le ya go ikemišetša go ithuta e ka ba le mafelelo a mabotse le go bana babo rena ba moo o hlankelago gona. Jenny ka lerato o gopola malapa ao a ilego a hudugela Ireland, e lego moo a goletšego gona. O re: “A be a e-na le moya wa go amogela baeng. Ruri malapa ao a be a tlile go tlo hlankela e sego go hlankelwa. A be a fišega e bile a dula a thabile moo le nna ke ilego ka swanelwa ke go a ekiša.” Ga bjale Jenny le monna wa gagwe ba hlankela gotee e le baromiwa kua Gambia.

Tšhegofatšo ya Jehofa “e a Humiša”

Phihlelo ya Paulo kua Matsedonia e bile e kgothatšago gakaakang! Mo e ka bago nywaga e lesome ka morago, o ile ngwalela bana babo ba kua Filipi gore: “Ke leboga Modimo wa-ka ka mehla ge ke le gopola.”—Bafil. 1:3.

Trevor le Emily bao ba hlanketšego kua Malawi pele ba laletšwa go ya Sekolong sa Beibele sa Watchtower sa Gilead le bona ba ikwa ka tsela e swanago. Ba re: “Ka dinako tše dingwe re be re ipotšiša ge e ba re dira se se nepagetšego, eupša re be re thabile. Tswalano ya rena e ile ya tia kudu gomme re bona tsela yeo Jehofa a re šegofatšago ka yona.” Greg le Crystal bao go boletšwego ka bona pejana ba bega gore: “Se ke selo se sekaone-kaone seo re ka se dirago.”

Ke therešo gore ka moka ga rena re ka se kgone go hlankela nageng e šele. Ba bangwe ba ka dira gabotse ka go hudugela lefelong le lengwe nageng ya gabo bona moo go nyakegago bagoeledi ba oketšegilego. Ba bangwe bona ba ka ipeela pakane ya go hlankela diphuthegong tše dingwe tšeo di lego kgaufsi le ga gabo bona. Selo sa bohlokwa ke go dira sohle seo o ka se kgonago go hlankela Jehofa. (Bakol. 3:23) Ka gona, mantšu a a buduletšwego e tla ba a therešo go wena ge a re: “Tšhegofatšo ya Jehofa e a humiša, gomme ga e okeletšwe ka bohloko.”—Die. 10:22, PK.

[Lepokisi/​Seswantšho go letlakala 5]

Itsebe

E le gore o itlhahlobe go bona ge e ba o ka hlankela moo go nyakegago bagoeledi ba oketšegilego, naganišiša ka dipotšišo tše di latelago gomme ka potego le ka thapelo o lekodišiše ge e ba o ka kgona go dira bjalo e le ka kgonthe. Tsebišo yeo e tšwago ditokollong tša Morokami tša nakong e fetilego e ka go thuša go dira bjalo.

• Na ke motho wa moya?​—“Megato e Išago Lethabong” (October 15, 1997, letlakala 6)

• Na ke modiredi yo a atlegago?​—“Tsela ya go Atlega Bodireding bja Bobulamadibogo” (May 15, 1989, letlakala 21)

• Na nka kgona go tlogela bagwera le ba lapa?​—“Go Lebeletšana le go Hlologela Gae Tirelong ya Modimo” (May 15, 1994, letlakala 28)

• Na nka kgona go ithuta leleme le lefsa?​—“Go Hlankela le Phuthego Yeo e Bolelago Leleme le Šele” (March 15, 2006, letlakala 17)

• Na nka kgona go lefelela ditshenyagalelo tša go huduga?​—“Na o ka Hlankela Tšhemong e Šele?” (October 15, 1999, letlakala 23)

[Seswantšho go letlakala 6]

Tsela ya boikokobetšo le ya go ikemišetša go ithuta e ka ba le mafelelo a mabotse le go bana babo rena ba moo o hlankelago gona

[Seswantšho go letlakala 7]

Bao ba tlelago go hlankela ke bona ba atlegago